شیخالاسلام مولانا عبدالحمیدا اِے هپتگَے آدینگ/ جمعهیے نمازا لهتے چه کُردستانَے ورنایانی اعدام کنگا چه گلّه کرت و گوں اِے گپَّے درشاں کنگا که «اسلامَے شریعتا په اعداما احتیاطَے نیمگ گپتگ» گوشتی: اعدامَے نقصان و تاوان په لوگ و چاگردَے مردماں سک باز اَنت.
په سنیآنلاینَے هالرسانی سایتَے هالکاریا نقل چه واجه مولانا عبدالحمیدَے سایتا، زاهدانَے جمعهیَے پیشنمازا ماں زاهدانَے جمعهیَے نمازا (15 مرداد 1395) په ایرانَے کرَجَے رجاییشهرَے نوکیں زندانیانی پاهو/ اعدام کنگا گوشت: په اِے گڈی رجاییشهرَے اعدام بوتگینانی باروا بازیں گپّے هست. من لوٹاں اِے باروا کمے گپ بکنان. امیت اِنت که اعتدال و میانهروی رعایت کنگ ببیت.
مولانا عبدالحمیدا نوکیں اعدامیانی پاهو کنگ «دورچاری و دلپراهیا چه دور» زانت و گوشتی: اِے گُڈی اعدامیانی باروا مئے گلّه همش اِنت که ماں اِے حکماں منطقهیَے حسّاسیں شرائط چارگ نبوتگنت. هنوگیں شرائط باز حساسیں شرائطے و دژمناں لوٹنت که اختلاف و جتایی و ناامنی بیار اَنت، باید اِے حکمانی دزمانجناں دورچاری و مزندلی رعایت کرتیں.
واجهها تاکید کرت: انگتا مئے وصیت همشنت که اِے مسائل رعایت کنگ ببنت و آیاں که مستقیم قاتل نهنت آیانی سرا رحم کنگ ببیت. اسلامَے دین برابری، رافت و رحمتَے دین اِنت. اگه اسلامی رافت کاربندگ ببیت بازیں مشکلاتے حلّ بیت. اگه کارمستر گوں دورچاری و دلپراهی مسائلا بچار اَنت زودتر مشکلات حل بنت. مئے واستا شیعه و سنی پرک نکنت، اسلام و انسانیت مهم اِنت.
?متّهم باید ظاهر و عادلانهایں دادگاه و آمیدگساں محاکمه کنگ ببنت
زاهدانَے جمعهیَے پیشنماز دیما په «علنی/ظاهری و عادلانهایں دادگاهَے برجم دارگ» په متهم و تهمت جتگیناں تاکید کرت و گوشتی: ممکن اِنت که یک نپرے یا یک گروهے تندروی و افراط بکنت، هما پیم که مرچی جهان پرّ اِنت چه افراطگرایی و ترندرویا. مئے ملکا هں سنی و شیعهیانی درمیانا ترندرو هست اِنت. مئے باور همش اِنت که اِے دابیں مردم وهدے که گرگ بنت، اگه گوں وتی دستاں یکے قتل و کشگا هور بوتگنت و آیانی جرم ماں عادلانه و علنی دادگاهاں ثابت بیت، گڑا آ وهدی کشگ ببنت. فقهَے مطابقا آ کساں که مباشر نبوتگنت، با پشتا شورے داتگش باید آ تعزیر و زندانی کنگ ببنت.
?اعدام کم کنگ ببنت
واجه مولانا عبدالحمیدا دیما په «اعدامانی کمکنگ ماں اِیرانا» تاکید کرت و گوشتی: منی هیالا لهتے چه ملکَے جزایی قانوناں باید اپدا چارگ ببنت و اعدام کم کنگ ببنت. وهدے که ما پیگمبر، صحابه، اهلبیت و حضرت علییَے زندگیا چاریں، آ بزرگانی دَورا اعدام سک کم بوتگ.
زاهدانَے جمعهیَے پیشنمازا په «اعدامَے تاواناں ماں چاگردا» اشاره کرت و گوشتی: اعدامَے گُڈی تاوان سک باز اَنت. گوں یک نپرے اعداما بید چه اِشی که آئییَے جَن و زهگ بےمستر بنت و په آیاں بازیں مشکلاتے جوڑ بیت، دلانی تها هں کینگ و بغض پیش کئیت. دگه بازیں تاوانے هں هست که ادا نام گرگ نبنت.
واجهها ماں دگه بهرے چه وتی گپاں گوشت: پیسرا هں من وتی فقهی نظر/دیدانکاں که چه قرآن و سنتا گرگ بوتگنت، په لهتے چه ملکَے جزایی و کیفری قانونانی باروا بیان کرتگنت. اهلسنتَے فقهَے مطابقا شریعت و اسلامَے فقها اعدامَے باروا احتیاطَے نیمگ گپتگ تا اعدام کمتری حدّ و اندازهیا برسنت. اسلاما قصاص و اعدامَے حکم تهنا په همایاں که یکّے کشتگ اِش و یا راهبندان و مال دزی اِش کرتگ، داتگ. همےپیم په زنا هں اگه چهار شاهد ببیت شریعتا کُشگَے و سنگچوپییَے حکم داتگ.
واجهها دیما گوشت: آ جاهے که قرآن و سنّتَے صریح و روشنیں حکمے هست هیچکس نتوانت گپے بجنت، بلے دگه قتلاں که تعزیری حکم اَنت دیدانک پیش کنگَے مجال هست اِنت. ماں ایرانَے جزایی قانونا آ حکمے که اودا شرعی نصّے هست، کسا گپے نیست اِنت. بلے آ حکم که عالم و زانتکاراں داتگنت، آیانی چارگ و تجدید نظرَے امکان هست، بلکیں آ اجتهاد و نظرَے دیما دگه اجتهاد و نظرے ببیت.
?اعدامیانی مردم وتا بدار اَنت
زاهدانَے جمعهیَے پیشنمازا گڈسرا گور په اهلسنت و خاصکار اعدام بوتگینانی لوگی مردماں گوشت: مئے وصیت په اهلسنت و خاصکار آیاں که چه اِے کارا دلپدرد بوتگنت، اِشنت که وتی دلی احساساتا کنترل کنَنت و آرامشا بدار اَنت تا دگه دژمناں په وتی پائدهیا سوت مکٹّ اَنت.
چمشانک