شیخالاسلام مولانا عبدالحمید، ماں زاهدان ءِ نماز جمعه ءِ دیوان ءَ (28 مهرماه 1402/ 20 اکتوبر 2023) شه فلسطین ءُ غزه ءِ جنگ ءُ کۆشاں بژن وارت ءُ سک سۆگه ئِے کرت که ڈیه ءِ زۆرآور ءُ سرکاراں په جنگ ءِ زوتێں بند کنگ ءَ سلاهکاری کن انت.
🔹غزه ءِ جاور به یک انسانی فاجعه ءِ بدل بیان انت
په سنیآنلاین ءِ سرهال ءَ شیخالاسلام مولانا عبدالحمید درشان کرت: اے رۆچاں دنیا ءِ سجهێن مردماں گند انت که ماں غزه ءَ هزاراں جنێن ءُ زهگ ءُ بےمیارێں مردمانی ساه گرگ بیت ءُ یک انسانی فاجعه ءِ اۆد ءَ جۆڑ بیان انت. هچ کس ءَ گت نه کرت که ماں اے جاور ءَ چشێن پێشامدے کپ ایت ءُ کار به اے جاها رس ایت که غزه ءِ مردمانی بێرانی ءِ سبب بیت.
واجه ءَ گێش کرت: راست انت که اۆلی سر ءَ کمجۆڑه ئێں پێشامدے کپت که شه یهودی ءُ اسرائیلیاں کشگ بوت؛ کسے اے پێشامد ءَ را نادلگۆش نه کنت ءُ پهکێن مردمانی دلگران کرت، بلێن اے پێشامد گندگێں جاه ءَ رس ایت؛ یک نێمگ ءَ حکومتے که تیوگێن حکومتاں شه آیی پلهمرزیَ کن انت ءُ آیرا رنگ رنگێں سامانَ دےانت، دگه نێمگ ءَ هما انت که اسرائیل ءِ زۆر ءُ سلاهانَ نه دار انت ءُ ماڑی ءُ شهر اش خراب بیان انت. گێشتری مردماں که کشگ بےانت غزه ءِ مردم انت که اے یک انسانی نقصانے.
🔹غزه ءِ جنگ ءِ بند نه کنگ اسرائیل ءِ چٹی ءَ انت
مولانا عبدالحمید گوشت: بازێن زمانے که مسلمان ءُ نامسلمانێں حکومتاں فلسطین ءِ پێشامدانی باروا نادلگۆش بوتگ انت، بلێن نون اے پێشامداں دنیا ءَ را جسکێنتگ ءُ دنیا ءِ انسانانی ڈاه داتگ که فلسطین ءِ مردمانی پکر ءَ به ات. عربی ءُ اسلامی ملکاں ءُ تیوگێن ملکاں که انسانی حقانی پکر ءَ انت بائد اے بنگپ ءَ نادلگۆش مه کن انت ءُ پرے جنگ ءِ بندکنگ ءَ هر کۆشستے کن انت.
زاهدان ءِ آدێنگ ءِ امام ءَ وتی هبرانی دێمتر ءَ گۆں اشاره به فلسطینیانی کشتگانی بازێں کچءُکساس ءَ اسرائیل ءَ را ڈاه دات ءُ گوشت ئِے: اگه اے جنگ همےرنگ روان بیت اسرائیل ءِ چٹی ءَ انت، پچےکه دنیا ءِ مردم زرد دار انت ءُ اے پێشامدانی گندگ پراوان سک انت لس سسائاں نه توان انت اے پێشامدان سگ انت. مئے باور همێش انت که آوان که شه هردو نێمگ ءَ کشگ بےانت انسان انت ءُ انسانی حق همێش انت همدگرے سر ءَ رحم کن انت. غزه ءِ مردم انسان انت ءُ نه بائد اێرنگ هۆرکشی ءُ درانڈی بے انت. ما اے جنایت ءَ سک اێر جن اێں ءُ شه میاناستمانی گلاں ءُ شه دنیا ءِ پهکێن حکومتاں لۆٹ اێں که پرے تباه کنۆکێں جنگے بند کنگ ءَ سلاهکاری کن انت ءُ پرے مردماں عادلانه ءُ جوانێں تۆجیلے درگێج انت.
🔹غزه ءِ نادراهجاهے سرے بێڑ دلبرێجۆکێں جنایتے ات
مولانا عبدالحمید دێمتر ءَ درائێنت: غزه ءِ نادراجاهے سرے بێڑ ءَ بازێں کۆشے داشت. ما اے جنایت ءَ را سک اێر جت، پچےکه باز دلبرێجۆکێں جنایتے انت. میان استمانی گلاں اے پێشامد ءَ نادلگۆش مه کن انت ءُ بےدۆزواهی ءَ آیرا رندگیری کن انت.
🔹گۆں جمهوری اسلامی ءِ بنهشت اێرکنۆکے حکم ءَ هم لهتے نه هشت که ماں تهران ءَ په اهلسنتاں مسیتے بندگ بیت
دارالعلوم زاهدان ءِ سرمستر ءَ گوشت: بژن انت که دێمے هپتگ ءَ دلبرێجۆکێں پێشامدے کپت که اهلسنتانی نمازخانه ءَ ماں تهران ءَ بند اش کرت، یک بهرے شه آ ماڑی ءَ هم واهندی اش کرت ءُ سندان اش برت.
مولانا عبدالحمید همےرنگ گۆں اشاره به کۆشستاں که په اهلسنتانی مسیت ءِ بندگ ءَ ماں تهران ءَ بوتگ، گوشت ئِے: آ زمان ءَ که مولانا عبدالعزیز رحمهالله ماں تهران ءِ شهیدرجایی ءِ دل ءِ نادراهجاه ءَ بستری ات، اے حکومت ءِ بنهشت اێرکنۆک هم همۆدا بستری ات. آیی مولانا عبدالعزیز رحمهالله ءِ حرمت ءَ را سکَ داشت ءُ هرکسے که په آیی نیاد ءَ بیاتێں، آییَ گوشت که په مولانا عبدالعزیز ءِ نیاد ءَ هم برو. همۆدا مولانا عبدالعزیز آیرا گوشت ات که ماں تهران ءَ اهلسنت مزنێں آباتی ئے انت، بلێن مسیتے نه دار انت. آیی گوشت ات اهلسنت مئے برات انت ءُ پرمان ئِے کرت ات که ڈگارے په مسیت ءَ دیگ بےانت. رۆتاکاں ءُ وتگوش ءَ هم اے هال ءَ را شنگ کرت. ڈگار ءِ جاگه هم معلوم کنگ بوت که منی گمان ءَ همے جاهے که نون صداءُسیما انت. تهران ءُ ملک ءِ اهلسنت هم باز وشال بوت انت که ماں تهران ءَ مسیت ءِ واهند بےانت، مولانا عبدالعزیز هم یک بانکی حساب ءِ جۆڑ کرت تاں تیوگێن اهلسنتاں په مسیتے بندگ ءَ مدد کن انت، بلێں ارمان که بدواهاں نه هشت که اهلسنت اۆدا مسیتے دیگ بےانت، اگه مۆکل اش داتێں آ مسیت په حکومت ءِ سۆب ءَ همَ بوت.
🔹تهران ءِ پونک ئِے نمازخانه ءِ بند کنگ اهلسنت ءُ پوره آزات سسائێں شیعیانی دلگرانی ءِ سبب بوتگ
مولانا عبدالحمید گوشت: وهدے که ماں تهران ءَ اهلسنتاں مسیتے دیگ نه بوت انت، آوان ماں تهران ءِ وڑوڑێں جاهاں صدمتری ءُ پنجاه متری ءُ گێش ءُ کمێں نمازخانه کریه اش کرت تاں اۆدا نماز بوان انت. تهران ءِ اهلسنتانی ٹوهترێں نمازخانه پونک ئِے نمازخانه ات. ماں اے نمازخانه ءَ پنچ وختے نمازاں نزیک به ده، بیست نپر ءُ نماز جمعه ئاں سیصد یا چارصد نپر ءَ نمازَ وانت. البت من وهدے که تهران ءَ شتێن آں باز کم اۆدا نمازَ وانت آں ءُ نمازجمعه ءَ هم ماں هتل ءَ وانت آں تاں که آزگسمایی ءِ سبب مه بیت.
واجه ءَ گوشت: ماں تهران ءِ نمازخانه ئاں ءُ همے پونک ءِ نمازخانه ءَ اگه گپے بوتگ دینی گپ بوتگ انت ءُ یک ٹکے هم سیاسی گپ نه بوتگ. ماں گچێنکاریاں هم بهر اش زرتگ بلێن ارمان که اے درگت ءَ مشکلانی آماچ بوتگ. ارمان که پونک ءِ نمازخانه ءَ را پوره واهندی اش کرت که اے چیز ءَ اهلسنت ءُ هر آزات سسائێں شیعه ءِ را دلپدرد کرت، پچے که اے کردار ءِ مولءُمراد دێمداری شه اهلسنتانی نماز ءَ ات ءُ کنۆکانی مذهبی ترۆندی ئے چێدگ ات.
🔹کارمستراں پچے اهلسنتێں پاگواجه ئان نه هل انت که زاهدان ءَ بیا انت؟!
مولانا عبدالحمید ماں دگه بهرے شه وتی هبراں گۆں اشاره به دێمداری شه اهلسنتێں پاگواجه ئانی آیگ ءَ به زاهدان ءَ گوشت: یکے شه اے هپتگ ءِ پێشامداں که ما را دلگران ئِے کرت اێش ات که نه هشت اش یک رمے شه خراسان ءِ پاگواجه ئاں زاهدان ءَ بیا انت. خراسان ءِ پاگواجه شه ڈیه ءِ گهترێں پاگواجه ئان انت که په هچ کس ءَ مشکل جۆڑ اش نه کرتگ. مولانا مطهری که شه نامپرشتێں پاگواجه ئان انت ءُ سرکار ءُ استمان آیی حرمت ءَ دار ایت، آ واجه ءَ را نه هشت اش که زاهدان ءَ بێت. وهدے بنگپ رندگیری بوت گوشت اش که خراسان ءِ کارمستراں دێمداری کرتگ. خراسان ءِ کارمستر پچے دێمداری کن انت؟! شه قدیم ءَ خراسان ءُ سیستانءُبلوچستان ءَ شت ءُ آت ءُ اُستات ءُ نشت بوتگ.
چمشانک