شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (۹ شهریور ۱۴۰۳) «آمید ءِ اێر دارگ» ءُ «نابرابریانی دور کنگ» ءَ را شه استمان ءِ مهمترێں لۆٹاں ءُ سرکار ءِ مسترێں اگدهاں زانت ءُ امێتوار بوت که ڈاکٹر پزشکیان ءِ سرکار توانت گۆں مشکلانی دور کنگ ءَ مردمانی وشنودی ءَ کٹ ایت.
🔹 گوستگێں سرکاراں «آمید ءِ اێر دارگ» ءِ وعده ءَ کرتگ، بلێں اے وعده پیلو نه بوت
په سنی‌آنلاین ءِ سرهال ءَ مولانا عبدالحمید گوشت: بازێنے شه درێں مردماں گلگ کن اَنت که تو ایوک ءَ کمبودانی یات ءَ کن ئے ءُ بوتگێں ھزمت ءُ کارانی بابت ءَ ھچ نه گْوش ئے. په درور گوش انت که اے استان ءِ ته ءَ بازێں جاھاں سڑک یا ریل جوڑ کنگ بوتگ ءُ گیس آرگ بوتگ. اے مزنێں ھزمت اَنت ءُ ما اے گپ ءَ نه گْوش ایں که پێسریگێں سرکاراں ھچ کار نه کُرتگ، بلے شه اێشی ءَ باز ھژدری ءُ بنیاتی کار پێسریگێں سرکاراں نه کرتگ اَنت ءُ مئے گلگانی گێشترێں بهر ھمے بابت ءَ انت.
واجه ءَ درشان کرت: آمید ءِ اێر دارگ ءُ نابرابریانی دور کنگ یکے شه سرکار ءِ مسترێں اگدهان اِنت ءُ گوستگێں درستێں سرکاراں آمید ءِ اێر دارگ ءُ نابرابریانی دور کنگ ءِ وعدہ کرتگ، بلے اے وعدہ پیلو نه بوتگ اَنت ءُ جیڑہ گێشءُگیوار کنگ نه بوتگ انت.
🔹 نزیک به دو سال شه زاهدان ءِ هۆنێں جمعه ءِ پێشامد ءَ گوستگ ءُ انگت ءَ اے بن‌گپ گێشءُگیوار نه بوتگ
زاهدان ءِ آدێنگ ءِ امام ءَ گێش کرت: گلگے که ما را شه گوست ءَ ھست انت که زاهدان ءَ انچێں پێشامدے بوتگ که دنیا ءَ جسکێنتگء ءُ ھرکسے زانت که بےانصافی بوتگ، بلے ما انگت نه زان اێں که اے پێشامد ءِ مولءُمراد چے بوتگ! اے پێشامد همدپ گۆں مھسا ءِ جنز ءَ بوتگ ءُ بوت کنت که اے پێشامد پمێشا زاهدان ءَ بوت که اے دمگ ءِ مردم زھرشانی ءَ ھوار مه به انت یا که په دگراں عبرتے بیت. مستریں سبب ءُ مولءُمراد ءَ الله گهتر زانت ءُ اے بن‌گپ که نزیکء دو سال شه آیی گوستگ، شه کارمسترانی نێمگ ءَ پٹءُپول نه بوتگ، وھدےکه اگاں اے بن‌گپ پٹءپۆل بوتیں ءُ گۆں مردماں همدردی بوتێں، گڑا اے باز پایدگدار ءُ کارآمد بوت.
واجه ءَ گوشت: ما امێت کن اێں که نوکێں سرکار گوست ءِ جیڑهاں گوں «تدبیر ءُ حکمت» ءَ گێشءُگیوار کنت تاں مردمانی وشنودی ءَ کٹ ایت. زاهدان ءِ پێشامد ءِ باروا هم ما شه اول ءَ رندگیری ءِ لۆٹۆک ات اێں ءُ گوشت اێں که ما تیار اێں که گۆں آمید ءَ گپءُتران کن اێں.
🔹 چار زالبۆل ءُ یک اهل‌سنت ءِ بیگ ماں چاردمی سرکار ءَ یک راسدێمێں ٹکے؛ چاگرد دراجترێں گامگیج ءِ اُمیت ءَ کنت
مولانا عبدالحمید گۆں اشاره به چاردمی سرکار ءِ کابینه ءَ گوشت: ما وشال اێں که چاردمی سرکار ءَ چار زالبۆل کابینه ءَ ھوار بوتگ انت. گوستگێں 45 سالانی ته ءَ ایوک ءَ یک جنێنے وزیر گچێن کنگ بوتگ ءُ سرکار ءِ کابینه ءَ یک اهل سنتے ھم هوار نه بوتگ ءُ نوں اولی رند انت که یک اهل‌سنتے کابینه ءَ ھوار انت.
واجه ءَ گێش کرت: آ چیزے که ماں چاردمی سرکار ءِ کابینه ءَ بوتگ راسدێمێں چیزے، البت اهل‌سنت ءُ زالبۆل ءُ سرجمێں راج ءِ امێت اێش انت که ٹوهترێں گام چست کنگ بنت ءُ شه زالبول ءُ اهل‌سنت ءَ گێشتر مردم ماں وڑوڑێں کاراں کارمرز کنگ بیت.
🔹 سیاسی بندیگان ءَ آزات کن ات ءُ گۆں آوان گپءُتران کن ات
مولانا عبدالحمید دێمترا سیاسی بندیگانی آزات کنگ ءُ گوں آواں گپ ءُ تران کنگ ءِ زلورت ءِ سرا زۆر دات ءُ گوشتء: کارمستراں بائد گۆں سیاسی بندیگاں گپءُتران به کن انت ءُ اے مردم زندان ءَ بوھگ ءِ بدل ءَ ڈن ءَ کار به کن انت.
واجه ءَ گێش کرت: مسترێں چیزے که سرجمێں ایران ءِ استمان ءِ ته ءَ ھمدردی ءُ یکوئی جۆڑ کنت «آمید» ءُ «آزاتی» ءُ پهکێں مردمان ءَ گۆں یک چم ءَ چارگ انت. مردمان ءَ آزاتی به بیت ءُ توان انت ھبر کن انت دانکه پهکاں شه اگدہ‌دار ءُ زانتکاراں وت ءَ اصلاح بہ کن انت. مئے چاگرد ءَ ءُ ایدگه چاگرداں ھچ وڑیں مردم نێست کہ آئی ءِ ته ءَ عیب مه بیت ءُ وت ءَ پاک ءُ مقدس زانت. هچ انسانے شه ردی ءَ پاک نه انت. اگاں کسے وت ءَ شه ردی ءَ برزتر زانت، اے وت ردێں هیالے.
🔹 جنێنان ءَ شه وانگ ءَ زبهر مه کن ات
زاهدان ءِ آدێنگ ءِ امام ءَ ماں دگه بهرے شه وتی هبراں گۆں اشاره به جنێنانی هێل دیگ ءِ ارزشت ءَ گوشت: مئے سۆگه به پهکاں همێش انت که جنێنان ءَ شه وانگ ءَ زبهر مه کن ات. جنێنان ءَ وس ءُ بودشت است ءُ بیت که آوانی وس ءُ بودشت شه لهتے مردێناں هم گێشتر بیت.
واجه ءَ گێش کرت: واجه رسول الله صلی‌الله‌علیه‌وسلم ءِ زند په ما نمونگے؛ واجه رسول الله صلی‌الله‌علیه‌وسلم ءَ جنێنانی وانگ ءَ ارزشت داتگ. آ چیزے که مرۆچی شه دین ءِ احکاماں مسلمانانَ رستگ هما علم ءُ زانت ءِ برکت انت که صحابه ئاں شه مردێں ءِ جنێناں کٹ کرتگ. یکے شه واجه رسول الله ءِ پاکێں لۆگبانوکاں دوهزار حدیث نقل کرتگ. واجه رسول الله ءِ پهکێں لۆگبانۆکاں ءُ جنێن زهگاں زانتکار بوتگ انت.
🔹 سستی ماں وانگ ءَ استان ءِ ته ءَ گێش بوتگ؛ پسءُماس ءُ تعلیم ءِ وزارت میاریگ انت
زاهدان ءِ آدێنگ ءِ امام ءَ درشان کرت: بژن انت که سستی ماں وانگ ءَ ڈیه ءِ ته ءَ باز بوتگ ءُ سیستانءُبلوچستان وانگ ءِ پڑ ءَ باز پد ءَ منتگ. لتهے پسءُماساں ءُ البت تعلیم ءِ وزارت اے باروا میاریگ انت که جوانێں رهبند پێش اش نه داشتگ. وسی ءُ دلسۆچێں کارمستراں کار گرگ نه بوتگ انت.
واجه ءَ سک سۆگه کرت: اے باروا پسءُماس ءُ کهول ءُ سرکار ءُ تعلیم ءِ وزارت ءِ اگده سک گران انت. بائد پهکاں په زھگانی وانگ ءُ اپسله کنگ ءَ یکجا به بنت ءُ جهد کن انت ءُ رهبند درگێج انت.
🔹 گهترێں راه په تعلیم ءِ شر کنگ ءَ دمگی واکانی کارمرز کنگ انت
مولانا عبدالحمید ٹکاٹک گوشت: سرکار بائد زهگانی تعلیم ءُ هێلکاری ءَ وتی برنامه ئانی سر ءَ به هل ایت. یکے شه گهترێں راهاں په وانێنگ ءُ هێلکاری ءِ شر کنگ ءَ دمگی ءُ مانۆکێں واکانی کارمرز کنگ انت. بائد ماں هر دمگے شه همۆدے مردماں کارمرز کنگ بیت، پچےکه اے مردم شه دگه دمگانی مردماں گێشتر آ دمگ ءِ مشکل ءُ لۆٹان ءَ سرپد انت ءُ دلپدردی اش گێشتر انت.
واجه ءَ گێش کرت: بائد سرکار ءَ هاسێں آزگ‌سمایی ءِ وزارت تعلیم ءُ هێلکاری ءِ سر ءَ بیت. ارمان که ماں گوستگێں سالاں ھم مزن شهدربرجاه ءُ هم سرکاری وانگجاهاں نقصان دیستگ. سرکار بائد اے پڑ ءَ مشکلانی گێشءُگیوار ءُ سستیانی دور کنگ ءَ جوانێں رهبندے درگێج ایت ءُ زانت ءُ تعلیم ءِ وزارتاں وتی سرجمێں جهد ءَ زھگانی وانگ ءُ زانگ ءِ سرا به کن انت. حتا په مزنێں مردمانی وانگ ءَ هم راه ءُ چارگے دێما بیار انت.
🔹 دان نون ملک ءِ ته ءَ یک اهل‌سنتێں مدیرکلے په تعلیم ءَ گچێن نه بوتگ
🔹 مردمان ءَ آوانی بودشت ءُ لائکی ءِ رد ءَ ابید شه دین ءُ مذهب ءُ راج ءَ کارمرز کن ات
مولانا عبدالحمید گۆں گلگ شه اهل‌سنتانی کارمرز نه کنگ ءَ ماں تعلیم ءِ وزارت ءِ مزنێں اگدهاں گوشت: ارماں که ما گوستگێں سالاں مه هچ استانے یک اهل‌سنتێں مدیرکلے په تعلیم ءَ گچێن نه بوتگ؛ پراستی مگه چه زهرآمدی ئے ملک ءِ ته ءَ بوتگ!! ماں هر راجے لائکێں مردم هست؛ شما شه چاگرد ءِ مردماں ابید شه آوانی دین ءُ مذهب ءُ راج ءَ کار گر ات.
واجه ءَ گێش کرت: منی باور ءَ په مردمانی کارگرگ ءَ آوانی دین ءَ هم دلگۆش مه کن ات که مسلمان انت یا نه انت. بلکه آوانی زرد ءُ وس ءُ بودشت ءَ چار ات.
چمشانک