شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (28 دی‌ماه 1403) گۆں اشاره به «میاں‌رۆدرهت ءِ چستءُاێر ءُ نۆکێں جاوراں» جمهور اسلامی ایران ءِ کارمسترانَ سۆگه کرت که «په بندش ءُ پاترپانی دور کنگ ءَ نۆکێں سیاست زور انت» ءُ «گۆں تیوگێں دنیا ءَ رهوت» کن انت.
🔹غزه ءِ آسبندی ءِ منگنامه ءَ تیوگێں دنیا ءِ مردمانَ وشال کرت
په سنی‌آنلاین ءِ سرهال ءَ مولانا عبدالحمید اول سر ءَ به غزه ءِ آسبندی ءِ منگنامه ءَ اشاره کرت ءُ گوشتء: اسرائیل ءُ غزه ءِ میانجین ءِ آسبندی که بازێنے شه ٹوه ءُ گونڈێں سرکاراں پرایی جهد کرت ات، مزنێں مستاگی، ءُ وشالی ءِ سوب بوت. درێگے اے آسبندی هما اۆلی رۆچاں بوتێں که نزیک به پنجاه هزار فلسطینی که گێشتری جنێن ءُ گونڈل انت، کشگ مه بوتێن انت ءُ اێنکس بیرانی ءُ نقصان مه بوتێں.
واجه ءَ گێش کرت: انگت هم وشالی ءِ جا انت که آسبندی بوت ءُ گێشترێں جانی ءُ مالی نقصانانی دێم گرگ بوت. اے آسبندی غزه ءُ تیوگێں دنیا ءِ مردمانی وشالی ءِ سوب بوت.
🔹هردو پاٹی آسبندی ءِ سر ءَ پابندی کن انت
زاهدان ءِ آدێنگ ءِ امام ءَ دێمتر ءَ هردو پاٹیانَ په «آسبندی ءِ سر ءَ پابندی کنگ ءَ» سۆگه کرت ءُ گوشتء: مئے سۆگه په دۆئێں پاٹیاں همێش انت که منگنامه ءِ مچێں بندانی سر ءَ عمل کن انت که دوارگ دگه مشکلے جۆڑ مه بیت.
واجه ءَ گوشت: ما را امێت هست که آیوک ءَ گیشءُگیوار ءُ مدامی ئێں سهلے بیت که فلسطین ءِ مظلومێں مردماں وتی حقاں رس انت.
🔹ملک ءِ کارمستراں ماں میاں‌رۆدرهت ءِ نۆکێں جاور ءَ، گۆں نۆکێں سیاستاں بیا انت
مولانا عبدالحمید وتی هبرانی دێمتر ءَ شه «میاں‌رۆدرهت ءِ نۆکێں چستءُاێراں» هال دات ءُ گوشتء: گۆں نۆکێں پێشامدانی که ماں میاں‌رۆدرهت ءَ کپتگ، ماں اے ڈیه ءَ جتا ءُ هاسێں جاورے پێش آتگ ءُ نۆکێں چستءُاێراں ماں میاں‌رۆدرهت ءَ پێداگ انت.
واجه ءَ گێش کرت: بازێں ملکے وت ءَ گۆں میاں‌رۆدرهت ءِ نۆگێں جاور ءُ چستءُاێراں همرنگَ کن انت. گهتر انت که جمهوری اسلامی ایران ءِ کارمستراں هم ماں وتی سیاستاں اے نۆکێں جاورانَ دلگۆش کن انت تاں په ملک ءَ نۆکێں مشکل جۆڑ مه بیت.
🔹کارمستراں تهنا گۆں یک هاسێں پاٹی ئے که گواچنانَ نه گند انت، شۆرءُسلاه مه کن انت/ مگه اشکالے دار ایت که لهتے مشکلانی باروا «ووٹ‌کاری» برجم دارگ بیت؟
زاهدان ءِ آدێنگ ءِ امام ءَ گوشت: پێغمبرانَ هم شۆرءُسلاه زلورت بوتگ؛ الله پاک ءَ ماں اے پاگپ ءَ «و شاورهم فی الامر» واجه رسول الله صلی‌الله‌علیه‌وسلم ءَ سۆگه کرتگ که گۆں وتی اصحاباں شۆرءُسلاه کنت. کارمستر ءُ فیصله کنۆکاں تهنا گۆں یک هاسێں پاٹی ئے که گواچنانَ نه گند انت، شۆرءُسلاه مه کن انت، بلکه گۆں هماوان که بےروداری ءَ وتی دیدانکاں درشان کن انت، شۆرءُسلاه کن انت.
واجه شیخ‌الاسلام ءَ ٹکاٹک گوشت: مگه اشکالے دار ایت که وهدے کسے نه توانت لهتے مشکلانی باروا فیصله ئے کنت، «ووٹ‌کاری» برجم دار اێں ءُ لس مردمانی دیدانکاں جست کن اێں؟ ماں دنیا ءِ بازێں ملکے اے کار ءَ کن انت.
🔹رهوت گۆں تیوگێں دنیا ءَ ایران ءِ استمان ءِ لۆٹ انت
مولانا عبدالحمید ٹکاٹک گوشت: منی سۆگه همێش انت که کارمستراں گۆں رۆدرهت ءُ رۆاێرشتێں ملکاں ءُ اسلامی ءُ نامسلمانێں ملکاں رهوت ءُ ترانکاری کن انت. رهوت گۆں تیوگێں دنیا ءَ ایران ءِ استمان ءِ لۆٹ انت. بائد انت که ترانکاری ءِ دروازگ پاچ بیت.
واجه ءَ سک سۆگه کرت: په دێمداری شه بندشاں بائد جوانێں توجیلے درگێجگ بیت، پچےکه ملک ءِ رکێنگ ءِ هبر انت. گهترێں سیاست همێش انت که استمان ءِ لۆٹانَ منّ اێں.
🔹کارمستراں نه بائد گۆں هچ ملکے «استراتژیکێں منگنامه» دست‌رند کن انت؛ ملک ءِ آزاتی بائد پهازگ بیت
مولانا عبدالحمید وتی هبرانی دێمتر ءَ گۆں اشاره به راجکماش ءِ سفر ءَ به روسیه ءَ گوشت: مئے سۆگه په کارمستراں همێش انت که گۆں هچ ملکے استراتژیکێں منگنامه دست‌رند مه کن انت، هاسکار دێمپانی منگنامهاں که په ملکے چٹی ءَ انت. البت لس منگنامه ءُ آ منگنامهاں که مالزانشتی انت ءُ مردم ءُ ملک ءِ سۆب ءَ انت، زبر انت.
واجه ءَ گێش کرت: شه ملک ءِ مهمترێں سۆباں ملک ءِ آزاتی ءِ پهازگ انت. گۆں رۆدرهت ءُ رۆاێرشت ءُ چین ءُ روسیه ءُ امریکا ءُ اروپا ءَ رهوت گر ات؛ اے په ملک ءِ سۆب ءَ انت، بلێں وت ءَ هچ ملکے ءِ وابستگ مه کن ات.
🔹زاهدان ءِ هۆنێں جمعه ءِ باروا ما «حق» ءِ لۆٹۆک اێں
🔹مردم دلگران مه به انت؛ هۆنێں جمعه ءِ بن‌گپ رندگیریَ بیت
مولانا عبدالحمید ماں دگه بهرے شه وتی هبراں گۆں اشاره به آمیدگس ءِ گڈی رأی ءَ هۆنێں جمعه ءِ باروا گوشت: همے زوتاں یک هالے هۆنێں جمعه ءِ باروا ماں چاگردی رسانکدراں شنگ بوتگ که مردمانی پرێشان کرتگ. بازێنے بهمانگ انت که پچے ما چیزے نه گوشتگ.
واجه ءَ گێش کرت: چیزے که ماں چاگردی رسانکدراں شنگ بوتگ، سیستانءُبلوچستان ءِ دادگستری ءِ سرمستر ءَ یک جستے ءِ پسو ءَ گوشتگ که گیشءُگیوارے بوتگ بلێں بائد مچێں پاٹیاں گۆں کارزانت ءُ پاگواجهانی هوری ءَ گۆں وت نند انت ءُ گپءُتران کن انت تاں کسے ءِ حق پادمالی مه بیت.
🔹شه مئے دیدانک ءَ هونێں جمعه ءِ بابت ءَ بائد «قصاص» اێر دارگ بیت ءُ آیی پرمانۆکاں سزا دیگ به انت
مولانا عبدالحمید گوشت: آمیدگس ءِ پێسر ءِ رأی باروا، شهیدانی لۆگمانانی وکیلاں بنیادی کانود ءِ رد ءَ اێراد گپت ءُ ما هم هما وهد ءَ منبر ءِ سر ءَ گوشت که اے بن‌گپ قصاص دار ایت. البت مئے هبر اێش انت که حق اێر دارگ بیت. وهدےکه حقێں گیشءُگیوارے بیت پهکاں آیرا من انت.
چیزے که پێسر ءَ گوشگ بوتگ ءُ نون هم مچێں مردماں آیی لۆٹۆک انت همێش انت که آ پێشامد ءِ پرمانۆکاں هم سزا دیگ به انت ءُ گۆں هچ کس ءَ روداری مه بیت.
واجه ءَ گوشت: ما اے باروا وتی دیدانک ءَ په کارمستراں نبشتگ ءُ دێم داتگ. دادگستری ءِ سرمستر ءَ گوشت که اے بن‌گپ انگت رندگیری بیان انت ءُ مهمێں ٹک اێش انت که شهید ءُ ٹپیانی حق پێلو دیگ بیت ءُ آوانی وشنودی کٹگ بیت.
🔹ایران ءِ استمان شه پاهوانی گێش بوگ ءَ پرێشان ءُ تپرکه انت
زاهدان ءِ آدێنگ ءِ امام ءَ وتی هبرانی گڈسر ءَ پاهو ءِ حکمانی باروا گوشت: همے زوتاں لهتے مردمانی پاهو ءِ حکم که لهتێنے شه آوان جنێن انت، دیگ بوتگ. ما شما را گۆں دلسۆچی ءَ سۆگه کن اێں که استمان ءِ نێمگ ءَ بیا ات ءُ پێسر ءِ سیاستانَ، هاسکار پاهو ءَ بند کن ات.
واجه ءَ گێش کرت: ایران ءِ استمان ءُ دگه استماناں شه اے پاهواں پرێشان انت. کارمستراں شه هر کارے که مردمانی دلانَ رنجێن ایت، پهرێز کن انت.
چمشانک