شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (2 آذرماه 1403) گۆں اشاره به اسرائیل ءِ جرماں فلسطین ءِ مردم، هاسکار غزه ءِ مردمانی سر ءَ، لاهه ءِ آمیدگس ءِ سزا ءَ را «مزنێں گامگێج» ءُ «باز منصفانه ءُ عادلانه» زانت.
په سنیآنلاین ءِ سرهال ءَ مولانا عبدالحمید گوشت: لاهه ءِ آمیدگس ءِ سزا اسرائیل ءِ مزنوزیر ءُ پێسر ءِ دێمپان وزیر ءِ باروا که په هورکشی ءُ جنگی جرمانی پارءَ آوانی دزگری ءِ حکم ءَ را داتگ ء، منصفانه ءُ مزنێں گامگێجے انت. آ ملکاں که گۆں اے حکم ءَ چپ انت آوان گواچنانَ نه گند انت ءُ ما پراواں بژنیگ اێں.
واجه ءَ گێش کرت: شه اسرائیل ءِ بێڑانی سوب ءَ غزه ءِ سر ءَ بازێں مردمے شه جنێں ءُ زهگ ءُ پیرێں ءُ بےمیارێں مردماں بماں ءُ میزائلانی چێر ءَ چک چک ءُ هورکشیَ به انت. نزیک به پنجاه هزار مردم کشگ ءُ گێش شه صدهزار ءَ ٹپی بوتگ انت ءُ غزه ءِ تیوگێں ماڑی ءُ بنیاتی ڈیلءُڈۆلاں بیران بوتگ انت.
🔹 دنیا ءِ زند بے «عدالت ءُ آمید» ءَ هچ ارزشتے نه دار ایت
مولانا عبدالحمید وتی هبرانی دێمتر ءَ گوشت: دنیا ءِ زند تاں وختے ارزشت دار ایت که ماں آیی آزات، گواچنگند ءُ حق لۆٹێں مردم بیت که گۆں عدل ءُ آمید ءَ گیشءُگیوار کن انت. روچے که دنیا ءِ ته ءَ عدالت ءُ آمید مه بیت ءُ هچ کس مه بیت که حق ءُ آمید ءِ گپ ءَ گوش ایت، گڑا آ رۆچ ءَ دنیا هچ ارزشتے نه دار ایت ءُ پاتیا ءِ وانگ بوتگ.
واجه ءَ گێش کرت: تهنا اسلام ءُ دین ءِ هبر نه انت؛ عدالت ءُ آمید باز هژدری انت. کسے که عدالت ءُ آمید داشته بیت جوانێں مردمے انت. لاهه ءِ آمیدگس ءِ فیصله وشّی ءِ سوب انت که انچێں مردم است که آمید ءِ گپ ءَ جن انت ءُ آمید ءِ گیشءُگیوار ءَ کن انت.
🔹 ما را اُمیت انت که جمهوری کماش ءُ آئی ھمراھانی سفر به سیستانءُبلوچستان ءَ پائدگ دار بیت
🔹 وهدے یک جمهوری کماش شه عدالت ءُ نابرابریانی دور کنگ ءَ گپ جنت، اے سک ارزشت دار ایت
مولانا عبدالحمید ماں دگه بهرے شه وتی هبراں گۆں اشاره به جمهوری کماش ءِ سفر ءَ به سیستانءُبلوچستان ءَ گوشت: درێں جمهوری کماش گۆں وتی لهتے شه وزیر ءُ کمکار ءُ همکاراں مئے ڈیه ءَ آت. الحمدلله جوانێں رۆچے ات، پرێشا که ما شه یک جمهوری کماشے اشکت که نابرابری ءُ بےعدالتی ءِ چپ ءَ گپء جت. وهدے یک جمهوری کماش شه عدالت ءُ نابرابریانی دور کنگ ءَ گپ جنت، اے سک ارزشت دار ایت.
واجه ءَ تاکید کرت: اگاں شه ملک ءِ کارمستراں عادلانه ئێں گپ ءُ کردارے گند اێں ءُ بُشکن اێں ءُ کارمستراں عدالت ءُ آمید ءِ نێمگ ءَ راسدێمێں گامے زور انت، گڑا ما اێشرا وتی اگده زان اێں که شه آیی وش آت کن اێں پچےکه اے آمید ءِ رد ءَ انت.
زاهدان ءِ آدێنگ ءِ امام ءَ گێش کرت: جمهوری کماش ماں وتی اۆلی سات ءَ سیستانءُبلوچستان ءِ دورێں استان/هلاکه ءَ آت. اے استان شه هررنگ ءَ زبهر انت؛ شه ناداری ءِ بابت ءَ ملک ءِ نادارترێں استان انت، شه وانگ ءُ هێلکاری ءِ بابت ءَ جهلترێں جاگه ءُ دگ وئیلانی بابت ءَ برزترێں جاگه ءَ دار ایت. ما را اُمیت انت که جمهوری کماش ءُ آئی ھمراھانی سفر به سیستانءُبلوچستان ءَ پائدگ دار بیت.
🔹 جمهوری کماش ءُ مزنێں کارمسترانی آیگ په استان ءِ امنیت ءُ تاهیر ءَ اثر دار انت
🔹 هچ چیزے عدالت ءُ آمید ءِ اێر دارگ ءِ کساس ءَ په امنیت ءِ پجائێنگ ءَ اثر نه دار ایت
مولانا عبدالحمید درشان کرت: من ءَ بێسه هست که جمهوری کماش ءُ مزنێں کارمسترانی ساڑی بیگ په سیستانءُبلوچستان ءِ امن ءُ تاهیر ءَ اثر دار ایت. منی باور ءَ یک کارمستر ءِ باآمید ءُ بےدۆزواهێں گپ په امنیت ءِ پجائێنگ ءَ شه اێشی که بم ءُ میزائل ءِ گپ جنت گێشتر اثر دار ایت. من ءَ یات انت که یک برے یکے شه پێسر ءِ جمهوری کماشاں وهدے اے استان ءَ آت، گوشتء آوان که ماں اے ڈیه ءَ ناامنی جۆڑ کن انت چۆ بم ءُ میزائل ءَ آوانی سر ءَ بێڑ کن اێں. وختے آ برگشت ناامنیاں گێشتر بوت انت، پمێشا گهتر انت که مدام شه عدالت ءُ آمید ءَ گپ بیت.
واجه ءَ سک سۆگه کرت: منی گپ گۆں درێں جمهوری کماش ءُ آدگه کارمستراں همێش انت که ماں دنیا ءَ هچ چیزے عدالت ءُ امید ءِ کساس ءَ اثر نه دار ایت ءُ توان اێں اے بابت ءَ قسم بۆر اێں. بائد انت مئے کردار چنکه گام شه مئے گپتار ءَ دێمتر بیت. ما بائد انت آمید ءُ عدالت ءَ وتی کردار ءِ ته ءَ نشان ده اێں.
🔹 مردمانی وشنودی ءِ نێمگ ءَ برۆ ات ءُ شه هچ پاترپے مه ترس ات
زاهدان ءِ آدێنگ ءِ امام ءَ گێش کرت: مئے سۆگه په مئے استان ءُ ملک ءُ آدگه ملکانی کارمستراں همێش انت که وتی استمان ءَ سات انت ءُ مردمانی وشی ءَ کٹ انت. اگاں استمان ءِ دل ءَ دست ءَ بیار ات ءُ آوانی وشنودی ءِ نێمگ ءَ برۆ ات گڑا شه دگه زۆرآوراں هچ ترسے نێست.
واجه ءَ گێش کرت: مئے لۆٹ شه تیوگێں اداره ءُ وزارتجاهاں همێش انت که په ایران ءِ مردماں شه جنێں ءُ مردێں ءُ ورنا ءُ نۆک ورنائاں کۆشست کن انت ءُ جهد کن انت که عدالت ءُ آمید ءَ اێر دار انت. اگاں کارمستراں عدالت ءُ آمید ءِ رد ءَ کرد کن انت تیوگێں سکیاں جۆڑ به انت.
🔸 مولانا عبدالحمید وتی هبرانی گڈسر ءَ گوشت که اے ڈیه ءِ مردمانی مشکلاں که یکے شه آوان زاهدان ءِ هۆنێں جمعه ءِ بنگپ انت گۆں جمهوری کماش ءَ گوشگ بوتگ انت ءُ اے باروا باانصافێں رندگیری ئے بیت.
چمشانک