مروچی : 2 فروردین , 1398
واجه مفتی محمدتقی عثمانی ءِ اولی گپ و تران رند چه ناکامیں ترورا:

حمله ٹیما کهف ءِ سورتا وانگتاں/ په قاتلانی هدایت بیگا دعاء کناں

حمله ٹیما کهف ءِ سورتا وانگتاں/ په قاتلانی هدایت بیگا دعاء کناں

سنی‌آنلائن|  فروردین ءِ دومی روچ 1398 هـ.ش ءِ سالا، آدینگ ءِ روچ ات که چند دمانے ساه و گین ماں سینگا بند بوتنت؛ وحشتناکیں گپے چه رودراتکی همساهگ ءِ نیمگا سربوت که شیخ‌الاسلام مولانا مفتی محمدتقی عثمانی حفظه‌الله ءِ گاڑی ءِ نیمگا تیرگواری کنگ بوتگ و اے علمی بے مٹیں واجه ماں مسجد جامع بیت‌المکرم کراچی ءِ راها ترور کنگ بوتگ. دمانے پد خبر آتک که واجه ءِ لوگبانک و دو نماسگ هم اودا سوار بوتگنت ، بلے وشیں گپ اش انت که آیانا تاوانے نرستگ بس دو نفر پانگپاں و اسکرت شهید و شوپراں ٹَپی بیتگنت. اے پیشامد هفتگے پد چه نیوزیلند ءِ دردناکیں پیشامدا پیش آتکگ و ماں  «پاکستان ءِ روچ ءِ» نزّیکیا انجام گپتگ. چه وڑا واجه مفتی محمدتقی عثمانی و آئی ءِ لوگماں سالم پشکپتگنت؟ آیا اے واجه چه خاصیں مردم و خاصیں گَلّانی نیمگا تھدید /بیهار دیگ بوتگ؟ چه کسانے اے پیشامد ءِ پُشتی نیمگا بوت کننت؟ اے جستانی پسو و آ دگه کِرّ و گوری لازمیں گپاں اے پیشامد ءِ بابتا ماں واجه مفتی محمدتقی عثمانی ءِ اولی گپ و تراناں رند چه اے پیشامدا بوان ات که گوں «امت ءِ» روتاک ءِ همّتا کراچیا چاپ و شنگ بوتگنت. واجه مولانا مفتی محمدتقی صاحبا  هزاران شاگرد و مرید ماں جهان ءِ هرچ کُنڈ و گورا هستنت. ایران و اوگانستان هم چه دنیا ءِ کُنڈان انت، ماں اے کشوراں بازینے واهگدارنت که اے پیشامد ءِ بابتا گیشتر سرپد ببیت. همے واستا سنی آنلاین ءِ و بسایٹا اے گلگدار و مصاحبہ که فروردین ءِ ششمی روچا و سَے شنبه ءِ درگتا شنگ بوتگ، په فارسی رجانک کتگ و په وانوکانی پیش کنت.

پدا ما هم په بلوچی زبان ءِ واهگداراں آئیا ماتی شهدیں زبانا رجانک کُتگ

🏼امت ءِ روتاک| ماں اے گلگدارا آئیا گپ کت و ما ارس رتک، چه هر کشورا چُش که دانمارک، انگلستان، عربستان سعودی و آ دگه کشوراں په همدردی و خبر ءِ گرگ ءِ واستا گوانک کنگ بوتگ. یکے چه شاگردانی چه اسپانیا بس په وتی استاد ءِ چارگا آتکگت.  مسجدالحرام ءِ پیش امام و گُشتانک دیوک و عربستان عالمانی شورا ءِ باسک، شیخ صالح بن‌حمیدا په شیخ‌الاسلام مفتی محمدتقی عثمانی ءِ حالشونیا گوانک کت. واجها وتی سلامت مانگ «معجزهے» زانت و گوشتی: منی خیالا الله پاکا وتی فرشتگ دیم داتگتنت داں تیرانی راها بدل بکننت. شیخ صالح بن‌حمید جهان اسلام ءِ مزنتریں مجمع فقهی ءِ باسک انت، و مفتی محمدتقی آئی ءِ رئیس ءِ جهمنند انت. لهتے چه شیخ‌الاسلام ءِ هزمت کنوکان ما را گوشت که مفتی صاحب ماں عربستانا خاصیں احترام ءِ واجه انت. عربستان ءِ حکومتا چند رند واجها گوشتگ که گوں وتی لوگمانا عربستان ءِ نندوک ببئے، بلے واجها دوست بوتگ که وتی ملکا بنندیت.  مفتی محمدتقی عثمانی دارالعوم کراچی ءِ شهدربرجاه ءِ سرمستر ءِ جاهمنند و شیخ‌الحدیث انت ( صحیح بخاری ءِ استاد انت) و جهان اسلام ءِ مزنترین و پجاه یاورتگیں عالمان انت. جهان اسلام ءِ گلّ ءِ/رابطة العالَم الإسلامي ءِ مجمع فقهی ءِ باسک و 44 کتاب ءِ نبیسوک انت و جهان ءِ تها اسلامی بینکداری ءِ بنڈوک ایرکنوک انت.

واجها دو سال ماں  شرعی ملی ءِ دادگاها/وفاقی شرعی عدالت و بیست سالا ماں پاکستان ءِ  عالی ءِ دادگاها هزمت کتگ. مفتی محمدتقی  قاضی ارشد ءِ منصب دار و همے وڑا پاکستان ءِ تجدید نظر شریعت عالی ءِ دادگاه ءِ  قاضی‌ ءِ کمککار بوتگ. همے دین ءِ لائقیں هزمتانی سوبا واجها گوں «شیخ‌الاسلام» لقبا توار کننت. چند روچ دیمترا تروریستاں په مفتی محمدتقی عثمانی ارش کننت، بلے قسمتا الله پاک آئیا و آئی ءِ لوگمانا حفاظت کنت، و جهان‌اسلام چه ٹوهیں تاوانے نجات کنت. البت ماں اے پر غمیں پیشامدا واجه ءِ دو همراه شهید و دو دگه ٹپّی کنگ بنت. اے پیشامد ءِ هر خبرا مفتی محمدتقی عثمانیا گوں  «امت ءِ روتاک ءِ» گلگدارا بیان کتگنت که په وانوکاں پیش کنگ بنت.👇🏽

شمئے در روگ چه تروریستانی دستا چه معجزه یے کمتر نهنت؛ آیا حمله و ارش ءِ وهدا شما خاصیں دعایے وانگت ات؟

پکّا هنچشنت؛‌ پاکیں ربا منا هنچو حفاظت کُت که ماں تیرانی گوارگ ءِ، منی جانا شیکرّے هم نکپت و نروسِّت. البت منی دوئیں همراهانی شهید بیگ و دوئینانی ٹپّی بیگا منا باز پدرد کُت. و شمئے جست ءِ دومی بهر ءِ پسوا باید انت بگوشاں من دعا نواناں، بلکیں دعاء لوٹاں. دعا ءِ وانگا گوں دعا ءِ لوٹگا دگری هست انت. دعا ءِ لوٹگ ماں سات و سفر ءِ دراجیا منی عادت انت. گیشتر  «کهف ءِ» سورتا شپا ماں نفلاں واناں. چه قرآنا یک جزے وانگ، تُری ماں سفرا، چه منی کاراننت. وهدے که ارش کنگ بوت، من وتا په کهف ءِ سورت ءِ وانگا  تیار کتگت. هنچو که من تلاوتا بنگیج کت تیرگواری بندات بوت. چند تیرا دیمی ماشینءِ شیشگا لَگِّت. اجکّه ئیں گپ اش انت که اولی تیرانے که جنگ بوتنت، په من آیانی توار تُرُندیں هَور و رگامءِ ترمپانی وڑا ات.

ترندیں هورے گوارگ انت، البت وهدے که منی چم په ماشین ءِ شیشگاں کپت، من سرپد بوتاں که هور ءِ جاهاں تیر گوارگ انت. هر چیزا پیسر منی ذهنا آتک که اے لهتے تروریست لوٹنت که ما را بجننت. موتور سواراں دیمکا و پشتکا شُتنت و هوایی تیراش هم جَت.

خبرانی تها اے رنگا آتکگ که موتور سواراں سَے موتور سواربوتگنت، اے گپ راست انت؟

بلے گپ همش انت. سَے موتراتنت که هریکے دو مردم سوارات. البت هما دمانا من نتوانت که بگوشاں که تیرجنوک چند نفرانت؛ هماپیمے که پیسرا گوشتوں که ارش ءِ وهدا کهف ءِ سورت ءِ وانگا و قرآن مجید منی دوئیں دستانی تها ات گُلائیشتاں. هنچو وانگتاں که هچ سرپد نبوتاں کجا سربوتگیں. هر سفر ءِ وهدا من یا قران ءِ وانگا گلائیش بان و یاگوں دگه کارے! همے واستا سرپد نباں که گاڑی چه کجا رد بیت. ارش ءِ روچا هم همے وڑا بوت. من هچ سار نگپت که کجا رستگیں. اناگتا مهاجمانی تیرگواری ءِ آماچ بوتیں.رند چه تیرانی لگگا په دیمی شیشگا، منی گاڑی راستی نیمگ ءِ شیشگ هم پرشت.

تیرانی رد بیگ ءِ فاصله چه شما چه اندازه ات؟

ماں گاڑی ءِ (دیمی صندلیا)، شوپر ءِ پهناتا محافظے چه پلیسا نشتگت من گوں وتی لوگبانک و دوئیں نماسگاں پُشتی صندلیا نشتگتاں.تیر بے صفت رچگت. تیرانے که چه پُشتا جنگ بوتنت، چه مئے سرونا رد بیت و دیمی صندلی ءِ پُشتی نیمگا مان پترتنت.همے وهدے تیرے که چه راستیں نیمگا جنگ بوتگت، شوپرا «حبیب» لَگِّتی. شوپرا منا گوشت بوپس. البت ماں ماشینا جاهے په وپسگا نیست انت، اے بابتا من وتی سر کمے جهل کُت و ماں دراج کشگ ءِ میانی حالتا وتا داشتوں. دمانے رند تیرگواری چه سَئیں نیمگاں بنگیج بوت. شوپرا گوں ٹَپّی بیگا گاڑی هلّاینت و چه تیرجنوکاں دور بوت. ما مارات که آیانی خیالا آ وتی کار کُتگ و شتگنت؛ بلے «حبیب ءِ» چست بوت که مهاجم لوٹنت واتر بکننت. شما  وتا گیشتر جَهل بکن ات. مهاجم په ما نزیک بوتگنت و پدا تیرگواری بندات بوت. اے رندی آیاں چه گاڑی ءِ چاریں نیمگاں ما را په تیر بست. یک عجیبیں پیشامدے دیماآتک؛ من چپی نیمگا در ءِ گورا نشتگتاں. ترورستانی تیرے همے درا ٹُنگ کتگت و رد بوتگت. تیرا راست هما جاهے لگّتگت که منی پاد گوں آئیا برابر بوتگ. پدرانت که منی پادا تیر بوارتیں، بلے اے تیر کجا شتگ؟ما هم نزانیں و اے جریان په ما معمّایے جوڑ بوتگ؛ معمایے که هچبر بلکیں زانگ نبیت. من و منی لوگمان پُشتی صندلیا نشتگتیں. همے واستا تیرجنوکاں گیشتر چه پُشتی نیمگا تیر جت.داں جاهے گاڑی ءِ پشتی شیشگ چُنڈ چنڈ بوت. بلے گوں الله ءِ فضل و احسانا تروریست وتی مراداں سرنبوتنت. رند چه شیشگ ءِ پرشگا هنگتا تیر جنگااتنت. گیشتریں تیرانے که چه مئے پشتا جنگ بوتنت دیمی صندلیانی پُشتی نیمگا مان پترتنت. لهتے چه تیراں ماشین ءِ صندوقا که لگّت ماں پُشتی صندلیانی آهناں مان آتکنت. چند دانگ تیرا هم پُشتی شیشگ ءِ نوارا لگِّتگ. بلے هچ تیرے  منا و منی لوگمانا نلگّتگ.🏽

شمئے لوگبانک و نماسگانی حالت چه وڑا ات؟

منی یکیں نماسگ «یمان» پنچ سالگیں مردیں چکے و «دینا»  هفت‌سالگیں دتگےانت. چُکّاں هچ نزاننت که چے بوتگ. وهدے که محافظ و شوپروں تیری بوتنت، یمانا وتی دست سینگ ءِ سرا ایر کُت و گوشتی: بابا! ادا لگّتگی! من پریشان بوتاں. قیامت بوتگت. دعا اوں کُت: یا الله! منی چُکّاں ببچّائین. هما دمانا یمان ءِ جامگ ءِ بٹن من پچ کُتنت. من دیت شیگ ءِ چنڈا که چه تیرانی لگگا پرشتگنت، آئی سینگا مان آتکگنت. منی لوگبانکا هم شیشگ ءِ چنڈاں لگتگت.  دوئیں دستی ٹپی بوتگنت. ارش ءِ وهدا منی لوگبانکا قرآن دستاات و تلاوت کنگت. الحمدلله منی لوگبانک منی جند ءِ ترس و اضطراب ءِ آماچ نبوتگت. آئیا اے ارش ءِ دراجیا اے مبارکیں آیت «وَجَعَلْنَا مِن بَیْنِ أَیْدِیهِمْ سَدًّا وَمِنْ خَلْفِهِمْ سَدًّا فَأَغْشَیْنَاهُمْ فَهُمْ لاَ یُبْصِرُونَ؛ و آیانی دیما ما سدے هشتگ، و آیانی  پشتا هم سدے؛ و آیانی چماں ما پوشتگنت، اے بابتا نگندنت !» یاسین ءِ سورتا  وانگت.

وهدے که اُرُش کنگ بوت، شما را  دو گاڑی هورات؟

بلے ما دو گاڑی ءِ تها اتیں. مئے گاڑی هیوندا سیویک/Civic پیسرات که من و منی لوگمان و شوپر وپُلیس ءِ مامور (محمد فاروق) سواراتیں. ماں پُشتی گاڑیا که آئی ءِ شوپر  عامر و مئے محافظ «صنوبر» سوار اتنت. شوپر(عامر) تیری بوت و باز ٹپے ات. هنوں حالی سک نوش انت. صنوبر شهید بوت.کلا دو نفر شهید بوتنت و دو نفر هم سک ٹپّی بوتنت .مئے کاروان هشت نفراتنت؛ چار نفر من و منی لوگمانتین و دو شوپر و دو محافظ اتنت. هر دو محافظ شهید بوتنت، شوپر هم باز ٹپّی بوتنت و ما چو معجزه ءِ نجاتیں کت.

شوپر و پلیس ءِ مامورا چند تیرا لگتنت و چه وهدی؟

منی شوپر ءِ دوئیں کوپگ تیری بوتنت. یک تیرے ماں سروشا هم وارتی. شوپر ءِ دست و برادست خشکیں خون اتنت،‌ بلے هنگتا آئیا گاڑی چلیناں کُت. یک تیرے پلیسیں محافظ ءِ سرا که شوپرء ِ گورا نشتگت، لگّت.

آیا شوپر  و محافظا هما اولی ارشا تیر وارت یا وهدے تروریستاں پدا واترّاش کُت بزاں دومی ارشا؟

شوپرا منا گوشت: که تیری وارتگ، بلے پکا گوشت نکناں که چه وهدی تیری بوتگ. بیها تروریستاں لوٹتگ که شوپر ءِ سرا تیر بجننت،بلے الله پاکا نجات داتگ. اگه تیرے شوپر ءِ سرا بوارتیں، پهکانی کار یکسرکنگ بوت. چیا که همے شوپرات گاڑی په نادراهجاها سرکُت. گوں دوئیں کوپگ و سروش ءِ ٹپاں، شوپرا گاڑی ترند هلّائینت. وهدے که مارتوں ما دیما رفتگیں و مهاجم پُشتا منتگنت، من دیت که چه شوپر ءِ دوئیں دست و باسکاں خون رچگاانت و آ گوں سکی شوپری کنگا انت. چپیں دستی چه کارا کپتگنت آئیا بس گوں راستیں دستا شوپرے کُت. وهدے که منا سهیگی کُت که یکیں دستا چه کارا شتگ، من گوشت یک کرّے بدار من وت فرمان ءِ پشتا ننداں و په نادراهجاها رویں. بلے شوپرا نه مَنّت و گوشتی: هچبر شمئے جان خطر ءِ تها انت. تروریستاں بلکیں پدا ارش بکننت. من ریسک کت نکناں.په الله ءِ ناما همودا پشتا بنند، من وت شما را داں نادراهجاها سر کناں. کمے رندترا  «حبیب ءِ» آ دگه دست هم چه کارا کپت و آئیا بس گوں راستیں دست ءِ لنکُکاں شوپرے کُت دیم په لیاقت ءِ میان استمانی ءِ نادراهجاها /لیاقت نیشنل اسپتال هلّائینگت.

بلے چو که من په آدینگ ءِ نماز ءِپیش امامیا ماں مسجد بیت‌المکرما اراده کتگت و نماز ءِ وهد هم نزیک ات، ماں راها په مقتدیاں گوانکوں کُت که بدیں پیشامدے په من کپتگ که نبیت په نماز ءِ پیش امامیا بیایاں. دمانے پد ما په نادراهجاها سر بوتین.هما دمانا ما وتا په اورژانس ءِ بهرا سرکُت. تختے لوٹتوں محمد فاروقا هما تخت ءِ سرا واپینتوں. منا امیت ات که نجات بکنت بلے آ پیسرا چه اشی که نادراهجاها سر ببیں شهید بوتگت. شوپرا سَے تیر وارتگت سِل ٹپّی بوتگت و طبیعی ات که چه حالا بروت. شما وت به جیڑات که آئیا چونیں بامردی و جرئتے چه وتا پیش داشتگ. پکا دلیر و با همتیں مردے. نادراهجاهءِ کارمند زوت وتی کاراں بندات کت و ٹپیان اش اورژانسءِ بخشا داخل کت. من اول سرا دیم په محافط ءِ تختا شُتان و آئیءِ حال من چه ڈاکٹرا جست کت. پزشکا گوشت آئیا دنیا ویل داتگ و ماں راها وفات بیتگ. شوپر ءِ بابتا گوشتِش عمل کنگ بیت و حالی بد نهنت. الله ءِ  شکروں گپت. همے وهدی نادراهجاه ءِ سرمستر مئے پانگا آتک. من گوشت آدینگ ءِ نماز ءِ وهدانت لوٹاں نماز بکنان. گوں آئی ءِ رهشونیا دیم په نادراهجاه ءِ مسیتا شُتاں و همودا نمازوں کت. وهدے که مسیتا شتاں دومی بانگ شروع بوتگت. نزیک ساعتے نادراهجاها مهتل بیتاں.

 تروریستاں بازیں وهدے تیر گواری کتگ، پلیس ءِ واک شما ندیتنت؟

پیشامد ءِ جاها پلیسے گندگ نبوت. بلے وهدے که ما دیم په نادراهجاها روگتیں، ماں راها  «اکسپو سنتردءِ » دیما پلیس گَشتی گاڑی یے اوشتاتگت که چه پلیسی واکاں پرات.شوپرا گاڑی آیانی گاڑی یے نزیکا برت و من گوشتنت: شوپر بازٹپّی انت، چه شما یکے فرمان پشتا بنندیت و ما را نادراهجاها سربکنت. بلے پلیس ءِ ماموراں وتی بے احساسی پیش داشت و گوشتش شما وت بروات. دلا گوشتوں وتی وهدا گوں بے جاهیں بحثاں زوال مکنیں که هر دمانے په ما ارزشمندانت. ماشین روگا ات که ما گوں آیاں گپ کت و شوپرا هن گپ جت، بلے وهدے که پلیسءِ ماموراں پہ همکاریا تیار نبوتنت، وت دیم په نادراهجاها شت. قسمتا بچار! ترافیک باز گران نهت و ما داں ده دقیقتا سربوتیں.

اِشکنگا شما پاترپ و تهدید کنگ بوتگت، چه کجام وهدا شمئے پاترپ دیگ بندات بوتگ؟

اے آخراں کسے منا تهدید نکتگ، بلے دو یا دو و نیم سال پیسرا تهدیدانے دیم دیگ بوتگنت. بلے من هچبر آیاں په دل نگپتگنت و نه ذمه واراں من چیزے گوشتگنت. چیا من فکر کناں تهدید کنوکاں په آ سازمانانے که وتا گوں آیاں نزیک کننت، هچ پیمیں رابطه یے ندارنت اے بابتا آیانی تهدید چَکّین انت.

چه وڑیں پاترپّ اش دات  و آیا تهدیداں تلفنی اتنت؟

گیشتر بے نام‌ونشان اتنت. گیشتر گوں نمدی تهدید اش کت. ماں لهتے نمدیاں لارت جنگ بوت که اے پیغام چه داعش ءِ نیمگا انت و نامه ءِ دیم دیوکا نبشت که من داعش ءِ فرماندهاں و اے بابتا که تو مئے دیمگیرئے ترا زندکا نیلیں

کجام دیمگیری(موضعگیری)؟

من مدام گوں عملیات مسلحانه و  انتحاری ارش کنگاں مخالفت کتگ. ماں نمدیا په همے چیزا اشاره کنگ بوتگ. لهتے وتا داعشے گوشت و پرتهدیدیں نمدی دیم اش دات و برےبرے نمدیانے گوں همے رنگیں تهدیداں چه تحریک طالبان پاکستانءِ/تی‌تی‌پی نیمگا دیم دیگ بوت. معلوم نه انت که اے نمدی اصلی اتنت یا نقلی و جعلی. چیا که چند رند مردمانے که وتا را ماں تحریک طالبان پاکستانا پجارا دات و پرتهدیدیں نمدی اش دیم دات، رندا نمدیانے چه تحریک طالبانی نیمگا سر بوت که هچ کسے چه آیانی نیمگا شما را تهدید نکتگ. همے واستا من اے تهدید په دلیں تهدید نزانتنت. یک و دو رندا تلفنی تهدیداش کُت که ما ترا زندگ نیلیں. من پسوا گوشت: «الله مالک انت».

هرچند که مسلحیں جیڑه یانی بابتا ماں کشورا منی نظر پ

درانت، بلے پدا هم فکروں کت که هچ کسا گوں من دشمنی نیست و کسانے که لارت اش جت که گوں داعشا ارتباط اش هست، دروغ بندنت. آ وهداں داعشے پاکستانا نیستت. عجیب ادا انت یکبرے ماں نمدی یے نبیسگ بوتگت «من داعش ءِ فرمانده یاں و شمئے نزیکا زندگے کناں.»

گڑا چیا ایالات سند ءِ استاندارا گوشتگ که هنوں هم شما تهدید کنگ بوتگت؟

منی خیالا په واجه استاندارا اشتباهے پیش آتکگ. اصلی گپ اش انت که وهدے عالمانی امنیتی اسکورت و پروتکل پچ گرگ بوتنت،لهتے چه  وفاق‌المدارس ءِ/شورای هماهنگی مدارس ءِ ذمه واراں گوں بازیں ذمه وارانے گِندُک اش کتگ و آیان اش گوشتگ که لهتے چه مئے عالماں تهدید کنگ بنت. اے بابتا اسکورت ءِ پچ گرگ ءِ جاها، په آیانی حفاظت کنگا بتُکش ات. بیت کنت استاندارا همے بابتا اے گپ گوشتگ. رند چه اے ارشا، واجه استاندار منی گندکاں اتکگ، بلے پیسرا ما را هچ وڑیں دیدارے نبوتگ.

شما را چند محافظ شخصی و دولتی هست؟

پیسرا منا هچ محافظے نبوتگ. بلے یک و نیم سال پیسرا یک سربازے دولتی منی محافظ کنگ بوتگ. من لوٹ ات همے جاندارا هم برترّیناں، چیا که من باز کم رَو و یای کناں. ابید اشیا، منی وتی جندا هم محافظ هست. بلے دور و بریاں مشورت داتگ که اے محافظ هم بمانیت و من وتی جند ءِ دیدانکا عمل نکتگ. وهدے که دولتا عالمانی اسکورت پچ گپتگنت، اے یکیں سربازی هم برت. بلے یک روچے پد یک سربازے جاها دو سربار په ما خاص کنگ بوت. یک روچے پیسر چه اُرُشا، یکیں سربازاِش برترّینت و ارش ءِ وهدا بس یک مامورے منی همراه ات که نامی محمد فاروق ات، شهید بوت.

گیشتر گوشگ بیت انسان ءِ ششمی حسّ بازیں چیزانے آئیا گوشیت، آیا اُرُش ءِ روچا اے وڑیں خیالے شمئے ذهنا آتک؟

اصلاً! راست اش انت وهدے که تیراں هور ءِ رگام ءِ وڑا گوارگتنت، منا یقین ات که اے تیر منا نه لگّنت. باور کن ات من گیشے نکنان و ناحقیں گپ نگوشاں؛ تچکیں گپ کنگاں. بلے چیا منا یقین ات، سوبی گوشت نکناں. بس گوشت کناں که الله پاکا لوٹ ات منا نجات بدنت.

گوشگ بیت شمئے ترور ءِ کنگ گوں راست و هیرت چاریں برنامه یاں انجام دیگ بوتگ؛ آیا شما هر جمعه ءِ روچا ماں مشخصیں وهدے په جمعه ءِ نماز ءِ پیش امامیا چه لوگا در بِت؟

بلے اے منی کارانت، پکّا که مهاجماں وشیں برنامه یے جوڑینتگ و وتی عملیات اش گوں هیرت چاری بنائینتگ. داں جاهے که اے آدینگا منی برنامه دگه چیزے ات. منا چارشنبه ءِ بلیت هستت که دیم په ملتانا برواں و قرار نبوتگ که آدینگا من کراچیا بباں. گیشتر منی جند ءِ دور و بری سهیگتنت که من په آدینگ ءِ پیش امامیا بیت المکرما نرواں.بلے اناگتا بال کنگ بند کنگ بوت و نبوت که ملتانا برواں. بلے کمیں مردمے چه منی سفر ءِ نروگا سهیگتنت و چه اشی سهیگتنت که چش گوستگیں هفته یاں دیم په مسجد جامع بیت‌المکرما رواں. رندا زانگ بوت که مهاجماں په وتی دلجم بیگ ءِ واستا وتی مردم په دارالعلوم هم دیم داتگ. دمانے چه اُرُشا پیش لهتے مردم دارالعلوم شتگنت و جست اش کتگ که مروچی کَے ادا نماز دنت و نماز چه ادارے بندات بیت؟ و مئے آیگ ءِ مراد اش انت که مفتی صاحب ءِ پشتا نماز وانیں و… گیشتر آ آتکگنت داں بزاننت من چه ادارے راه کپاں و آیا منی برنامه ءِ توکا بدلی آتکگ یا نه.

شما گوشت کمیں مردمے چه شمئے سفر ءِ نروگا سهیگ بوتگنت، آیا مردمانے ڈن چه دارالعلوم هم سهیگ بوتگنت؟

طبیعی انت که لهتے ڈنی هم خبر دار بیتگنت . چیا که ملتان ءِ مردم من سهیگ کرتگتنت که پرواز ءِ بند بیگ ءِ وجها منی آیگ په ملتانا نبیت.

اے پیشامد ءِ پٹ و پول ءِ بابتا تحقیقات  آیا  (امنیتی ذمه واراں) شمئے اعتمادا بروبر کننت؟

بلے منا خبردار کننت. من گمان کناں که گوں جد و جهدا پٹ و پول انجام گیرت.

پٹ و پول چه هر وڑیں نهادان و قانون ءِ اجراء کنوکاں هورا هور بیگِنت. اے رندا مارگ بیت که پٹّ و پول گوں جد و جهدا بیگ انت. ماں جریانا لهتے چُشیں گپ هست که آیانا رسانکانی تها شنگ کنگ شر نهنت. البت من چه پٹ و پولانی دیمرویا دلجماں.

شمئے ارزیابی چه اے ترورا چه وڑانت ؟

پیسرا هم گوشتگوں ارشے که منی سرا بوتگ، مذهبی و فرقه‌ای رنگ و بو دیگ مبیت. سر و برا اے کشور ءِ دشمنانی مکر انت داں ماں «پاکستان ءِ روچا» گَڑ وبَڑی یے پیداگ بکننت. الله پاکا اے مکر پروش دات و منی دوهمراه شهید و دو دگه ٹپی واسطه بوتنت.

شمئے پیغام په قاتلاں چے انت؟

من قاتلا په هدایت ءِ راها دعوت کناں و چه الله پاکا لوٹاں که هدایت اش بکنت ، تچکیں راها آیان پیش بداریت و په نیکیں کار ءِ کنگ اش نصیب بکنت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *