شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (23 شهریور 1403) گۆں اشاره به مردم ءُ هاسکار بےوسێں پاٹیانی مشکلاں «تعلیم ءُ علاج» ءِ هرچانی باروا، اے دۆئێنانی انچکا کنگ ءَ شه حکومت ءُ سرکارانی مهمترێں اگدهاں زانت.
په سنی‌آنلاین ءِ سرهال ءَ مولانا عبدالحمید درشان کرت: بائد ماں سرجمێں دنیا ءَ تعلیمی عدالت بیت ءُ پهکاں برابر دلگۆش کنگ به بنت. یکے شه دنیا ءِ حکومت ءُ سرکارانی اگدهاں همێش انت که تعلیم ءُ علاج ءَ انچکا کن انت تاں مردمانی زهگاں ماں هر ملکے به توان انت برابر ءَ درس بوان انت. اگاں تعلیم انچکا مه بیت گڑا بس هزگاراں توان انت په وتی زهگاں هرچ کن انت ءُ نادارانی زهگاں شه وانگ ءَ زبهر به انت.
🔹 بائد بودناک‌ترێں مردماں ماں مزن‌شهدربرجاهاں ءُ وانگجاهاں کارمرز به بنت
مولانا عبدالحمید گێش کرت: یکء دگرے شه حکومت ءُ سرکارانی اگدهاں اێش انت که گهترێں ءُ بودناک‌ترێں مردمان ءَ ماں مزن‌شهدربرجاه ءُ وانگجاهاں کارمرز کن انت تاں آوان توان انت ملک ءِ زهگ ءُ ورنائان ءَ اے بابت ءَ کمک کن انت.
واجه ءَ ٹکاٹک گوشت: گێشترێں ماجب وانێنۆک ءُ مزن‌شهدربرجاه ءِ استاذان ءَ دیگ بیت تاں په‌دل درس دے انت. علم ءُ زانت دێمروی ءِ چێرگێج انت ءُ بائد پرایی هرچ بیت.
🔹 بازێنے شه کهولاں وتی زهگانی وانگ ءِ هرچءُدرچان ءَ نه دار انت
🔹 سرکاراں بائد وانگ ءِ هرچءُدرچاں کم کن انت
زاهدان ءِ آدێنگ ءِ امام ءَ گوشت: مرۆچی مئے ملک ءِ ته ءَ وانگ ءِ هرچءُدرچاں باز بوتگ انت. سرکاراں بائد اے هرچان ءَ کم کن انت. بائد ماں تعلیم ءِ وزارت ءَ جوانێں رهبند هِلّگ به انت که گرانێں هرچاں شه مردمانی بڈ ءَ زورگ به انت.
واجه ءَ گێش کرت: بازێنے شه کهولان نه توان انت ماجب ءُ آدگه چیزان ءَ چۆ هاسێں پچ ءُ دگه چیزانی هرچ ءَ دےانت ءُ پمێشا زهگ اش شه وانگ ءَ زبهر به انت. بازێنے شه کهولان په وتی زهگانی مزن‌شهدربرجاه ءِ هرچاں گۆں مشکل ءَ آماچ انت.
شیخ‌الاسلام ءَ درائێنت: ڈاکٹر پزشکیان ءَ وانگ ءُ هێلکاری ءِ باروا جوانێں هبر دات. ایران ءِ مردماں ءُ هاس بےوسانی لۆٹ همێش انت که تعلیم ءِ هرچاں کم به انت. وڑے بیت که مردم توان انت اے هرچان ءَ دےانت.
🔹 دینی وانگجاه ءُ مسیتاں بائد گۆں مردمانی کمکاں راه برگ به انت
زاهدان ءِ آدێنگ ءِ امام ءَ گوشت: مردماں وتی بودناکێں زهگان ءَ په دینی مسائلانی دربرگ ءَ دینی وانگجاهاں دێم دےانت ءُ درێں مردماں بائد په دینی وانگجاهانی وازمندیانی پێلو کنگ ءُ آ پاگواجهاں که سبق دے انت، هرچ کن انت تاں دینی وانگجاهانی استاذانی گڑتی دور به انت.
واجه ءَ گوشت: ادا یک ٹِک ءِ گوشگ زلور انت ءُ آ اێش انت که منی باور ءِ رد ءَ حکومت ءُ سرکار نه بائد په دینی وانگجاهاں هرچ کنت، بلکه دینی وانگجاهاں ءُ مسیتاں گۆں مردمانی کمکاں راه برگ به انت تاں گۆں هچ حکومت ءُ سرکارے همگرنچ مه به انت. کته‌کاری ءِ رد ءَ گهترێں ءُ برابرێں رهبند هما انت که پاگواجه ءُ دینی وانگجاهانی وت‌واجهی ساتگ بیت تاں به توان انت گۆں جوانێں شرگداری ءَ سرکاران ءَ راهشۆنی ءُ سۆگه کن انت.
🔹 علاج ءِ هرچءُدرچاں ملک ءِ ته ءَ باز بزر انت
مولانا عبدالحمید وتی هبرانی دێمتر ءَ گوشت: تیوگێں حکومتاں لاچار انت که «علاج» ءَ هم په مردماں انچکا کن انت. نون مئے ملک ءِ ته ءَ علاج ءِ هرچاں باز گران انت. سرکار گۆں مچاں، هاس گۆں بےوساں همکاری کنت تاں شه جانسلامتی ءِ داد ءَ زبهر مه بنت.
واجه ءَ گێش کرت: جانسلامتی ءِ باروا بازێن کمی ئے هست ءُ بازێں دوایے زیان انت یا دست ءَ نه کپ انت. «سلامتی» چۆ «امنیت» ءَ هڑدری انت ءُ بائد دلگۆش بیت.
🔹 هر چاگردے را عدالت په کار انت ءُ شه ادیان ءُ دۆدءُربێدگانی مهمێں بنداران انت
🔹 عدالت ءِ اێر دارگ چاگرد ءِ ته ءَ تاهیر کار ایت
زاهدان ءِ آدێنگ ءِ امام ءَ آمید ءِ اێر دارگ ءِ باروا گوشت: عدالت ءِ اێر دارگ انچش هژدری انت که هرچی آیی باروا گپ جن اێں کم انت. هر چاگردے را عدالت په کار انت ءُ شه ادیان ءُ دۆدءُربێدگانی مهمێں بنداران انت. عدالت بس په حکومت ءُ سرکاراں نه انت، بلکه سرجمێں مردماں بائد عدالت ءَ اێر دار انت.
واجه ءَ گێش کرت: بائد عدالت ءَ گس ءِ ته ءَ بچک ءُ جنک ءُ لۆگ‌بانُکانی میانجین ءَ اێر دار اێں. عدالت ءِ اێر دارگ زند ءَ وش کنت.
مولانا عبدالحمید گوشت: ماں یک حکومتے هم هما وهد ءَ تاهیر، یکویی، براسی ءُ امنیت جۆڑ بیت که عدالت پجائێنگ بیت. وهدے ماں یک حکومتے چه اسلامی بیت یا الس‌واجهی، پهکێں راج، مذهب ءُ دیناں یک رنگ ءَ چارگ به بنت ءُ منۆک ءُ نامنۆکانی حقاں کمار به انت گڑا مردماں هم تاهیر ءُ آسودگی ءَ رس انت.
واجه ءَ تچکاتچک گوشت: اگاں یک حکومت ءِ نام ءَ «الس‌واجهی» به هل انت، بلێں اۆد ءَ عدالت ءُ حقاں کمار مه بنت، هچ سۆبے نه دار ایت. اگاں یک حکومت ءِ نام «اسلامی» بیت بلێں اۆد ءَ نابرابری بیت ءُ عدالت اێر دارگ مه بیت، چشێں حکومتے دنیا ءِ هر کنڈ ءَ که بیت مردم تاهیر ءَ نه رس انت.
🔹 واجه پزشکیان ءِ سرکار عدالت ءُ آمید ءِ پڑا ترندێں گام زور ایت
زاهدان ءِ آدێنگ ءِ امام ءَ سک سۆگه کرت: ما را امێت انت که واجه پزشکیان عدالت ءُ آمید ءِ پڑا ترندێں گام زور ایت. دگه رهبنداں ابید شه عدالت ءِ اێر دارگ ءَ بےپۆک انت. گۆں زۆر ءُ توپک ءُ زندان ءُ کشتن ءَ هچ مشکلے دور نه بیت، بلکه ناوشنودیاں گێش به انت. عدالت ءُ درستێں سیاستانی اێر دارگ که تیوگێں مردمانی حقاں کمار به انت باز اثر دار انت.
🔹 درّێں مردماں «تعلیم ءُ هێلکاری»، «دینداری» ءُ «سالمێں مالزانشت» ءَ دلگۆش کن انت
مولانا عبدالحمید وتی هبرانی گڈسر ءَ لس مردمان ءَ سۆگه کرت ءُ گوشتء: منی اۆلی سۆگه په شما اێش انت که تعلیم ءُ هێلکاری ءَ ارزشت دےات. دینی ءُ مزن‌شهدربرجاهی زانتانی پد ءَ برو ات. دۆمی سۆگه اێش انت که دین ءِ اصل ءَ دلگۆش کن ات. اگاں مردمانی زند ءِ ته ءَ دین، تقوا ءُ دین دۆستی بیت ءُ مردماں دیندار به بنت، گڑا آوان آسودگێں زند ءَ رس انت. ماں هر جاوراں الله ءَ داشته به اێں ءُ گۆں الله ءَ ءُ شریعت ءِ پرماناں وابستگ به اێں.
واجه ءَ گێش کرت: سێمی سۆگه «سالمێں مالزانشت» انت. ماں اے پڑا هم حکومت ءُ سرکار گۆں نۆکێں رهبند ءَ ءُ پێش ءِ سیاستانی ٹگلێنگ ءَ په ملک ءِ زر ءِ ارزشت ءَ جهد کن انت ءُ هم شما درێں مردماں جوانێں کار ءُ حلالێں رۆزی ءِ پد ءَ برو ات. دزی، مۆک، سود ءُ دگه چیز چاگرد ءَ تباهی ءِ نێمگ ءَ تێلانک دے انت ءُ شه اے چیزاں بائد سک پلگار بیت.
چمشانک