سنی‌آنلاین| یکے شه زاهدان ءِ مزنێں پێشامداں دارالعلوم زاهدان ءِ طالبانی زانت‌دربری ءِ مراگش انت. اے مراگش هرسال ماں رجب ءِ گڈی رۆچاں برجم دارگ بیت ءُ علم ءُ زانت ءُ معنویت ءِ دۆستداراں شه ایران ءِ کنڈ کنڈاں ءُ شه ملک ءِ ڈن ءَ اے شهر ءَ کاینت. امبرانی هم پد شه چنکه سال اۆشت ءَ په کرونا ءُ دگه سوباں اے مراگش برجم دارگ بوت که شهر ءِ ندارگ ءَ بدل بوت ءُ مهمانی حالءُاحوال ءَ نۆکِ کرت.
هرچۆں که بهرزورۆکانی ٹکێں کچءُکساس مالوم نه ات، بلێں شه آ چیزے که ماں مصلا ءُ دگ ءُ کوچه ءُ مسیت مکی ءَ گندگَ بوت، زانگ بیت که گێش شه صدوپنجاه ءُ تاں دوصد هزار مردم ءَ ماں اے مراگش ءَ بهر زۆرتگ. جنێنانی آباتی هم باز باز ات ءُ ماں اے مراگش ءَ په جنێناں جتائێں جاگه ئے ماں مصلا ءَ جۆڑ کنگ بوت ات.
🔸قرآنی دیوان، مراگش ءِ کر ءَ
نماز دیگر ءَ پد (10 بهمن 1403) قرآنی دیوان برجم دارگ بوت که یک رمبے شه مهماناں شه ملک ءِ کنڈ کنڈاں بهر زۆرت. زبردستێں قاریاں ماں اے دیوان ءَ پاکێں قرآن ءَ وت ءُ مردمانی ارواهاں تازگ اش کرت.
پد ءَ مولانا عبدالمجید مرادزهی بلوچ ءُ اهل‌سنتێں شۆهازکار ءُ مولانا ڈاکٹر عبیدالله بادپا، دارالعلوم زاهدان ءِ فقه ءُ حدیث ءِ استاد ءَ گپ جت.
مولانا عبدالمجید مرادزهی گۆں اشاره به فلسطین ءِ مردمانی مظلومی ءَ اسرائیل ءَ را بیهارے په دنیا ءَ زانت ءُ طوفان الاقصا ءَ را په مسلماناں برکتے زانت ءُ سۆگهء کرت که په فلسطین ءِ مردماں دعا بیت ءُ اسرائیل ءِ کالائانی سر ءَ بندش بیت ءُ همےرنگ سۆگهء کرت که غزه ءِ مردم مالی کمک به انت.
مولانا دکتر عبیدالله بادپا هم گۆں اشاره به قرآن ءِ کرد ءَ ماں مسلمانانی راجدپتر ءَ گوشت: مسلمانان هرچی دار انت ءُ ماں آیوک ءَ واهند به انت، شه قرآن ءِ برکت ءَ انت ءُ همےرنگ هرچی شه دست اش شتگ پرێشا بوتگ که قرآن ءَ نادلگۆش اش کرتگ. آیی گوشت: وهدے شه اے سپر ءَ واتر به ات بائد وتی ءُ وتی لۆگمانانی اصلاح ءِ پکر ءَ به ات، اے باز هژدری انت که شمے زهگان قرآن ءَ یات گر انت.
واجه شیخ‌الاسلام ءَ هم ماں اے دیوان ءَ مهمانانَ وش آت گوشت ءُ آوانی دلانی وش کرت.
🔸پنچ‌شمبی ءِ سهب ءُ زانت‌دربری مراگش ءِ رسمی بنگێج
مراگش گۆں پاکێں قرآن ءِ تلاوت ءَ بنگێج بوت. گڑا مولوی محمودالحسن ازبک‌زهی شه دارالعلوم زاهدان ءِ زانت‌دربرۆکانی نێمگ ءَ گشتانک دات ءُ په علم ءِ دربرگ ءُ شنگ کنگ ءَ سک سۆگهء کرت. پد ءَ زبیر آخوند شه استان گلستان ءِ پاگواجهاں گشتانک دات ءُ په ورنا ءُ نۆکێں پدرێچ ءِ اپسله ءَ سک سۆگه کرت. آیی گۆں اشاره به نونێں چاگرد ءِ مشکلاں ءُ ورنائانی دوری ءَ شه دین ءَ گوشت که مرۆچی پاگواجهانی ذمه باز گران انت ءُ بائد په ورنائانی اپسله ءُ دینداری ءَ رهبندے درگێج انت.
اے دیوان ءِ آدگه گشتانک دئوک مولانا خدابخش اسلام‌دوست، چهبار ءِ جامعة‌الحرمین‌الشریفین ءِ فقه ءُ حدیث ءِ استاد ات که شه مولانا عبدالرحمان چهباری ءِ نێمگ ءَ ماں اے مراگش ءَ بهر زۆرتگ ات. آئی صحابهانی جاگه ءِ باروا گپ جت ءُ صحابهانَ ایمان ءُ وفاداری ءِ چێدگ زانت. آئی گوشت: صحابه واجه رسول الله صلی‌الله‌علیه‌وسلم ءِ اۆلی شاگرد ءُ واجه رسول الله ءِ پیغمبری ءِ راستی ءِ گواه بوتگ انت ءُ دۆستی گۆں آوان دۆستی گۆں واجه رسول الله ءَ انت.
مولانا اسلام‌دوست گێش کرت: آوان که صحابهانی بےحرمتی ءَ کن انت، چوناهی ءَ به قرآن ءُ واجه رسول الله ءِ پیغمبری ءَ باورے نه دار انت.
پد ءَ مولانا محمد مفلح، شه اۆگانستان ءِ زبردستێں پاگواجهاں نبشتانکے را وانت ءُ گڑا مولانا محمدطیب ملازهی، ایرانشهر ءِ شمس‌العلومِ دینی وانگجاه ءِ سرمستر ءَ گۆں اشاره به ایمان ءِ جاگه ءَ ماں زندگی ءَ صحابهانی ایمان ءَ را یک درورے شه گواچنی ئێں ایمان ءَ زانت ءُ گوشت ء که ایمان بس گۆں دپ ءَ نه انت، بلکه ایمان هما انت که دل هم آیرا منّ ایت.
مراگش ءِ اۆلی بهر گۆں 2019 ءُ2020/ 1398 ءُ 1399 ءِ طالبانی پاگبندی ءَ هلاس بوت.
🔸مراگش ءِ دۆمی بهر گۆں مولانا عبدالغنی بدری، دارالعلوم زاهدان ءِ هێلکاری کمکار ءُ تفسیر ءُ حدیث ءِ استاد ءِ گشتانک ءَ بنگێج بوت.
مولانا بدری وتی هبرانی اۆلی سر ءَ گلگ کرت که زبردستێں پاگواجه ءُ مزن‌سسائانَ نه هشتگ اش که ماں اے مراگش ءَ بهر زور انت. آیی گوشت که گێشتری مهمانان په آتن ءَ مشکلے نه داشتگ، بلێں ارمان که لهتے پاگواجهانَ که شه «کردستان»، «گلستان»، «خراسان»، «هرمزگان»، «فارس» ءُ تهران ءَ لۆٹتگ اش که بیا انت، نه هشتگ اش.
مولانا بدری زانت‌دربری مراگشانَ یکویی ءِ چێدگ زانت که چۆشێں مراگشاں سوب به انت که یکویی گێشتر بیت ءُ ما را امێت است که آیوک ءَ چۆشێں مشکل پێش مه یَێت.
گڑا شیخ سید عقیل صدیقی، شه استان هرمزگان ءِ پاگواجهاں گپ کرت. آیی گوشت مرۆچی لهتے جهد کن انت تاں سنت ءُ حدیث ءَ شه قرآن ءَ جتا کن انت که اے باز خطرناک انت، پچے که قرآن تهنکا بس نه انت ءُ اے چیز مسلمانانَ شه هدایت ءِ راه ءَ دور کنت.
پد ءَ مولانا عبدالحکیم سیدزاده، سراوان هند، گشت ءِ دینی وانگجاه عین‌العلوم ءِ حدیث ءِ استاد ءَ عدالت ءِ باروا گپ جت. آیی گوشت وهدے عدالت اێر دارگ بیت چاگرد ءِ مچێں مردماں وتی حق ءَ رس انت ءُ همےرنگ په چاگرد ءُ ردءُبند ءُ امنیت ءَ کمک کنت. مولانا سیدزاده همےرنگ به ظلم ءَ اشاره کرت ءُ گوشت ء که هر چاگردے که اۆد ءَ ظلم بیت، یک رۆچے آ چاگرد پرۆش وارت.
گڑا مولانا گل‌محمد مؤمن، خراسان ءِ هند، خواف ءِ دینی وانگجاه ءِ استاد ءَ علم ءُ زانت ءِ جاگه ءِ باروا گپ جت. آیی گوشت: اگاں مردم امربه‌معروف ءُ نهی‌شه منکر ءَ نادلگۆش کن انت ءُ شه علم ءَ دور به انت گڑا دین ءُ چاگرد نقصان گند ایت.
مراگش ءِ دۆمی بهر گۆں 2021/ 1400 ءِ طالبانی پاگبندی ءَ ءُ گۆں(2019، 2020ءُ2021) 1398، 1399، 1400 ءِ جنێنێں دربرۆکانی تجلیل ءَ هلاس بوت.
🔸مراگش ءِ گڈی بهر
مراگش ءِ گڈی بهر شه پێشین ءِ نماز ءَ پد بنگێج بوت. ماں اے بهر ءَ مولانا مفتی محمدقاسم قاسمی، شیخ ابراهیم اسماعیلی ءُ شیخ‌الاسلام مولانا عبدالحمید ءَ گپ کرت ءُ زانت‌دربرانی پاگبندی ءُ تجلیل بوت.
🔸 مولانا مفتی محمدقاسم قاسمی، دارالعلوم زاهدان ءِ دارالافتاء ءِ سرمستر ءُ حدیث ءُ فقه ءِ زبردستێں استاد ءَ گۆں اشاره به واجه رسول الله ءِ معراج ءِ پێشامد ءَ آیرا مهمانی ءُ عزتے شه الله ءِ نێمگ ءَ په وتی پیغمبر ءَ زانت ءُ گوشتء پد شه اێشی که واجه رسول الله سکی ءُ رنجانی آماچ بوت، الله پاک ءَ آیرا په معراج ءَ برت. مولانا قاسمی گوشت: نماز بندگانی معراج انت که نماز ءِ سوب ءَ گۆں وتی الله ءَ رهوت کنت ءُ وتی جان ءُ ارواه ءَ اصلاح کنت ءُ شه چاگرد ءِ رڈی ءُ چۆٹیاں پهازگ بیت.
پدا شیخ ابراهیم اسماعیلی، هرمزگان ءِ هند، سیریک ءِ آدێنگ ءِ امام ءَ گپ کرت. آیی گوشت: اهل‌سنتاں په ایران ءَ دادے انت ءُ په ملک ءِ تپاک ءُ یکویی ءَ باز جهد اش کرتگ. اسماعیلی گوشت نه بائد شه چۆشێں مراگشاں مکن بیت. آیی گوشت استان ءِ ڈیهانی مشکلانی باروا گۆں واجه شیخ‌الاسلام ءَ شۆر بیت. آیی همےرنگ گوشت که مهمترێں چیز په ملکی یکویی ءَ بودناکێں کارمسترانی گچێن کنگ انت.
🔸 مراگش ءِ گڈسر ءُ واجه شیخ‌الاسلام مولانا عبدالحمید ءِ گپاں
دارالعلوم زاهدان ءِ طالبانی زانت‌دربری ءِ سیءُچارمی مراگش گۆں واجه شیخ‌الاسلام مولانا عبدالحمید، دارالعلوم زاهدان ءِ سرمستر ءِ گشتانک ءُ دعا ءَ هلاس بوت. واجه ءَ پد شه مهمانانی وش آت گوشی ءَ په دینی ءُ دنیایی علم ءُ زانتانی دربرگ ءَ سک سۆگه کرت ءُ گوشتءِ که لازم انت که دینی وانگجاه ءُ شهدربرجاهاں برابر دێم ءَ برو انت، پچے که آ دنیا وهدے آباد بیت که مردم وت ءَ ماں اے دنیا ءَ اصلاح ءُ جۆڑ کنت.
واجه ءَ سک سۆگه کرت که زانت ءِ دربرگ بس مردێنانی نه انت، بلکه جنێں ءُ مردێناں بائد انت په زانت ءِ کٹگ ءَ جهد کن انت.
🔹ما میانه ئێں راه ءِ سر ءَ اێں ءُ تیوگێں مردمانی خیر ءَ لۆٹ اێں
په سنی‌آنلاین ءِ سرهال ءَ مولانا عبدالحمید پد شه مردمانی وش آت گوشی ءَ که شه ملک ءِ وڑوڑێں ڈیهاں آت ات انت، گوشتء: مئے راه، میانه ئێں راه انت ءُ ما تانسرپسندی ءَ نه من اێں. ماں اسلام ءَ تانسرپسندی نێست. اعتدال و میانه‌روی مانۆکێں راهے که الله ءِ پسند انت.
واجه ءَ گێش کرت: ما په مردمانی سۆب ءَ پکر کن اێں ءُ تیوگێں مردمانی خیر ءَ لۆٹ اێں. الله ءِ پیغمبراں په تیوگێں مردماں پکر کرتگ ءُ پهکانی خیر ءَ لۆٹ اتگ اش ءُ په مردمانی دنیا ءُ آخرت ءِ آبادی ءَ جهد اش کرتگ.
🔹اسلام تعامل ءُ مدارا ءُ پرایمنێں زندگی ءِ دین انت
زاهدان ءِ آدێنگ ءِ امام ءَ گوشت: اسلام تعامل ءُ مدارا ءُ پرایمنێں زندگی ءِ دین انت ءُ «جهاد» ماں اسلام ءَ شه بازێں کارزانتانی دیدانک ءَ «دێمپانی جهاد» انت که په دێمداری شه ظالمانی ظلم ءُ بێڑ ءَ بیت.
واجه ءَ گێش کرت: تیوگێں اسلامی کارزانتاں تپاک انت که اسلام گۆں زهم ءِ زۆر ءَ دنیا ءِ ته ءَ شنگ نه بوتگ، بلکه گۆں جوانێں ءُ رۆشنێں باور ءُ احکاماں دنیا ءِ مردمانی دلانی ته ءَ پترتگ. نونێں زمانگ ءَ هم اگاں مسلماناں لۆٹ انت که دنیا ءِ مردمانَ اسلام ءِ نێمگ ءَ بیار انت گڑا بائد به اسلامی ءُ قرآنی اخلاق ءُ واجه رسول الله صلّی‌الله‌علیه‌وسلّم پرمائشاں لچ انت.
🔹 «مالزانشتی ءُ رۆزیگی مشکلاں» شه ایران ءِ مردمانی ٹوهترێں مشکلاں انت
مولانا عبدالحمید وتی هبرانی دێمتر ءَ گۆں اشاره به ایران ءِ مردمانی مشکلاں گوشت: ایران همے ملک ءِ مردمانی ملک انت ءُ آیی مڈیاں هم همے مردمانی انت. اے ایران ءِ مردمانی حق انت که آوانی مشکلاں رندگیری به انت.
واجه ءَ گێش کرت: یکے شه ایران ءِ مردمانی ٹوهترێں مشکلاں که ما را رنجێنتگ مالزانشتی ءُ رۆزیگی مشکل انت. زندگی په بازێں مردمے هاسکار کم درامد ءُ بےکاراں سک بوتگ. کارمند ءُ شرکت ءُ کارجاهانی واهندان پرێشی که زر ءِ ارزشت کپتگ مشکلانی آماچ انت.
🔹ایران شه دنیا ءِ هزگارێں ملکان انت/ ملک ءَ «زۆراکێں کارمستری» ءُ هم پکری ئے پکار انت
زاهدان ءِ آدێنگ ءِ امام ءَ درشان کرت: ایران بودشت ءُ معدنانی پڑا شه دنیا ءِ هزگارێں ملکان انت؛ گڑا پچے ایران ءِ مردماں مالزانشتی مشکلانی آماچ به انت؟! کارمستراں بائد په مردمانی مشکلاں هاسکار رۆزیگی مشکلاں جوانێں توجیلے درگێج انت. اے مشکلاں توجیل دار انت که بائد درگێجگ به انت.
واجه ءَ سک سۆگه کرت که ایران ءِ مڈیاں په ملک ءِ جندے مردماں هرچ به انت. فیصله کنۆکاں مدام بائد ملک ءِ سۆبانَ شه دگه چیزاں دێمتر زان انت.
مولانا عبدالحمید سستێں کارمسترانی کارمرز کنگ ءَ را شه ملک ءِ نونێں مشکلانی سوباں زانت ءُ گوشتء: یکے شه نونێں بازێں مشکلانی سوب ءَ سستێں کارمسترانی کارمرز کنگ انت. ملک ءَ زۆراکێں کارمستری ءُ هم پکری ئے پکار انت.
🔹ایران ءِ استمان ءُ اهل‌سنتێں چاگرد ءُ پاگواجهانی میانجین ءَ مهر ءُ همدلی است
زاهدان ءِ آدێنگ ءِ امام ءَ ماں دگه بهرے شه وتی هبراں وتی وشالی ءَ شه ایران ءِ مردمانی محبت ءُ گۆں همدگر ءَ ءُ همےرنگ اهل‌سنتێں پاگواجهانی همدلی ءَ درشان کرت ءُ گوشتء: الحمدلله مرۆچی اهل‌سنتێں پاگواجهاں همدگر ءَ همراهی ءُ پله‌مرزیَ کن انت. دێرێں وهدے که ایران ءِ مردمانی میانجین ءَ هاسکار اهل‌سنتانی میانجین ءَ همدلی ءُ مهر باز بوتگ.
واجه ءَ گوشت: ایران ءِ مردماں یک استمان ءُ شه دنیا ءِ گهترێں استمانان انت. الله پاک عزتے را که اے مردمانی لائک انت آوانَ دنت ءُ ایران ءِ استمان ءَ سربرز کنت.
🔹تیوگێں مردم ءُ اثردارێں مردماں په امنیت ءِ پهازگ ءَ کۆشست کن انت
مولانا عبدالحمید سک سۆگه کرت: ڈیه ءِ امنیت ءِ پهازگ سک هژدری انت ءُ پهکانی سۆب ءَ انت. تیوگێں مردم ءُ اثردارێں مردماں په امنیت ءِ پهازگ ءَ کۆشست کن انت.
واجه ءَ گێش کرت: اثردارێں گپ ءُ شرگداریاں جوان انت. لۆٹ ءُ مشکلاں بائد گۆں ترانکاری ءَ گیشءُگیوار به انت.
🔹دارالعلوم زاهدان ءِ بن‌هشت ءَ را مزن‌سسائێں مردمے ءُ باخدا ئێں پاگواجه ئے اێر کرتگ
مولانا عبدالحمید وتی هبرانی دێمتر ءَ گوشت: دارالعلوم زاهدان ءِ بن‌هشت ءَ را مولانا عبدالعزیز رحمه‌الله که مزن‌سسائێں مردم ءُ باخدائێں پاگواجه ئے ات، اێر کرت ات. پهکێں برکتاں که شما ادا گند ات شه مولانا عبدالعزیز رحمه‌الله ءِ اخلاص ءُ دعا ءُ زحمتاں انت ءُ همےرنگ اے بنجاه ءِ باسک ءُ استادانی جهد ءُ هم پکریانی برورد انت.
🔹شه پهکان که پرے دیوان ءِ برجم دارگ ءَ جهد اش کرتگ، منتوار اێں/ اے ڈیه ءِ کارمستران همکاری کرت
🔹شه اے بابت ءَ گلگ دار اێں که لهتے زبردستێں پاگواجهانَ نه هشت اش ادا بیا انت
شیخ‌الاسلام مولانا عبدالحمید وتی هبرانی گڈسر ءَ ماں اے دیوان ءَ گوشت: ما شه پهکاں که په اے دیوان ءِ برجم دارگ ءَ همکاری اش کرتگ، چه مالی ئێں کمک به انت یا هزمت ءُ دێمراهی شه مهمانان بیت، ما شه آوان منتوار اێں ءُ پراوان دعا کن اێں.
واجه ءَ گێش کرت: استان ءِ کارمستران هم همکاری کرت ءُ هاسێں مشکلے جۆڑ نه بوتگ. البت شه اے بابت ءَ گلگ دار اێں که لهتے زبردستێں پاگواجهانَ نه هشت اش که ماں اے دیوان ءَ بهر زور انت.
چمشانک