شیخالاسلام مولانا عبدالحمید ماں زاهدان ءِ نمازجمعه ءِ دیوان ءَ (۲۹ خرداد ۱۴۰۵/ 19 جون 2026) گۆں اشاره به ایران ءُ امریکا ءِ تفاهمنامه ءِ امضا ءَ، آیرا په ایران ءِ استمان ءِ سۆب ءَ زانت ءُ کڈن ئی کرت که په اے تفاهمنامه ءِ سۆبانی رکێنگ ءَ بائد فساد ءُ شێتانیانی دێم گرگ بیت ءُ فاسد ءُ ترۆندێں مردمانی بدل ءَ وسی ءُ میانهرۆئێں مردم کار گرگ به انت، پچےکه همے چیز په یک آباد ءُ شرێں ایرانے زلورت انت.
🔹میانرۆدرآت، استمان ءُ ملکانی مالزانشت ءِ شاهرگ انت؛ آئی امنیت ءِ پهازگ عقل ءُ جوانێں سیاست ءِ لۆٹ انت
په سنیآنلاین ءِ سرهال ءَ مولانا عبدالحمید درشان کرت: ما پهکاں شه ایران ءُ امریکا ءِ تفاهمنامه ءِ امضا ءَ وشال اێں. ما سهل ءِ دۆزواه اێں ءُ آیرا په دنیا ءِ مچێں مردمانی سۆب ءَ زان اێں ءُ مئے باور همێش انت که اے سهل په ایران ءِ استمان ءِ سۆب ءَ انت.
واجه ءَ گێش کرت: میانرۆدرآت استمان ءُ ملکانی مالزانشت ءِ شاهرگ انت ءُ بازێں ملکے ءِ انرژی شه اے ڈیه ءَ پجائێنگ بیت. پمێشا عقل ءُ جوانێں سیاست ءِ لۆٹ انت که میانرۆدرآت پد شه گوستگێں سالانی جنگاں به تاهیر ءَ رس ایت تاں پهکاں سهل ءُ امن ءِ ساهگ ءِ چیر ءَ شه اے ڈیه ءِ سۆباں بهر زور انت.
🔹میانرۆدرآت همگیر ءُ مدامی ئێں سهل ءِ وازمندگ انت که مچێں جێڑهاں هلاس کنت
واجه ءَ گێش کرت: میانرۆدرآت همگیر ءُ مدامی ئێں سهل ءِ وازمندگ انت که توانت فلسطینی ءُ اسرائیل ءِ کهنگێں جێڑه ءَ هم هلاس کنت. المی انت که یک منّگنامهے تیوگێں ملکانی میانجین ءَ امضا بیت تاں گوستگێں جێڑهاں هلاس کن انت ءُ استماناں به امن ءُ تاهیر ءَ رس انت.
🔹ملک ءِ ته ءَ مالی فساد سک باز انت؛ مردم گڑتیَ کن انت که بلاک بوتگێں زرّاں که قرار انت آزات به انت، لپاشگ مه به انت
زاهدان ءِ آدێنگ ءِ امام ءَ گوشت: ما پهکاں زان اێں که ملک ءِ ته ءَ فساد سک باز انت. بندشانی زورگ ءُ بلاک بوتگێں زرانی آزات کنگ یکے شه ایران ءُ امریکا ءِ تفاهمنامه ءِ بنداں انت ءُ مردم شه اے بابت ءَ سک پهگل انت.
واجه ءَ درشان کرت: بلے مردمانی گڑتی اێش انت که اگاں ملک ءِ ته ءِ فساد دور مه به انت، گڑا بیتکنت که بازێں بهرے شه اے زراں لپاشگ به انت ءُ ایران ءِ مردماں که سالانی دراجی ءَ گشن ءُ سکیانی آماچ بوتگ انت شه اے زراں بےبهر به انت ءُ سکی اش دور مه به انت.
🔹ایران ءِ کارمستری گۆں مذهبی سیاستاں نه بیت
واجه ءَ ٹکاٹک گوشت: اگه کارمستراں مذهب ءِ نێمگ ءَ برو انت، گڑا نه توان انت سجێں ملک ءَ ٹێلێن انت، پچےکه ایران ءِ مچێں مردم مذهبی نه انت، بلکه شیعه، سنی، مسلمان ءُ نامسلمان دار انت ءُ مذهبی سیاست سوبَ بیت که آدگراں ناوشنود به انت. اگں ته ءِ ءُ ڈن ءِ ملکاریاں ایران ءِ مردمانی سۆب ءَ ردءُبند به انت الله ءُ مردم آوانَ گند انت ءُ شه آوان پلهمرزی کن انت.
🔹«پاهو» ءُ «زهرشانی کنۆکانی مڈیانی واهندی کنگ» ءَ بس کن ات/ گێشتری مردم نونێں پاهوانَ «سیاسی» زان انت
زاهدان ءِ آدێنگ ءِ امام ءَ گوشت: بژن انت که پاهو ملک ءِ ته ءَ باز بوتگ. لهتے شه بندیجاهانی ته ءَ کلۆه دێم داتگ که بازێنے پاهو ءِ ودار لڑ ءِ ته ءَ انت ءُ بلوچانی کساس ماں اے لڑ ءَ شه آدگه راجاں گێشتر انت.
واجه ءَ کڈن کرت: ما گوست ءَ هم گوشتگ ءُ نون هم کڈنَ کن اێں که پاهواں بند کن ات. گێشتری مردم اے پاهواں سیاسی ءُ په دێمداری شه زهرشانیاں زان انت، هرچۆں که په نشه ئی موادانی نیمۆن ءَ به انت. همےرنگ شه کارمستراں لۆٹ اێں که زهرشانی کنۆکانی مڈیاں واهندی مه کن انت.
واجه ءَ درائێنت: ما آمید ءُ ایران ءِ آبادی ءَ لۆٹ اێں؛ لۆٹ اێں که ایران ءِ مردم په عزت ءُ شرف زندگی کن انت.
🔹کرمان ءِ زربار ءِ زالبولێں زهرشانی کنۆکانی بےشرپی بوتگ؛ استان کرمان ءِ کارمستراں رندگیری کن انت ءُ زهرشانی کنۆکانی توار ءَ گۆش دار انت
مولانا عبدالحمید ماں دگه بهرے شه وتی هبراں گوشت: گوستگێں رۆچاں ماں تفتان ءِ ڈیه ءَ ءُ یک ڈیهے ماں کرمان ءِ زربار ءَ کانکنیانی سوب ءَ جنێناں زهرشانی کرتگ. بلے ماں استان کرمان ءَ زهرشانی کنۆکێں زالبولانی بےشرپی بوتگ.
واجه ءَ کڈن کرت: شه پهازۆکی کارمستر ءُ استان کرمان ءِ آدگه کارمستراں لۆٹ اێں که اے بنگپ ءَ رندگیری کن انت ءُ آ زالبولانی لۆٹ ءُ تواراں بشکن انت.
🔹تفتان ءِ مردماں شه معدنانی درگێجگ ءَ تاوان دیستگ؛ بائد ڈیه ءِ مردماں هم شه اے معدناں سۆب بر انت
شیخالاسلام ءَ گێش کرت: گۆں تفتان ءِ جنێنێں زهرشانی کنۆکاں هم ترۆندی بوتگ ءُ کارمستراں گوشتگ که اے بنگپ رندگیریَ بیت. بلے مهمێں ٹک اێش انت که تفتان ءِ مردماں شه اے معدنانی درگێجگ ءَ تاوان دیستگ، هاسکار آوانی کشار ءُ دلوت ءُ مالاں تباه بوتگ انت. تاں وهدےکه تفتان ءِ مردمانی توار اشکنگ مه بیت ءُ آوانی حق ءُ تواراں دلگۆش مه به انت، بیتکنت که اے زهرشانیاں پدا پرام به انت. پمێشا اے بنگپاں بائد په جوانی رندگیری به انت تاں مردمان هم شه اے معدناں سۆب رس ایت.
🔹کارمستراں زاهدان ءِ آپ ءِ سندءُبند ءَ رندگیری کن انت/ سیستان ءِ آپ بائد په جوانی کارمستری بیت
مولانا عبدالحمید وتی هبرانی گڈسر ءَ درائێنت: شه زاهدان ءِ کارمستراں لۆٹ اێں که مێتگ ءِ آپ ءِ سندءُبند ءَ رندگیری کن انت ءُ وتی وس ءِ کساس ءَ کۆشست کن انت که اے سندءُبنداں کم به انت ءُ اگاں نه بیت، گڑا آپ ءِ بهرءُتهر عادلانه بیت.
واجه صاحب ءَ همےرنگ گۆں منتواری شه اۆگانستان ءِ اسلامی حکومت ءَ په آپ ءِ یله دیگ ءَ سیستان ءِ نێمگ ءَ امێتوار بوت که اے کرد برجاه بیت ءُ «سیستان ءِ آپ ءِ جوانێں کارمستری» ءِ لۆٹۆک بوت تاں سیستان ءِ مردمانی مۆسمی کشاراں هشک مه به انت.
چمشانک