مروچی :جمعه, ۱۰ فروردین , ۱۴۰۳
مولانا عبدالحمید مان زاهدان جمعه نمازے دیوانا:

بروسه به الله‌ئا مان مچ کاران تها یکے شه دینِ اسلامے مهمین تعالیماننت

بروسه به الله‌ئا مان مچ کاران تها یکے شه دینِ اسلامے مهمین تعالیماننت

شیخ‌الاسلام مولانا عبدالحمید مان زاهدان جمعه نمازے دیوانا (17 مرداد 1399)، گو اشاره به بروسه‌ئے جاه و ارزشتا مان اسلامی تعالیمان تها، په «دلگوش به الله‌ئے نیمگے» لازم گرگا ؤ «توسل به الله ؤ نیکین کرداران»، دیم‌په‌دیم بیگے وهدا گو هر نعمت ؤ سکی‌ئے، تأکید کرت.
په زاهدانِ اهل‌سنتے جمعه‌وے پیشنمازے کارگسے هال‌رسانی‌ئے بنجاهے سرهالا، شیخ‌الاسلام مولانا عبدالحمید درشان کرت: الله تعالائے دشمن ؤ پاکین پروردگارے نمنّوکان مان دراجین تاریخے تها باز جهد کرته که به بازینے شه اسلامی دؤدان ؤ دینی تعالیمانِ دیما بؤشتنت ؤ دینی تعالیمانَ بدل کننت، یکے شِے تعالیمان «جهاد»انت که پْرایی زْیان کنگا بازین جهدے شه اسلامے دشمنانِ نیمگا بَیَگِنت.
واجه‌ئا وتی هبرانِ دیمترا گوشت: البت اپسوزنت که بازینی شه مسلمانان هم به جهاد ؤ آیی فلسفه ؤ جهادے جاها ردے تهاونت، پچے که گو لهتین آیه ؤ حدیثے سیل کنگا بے جدُ وَلّ ؤ شوهازا ؤ بے ائشی که آوانَ گو پیامبرے سیرتا برابر کننت ردی‌ئین بروردش گپته، بلین اسلامے دشمنان په رهبند آتگنت ؤ لوٹنت بازینے شه اے تعالیمانَ زورنت.
زاهدان اهل‌سنتے جمعه‌وی پیشنمازا دیمترا گیش کرت: یکے شه اسلامے تعالیمان «بروسه به الله تعالی»انت که دشمن کوشستَ کننت اے تعالیما هم مان مسلمانان نیاما سست کننت ؤ لوٹنت که مسلمانانَ ائرْگ منّئننت که گرد چیز همے اسبابنت ؤ اپسوزنت که اے نیمگا ته حدودے سوبمند بوتگنت. پیشا دکترانِ نسخه‌وی سرا «هوالشافی» دیستگَ بوت، بلین نون اے نبشته کمتر دیستگَ‌بیت.
واجها درشان کرت: «توحید» هر انسانے بن‌تَبے تهائنت، وهدے که انسان به بن‌بستا رسیت، وت به الله‌ئے نیمگا دلگوشَ کنت. گردِ آسمانی‌ئین دینان سرجمع ؤ هاس اسلامے دینا ما را یات داته که بائد به الله‌ئے نیمگا دلگوش بیت، پچے که هرچیز الله‌ئے دستائنت. ناجوڑی‌ئے وهدا دکتر سبب ؤ واسطه‌انت، بلین رب‌الاسباب اللهءِ جندنت. مهتر ابراهیم علیه‌السلام پرماینت: «وَإِذَا مَرِضْتُ فَهُوَ يَشْفِينِ». وهدے که ما دواءَ ورن بائد مئے دلگوش به الله‌ئا بیت، وهدے که اسبابانَ کار گرن بائد مئے امیت به الله‌ئا بیت.
دارالعلوم زاهدان سرمسترا پد شه آیه‌ئے وانگا «إِنْ يَنْصُرْكُمُ اللَّهُ فَلَا غَالِبَ لَكُمْ وَإِنْ يَخْذُلْكُمْ فَمَنْ ذَا الَّذِي يَنْصُرُكُمْ مِنْ بَعْدِهِ وَعَلَى اللَّهِ فَلْيَتَوَكَّلِ الْمُؤْمِنُونَ» [آل عمران: 160]، درشان کرت: اسباب جایے کار کننت که رب‌الاسباب لوٹیت. صحابه رضوان‌الله‌علیهم‌اجمعین وتی باورا را سیده شه وحی و تعلیم رسول‌الله صلی‌الله‌علیه‌و‌سلم اشَ گپت ؤ چیزی که آوانَ زوربُندانِ دیما پیروز کرت «بروسه به الله تعالی»ات.
واجه‌ئا گیش کرت: مان مدینه‌ئے میتگا یهودی و مشرکان گو وت زندَ گوازینت ؤ رسول الله صلی‌‌‌الله‌علیه‌وسلم ؤ مسلمانان گو آوان کاری‌ءَ نداشت، بلیکن گو وت کرارش کرتت که یک دگرے دشمنا مدد مکننت، پمیشا اسلاما ما را مسالمتین زندگوازینگا را یات داته. قرآن عظیم‌الشأن پرماینیت: «لَا يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُمْ مِنْ دِيَارِكُمْ أَنْ تَبَرُّوهُمْ وَتُقْسِطُوا إِلَيْهِمْ إِنَّ اللَّهَ يُحِبُّ الْمُقْسِطِينَ» [الممتحنه: 8]

مهتر عثمان رضی‌الله‌عنه شه پیامبرے اهل‌بیت ؤ شه تاریخے ٹوهین واجه‌کاراننت
شیخ‌الاسلام مولانا عبدالحمید مان یک بهرے شه وتی هبران گو اشاره به مهتر عثمان رضی‌الله‌عنه شهادتے سالروچا، هبرا را به یک چنڈے شه آ مزن شانین صحابه‌وی فضیلتان نمیگا کَشِّت و گوشته: اے سیدنا عثمان رضی‌الله‌تعالی‌عنه شهادت روچنت. رسول ‌اکرم صلی‌الله‌علیه‌و‌سلم باز ٹوهین و مزنین انسانانَ اپسِله کرت که سیدنا عثمان رضی‌الله‌عنه یکی شه آ ٹوهین انساناننت.
واجه‌ئا دیمترا گیش کرت: وهدے که رسول‌الله صلی‌الله‌علیه‌و‌سلمے ائولی‌ئین جنک که به حضرت عثمان رضی‌الله‌تعالی‌عنه نکاحا وت، وفات کرت، حضرت صلی‌الله‌علیه‌و‌سلما وتی دؤمی‌ئین جنکا را به مهتر عثمان نکاحا دات، وهدی که دؤمی‌ئین جنکا هم وفات کرت، رسول‌الله صلی‌الله‌علیه‌وسلم پرمایش کرت: اگه من دگه جنکے داشتین، آیرا هم به عثمان نکاحا ونَ دات.
زاهدانِ جمعه‌وے پیشنمازا وتی هبرانَ دیمترا برت: مهتر عثمان رضی‌الله‌تعالی‌عنه «جیش‌العسره» لشکرا را مجهز کرت. اسلامے لشکرے جوڑ بیگے وهدا رسول اکرم صلی‌الله‌علیه‌وسلم سئے گشت جار جت که کئے اے لشکرا که په رومیانِ جنگا روت، مجهزَ کنت؟ هر سئے گشتا عثمان رضی‌الله‌تعالی‌عنه اُستات ؤ جار جت که تیارنت په لشکرے مجهز کنگا، ؤ هر گشتا صد اشتر گو تجهیزاتا به اسلامے لشکرے دات.
واجه‌ئا مهتر عثمان رضی‌الله‌عنه فضایلانِ گوشگا را دیمترا برت ؤ درائنته: وهدے که مسلمانان به آپا نیازبُندتنت، پیامبر اکرم صلی‌الله‌علیه‌و‌سلما جار جت که هرکس پلان چاها آباد کنت ؤ به مسلمانانِ دنت، آیی جا به گلباگائنت؛ مهتر عثمان اے اگده‌ئا را قبول کرت ؤ چاها را آباد کرت ؤ به مسلمانانِ دات. صلح حدیبیه‌ئے وهدا هم پیامبر صلی‌الله‌علیه‌و‌سلم مهتر عثمانا را په گپ ؤ گال گو مشرکان دیم دات که اے چیدگے وت شه مهتر عثمانِ بِستار ؤ الله‌ءِ رسولے بروسه آ واجه‌کارے سرا. وهدے که آچاوگ بوت که مهتر عثمان شهید بوته، پیامبر اکرم صلی‌الله‌علیه‌و‌سلما شه صحابه‌ئان بیعت گپت که آ واجه‌کارے هونا گرنت. یکے شه صحابی‌ئان گوشت اگه عثمان زندگ بیت، اے بیعتے تها هورَ نبیت، پیامبر صلی‌الله‌علیه‌‌وسلما وتی راستین دستا مان وتی چپین دستے سرا اشت ؤ پرمایش کرت: اے عثمانِ دستنت، ؤ شه مهتر عثمانِ نیمگا هم بیعتِ کرت.
مولانا عبدالحمید درشان کرت: مهتر عثمان و مهتر علی رضی‌الله‌عنهما رسول خدا صلی‌الله‌علیه‌و‌سلمے زاماس بوتگنت ؤ واجه‌ئا آوانَ باز دؤست داشته. مهتر ابوبکر و عمر رضی‌الله‌عنهما هم آ واجه صلی‌الله‌علیه‌وسلمے وسِرک بوتگنت که پیامبر اکرما گو آوان هم محبت کرته. آوان ٹوهین انسان ؤ پیغمبر صلی‌الله‌علیه‌وسلم مشاور و وزیر بوتگنت.
واجه‌ئا دیمترا گو ائشی که «واجه‌ئان ابوبکر ؤ عمر ؤ عثمان ؤ علی پیامبرے “اهل‌بیت” انت»، درشان کرت: رسول اکرم صلی‌الله‌علیه‌وسلم مان حدیثے پرماینته: «کلّ تقیّ و نقیّ فهو آلی». گو اے حدیثے رِدا گردِ پهریزکار پیامبر صلی‌الله‌علیه‌وسلمے اهل مَرتگَ بینت ؤ تیوگین مردم که الله ؤ رسولے هبرنزوریا کننت، هرچؤن که پشتا به آ واجه‌ئا رسنت، انگت شه آ واجه‌ئے «آلا» مَرتگَ نبینت، هما رنگ که الله تعالی به حضرت نوح علیه‌السلاما که وتی هبرنزورین زاهگا را شه وتی اهل‌بیتا زانته، پرمایش کرت:‌ «إِنَّهُ لَيْسَ مِنْ أَهْلِكَ إِنَّهُ عَمَلٌ غَيْرُ صَالِحٍ» [هود: 46]

گو لبنان دُرّین مردمان همدردیَ کنن
زاهدانِ امام جمعه‌وا وتی هبرانِ گڈسرا به بیروت بندِنے دیمے تْرکّگا اشاره کرت ؤ گوشته: ترکگے که مان بیروتا بوت، بازینے کشگ ؤ ڈڈری بوتنت، ما گو لبنانِ درین مردمان همدردیَ کنن ؤ گو آوان گَمان هورن. بائد گو هر انسانے شه مسلمان و نامسلمانا مان هرجای شه دنیاوا که بیت و مظلومنت، همدردی بیت.
واجه‌ئا گوشت: بیروت ترکّگا بازین نقصانے داشته، البت اے ترکگے سوب انگت باز دلگوش کرتگ معلوم نَئنت. الله تعالی تیوگین مسلمان ؤ مچ دنیاوے مردمانَ شه گرد ناجوڑی ؤ آپت ؤ ناامنی ؤ نقصانان حفظ کنت ؤ ساتیت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *