سنیآنلاین| مفتی محمدقاسم قاسمی ماں زاهدان ءِ نمازجمعه ءِ دیوان ءَ (15 خرداد 1405/ 5 جون 2026) «بیت الله» ءَ یکے شه الله ءِ هاسێں داداں په مچێں مردماں هاسکار مسلماناں زانت. مفتی صاحب ءَ همےرنگ گۆں اشاره به حج ءِ جاگه ءُ فضیلت ءَ ماں اسلام ءَ، حاجیانَ په اے سفر ءِ نور ءُ برکتانی پهازگ ءَ سۆگه کرت.
🔹ماں حج ءَ بازێں نشانی ئے شه الله پاک ءِ زۆر ءُ مزنی ءَ اندر انت
په سنیآنلاین ءِ سرهال ءَ، مفتی محمدقاسم قاسمی پد شه اے پاگپ ءِ وانگ ءَ «إِنَّ أَوَّلَ بَيْتٍ وُضِعَ لِلنَّاسِ لَلَّذِي بِبَكَّةَ مُبَارَكًا وَهُدًى لِلْعَالَمِينَ*فِيهِ آيَاتٌ بَيِّنَاتٌ مَقَامُ إِبْرَاهِيمَ وَمَنْ دَخَلَهُ كَانَ آمِنًا وَلِلَّهِ عَلَى النَّاسِ حِجُّ الْبَيْتِ مَنِ اسْتَطَاعَ إِلَيْهِ سَبِيلًا وَمَنْ كَفَرَ فَإِنَّ اللَّهَ غَنِيٌّ عَنِ الْعَالَمِينَ» [آل عمران: 96-97] درشان کرت: الله پاک ءَ بازێں دادے مارا داتگ. اسلام ءِ دین، واجه رسولالله صلیاللهعلیهوسلم ءُ الله ءِ گس باز ٹوهێں داد انت که الله پاک ءَ مسلمانانَ داتگ. یهودی ءُ مسیحی هرچۆں که وت ءَ گۆں مهتر ابراهیم علیهالسّلام ءَ لچێن انت، بلے شه اے داداں بےبهر انت.
مفتی صاحب ءَ گێش کرت: الله پاک ءَ گۆں اے برکتاں که ماں بیتالله شریف ءَ اێر کرتگ چۆناهی ءَ گێش شه مسلمانان تیوگێں مردمانی سر ءَ منت ئی کرتگ. مچێں مردماں یک رنگے شه الله ءِ گس ءِ برکتاں بهر زورۆک انت. ماں حج ءَ بازێں نشانی ئے شه الله ءِ مزنی ءُ زۆر ءَ اندر انت؛ زمزم، مقام ابراهیم، عرفات ءُ منا الله ءِ مزنی ءُ آئی شاهگانێں حکومت ءِ چێدگ انت.
🔹حج گوستگێں گناهان پاک کنت
دارالعلوم زاهدان ءِ فقه ءِ استاد ءَ گێش کرت: حج ءَ کارپد هست. ماں حدیث شریف ءَ آتگ که کسے حج کنت ءُ حج ءِ احکاماں په جوانی کمار کنت، چۆ کسے که نۆک شه ماس ءَ ودی بوتگ شه گناهاں پاکَ بیت. اے هاسێں فضیلت تهنا په دو کرد ءَ آتگ، یکے په دین ءِ نۆک منّۆک ءَ ءُ دۆمی په «هجرت» ءَ.
🔹حج، مهتر آدم ءِ توبه، ءُ مهتر ابراهیم، اسماعیل ءُ هاجره ءِ اخلاص ءُ کۆشستانی برورد انت
مولانا قاسمی درشان کرت: حج ءَ گواچنے هست. ماں حج ءَ مهتر آدم ءِ پشۆمانی ءُ توبه ءُ پیامبرانی دعا پدرَ بهانت. مهتر آدم ءِ توبه پد شه اێشی که شه بهشت ءَ در کنگ بوت، ماں عرفات ءَ منّگ بوت، وهدےکه مردم ماں عرفات ءَ ساڑیَ بیت مهتر آدم ءِ توبه آئی دێم ءَ پدر بیت.
مفتی صاحب ءَ گێش کرت: دۆمی گواچن، مهتر ابراهیم علیهالسلام ءُ آئی کهول ءِ کۆشست، ندریگ ءُ دعا انت. مهتر ابراهیم ءَ وتی گس ءُ شام ءِ زێدێں ڈیه ءَ یله دات ءُ مهتر هاجره ءَ ماں مکه ءَ که آ زمانگ ءَ هشکاوگ ءُ بےآپ ءُ جرّێں ڈگارےات، تهنا یله دات. وهدے که مهتر هاجره سرپد بوت که مهتر ابراهیم آیرا و آئی گونڈلێں زهگ ءَ په الله ءِ حکم ءَ تهنا هل ایت، اۆپار ئی کرت ءُ اے دپتری گالرد ءَ گوشت ئی که: گڑا الله ما را تباه نهکنت. وهدے مهتر اسماعیل تُنّگ بوت، مهتر هاجره هپت گشت په آپ ءِ جدءُهل ءَ صفا ءُ مروه ءِ درمیان ءَ جِست. مهتر هاجره ءِ اے کرد الله پاک ءَ انچش پسند بوت که آیرا یکے شه حج ءِ مناسکانی کرت ءُ تیوگێں انبیا ءُ اولیا ءُ حاجیاں آئی کرد ءَ ماں حج ءَ پرامَ کرت ءُ اے کرد تاں قیامت ءَ شه حج ءِ اعمال ءُ مناسکاں انت.
🔹 اسلام کۆشست، اخلاص ءُ سرندر کنگ ءِ دین انت
دارالعلوم زاهدان ءِ دارالإفتا ءِ سرمستر ءَ گوشت: اسلام کۆشست، اخلاص ءُ سرندر کنگ ءِ دین انت. الله پاک وهدے یک مردم یا راجے را پسند کنت، گڑا آیرا ماں دنیا ءَ سربرز کنت. مهتر ابراهیم ءُ هاجره ءُ اسماعیل ءِ دعائانی سوب ءَ الله پاک ءَ واجه رسولالله صلیاللهعلیهوسلم را دێم دات ءُ کعبه ءِ جاگه، شرف ءُ مزنی ءَ گێش ئی کرت.
🔹کعبه دنیا ءِ امنءُامان ءِ سوب انت
مفتی محمدقاسم قاسمی وتی هبرانی دێمتر ءَ گوشت: مهتر ابراهیم علیهالسلام گۆں یک جنێں ءُ یک زهگے مکه ءِ شهر ءِ بنهشت ءَ اێر کرت ءُ واجه رسولالله صلیاللهعلیهوسلم ءَ آیرا آباد کرت. مفتی محمدشفیع رحمهالله ماں «معارفالقرآن» ءَ اے پاگپ ءِ گێشواری ءِ بابت ءَ نبشتگ: «جَعَلَ اللَّهُ الْكَعْبَةَ الْبَيْتَ الْحَرَامَ قِيَامًا لِلنَّاسِ» کعبه دنیا ءِ امنءُامان ءِ سوب انت. اگاں بیتالله ءِ طواف بند بیت، گڑا بیتکنت که دنیا بێرانی ءُ تباهی ءِ آماچ بیت.
🔸مولانا محمدقاسم ءَ وتی هبرانی گڈسر ءَ پهکێں مردم هاسکار حاجیان په رهوت گۆں قرآن ءُ مسیتاں، رهوت گۆں زانتکار ءُ صالحاں ءُ حج ءِ نور ءُ کٹّاں سۆگه ءُ کڈن کرت.
چمشانک