شیخ‌الاسلام مولانا عبدالحمید، ماں چهبار ءِ نمازجمعه ءِ دیوان ءَ (26 بهمن 1403/ 14 فبروری 2025) گۆں اشاره به دریاب‌کر ءِ مردمانی مشکلاں شه استان ءِ گورنر ءُ چهبار ءِ آزاتێں ڈیه ءِ سرمستر ءَ که هردوئاں بلوچ انت، لۆٹ ات که اے ڈیه ءِ مردمانی مشکلانَ رندگیری کن انت ءُ اول ءَ همے ڈیه ءِ مردمانی سۆبانَ دلگۆش کن انت.
🔹 انگت چهبار ءِ مردمانی بازێں ڈگارے سند دیگ نه بوتگ انت
په سنی‌آنلاین ءِ سرهال ءَ مولانا عبدالحمید درشان کرت: ارمان انت که چهبار، تیس، کنارک ءُ آدگه تیابدپی ڈیهاں که بازێں مشکلانی آماچ انت، تاں نون آوانی مشکلاں آ رنگ که بائد بیت، رندگیری نه بوتگ انت.
واجه ءَ گێش کرت: اشکنگ بیت که بازێنے شه چهبار ءِ مردمانی ڈگاراں انگت سند دیگ نه بوتگ انت. پمێشا اے ڈگاراں چنکه دست ءَ بها کنگ به انت.
مولانا عبدالحمید گوشت: مزنێں کارگساں که په سۆب برگ ءَ ادا آتگ انت، مردمانی ڈگاراں وتی نام ءَ ثبتَ کن انت ءُ شه اے ڈیه ءِ طرح ءُ رهبنداں ٹوهێں سۆبے کٹ انت، بلے اے ڈیهانی مردماں ناداری ءُ بےکاری ءُ گشنگی ءِ آماچ انت.
🔹 تهے ءُ ڈن ءِ زرکارێں کارگساں هج کنگ به انت که استان ءِ مردمانی سۆبانَ دلگۆش کن انت
زاهدان ءِ آدێنگ ءِ امام ءَ گێش کرت: ماں گوست ءَ دریاب‌کر ءِ نندۆکێں مردماں کمتر بےکاری ءِ آماچ بوتگ انت، بلے نون که په بهربرگ شه دریاب ءِ سۆباں بازێنے ادا آتگ انت ءُ لهتے ملک ءُ ٹوهێں کارگساں په زر ءِ امێت ءَ ادا منگنامه بستگ، الله ءُ مردماں اے چیز ءَ پسندَ نه کن انت که اے ڈیه ءِ نندۆکانی جند گشنگ به انت.
واجه ءَ گێش کرت: اگاں تهے ءُ ڈن ءِ کارگساں لۆٹ انت که شه اے دریاب‌کر ءِ نندۆکێں مردمانی سۆباں کارمرز کن انت، گڑا بائد انت اے مردمانی کارءُبارانَ هم دلگۆش کن انت.
🔹 په دریاب‌کر ءِ مردمانی آپ ءِ مشکل ءَ زۆتێں توجیلے درگێجگ بیت
مولانا عبدالحمید گۆں اشاره به چهبار ءِ مردمانی آپ ءِ مشکل ءَ گوشت: کے الله ءِ جواب ءَ دات کنت که اے مردم دریاب ءِ کر ءَ بےآپ به انت؟!
واجه ءَ گێش کرت: اگه دریاب ءِ آپ پالایگ بیت ءُ مردماں دیگ بیت، گڑا آوانی آپ ءِ مشکل جۆڑ بیت. وهدے که اے پالاپتگێں آپ دگه استاناں برگ بیت، بائد اول ءَ دریاب‌کر ءِ مردمانی آپ ءِ مشکل جۆڑ بیت.
🔹 وهدےکه استان ءُ چهبار ءِ آزاتێں ڈیه، دمگی کارمسترانی دست ءَ انت، نیمۆنے په مردمانی مشکلانی رندگیری نه کنگ ءَ نێست
زاهدان ءِ آدێنگ ءِ امام ءَ گوشت: نون که سیستانءُبلوچستان ءِ گورنر ءُ همےرنگ چهبار ءِ آزاتێں ڈیه ءِ سرمستر شه دمگ ءِ جند ءِ دلسۆچێں مردماں انت، گڑا هچ نیمۆنے په مردمانی مشکلانی رندگیری نه کنگ ءَ نێست.
واجه ءَ گوشت: مئے سۆگه په استان ءِ کارمستراں همێش انت که وتی کۆشست ءَ په مردمانی مشکلانی جۆڑ کنگ ءَ کن انت. البت مئے لۆٹ ءُ واهگ انت که گۆں دمگی کارمستراں گێشتر همکاری بیت تاں توان انت مردمانی مشکلانی جۆڑ کنگ ءِ ته ءَ سۆبێں به انت.
🔹 شه سرکار ءُ جمهوری کماش ءِ جند ءَ لۆٹ اێں که سیستانءُبلوچستان ءَ هاسێں دلگۆشے کنت/ ماں ٹوهێں طرح ءُ رهبنداں استان ءِ مردماں بائد دلگۆش به انت
مولانا عبدالحمید گوشت: مئے امێت‌داری شه سرکار ءُ جمهوری کماش ءِ جند ءَ همێش انت که سیستانءُبلوچستان ءُ هاسکار دریاب‌کر ءِ مردمانی نێمگ ءَ هاسێں دلگۆشے بیت. بائد انت تیابدپی ڈیهانی مردماں که سکیان اش سگ اِتگ، ماں سۆبمندی شه اے ڈیه ءِ سۆباں شه پهکاں دێمتر ءَ به انت.
واجه ءَ گێش کرت: ماں جمهوری کماش ءِ سپر ءَ په زاهدان ءَ، من آیرا گوشت که سیستانءُبلوچستان ءِ مردماں بازێں سکی ءُ زبهری ئے را سگ اِتگ، وهدےکه اے استان بازێں سۆبے چۆ: ٹوهێں ءُ بےجۆڑه ئێں معدن، بےمٹێں کشاری ئێں ڈگار، تیابدپ ءُ… دار ایت که شه ملک ءِ مزنێں سۆباں انت ءُ گێشتر شه اێشی انت که یک کارگسے اۆد ءَ زرکاری کنت. ماں اے ٹوهێں طرح ءُ رهبنداں بائد انت اے ڈیه ءِ مردماں نادلگۆش مه بنت. بائد اے ڈیه ءِ ته ءَ بنیاتی ڈیلءُڈۆلاں ساچگ به انت که په ملک ءُ استان ءِ پایدگ ءَ انت. ما را امێت است که ملک ءُ استان ءِ کارمستراں اے مردمانی سۆبانَ دلگۆش کن انت.
🔹 ایران ءِ مردماں شه مالزانشت ءِ بابت ءَ سکێں رۆچانَ گوازێن انت/ کارمستراں مردمانی مشکلانَ گند انت ءُ «زوتێں توجیلے» درگێج انت
زاهدان ءِ آدێنگ ءِ امام ءَ وتی هبرانی دێمتر ءَ گۆں اشاره به ملک ءِ مردمانی مالزانشتی ءِ رۆزیگی مشکلاں گوشت: مرۆچی ایران ءِ تیوگێں مردماں شه مالزانشت ءِ بابت ءَ سکێں رۆچانَ گوازێن انت. ملک ءِ زر ءِ ارزشت کپتگ ءُ کٹءُکاراں نقصان دیستگ ءُ گرانی ءِ سوب بوتگ.
واجه ءَ گێش کرت: وهدےکه کهول ءِ سرپرست کٹءُکارے مه داشته بیت بازێں مشکلے په چاگرد ءَ جۆڑ بیت. بازێں کهولانی ته ءَ جنگ ءُ جێڑه جۆڑ بوتگ ءَ سون/طلاق ءِ کچءُکساس ملک ءِ ته ءَ باز بوتگ. دزی ءُ رهزنی ءُ کۆش ءُ فساد ماں چاگرد ءَ باز بوتگ انت که یک بهرے شه آوان ناداری ءُ بےکاری ءِ برورد انت. ناداری یکے شه دنیا ءِ بدترێں آفت ءُ مشکلاں انت.
مولانا عبدالحمید ٹکاٹک گوشت: مالزانشتی مشکلانَ زوتێں توجیلے په کار انت. کارمستراں بائد مردمانی مشکلانَ گند انت ءُ چارگے درگێج انت. اگاں مردماں گشنگ انت، گڑا بائد کارمستراں ءُ پاگواجهاں هم گشنگی ءَ سگ انت.
🔹 ناامنی شه بدترێں پدرائشتان انت
زاهدان ءِ آدێنگ ءِ امام ءَ وتی هبرانی گڈسر ءَ په «امنیت ءِ پهازگ» ءَ سک سۆگه کرت ءُ گوشتء: ما امنیت ءِ ساتگ ءَ سک سۆگهَ کن اێں. مردم، پاگواجه، واکدار ءُ کارمستراں بائد په امنیت ءِ پهازگ ءَ کۆشست کن انت.
واجه ءَ ٹکاٹک گوشت: ناامنی شه بدترێں پدرائشتاں انت که په ڈیه ءَ باز بد انت ءُ گێشتری لٹ ءَ مردمانی سۆبانَ جنت.
چمشانک