شیخ‌الاسلام مولانا عبدالحمید، شمبی ءِ پێشین ءَ پد (12 آبان 1403) ماں «سیستانءُبلوچستان ءِ گورنر ءِ اکرام ءُ پجارۆکی ءِ مراگش ءَ» مردمانی وشالی ءَ شه بلوچێں اهل‌سنت ءِ گچێن کنگ ءَ په گورنری ءَ درشان کرت ءُ راج ءُ مذهبانی بودیگانی کارمرز کنگ، مردمانی لۆٹ ءُ مشکلانی رندگیری ءَ په مردمانی وشنودی ءِ کٹگ ءَ ءُ همےرنگ امنیت ءِ جۆڑ کنگ ءِ هرچانی کم کنگ ءَ پایدگدار ءُ کارآمد لێک ات.
🔹 من ءَ انچۆش سما بیت که جمهوری کماش په وتی وعدهانی پێلو کنگ ءِ جهد ءَ انت
په سنی‌آنلاین ءِ سرهال ءَ مولانا عبدالحمید ماں اے مراگش ءَ که گۆں اسکندر مؤمنی، تهے کارانی وزیر ءِ ساڑی بیگ ءَ برجم دارگ بوت ات، پد شه وش آت گوشی ءَ درائێنتء: دۆ سال پێسر ءِ پێشامد ءِ سوب ءَ من نه توانت که ماں چشێں مراگشاں بهر زور آں، بلێں من مدام مردم ءُ استان ءِ دۆزواه بوتگ آں.
واجه ءَ درشان کرت: نون که ماں اے مراگش ءَ بهر زۆرتگ آں من ءَ انچۆش سما بیت که واجه جمهوری کماش په وتی وعدهانی پێلو کنگ ءِ جهد ءَ انت ءُ اے پڑا راسدێمێں گامء زۆرتگ، البت انگت بائد انت راسدێمێں گێشترێں گام زور ایت.
🔹 ایران ءِ مردماں دۆزواهێں گپ ءُ گامانی منتوار انت
زاهدان ءِ آدێنگ ءِ امام ءَ گێش کرت: راج ءُ مذهبانی کارگرگ یکے شه واجه جمهوری کماش ءِ وعدهان ات که الحمدلله اے باروا چنکه گام چستء کرتگ ءُ ماں کردستان، خوزستان ءُ سیستانءُبلوچستان ءَ شه راج ءُ مذهبانی میانجین ءَ استاندار گچێنء کرتگ.
واجه ءَ گوشت: دمگی بودیگانی کارمرز کنگ ءِ ته ءَ بازێں حکمتے هست انت ءُ مردمانی وشنودی ءِ سوب بیت؛ همارنگ که وهدے مردماں سهی بوت انت که په سیستانءُبلوچستان ءَ بلوچ ءُ اهل‌سنتێں گورنرے گچێن بوتگ باز وشال بوت انت که سرکار ءَ مئے بودیگانی سر ءَ بێسه کرتگ ءُ آیرا اے وار ءَ داتگء تاں وتی وس ءُ تۆک ءَ نشان دنت.
مولانا عبدالحمید درائێنت: ایران ءِ استمان ءُ تیوگێں راج ءُ مذهباں ءُ آوان که ملک ءِ ڈن ءَ زند گوازێن انت، ملک ءِ ٹوهترێں مڈی انت. یکے شه ایران ءِ مردمانی هاسیتاں اێش انت که آ درست براسی ءُ ملک ءِ ڈگارانی پهازگ ءِ بابت ءَ جیڑ اَنت.
واجه ءَ گێش کرت: ایران ءِ مردێں ءُ جنێنانی ته ءَ بازێں بودیگے هست انت که اگاں آوانی سر ءَ گێشتر بێسه بیت گێشتر راسدێمێں برورد دار ایت. ایران ءِ مردماں زانتکار ءُ قدردانێں مردم انت ءُ هرکس پراوانی سۆب ءُ خیر ءَ گپے جنت ءُ کارے کنت، آیی منتوارَ بنت.
🔹 گهترێں سیاست مردمانی لۆٹ ءُ مشکلانی رندگیری انت
زاهدان ءِ آدێنگ ءِ امام ءَ گوشت: ٹوهترێں ءُ گهترێں سیاست مردمانی لۆٹ ءُ مشکلانی دلگۆش ءُ رندگیری انت. ماں استان ءَ بازێں هزمتے بوتگ که اے هزمتاں ستا کرز انت، بلێں ارمان که ملک ءِ رۆزیگی جاور ءِ نگێگی ءِ سوب ءَ استان ءِ ته ءَ مشکل ءُ زبهریاں انچۆش باز انت که اگاں مردمان ءَ چار ات گڑا گوش ات که هچ کارے نه بوتگ.
واجه ءَ گێش کرت: چیزے که ملک ءِ ته ءَ پسو دنت مردمانی حقێں لۆٹانی گۆشدارگ ءُ آوانی رندگیری انت. ایران ءِ مردماں هۆشی ئێں مردم انت ءُ سرکار ءِ جاور ءَ هم سرپد انت. گهترێں تۆجیل په مشکلانی گێشءُگیوار کنگ ءَ الله ءِ سر ءَ تکیه کنگ ءُ مردمانی سرءَ بێسه کنگ انت.
واجه ءَ درائێنت: ماں سیستانءُبلوچستان ءَ شیعه ءُ سنی ءِ گپ نه انت، ادا مردمانی میانجین ءَ سیادی ءُ رهوت هست، اے دمگ ءِ مردماں یکۆیی ءِ لۆٹۆک انت ءُ جێڑه ءُ جتایی ءَ نه لۆٹ انت.
🔹 سرکار ءِ اے داب ءُ رهبند زاهدان ءِ پێشامد ءِ گێشءگیوار ءَ آسان کنت
زاهدان ءِ آدێنگ ءِ امام ءَ درشان کرت: اگاں سرکار وتی همے داب ءُ رهبند ءَ دێم ءَ بارت، گڑا مردماں تپاک کن انت. راهے را که سرکار ءَ دێم ءَ گپتگ ءُ اے رنگێں گاماں زاهدان ءِ چنکه سال پێش ءِ پێشامد ءِ گێشءُگیوار ءَ آسان کنت. البت واجه پزشکیان ءُ آدگه کارمستراں آ پێشامد ءِ گێشءُگیوار ءِ پکر ءَ به انت.
🔹 ابید شه نوکێں گورنر ءِ «پله‌مرزی» ءَ آیرا «هاسێں اختیار» دیگ بیت
مولانا عبدالحمید وتی هبرانی گڈسر ءَ گوشت: مردمانی لۆٹ همێش انت که ابید شه نۆکێں گورنر ءِ پله‌مرزی ءَ آیرا هاسێن اهتیار دیگ بیت. تاں اۆد ءَ که ما نوکێں گورنر ءِ باروا زان اێں آیی گور ءَ دمگ ءِ مردمانی نیام ءَ هچ دگری ئے نێست؛ مئے لۆٹ شه آیی همێش انت که گۆں دل ءِ جهلانکی ءَ جهد کنت ءُ شه دمگ ءِ دگه مردماں هم کار گیت. اے دمگ ءِ مردماں هم شه آیی پله‌مرزیَ کن انت.
چمشانک