مروچی :سه شنبه, ۲۸ فروردین , ۱۴۰۳
مولانا عبدالحمید:

اگه لاهه ءِ آمیدگس وت‌سر بیت اسرائیل ءَ اێر جنت

اگه لاهه ءِ آمیدگس وت‌سر بیت اسرائیل ءَ اێر جنت

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (22 دی‌ماه 1402/ 12 جنوری 2024) گۆں اشاره به زرباری افریقا ءِ شکایت ءَ اسرائیل ءِ هۆرکشیانی باروا ماں غزه ءَ گوشت که اگاں لاهه ءِ آمیدگس وت‌سر بیت اسرائیل ءَ اێر جنت ءُ زوتێں آسبندی ءِ حکما دنت.

🔹اسرائیل ماں غزه ءَ «نسل‌کۆشی» ءُ «جنایت جنگی» کرتگ

په سنی‌آنلاین ءِ سرهال ءَ شیخ‌الاسلام مولانا عبدالحمید درائێنت: اے رۆچاں لاهه ءِ آمیدگس گۆں اسرائیل ءِ نسل‌کۆشی ءِ پرونده ءَ گلائێش انت. اے راستال انت که اسرائیل ءَ ماں غزه ءَ نسل‌کۆشی ءُ جنایت جنگی کرتگ. هچ عقل ءُ راست‌بندگِری ئے نه منّ ایت که په لهتێں سلاهبندێں مردم ءِ کردارانی پارءَ یک پدرێچے کشگ بیت. ماں غزه ءَ بےمیارێں جنێں ءُ زهگاں هۆرکشی بوتگ ءُ مردمانی گس ءُ کشاراں ابن بوتگ انت. دو ملیون مردم درانڈیه ءُ بےجاه بوتگ انت. آ ماں اے سارتێں هوا ءَ شه کجا په وت آپ ءُ نانے جدءُهل کن انت؟!

واجه ءَ گێش کرت: اگاں لاهه ءِ آمیدگس ءُ آیی قاضیاں پراستی وت‌سر ءُ آزات انت هم اسرائیل ءَ اێر جن انت ءُ هم زوتێں آسبندی ءِ حکما دےانت تاں غزه ءِ مردماں وتی گس ءُ جاهاں برگرد انت. البت نون که ماں غزه ءَ چیزے نه منتگ ءُ تیوکا بێران بوتگ.

زاهدان ءِ آدێنگ ءِ امام ءَ گێش کرت: امریکا ءُ پهکێں حکومتاں که شه اسرائیل ءَ بےسرءُسۆج پله‌مرزی کرتگ ءُ شه اسرائیل ءَ دێمداری نه کرتگ اش، الله ءُ دنیا ءِ پهکێں مردانی دێم ءَ میاریگ انت ءُ نون تهنا راه اێش انت که په فلسطینیاں جتائێں حکومتے جۆڑ بیت ءُ آوانی زۆرگپتگێں ڈگاراں پد ءَ دیگ بےانت. اے تهنا راهے که آزاتێں مردمانی دل تسلا بیت.

واجه ءَ درائێنت: من اے گپان ءَ بےدۆزواهی ءَ ءُ گۆں آمید ءَ گوش آں ءُ منی سۆگه په پهکاں اێش انت که تیوگێں مسائل ءُ بن‌گپان ءَ بےدۆزواهی ءُ گۆں آمید ءَ گێش ءُ گیوار کن انت. ما په اسیرانی آزات کنگ ءَ هم سۆگهَ کن اێں ءُ امێتوار اێں که فلسطینیانی ڈگار جتا بیت ءُ آوان وت‌مستر بےانت ءُ اے دێرێں جێڑهاں هم هلاس بےانت.

🔹اگاں اکراین ءِ بالی‌گُراب ءُ زاهدان ءِ مصلا ءِ «جنایت» ءُ آدگه پێشامداں رسیدگی بوتێں انت مردمانی دل تسلایی بوت

مولانا عبدالحمید ماں دگه بهرے شه وتی هبراں گوشت: اے رۆچاں همدپ انت گۆں اکراین ءِ بالی‌گراب ءِ پێشامد ءَ که بازێنے شه مئے هم ملکیاں کشگ بوت انت. من پهکان ءَ که لۆگمان ءُ سیاد اش ماں آ پێشامد ءَ کشگ بوتگ انت، دل‌تسلا گوش آں.

واجه ءَ گێش کرت: آ باز ٹوهێں پێشامدے ات، چشێن پێشامدان ءَ کارمستراں بائد زوت گێش ءُ گیوار کن انت، اگاں پرایی جوانێں تۆجیلی درگێجگ بوتێں مرۆچی اے مشکلاں جۆڑ نه بوت انت که لهتے شه آ پێشامد ءِ پشپداں مرۆچی ماں درے ملکاں په شکایت ءَ اے آمیدگس ءُ آ آمیدگس ءَ برو انت ءُ ملک ءِ اعتبار چَٹی ءِ آماچ بیت.

شیخ‌الاسلام ءَ گوشت: ماں همے زهدان ءِ مصلا ءَ هم جنایتے پێش آت که صد نپر کشگ ءُ نزیک به سێصد نپر کۆر ءُ ٹپی ءُ سرێن‌پرۆش بوت انت. امێتدار اَت اێں که  مزن‌رهشۆن، آ جنایت ءَ اێر جنت ءُ آ جنایت ءَ رسیدگی کنت. اگاں ماں اکراین ءِ بالی‌گراب ءِ جنایت ءَ هم آیی کنۆکاں اسلامی شریعت ءِ رد ءَ سزا دیگ بوتێں انت، مردم ءُ آ پێشامد ءِ پشپدانی دل تسلا بوت ءُ شه اێشی گهتر ات که مردم په شکایت ءَ درے ملکاں برو انت.

🔹ما «سیاسی جنجال» ندار اێں ءُ جاگه ءُ نام‌برزی ءِ پد ءَ نه اێں؛ «زرد» ما را لاچارَ کنت تاں شه مردمانی حقاں دێمپانی کن اێں

زاهدان ءِ آدێنگ ءِ امام ءَ درشان کرت: یکے شه کارمستراں گوشت ات که فلانی سیاسی جنجالانی پد ءَ انت، ماں‎حالےکه ما هچ سیاسی جنجال نه دار اێں ءُ جاگه ءُ نام‌برزی ءَ نه لۆٹ اێں. من نه ماں گوست ءَ په وت جاگه ءُ نام‌برزی لۆٹ اتگ ءُ نه آیۆک ءَ جاگه ءُ نام‌برزی ءِ پد ءَ آں. همے که مردماں مئے سر ءَ برۆسه کرتگ ءُ مئے پشت ءَ نماز وان انت، الله ءِ فضل انت ءُ ما را بس انت. اگاں یک رۆچی مردم گوش انت ما وشنود نه اێں که شمے پشت ءَ نماز بوان اێں، من امامت ءَ یله کن آں.

واجه ءَ گێش کرت: گۆں اے هبرانی گوشگ ءَ منی سر ءَ زۆرَ کار انت ءُ شه منی گپاں لهتے شه منی پێسرے همبلاں دلگراں بےانت، بلێں منی زرد من ءَ لاچارَ کنت تاں شه مردمانی حقاں دێمپانی کن آں ءُ من اێشر ءَ وتی اگده زان آں.

واجه ءَ په ستک گوشت: مئے کر ءَ ایران ءِ استمان ءِ میانجین ءَ شه سنی ءُ شیعه ءُ مسلمان ءُ نامسلمان ءَ بگر تاں دگه راجاں هچ دگری ئے نێست. چاگرد ءِ پهکێن راج ءُ دین ءُ مذهب ءُ جنێن ءُ ورنائاں مئے کر ءَ ارزشت ءُ حرمت دار انت. ما گوش اێں آ آزاتیاں که اسلام ءَ ءُ بنیادی کانود ءَ داتگ، مردمانی میان ءَ اێر دارگ بےانت. ما گوش اێں که کاراں به وسی ءُ بودێں مردماں دیگ بےانت تاں ملک ءُ استمان اعتبار ءِ واهند بیت.

مولانا عبدالحمید وتی هبرانی گڈسر ءَ گوشت: منی سۆگه به تیوگێں مردماں اێش انت که اگاں شه منی رنگے مردمے ردی ءُ سلیقه ئے دیست ات، آیرا په دین اسلام ءُ رسول الله صلّی‌الله‌علیه‌وسلّم ءُ صحابه ءُ اهل‌بیتانی نام ءَ مه کن ات ءُ به دین ءَ بدگمان مه به ات، عقل ءِ بگێر ءَ انت که په مردمانی کردارانی پارءَ به دین ءَ بدگمان به ات. اسلام ءِ دین انچێن دینے که په مردمانی دنیا ءُ آخرت ءِ سۆبمندی ءَ بازێں پتانسیل ءُ ارزشتے دار ایت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *