شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (۱۱ آبان ۱۴۰۳) گۆں منتواری شه «راسدێمێں گامگێجاں» که شه جمهوری کماش ءِ نێمگ ءَ راج ءُ مذهبانی حقانی باروا زورگ بوتگ انت که یکے شه آواں اهل‌سنتێں بلوچ ءِ گچێن کنگ په سیستانءُبلوچستان ءِ استانداری ءَ انت، آوان ءَ «اۆلی گام» زانت ءُ امێتوار بوت که اے گامگێجاں رواں به انت.
په سنی‌آنلاین ءِ سرهال ءَ مولانا عبدالحمید گوشت: باز جوانێں چیز ملک ءِ تها بوهگ انت. واجه پزشکیان ءَ کوشست کرتگ لهتے شه گچێنکاری ءِ درگت ءِ وعدهان ءَ پێلو کنت. کسے که لۆٹ ایت مردمانی هزمت ءَ کنت ءُ عدالت ءُ آمید ءِ نێمگ ءَ گام زور ایت، بائد انت مردماں گۆں آیی ءَ همکاری کن انت ءُ پرایی دعا کن انت تاں وتی کار ءَ دێم ءَ بارت.
واجه ءَ گێش کرت: پزشکیان ءِ وعدهاں باز ات انت که یکے شه آوان راج ءُ مذهبانی دلگۆش کنگ انت که الحمدلله اے باروا راسدێمێں گام زورگ بوتگ انت؛ هرچۆں که اے اۆلی گام انت ءُ دراجێں راهے دێم ءَ دار ایت، دعا کن اێں اے راه ءِ ته ءَ سۆبێں بیت.
زاهدان ءِ آدێنگ ءِ امام ءَ گوشت: ڈاکٹر پزشکیان ءَ په وت ءُ لهتے وزیراں اهل‌سنتێں معاون درچتگ ءُ په کردستان ءَ اهل‌سنتێں استاندار ءُ په خوزستان ءَ هم عربێں استاندار ءِ گچێن کرتگ ءُ نون هم په سیستانءُبلوچستان ءَ اهل‌سنتێں استاندارے گچێن کرتگ که ما اێشرا خیر ءِ نشانے زان اێں. استاندارے که په اے استان ءَ گچێن کنگ بوتگ بودیگ ءُ وسی ئێں مردمے.
🔹 ایران ءِ مردم ملک ءِ مڈی انت/ تیوگێں راج ءُ مذهبانی بودیگانی کارگرگ تپاک ءِ گێشی ءِ سوب بیت
مولانا عبدالحمید درشان کرت: ایران ءِ تیوگێں مردماں ملک ءِ مڈی انت ءُ راج ءُ مذهباں ملک ءِ بنی جهمنند انت. راج ءُ مذهب ءُ زباناں الله ءِ قدرت ءِ چێدگ انت. هر ملکے یک استمان ءِ واهند انت ءُ مئے دیدانک ءِ ته ءَ هچ دگری ءِ استمان ءِ میانجین ءَ نه انت.
واجه ءَ گێش کرت: تیوگێں راج ءُ مذهبانی بودیگانی کارگرگ تپاک ءِ گێشی ءِ سوب بیت ءُ الله ءَ وشنود کنت. دین گۆں نام ءَ نه یهت. دین ءَ بےآمید ءُ عدالت ءَ بزانتے نێست.
🔹 ایران ءِ استمان ءِ بنداری لۆٹاں نابرابریانی دور کنگ، عدالت ءِ اێر دارگ، آزاتیانی پجائێنگ ءُ رۆزیگی جاور ءِ گهبودی انت
مولانا عبدالحمید گوشت: ایران ءِ استمان لالچے نه انت. آوانی لۆٹ آمید ءُ عدالت ءِ اێر دارگ ءُ نابرابریانی دور کنگ انت. شه آوانی بنداری لۆٹاں نابرابریانی دور کنگ، ند ءُ گپتار ءِ آزاتی، مذهبی آزاتی ءُ رۆزیگی جاور ءِ گهبودی انت.
🔹 ھما دست که راجی مڈّیانی نێمگ ءَ دراج انت آ گٹّگ به بنت
🔹 شه بیت‌المال ءَ په مذهب ءَ زر هرچ مه کن ات
مولانا عبدالحمید گوشت: ایران ءِ مردمانی لۆٹ انت که ھما دست که راجی مڈّیانی نێمگ ءَ دراج انت آ گٹّگ به بنت. راجی مڈیاں بائد بیت‌المال ءَ هۆر به بنت ءُ په هاسێں مردم ءَ هرچ مه بنت، بلکه په تیوگێں مردماں هرچ به بنت.
واجه ءَ گێش کرت: پمێشا ما مدام سۆگه کرتگ که شه بیت‌المال ءَ په مذهب ءَ انگت هرچ مه بیت ءُ ما ماں گوستگێں دهگاں په دینی وانگجاه ءُ مسیت مکی ءَ شه سرکار ءَ کمکے نه لۆٹتگ. حتا وختے که یکے شه گوستگێں سرکاراں ما را گوشت که لۆٹ انت مسیت ءَ کمک کن انت ما اێشرا نه منّ ات ءُ گوشت اێں که ما شه سرکاراں کمک نه لۆٹ اێں، هما مردماں که ادا نماز وان انت بائد انت کمک کن انت. اگاں مردماں کمک مه کن انت ما وانگجاه ءَ بند کن اێں.
🔹 په فسادے که ملک ءِ تها رۆتگء جتگ بائد انت «انقلابی ئێں گامگێجے» بیت
واجه ءَ دێمتر ءَ درشان کرت: نون استمان ءِ مهمترێں لۆٹ «مالزانشت» انت. فسادے که ملک ءِ ته ءَ رۆتگء جتگ تهنا گۆں آمیدگس ءَ ءُ پهازۆکی واکاں جۆڑ نه بیت، بلکه بائد یک انقلابی ئێں گامگێجے بیت تاں شه رۆتگ ءَ بن‌گوج بیت. تیوگێں ادارهاں ءُ مردماں که شه راجی مڈیاں سۆب بر انت بائد انت آ سۆبان ءَ بیت‌المال ءَ برگردێن انت، چیا که هچ حقے شه استمان ءِ حق ءَ گران تر نه انت. وهدےکه استمان گشنگ انت روا نه انت که زران ءَ دگه جایے هرچ کن اێں.
🔹 ما تیوگێں ایران ءِ راج ءُ مذهبانی وشنودی ءَ لۆٹ اێں
مولانا عبدالحمید تأکید کرت: امێتوار اێں که پهکێں کاراں په استمان ءِ وشنودی ءَ به انت. ما تهنا وتی راج ءِ وشنودی ءَ نه لۆٹ اێں، بلکه ایران ءِ تیوگێں راج ءُ مذهبانی وشنودی ءَ لۆٹ اێں. ما وت ءَ شه ایران ءِ استمان ءَ جتا نه زان اێں ءُ گۆں آوانی رنج ءُ غماں هوار اێں.
واجه ءَ گێش کرت: الحمدلله ماں سیستانءُبلوچستان ءَ هچ جێڑه ئے نێست ءُ پهکێں راجاں چۆ زابلی، یزدی، بیرجندی، تهرانی ءُ دگه دگه راجاں مئے دۆستێں راج انت ءُ ما په آوانی حقانی کمار کنگ ءَ سۆگه کن اێں. ما په استمان ءِ سۆب ءَ شه وتی حق ءَ درگوز کن اێں.
🔹 مردم لۆٹ انت که سیمسر پاچ به بنت
مولانا عبدالحمید گێش کرت: سیمسراں بند انت ءُ بازێں مردم ءِ کٹءُکار مشکلانی آماچ انت. مردم لۆٹ انت که سیمسراں پاچ به انت. راهے که نون سرکار ءَ دێم ءَ گپتگ ما را امێت انت که امن ءُ تاهیر ءِ سوب بیت. شه گوستگێں پێشامد ءَ که پهازۆکی واکاں کشگ بوت انت مئے دل په درد بوت.
🔹 چهبار، کنارک ءُ دشتیاری ءِ مردماں شه «آپ ءِ کمی»، «جانسلامتی جاور ءِ نگێگی» ءُ «هێلکاری ءِ آسراتی ءِ نه بوگ» ءَ مشکلانی آماچ انت
زاهدان ءِ آدێنگ ءِ امام ءَ وتی هبرانی گڈسر ءَ گۆں اشاره به وتی نوکێں سفر ءَ به زرباری بلوچستان ءَ اۆد ءِ مردمانی لهتے مشکلانی نێمگ ءَ اشاره کرت ءُ گوشتء: ماں مئے سفر ءَ به چهبار ءُ کنارک ءُ دشتیاری ءِ مزن‌مێتگاں یک چیزے که ما را باز په درد کرت آپ ءِ کمی، جانسلامتی جاور ءِ نگێگی ءُ هیلکاری ءِ آسراتی ءِ نه بوگ ات.
واجه ءَ گوشت یات به به ات که اے مشکلاں شه پێش ءَ گێشتر بوتگ انت، گڑا شه ڈاکٹر پزشکیان ءُ ھمگرنچێں کارمستراں لۆٹ اتء که مردمانی اے مشکلان ءَ رندگیری کن انت.
چمشانک