شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (9 آذر 1403) زۆر پر دات که «نرمێں گپ ءُ سیاستانی» راسدێمێں اثر شه «ترۆندێں سیاست ءُ کردارانی» اثر ءَ گێشتر انت ءُ سک سۆگه ء کرت که «مردمانی وشنودی کٹگ بیت» ءُ «کانود ءُ سیاستاں مردمانی سۆبانی رد ءَ ٹگلێنگ» به انت.
په سنیآنلاین ءِ سرهال ءَ مولانا عبدالحمید گوشت: الله تعالی گۆں سکگری ءُ ترۆندی ءَ همراه نه انت، بلکه الله پاک ءِ دلگۆش ءُ همراهداری گۆں نرمتبی ءُ نرمێں گپان انت. الله پاک ءَ مهتر موسی ءُ هارون علیهماالسلام ءَ سۆگه کرتگ که: «فَقُولَا لَهُ قَوْلًا لَيِّنًا لَعَلَّهُ يَتَذَكَّرُ أَوْ يَخْشَى» گۆں فرعون ءَ که شه راجدپتر ءِ ٹوهترێں وتمن ءُ زۆرآوراں بوتگ، په نرمی هبر کن ات، بوت کنت که آ نصیحت بزور ایت یا به ترس ایت.
واجه ءَ گێش کرت: اے الله پاک ءِ سۆگه په مهتر موسی علیهالسلام ءَ چوناهی ءَ په مچێں دنیا ءِ مردمان انت که نرمێں هبر ءُ سیاستاں شه ترۆندێں کردار ءُ سیاستاں گهتر کار کن انت. راجدپتر ءِ دعوت دهوک، صالح ءُ حکومتانی کتهکاریانی رد ءَ نرمتبی ءُ مردمداری گهتر کار کنت. مئے سۆگه په تیوگێں حکومت ءُ سرکاراں همێش انت که ترۆندێں کردار ءُ هبراں کارا نه انت ءُ مدام بائدانت شه نرمێں گپ ءُ کردار ءَ کار گرگ بیت.
🔹 اے 45 سال ءِ دراجی ءَ لهتے کانود ءُ رهبندانی ته ءَ هچ بدلی ءِ نیاتگ/ کانودانی جۆڑ کنگ ءِ وهد ءَ بائد انت دنیا ءِ جاور دلگۆش کنگ بیت
زاهدان ءِ آدێنگ ءِ امام ءَ درشان کرت: سۆگه ئے که من تاں نون داشتگ همے بوتگ که چۆ آدگه ملکاں آ کانوداں که بےپۆک بوتگ انت، بائد انت ٹگلێنگ به انت. پچےکه چشێں بےپۆکێں کانودانی نقصان باز گێشتر انت.
واجه ءَ گوشت: آ کانوداں که شه بنیآدمانی نێمگ ءَ درگێجگ به انت تاں یک وهدے کارآمد انت ءُ مدام جواب نه دنت ءُ بائد انت گۆں جاور ءِ بدل بیگ ءَ ٹگلێنگ به انت. الله ءِ حکم ءُ کانوداں هم بازێں جاگه ئے «نسخ» به انت ءُ گۆں جاور ءِ بدل بیگ ءَ نۆکێں حکمے کێت. البت گۆں واجه رسول الله صلیاللهعلیهوسلم ءِ وفات ءَ ءُ وحی ءِ بند بیگ ءَ الله ءِ حکم ءُ کانوداں نص انت ءُ تاں قیامت ءَ ٹگل نه ور انت.
مولانا عبدالحمید گوشت: بژن انت که 45 سال گوستگ ءُ انگت لهتے شه کانود ءُ رهبنداں کمے هم ٹگلێنگ نه بوتگ انت ءُ ملک ءَ شه اے بابت ءَ نقصان دیستگ. اے گپاں گواچن انت که من شه دلسۆچی ءَ گوش آں. ما ماں همے دنیا ءَ زند گوازێن اێں ءُ بائد انت جاور ءَ دلگۆش کن اێں که کجام کانوداں مردمانی سۆب ءَ انت.
🔹 شه شورای تامین ءِ شۆر ءَ په پٹءُپاسی اۆشتجاهانی جمع کنگ ءَ وشال اێں؛ چۆشێں گامگێجاں په «یکویی» ءُ «امنیت» ءَ اثر دار انت
🔹 هر دێمرئی ءِ بنگێج امنیت انت
مولانا عبدالحمید ماں دگه بهرے شه وتی هبراں گوشت: ما باز وشال اێں که استان/ هلاکه ءِ شهرانی ءُ هاس زاهدان ءِ پٹءُپاسی اۆشتجاهاں جمع کنگ بوتگ انت. سیستانءُبلوچستان ءِ هلاکهدار ءُ شورای تامین ءَ اے باروا هێمات کرتگ.
واجه ءَ گێش کرت: من دجم آں که ترۆندی ءُ زۆر په یکویی ءُ امنیت ءَ بےپۆک انت، بلێں اے گامگێج که استان ءِ شورای تامین ءَ کرتگ که پٹءُپاسی اۆشتجاهانَ جمع کرتگ جواب دنت. «یکویی» ءُ «امنیت» دو چیز انت که یکءُآدگر ءِ سر ءَ اثر دار انت. ما هم په ملک ءُ استان ءِ امنیت ءَ سک سۆگهَ کن اێں. هر دێمرئی ءِ بنگێج امنیت انت ءُ اے استان ءِ دێمرئی هم گۆں امنیت ءَ بیت.
🔹 ماں استان ءَ «مردمی جنزے» په «امنیت ءِ ساتگ» ءَ بنگێج بوتگ
زاهدان ءِ آدێنگ ءِ امام ءَ گوشت: ما شه امنیتی واکداراں گلگ دار اێں که جمهوری کماش ءِ سفر ءِ درگت ءَ زۆر ءُ سکیاں که مسیت ءُ وانگجاه ءِ سر ءَ ات انت، زورگ بوت انت، بلێں نون دوارگ هما زۆر ءُ سکیاں بیگ ءَ انت. ما شما را سۆگهَ کن اێں که اے زۆراں بےپۆک انت، اگاں امنیتَ لۆٹ ات، گڑا هما کار ءَ کن ات که شورای تامین ءَ کرت ءُ پٹءُپاسی اۆشتجاهانی جمع کرت.
واجه ءَ زۆر پر دات: ما پهکاں ماں اے جاور ءَ په دلانی نزیکی ءَ ءُ امنیت ءِ پجائێنگ ءَ جهد کن اێں. نون ڈیه ءِ ته ءَ یک مردمی جنزے په امنیت ءِ پجائێنگ ءَ بنگێج بوتگ. من هم ماں وتی سپراں که استان ءِ مێتگاں رو آں په «امنیت ءِ ساتگ» ءَ سک سۆگهَ کن آں.
🔹 په هر حکومتے مردمانی وشنود کنگ «ٹوهترێں هزمت» ءُ مردمانی ناوشنود کنگ «ٹوهترێں لٹ» انت
مولانا عبدالحمید وتی هبرانی دێمتر ءَ په «ایران ءِ استمان ءِ وشنود کنگ ءَ» سک سۆگه کرت ءُ گوشتء: بائد ایران ءِ استمان ءِ دل ءَ شه جنێن ءُ راج ءُ مذهباں دست ءَ بیار اێں ءُ مردمان ءَ ناوشنود مه کن اێں. پهکاں بائدانت جهد کن انت که مردم آزاتی داشته به انت.
واجه ءَ سک سۆگه کرت: ٹوهترێں هزمت ءَ په هر حکومت ءَ چه اسلامی بیت یا نااسلامی هما کسَ کنت که مردمانی دل ءَ دست ءَ بیار ایت ءُ ٹوهترێں لٹ ءَ هم هما کسَ جنت که مردمانی ناوشنودی ءِ سوب بیت؛ من گت نه کن آں که کسے گۆں اے بنگپ ءَ چپ بیت.
🔹 ما عدالتلۆٹ ءُ عدالتپسند اێں/ کسے که «عدالت» ءَ نه منّ ایت، بائد ماں آیی اسلام ءَ شک کن اێں
زاهدان ءِ آدێنگ ءِ امام ءَ گوشت: ما عدالتلۆٹ ءُ عدالتپسند اێں. ما باز بر ءَ گوشتگ که مئے اسلام میانه ءُ اعتدالێں اسلامے ءُ ما گۆں تانسرپسندی ءَ چپ اێں. مئے باور ءَ بےعدالت ءُ آمید ءَ سجهێں چیزانی پاتیا وانگَ بیت.
واجه ءَ گێش کرت: پهکاں عدالت ءُ آمید ءَ منّ انت. کسے که عدالت ءَ مه منّ ایت بائد انت ماں آیی دین ءُ اسلام ءَ شک بیت. لهتے شه اسلامی مذهباں «عدالت» ءَ شه دین ءِ اصول ءُ لهتے دگه شه مذهباں آیرا فرض ءُ ارکان زان انت. ما اسلام ءِ دلسۆچ ءُ ملک ءُ مردمانی خیر ءَ لۆٹ اێں ءُ ترس اێں که مردم شه دین ءَ بدگمان مه بنت.
🔹 نشه ئی موادانی سوب ءِ پاهواں ابید شه اێشی که لۆگمانان ءَ بےسرپرست کرتگ، هچ آسراتے نه داشتگ اش؛ سیاسی پاهواں هم نقصان دار انت
مولانا عبدالحمید وتی هبرانی دێمتر ءَ گوشت: یکے شه کانوداں که مردمانَ پرێشانء کرتگ ءُ ملک ءِ ڈن ءَ هم په ملک ءَ بدێں آسرات ء داشتگ، ترۆندێں کردار ءُ زۆرێں استه گرگ ءُ بازێں پاهو انت.
واجه ءَ گێش کرت: اے مچاں مئے هموطن انت. وهدےکه لهتے مسلمانان واجه رسولالله صلیاللهعلیهوسلم ءَ گوشت که چاریگێں بنڈاں/ منافقاں کشگ به انت واجه رسولالله صلیاللهعلیهوسلم ءَ یک بنڈے را هم نه کشت ءُ گوشتء اگاں من بنڈاں کُش آں گڑا دنیا ءِ مردمَ گوش انت که محمد ـ صلیاللهعلیهوسلم ـ وتی مردمانَ کش ایت.
زاهدان ءِ آدێنگ ءِ امام ءَ گوشت: پاهواں که تاں نون په نشه ئی موادانی سوب ءَ بوتگ انت ابید شه اێشی که ایرانی لۆگمانان ءَ بےسرپرست اش کرتگ هچ آسراتے نه داشتگ اش. ملکاری پاهواں هم چٹی دار انت. پمێشا مئے دلسۆچی ئێں لۆٹ شه کارمستراں همێش انت که اگاں کسے جرمے کنت شه بندیگ کنگ ءُ دگه سزائاں کارمرز بیت، بلێں پاهو دیگ مه بیت. البت «قصاص» که الله ءِ حکم انت جوانێں کارے مگه اے که آیی سیاد ءُ وارث درگوز کن انت.
🔹 وتکشیانی گێشی ءِ سوب پٹءُپۆل بیت
مولانا عبدالحمید وتی هبرانی گڈسر ءَ شه «وتکشی ءِ بازی ءَ» بژنیگ بوت ءُ گوشتء: ارمان که وتکشی ملک ءِ ته ءَ باز بوتگ ءُ لهتے وتی دپانَ دۆتگ. اے بنگپ بائد پٹءُپۆل بیت که پچے ڈاکٹراں ءُ ماهرێں ڈاکٹر ءُ زهگاں وتکشیَ کن انت. اگاں اے باروا مشکل ءُ سکی هست انت گڑا رندگیری به بیت ءُ تۆجیلے درگێجگ بیت.
چمشانک