شیخ‌الاسلام مولانا عبدالحمید، ماں زاهدان ءِ نمازجمعه ءُ دیوان ءَ (4 آبان 1403) شه غزه ءُ لبنان ءِ جنگ ءُ کۆشاں سک بژنیگ بوت ءُ اے ندارگان ءَ «دل سندۆک» زانت که کس نه توانت آوان ءَ سگ ایت ءُ په «اسلامی ملکانی تپاک» ءُ «مسلمان ءُ نامسلمانێں ملکانی جهداں» په آسبندی ءُ دێمداری شه جنگ ءُ هۆنرێچی ءَ سک سۆگهء کرت.
🔹 دلسۆچی په انسانیت ءَ ءُ دێمداری شه جنگ ءُ هۆنرێچی ءَ یک انسانی اگده ئے
په سنی‌آنلاین ءِ سرهال ءَ مولانا عبدالحمید گوشت: ارمان که مرۆچی بازێں مردمے ماں غزه ءُ فلسطین ءُ لبنان ءَ کشگ به انت. ماں روس ءُ اکراین ءِ جنگ ءَ هم بازێں مردمے شه هردۆ نێمگ ءَ کشگ بوتگ انت. پچے آوان که وس ءِ واهند انت په آسبندی ءُ سهل ءَ جهد نه کن انت؟! بائد انت که پهکاں په عدالت ءِ اێر دارگ ءُ ملک ءُ استمانانی حقانی کمار کنگ ءَ جهد کن انت.
واجه ءَ گێش کرت: پاکێں قرآن ءَ درائێنتگ: «مَنْ قَتَلَ نَفْسًا بِغَيْرِ نَفْسٍ أَوْ فَسَادٍ فِي الْأَرْضِ فَكَأَنَّمَا قَتَلَ النَّاسَ جَمِيعًا وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا» الله پاک ءَ ماں اے پاگپ ءَ بس درائێنتگ که هرکس یک بےمیارێں مردمے ءِ ساه ءَ گێت سابکێں تیوگێں مردمانی ساه ءَ گپتگ ئے ءُ هرکس یک مردمے را رکێن ایت سابکێں تیوگێں مردمانی رکێنتگ. پمێشا دلسۆچی په انسانیت ءَ ءُ دێمداری شه جنگ ءُ هۆنرێچی ءَ یک انسانی اگده ئے.
🔹 جنگ ءُ کۆشاں که ماں غزه ءَ بوهگ ءَ انت «دل سندۆک» انت که سگ ات نه به انت
زاهدان ءِ آدێنگ ءِ امام ءَ په «اسلامی ملکانی تپاک» ءَ سک سۆگه کرت ءُ گوشتء: اسلامی ملکانی اگده اے باروا سک گران انت. اسلامی ملکانی جێڑه وتی جاه ءَ بلێں پچے په دێمداری شه ظلم ءُ هۆنرێچیاں که ماں مقدسێں ملک ءَ بوهگ ءَ انت گۆں وت تپاک نه کن انت؟! اسلامی ملکاں گۆں وت به نند انت ءُ هما آسراتی ءِ رد ءَ که الله تعالیٰ ءَ آواں داتگ انت که بازێنے شه اسلامی ملکانی دست ءَ دنیا ءِ مالزانشت ءِ شاهرگ انت ءُ هر ملکے که آسبندی ءَ نه من ایت، گڑا آیرا پرنچ انت تا اے کۆش ءُ هۆنرێچی ءِ دێم گرگ بیت. هردو پاٹیاں اسیران ءَ بدل کن انت ءُ آوان ءَ آجو به کن انت.
واجه ءَ گێش کرت: ماں غزه ءَ «دل سندۆکێں» ندارگ بوهگ ءَ انت که دنیا ءِ مردماں آوان سگ ات نه کن انت. گوستگێں شپ ءَ ماں یک اسرائیل ءِ بێڑ ءَ 200 فلسطینی شهید بوتگ انت؛ آوان که ماں اے بێڑ ءَ کشگ بوتگ انت جنێں ءُ زهگ ءُ بےسلاه ءُ آزاور انت. کجام مردم توانت فلسطین ءُ لبنان ءِ مردمانی درانڈیه بوهگ ءُ آوانی جانی ءُ مالی نقصانان ءَ سگ ات کنت؟!
واجه ءَ گێش کرت: بائد انت اسلامی ءُ نامسلمانێں ملکاں ءُ رۆدراتکی ءُ رۆاێرشتی ملکاں ابید شه وتی جێڑهاں فلسطین ءُ لبنان ءُ روس ءُ اکراین ءِ جنگ ءُ هۆنرێچیانی دێم ءَ گر انت.
🔹 گهترێں حاکم هما انت که مردمانی هبران ءَ گۆش دار ایت ءُ مردمانی دێم ءَ هاکساری کنت
زاهدان ءِ آدێنگ ءِ امام ءَ گوشت: منی کلۆ په ملک ءِ کارمستراں همێش انت که الله ءُ مردمان ءَ سات ات. اے استمان «الله ءِ داتگێں رحمت ءُ قدرت» انت. پمێشا گۆں استمان ءَ وابستگ به ات ءُ آوانی مشکل ءُ لۆٹان ءَ رندگیری کن ات. اے رۆچاں مردمانی رۆزیگی جاور سک نگێگ انت. راستێں ءُ جوانێں سیاست همێش انت که کارمستراں مردمانی گپان گۆش دار انت ءُ په آوانی زند ءُ معیشت ءِ گهبودی ءَ گامے زور انت.
واجه ءَ گێش کرت: الله پاک ءَ وتی پێغمبر ءَ را گوشتگ: «وَٱخفِض جَنَاحَكَ لِمَنِ ٱتَّبَعَكَ مِنَ ٱلمؤمِنِينَ» ءُ جهل بکن وتی بانزلاں په همائی که آئی تهی رندگیری ءَ کرتگ شه ایمان آرۆکاں. گهترێں حاکم هما انت که مردمانی گپاں گۆش دار ایت ءُ مردمانی دێم ءَ هاکساری کنت. اگاں شما الله ءُ مردمان ءَ وتی کر ءَ دار ات گڑا هچ کس ءِ مهتاج نه به ات ءُ هچ کس نه توانت شمے چپ ءَ کارے کنت، بلێں اگاں الله ءُ مردمان ءَ یله بدے ات گڑا دگه هچ پناهے نێست.
🔹 کارمستراں تفتان ءِ مردمانی گڑتیان ءَ رندگیری کن انت/ هچ بن‌گپے را گۆں زۆر ءَ دێم ءَ مه بر ات
مولانا عبدالحمید ماں دگه بهرے شه وتی هبراں گوشت: تفتان ءِ مردماں که آوانی پسءُپیرکاں اے ڈیه ءِ ته ءَ زند گوازێنتگ، اے رۆچاں مشکلانی آماچ انت ءُ پرێشان انت. تفتان ءِ مردمانی گڑتی اێش انت که زند ءِ جاور بێران بیت ءُ آوانی جند ءِ زند هم تباه بیت ءُ کاهچر ءُ کشار ءُ آپاں ابن ءُ هشک به انت؛ اے گڑتی عقل ءِ رد ءَ ءُ پچاه انت.
واجه ءَ سک سۆگه کرت: مئے سۆگه په کارمستراں اێش انت که مردمانی گپان گۆش دار انت؛ اگاں هبر اش ناحق انت، گڑا آوان سرپد کن انت ءُ اگه هبرش حق انت آوان رندگیری کن انت. حق گۆں مردمان انت نه گۆں آ شرکتاں که شه دگه جاهاں په بهرزوری ءَ ادا آتگ انت که اے ڈیه ءِ گنج ءُ مڈیان ءَ هول کن انت. هچ بن‌گپے را گۆں زۆر ءَ دێم ءَ مه بر ات. مردمانی خێرێں دعا شمے سۆبمندی ءِ سوب بیت ءُ مردمانی آه ءُ نالگ شما را مشکلانی آماچ کنت.
🔹 ما مدام په ترانکاری ءَ تأکید کرتگ/ تا وهدےکه وت ءَ ندر مه کن ات مشکل ءُ جێڑهاں گێشءُگیوار نه بنت
مولانا عبدالحمید وتی هبرانی گڈسر ءَ درشان کرت: گهترێں تۆجیل په مشکلانی گێشءُگیوار کنگ ءَ «ترانکاری» انت. ما مدام په ترانکاری ءَ تأکید کن اێں. وختے زاهدان ءِ هۆنێں جمعه ءِ پێشامد بوت ما جار جت که ما ترانکاری ءِ مردم اێں ءُ هچبر گۆں ترانکاری ءَ چپ نه اێں، بلکه لۆٹ اێں دگرانی گپاں گۆش دار اێں ءُ وتی هبر ءَ هم کن اێں. بلێں زۆر ءُ سکی ءُ لۆٹائێنگ په آمیدگس ءَ هچبر تۆجیل نه انت.
واجه ءَ گێش کرت: ما تاں نون هچ کس ءِ لۆٹ ءَ په ترانکاری ءَ رد نه کرتگ، بلکه من وت پرے چیز ءَ وهد هشتگ ءُ هبران ءَ گۆش اۆں داشتگ ءُ مردمانی گپان هم رسێنتگ اۆں ءُ منی گپاں هم کارمستران ءَ رستگ انت. یک پاٹی ءِ شه مئے نێمگ ءَ شتگ انت گۆں کارمستراں چۆ مدیر ءُ آوانی معاوناں گپ اش جتگ ءُ آوانی هبران ءَ گۆش اش داشتگ.
زاهدان ءِ آدێنگ ءِ امام ءَ گوشت: تاں وهدے که وت ءَ ندر مه کن اێں اے مشکلاں گێشءُگیوار نه بنت. اگاں هریکے شه دو پاٹیاں لۆٹ ایت شه هچ چیزے درگوز مه بیت گڑا اے بن‌گپ گێشءُگیوار نه بنت. وهدےکه ترانکاری ءِ دروازگ پچ انت ءُ مردمانی حقاں گوشگ به انت، بائد مردمانی حقاں کمار به انت؛ اے هژدری انت که وتی دلاں پراه بکن اێں.
چمشانک