شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (19 آبان 1402/ 10 اکتوبر 2023) همارنگ که اسرائیل ءِ جنایتانَ ماں غزه ءَ سک اێر جت، امریکا ءُ اسرائیل ءِ آدگه پله‌مرزانَ ماں اے هۆرکشی ءُ بێرانی ءَ شریدار زانت ءُ شه اسلامی ملکاں لۆٹ ات ئِے که په دێمداری شه اسرائیل ءِ جنایتاں گۆں وت تپاک کن انت.
🔹اسرائیلَ لۆٹ ایت که غزه ءَ پهک بێران کنت ءُ آیی تیوگێں نندۆکانَ درانڈیه کنت
🔹اسرائیل ءِ جنایت ماں غزه ءَ پهکێں انسانانی زرد ءَ آزارَ دنت
په سنی‌آنلاین ءِ سرهال ءَ شیخ‌الاسلام مولانا عبدالحمید گوشت: دنیا ءِ زند ابید شه آزموت ءُ چکاس ءَ دگه چیزے نه انت. الله پاک لۆٹ ایت گند ایت که مئے کرداراں اے چکاسانی باروا چے انت. پمێشا ما بائد دلگۆش کن اێں که مئے کرداراں وڑے بےانت که ماں اے چکاساں سۆبێں به اێں ءُ الله ءِ وشنودی ءَ کٹ اێں. پێشامدانے که ماں دنیا ءَ کپ انت الله ءِ آزمود انت، اسلام ءِ دین ءَ ما را سۆگه کرتگ که آوانی باروا نادلگۆش مه به اێں. مئے اگده آ پێشامدانی باروا باز گران انت.
واجه ءَ گۆں اشاره به غزه ءِ جاور ءَ گوشت: ڈگار ءِ سرے پهکێں مردماں که زرد ءِ واهند انت شه غزه ءِ پێشامد ءَ دلگران انت. غزه ءِ پێشامد ءَ تیوگێں مردمانی زرد ءَ رنج داتگ، حتا میانه روئێں یهودیاں هم دلگران انت ءُ زهرشانیَ کن انت که هۆن ءِ رێچگ تۆجیل نه انت، تۆجیل ترانکاری انت.
مولانا عبدالحمید درائێنت: ماں غزه ءِ شهر ءَ گۆں دو میلیون آباتی ءَ، گساں ءُ بےسلاهێں مردماں جنَگ بےانت ءُ شهر بێرانی ءِ نێمگ ءَ رۆت. اسرائیل وت غزه ءِ دگ ءُ گسان ڈالێن ایت تاں آیرا بێران کنت، غزه ءِ اے رۆچانی پێشامداں ماں دنیا ءُ راجدپتر ءَ بےمٹ انت ءُ هر کسے که عقل ءِ واهند بیت اے جنایتانَ نه من ایت.
🔹 هچ دین ءُ کانودے جنێں ءُ زهگانی هۆرکشی ءُ عبادتجاه ءُ نادراهجاهانی ڈالێنگ ءِ مۆکل ءَ نه دنت
زاهدان ءِ آدێنگ ءِ خطیب ءَ درائێنت: اگں یهودیاں ءُ اسرائیل ءِ مردماں تباهی دیستگ، بلے چنکه برۆبر گێشتر غزه ءِ مردمانَ نقصان ئِے رسێنتگ. قرآن پاک ءَ شه مسیت، کلیسا ءُ عبادتجاهانی ڈالێنگ ءَ ڈاه داتگ ءُ پمێشا جهاد ءَ را مشروع ئِے زانتگ که: «وَلَوْلَا دَفْعُ اللَّهِ النَّاسَ بَعْضَهُمْ بِبَعْضٍ لَهُدِّمَتْ صَوَامِعُ وَبِيَعٌ وَصَلَوَاتٌ وَمَسَاجِدُ يُذْكَرُ فِيهَا اسْمُ اللَّهِ كَثِيرًا» اگاں مردماں دێمپانی مه کن انت ءُ شه ظلم ءُ تباهیاں دێمداری مه کن انت، گڑا مسیت ءُ مسلمان ءُ یهودی ءُ عیسائیانی عبادتجاهانی سر ءَ بێڑ بیت.
واجه ءَ گێش کرت: عبادتجاهاں هر دین ءُ مذهب ءُ استمان ءُ پاٹی ءِ بےانت ءُ همےرنگ نادراجاهاں نبائد ماں جنگاں ڈالێنگ بےانت ءُ جنێن ءُ زهگاں کشگ بےانت. ماں اسرائیل ءِ بێڑ ءَ گێش شه 10 هزار نپر ءَ شهید بوتگ که نزیک به پنچ هزار نپر شه آوان زهگک انت ءُ نزیک به سے هزار هم جنێن انت. هچ آسمانی ئێں دین ءُ هچ کانودے نه گوشتگ که کسے جنێن ءُ زهگانَ کش ایت ءُ عبادتجاه ءُ نادراهجاهانَ بێران کنت.
🔹 درۆگ ءُ بنڈ کارے نه کنت؛ اێشی بدل ءَ که شرگدارانی پد ءَ درۆگ ءُ بنڈ بند ات، شرگداریانَ گۆش دار ات
شیخ‌الاسلام مولانا عبدالحمید ماں دگه بهرے شه وتی هبراں گۆں اشاره به سرکاری رسانکدرانی بنڈاں مسیت مکی ءِ کارمندانی پد ءَ، گوشت: لهتے شه سرکاری رسانکدراں به درۆگ ءُ بنڈ ءَ لچتگ انت. ما بهمانگ اێں که پچے اے رسانکدراں شرگدارانی پد ءَ ءُ آوانی پد ءَ که آمید ءُ جوانێں آزاتیانی لۆٹۆک انت، تچکاتچک درۆگ بند انت ءُ بنڈ جن انت؟!
واجه ءَ گوشت: کجا دین اسلام ءَ مسلمانانَ درۆگ ءُ بنڈ ءِ مۆکل ءَ داتگ؟ اے چۆنێں دینداری ئے که مردمانی مۆکل داتگ تاں وتی مخالفانی پد ءَ درۆگ بُرّ ایت ءُ آوانَ بنڈ جنت؟! آوان که چشێن کارَ کن انت، بائد به وتی دینداری ءَ شک کن انت. الحمدلله ما وت ءَ چشێن مۆکلے نه ده اێں که کسے را بنڈ جن اێں. ما درۆگ ءَ په هچ کس ءَ روا نه زان اێں. مئے باور ءَ دینداری بس راستی ءُ امانتداری ءِ تها انت. ما نبائد حق ءَ پاد ءِ چێر ءَ کن اێں.
زاهدان ءِ آدێنگ ءِ امام ءَ ٹکاٹک گوشت: اے درۆگاں پرے واستا گوشگ بےانت تاں شرگدارانی دپ ءَ بند انت، ماں حالےکه تۆجیل همێش انت که شرگدار ءُ مخالفانی گپاں اشکنگ بےانت. ما نه گوش اێں که ما سستی نه دار اێں، اگں کسے مئے گپانی سر ءَ جوانێں شرگداری ئے کنت ما را پسند بیت ءُ ما وت ءَ اصلاحَ کن اێں.
واجه ءَ درشان کرت: مردم بائد وت ءَ گۆں مخالفانی شرگداریاں اصلاح کنت، نه که بنڈ جنت ءُ دێمءُ درائێں درۆگ بند ایت. درۆگ ءُ بنڈ پرێشی که مردمانی سسا ءَ ٹگلێن ایت ءُ یکے را بنّام کنت، شه هرکسے نێمگ ءَ بیت، حرام انت ءُ کارے کرت نه کنت.
🔹هالتاک نبیس ءُ رسانکی کارندهانی کانودی آزاتیاں دیگ بےانت
مولانا عبدالحمید وتی هبرانی دێمتر ءَ گوشت: ماں تیوگێں دنیا ءَ رسانکدراں چاگرد ءِ گواچنانَ شنگ کن انت ءُ مردمانی لۆٹانَ کارمسترانَ رسێن انت ءُ کارمسترانی لۆٹانَ مردمانَ رسێن انت. یکے شه هر دۆدءُربێدگ ءُ استمان ءِ اۆلی آزاتیاں رسانکی آزاتی انت. اے په ملک ءِ سۆت ءُ خیر ءَ انت که رسانکدر ءُ هالتاک نبیساں آزات بےانت. رسانکانی واهنداں نبائد گۆں سکیاں آماچ بےانت.
واجه ءَ درائێنت: ارماں که اے رۆچاں ملک ءِ تها هالتاک نبیس ءُ رسانکانی واهنداں په گونڈترێں چیز ءَ شه واکانی نێمگ ءَ لۆٹگ یا بندیگ بےانت، اے جوانێں کارے نه انت. تیوگێں رسانکدراں نبائد تهنا آ چیز ءَ که سرکارے دل انت شنگ کن انت. بائد هالتاک نبیس ءُ رسانکانی واهندانی کانودی آزاتیاں که ماں بنیادی کانود ءَ آتگ انت، دیگ بےانت.
🔹ایران ءِ اهل‌سنتاں هچ رسانکے نه دار انت
🔹اگاں کسی بتے گیرت یا جهدے کنت آوار جنگ بیت؛ ما اے جاور ءِ باروا سک اێراد دار اێں
زاهدان ءِ آدێنگ ءِ امام ءَ وتی هبرانی دێمتر ءَ درشان کرت: بژن انت که ایران ءِ اهل‌سنتاں هچ رسانکے نه دار انت. مئے ملک ءِ تها پاٹیان ماهواره‌ای ءُ گندگۆشی رسانک نه دار انت، ماں حالےکه ماں تیوگێں دنیا ءَ ملکاری ءُ مذهبی پاٹیاں شه وت ءَ رسانک دار انت، بلێں ایران ءِ اهل‌سنتاں چشێں آزاتی ءِ نه دار انت.
واجه ءَ گێش کرت: ما یک تندجاهے داشت که هما اول ءَ بندکنگ بوت. من ءَ هم یک تندجاهےات که هما اول ءَ بے اێشی که چار انت بن‌گپ ئِے چےانت ءُ چے شنگ کنت، بند کنگ بوت. نون هم اگاں کسی بتے گیرت یا رسانکی جهدے کنت دزگر ءُ آوار جنگ بیت، ما اے جاور ءِ سر ءَ سک اێراد دار اێں نه بائد گفتار ءِ آزاتی ءِ دێم گرگ بیت.
واجه شیخ‌الاسلام ءَ گوشت: ما همے ملک ءِ نندۆک اێں ءُ وتی ند ءُ گفتار ءِ آزاتی ءِ لۆٹۆک اێں. مئے لۆٹ همێش انت که هالتاک نبیس ءُ آوانے که رسانکدری جهد اش کرتگ آجو بےانت تاں چاگرد ءِ گواچنانَ درشان کن انت. اے هم ملک ءُ هم سرکار ءُ مردمانی سۆب ءَ انت.
چمشانک