ایمانءِ لوٹ چی انت یعنی اللہ تعالی چہ مومنیں بندہءَ ہر حبر و کارانی مطالبہءَ کنت آ خبر کجام انت اے بابتءَ چیزے عرض کنگ و سرگونڈیں حسابءَ ایمانءِ حقیقتءِ باروا چیزئے عرض کنگ مناسب انت مان قرآن حکیم و نبی کریم صلی اللہ علیہ وسلمءِ حدیثاں ایمانءِ ردا ہر چیکہ گشگ بوتگ آیانی مطلبءِ گیش و گیوار چوش انت۔
در اصل ایمانءِ نام انت ہما پحتہ ایں اعتقاد و یقینءِ کہ اللہءِ ذات و صفاتءِ باروا اللہءِ ملائکہءِ و اللہءِ کتابانی و رسولانی و قیامتءِ روچءِ بابتءَ ماں بندہءِ دل بہ صورتءَ تصدیق پیداگ و جاہ منند بیت پمشکا مومنین بندہ ہما کس انت کہ اللہءِ ذاتءِ و فرشتگانی و اللہءِ آسمانی کتاباں کہ ماں آیاں گڈی کتاب قرآن مجید انت، اللہءِ نبیاں و رسولاں کہ ماں آیاں آخری نبی محمدصلی اللہ علیہ وسلم انت و حشر و نشر جزا و سزاءِ سرا پھتہ اعتقاد و یقین گوں دلءَ داریت و بہ زبانءَ آرا تصدیق کنت و ایمانءِ عملی لوٹانی باب اے دابءَ انت کہ اللہءِ صفتءِ توحید کہ آئیءِ بیان ماں لاالہ الااللہءَ پوشیدہ انت و آئی مطلب ایش انت کہ اللہ پاک یک ویگانگ انت و کسے ماں آئی ذاتءَ شریک نہ انت و کسے آئی صفات و کارانی تہا شری دار نہ انت تھنا آئی وت تمام چیزاںءَ رودینیت و چار گند کنت بندیانی نفع و نقصان سیت و تاوان ایوکءَ ماں ہمائی دستءَ و اختیارءَ انت۔
اللہءِ اے صفت و توحیدے سرا ایمانءِ لوٹ بہ اے دابءَ انت کہ بندہءِ ہر یک عبادت بندگی و فرمان داری فقط پہ خدائیگی بہ بیت و چیریشی مقصود محض آئی رضا و خوشنودی حاصل کنگ بہ بیت و آئی زند چہ بر ڈولیں شرک و بدیءَ پاک بہ بیت ہمے ڈولءَ اللہءِ صفت رب العالمینءِ سرا ایمانءِ لوٹ ایش انت کہ مومنیں بندہ خدائے تمامیں مخلوقءِ بہتری و وشیءَ شوہازءَ بہ بیت و ہر یکے خیرءِ لوٹوک بہ بیت۔ ہنچوشکہ اللہءِ صفت و رحمت کہ سر آئی اسمائے حسنی رحمن و رحیم شون دیوک انت۔ ایشانی ردءَ ایمانءَ لوٹ چوش انت کہ مومنین بندہ گوں ہر کسءَ شفقت و رحمتءِ دستورءَ اختیار بکنت و گوں آیاں بہ مہربانیءَ پیش بئیت انت بزاں ایوکءَ نہ گوں ہر کسءَ عدل و انصاف بکنت بلکیں گوں احسان و فیاضیءَ پیش بئیت انت و ایثار و قربانی درشان بکنت۔ سر ملائکہ ایمان یارگ مطلب چوش انت کہ مومنیں بندہ چوش بہ فہمیت و باور بکنت کہ ماں دنیاءَ ملائکہ اللہءِ یک انچیں روحانی مخلوق ایت کہ مئے چماں آیاںءَ گندگ نتوان انت و لیکن آیانءَ بہ اللہءِ منشاء و مرضیءِ روءَ ماں دنیاءِ کارخانہءِ جتا ج
تا خدمات انجام دیوک انت و سر ایشان ایمان یاروک کجام یک چوشیں روحانی واقع انکار مہ کنت کہ مادی طورءَ کسے آئی تو جیل کت مہ کنت بے شک خیرءِ اے ندیستگیں قوتانی سرا اعتماد دارگءَ چہ انسانءَ روحانی قوت حاصل بیت۔
ماں آسمانی کتابانی سرا ایمان آرگءِ مقصد و مراد ایش انت کہ خدائے بر حقین آخری کتاب انت کہ سرائی تعلیمات و ہدایتءَ عمل کنگ پہ انسانءَ نفع سیت یاروک انت ماں زندہاتیءِ ہر معاملہءَ آئی حکمءَ منّگ و آئی سر عمل کنگ ضروری انت و ہر چیزءَ کہ منع کنگ بوتگ چہ آئی وتءَ دور دارگ ہم لازمی انت۔ و دینءِ ہمک کار و بارءِ تہا قرآن شریفءَ حقیقی معیار و مقیاس حساب بکنت ہمے دابءَ رسولانی سر ایمان آرگءِ معنی و مراد ہمیش انت کہ تمام رسول بر حق انت و اللہ تعالی ایشانءَ درچتگ و ایشانءَ پہ بنی آدمءِ ہدایت و راہ شونیءَ دیم داتگ انت کہ چریشاں گڈی و آخری نبی حضرت محمدصلی اللہ علیہ وسلم انت۔ کہ ماں مومنیں بندہءِ دلءَ واجہ نبیءِ بے پناہ محبت و بزرگی جاگہ بکنت و واجہءِ رد بند و سنّتانی سرا گوں مظبوطیءَ عمل بکنت، خصوصاً فساد و فتنہءِ دورءَ مسلمانءَ بایدانت کہ واجہ نبیءِ پنتانی سرا عمل بکنت۔
(سوغات دسمبر ۸۸)
واجہ مولانا خیرمحمد ندوی رحمہ اللہ
سرچمّگ: راستیں راہ
چمشانک