شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (2 شهریور 1403) گۆں اشاره به ایران ءِ وڑوڑێں پاٹیاں هاسکار پرستارانی گلگ ءَ شه رۆزیگی جاور ءِ خرابی ءَ، «حکومت ءُ سرکار ءِ ذمه» ءَ په رۆزیگی ءُ مالزانشتی مشکلانی حل کنگ ءَ سک گران زانت.
په سنی‌آنلاین ءِ سرهال ءَ مولانا عبدالحمید گوشت: مئے ملک بازێں پرێشانی ءُ مشکلانی آماچ انت. پرستار، پوریاگر، کارنشت، وانێنۆک ءُ وڑوڑێں پاٹیاں گلگ دار انت ءُ زندگی پراواں سک بوتگ. لس مردماں مشکل دار انت ءُ دلش شه زندگی ءِ مشکلاں هۆن انت. اے که لهتے شه ترس ءَ اێراد نه گر انت، بزانتء اێش نه انت که مشکل نه دار انت.
واجه ءَ دێمتر ءَ هاسکار پرستارانی مشکلانی نێمگ ءَ اشاره کرت ءُ گوشتء: درّێں پرستاراں ماں سک‌ترێں جاوراں مردمانی همراه انت ءُ ماں نادراهجاهاں تاهیر نه دار انت ءُ په ناجۆڑانی هزمت کنگ ءَ سکیان ءَ سگ انت. پرستاراں پراستی که مزنێں هزمتے په ملک ءَ کن انت ءُ آوانی هزمت سک ارزشت دار ایت. کرونا ءِ درگت ءَ که مردماں شه مسیتاں هم جست انت ءُ حج بند بوت ءُ مسجدالحرام ءُ مسجدالنبی ءِ دروازگاں بند بوت انت، انگت ڈاکٹر ءُ پرستاراں ماں نادراهجاهاں منت انت ءُ هزمت اش کرت. نون که آوان ماجبانی باروا اێراد دار انت که آوانی زندگی ءَ بس نه کنت ءُ هما هم وهد ءِ سر ءَ دیگ نه بیت، اے باز ٹوهێں مصیبتے.
🔹 مرۆچی بائد ایران گۆں یورپی ملکاں کۆپگ ماں کۆپگ بوتێں
مولانا عبدالحمید گێش کرت: ملک ءِ زرّ ءِ ارزشت گار بوتگ، مردمانی زند گران بوتگ ءُ لھتے مردم ءِ زند ھراب بوھگ ءَ انت. پوریاگر ھم کوکار کنگ ءَ انت. اے پوریاگراں پیسر ءَ پچے توار چست نه کرتگ؟ گوستگێں زمانگ ءَ وت‌کُشی نه بوتگ. گوستگێں زمانگ ءَ ما اے گپ نه اشکتگ که پرستار ءُ ڈاکٹر وت‌کشی کن اَنت، بلے مرۆچی وت‌کشی کن انت.
واجه ءَ گێش کرت: ما اشکنگ ءَ اێں که لھتے وانێنۆکاں ھم سپوری ءِ کار ءَ رو انت پچےکه آوانی ماجب آوانی زندگی ءَ بس نه انت. وزارت تعلیم ءُ شھدربرجاہ گوں استاد ءُ وانێنۆکانی اے جاوراں چۆں لۆٹ انت مردمانی زهگان ءَ هێل دےانت ءُ گۆں ھمساھگێں ملک ءُ جھان ءِ مزنێں ملکاں کۆپگ ماں کۆپگ به انت؟! ایران انچێں ملکے که مرۆچی بائد گۆں یورپی ملکاں کۆپگ ماں کۆپگ بوتێں، پچےکه آیی کوھنێں دود ءُ ربیدگ ءِ واهند انت.
🔹 کامستراں ءُ پارلمان ءِ جهگیراں بندیجاهان ءَ چار انت ءُ گۆں سیاسی بندیگاں گپءُتران به کن انت
مولانا عبدالحمید گوشت: بازێں سیاسی بندیگ انت که آواں هچ وڑێں جرمے نه کرتگ ءُ ایوک ءَ ملک ءِ جاور ءِ سرا گپ جتگ ءُ اێراد اش گپتگ. بائد گۆں اے مردماں گپ کنگ به بیت. ملک ءِ کارمستراں، جمهوری کماش ءُ پارلمان ءِ جهگیراں سیاسی بندیگانی گندگ ءَ به رونت ءُ گۆں آواں گپءُتران به کن انت.
🔹 ما نه توان اێں «حق» ءَ گۆں «ظلم» ءَ سات اێں
🔹 په «دین» ءِ شنگ کنگ ءَ هچ زلورتے به «درۆگ» ءُ «خرافات» ءَ نێست
زاهدان ءِ آدێنگ ءِ امام ءَ گوشت: ما گۆں “ظلم” ءَ “حق” ءَ برجاہ داشت نه کن اێں، بلے حق گۆں حق ءَ برجاہ دارگ بیت. دین گۆں عدالت ءُ آمید ءُ راستی ءَ برجاہ دارگ بیت. دین مردمانی زند ءَ اختیاری اِنت ءُ اگاں کسے دین ءِ منّگ ءَ نه لوٹ ایت گڑا ما نه توان اێں آیی ءَ په زور منّێں اێں. الله تعالیٰ ءَ اختیار داتگ.
واجه ءَ درشان کرت: په دین ءِ شنگءُتالان کنگ ءَ ھچ زلورتے په درۆگ، خرافات ءُ دگه راہ ءُ دراں نێست. ما توان اێں گۆں دلبڈی، منانک ءُ احترام ءَ دین ءَ مردمان ءَ پێش کن اێں.
🔹 ملک ءِ نونێں جاورھالانی ته ءَ حکومت ءُ سرکار ءِ ذمه واری سک گران انت
زاهدان ءِ آدێنگ ءِ امام ءَ گوشت: مرۆچی ایران ءِ استمان سک‌ترێں جاورانی آماچ انت ءُ اے پڑ ءَ ڈاکٹر پزشکیان ءِ سرکار ءُ سرجمێں حکومت ءِ کارندهانی ذمه واری سک گران اِنت ءُ په اے مشکلانی گێشءُگیوار ءَ جوانێں تۆجیلے بائد شۆھاز کنگ بیت.
واجه ءَ گێش کرت: دانکه اندری سیاستاں بدل کنگ مه بنت ءُ داں ایران ءِ مردمانی مسترێں واهگ که آمید انت اێر دارگ مه بیت ءُ گپتار ءُ ند ءِ آزاتی ءُ سیاسی آزاتی ءُ ملکاری کرداراں پجائێنگ مه بنت، مشکلانی گێشءُگیوار کنگ ممکن نه انت.
🔹 په ملک ءِ مالزانشت ءِ گهتری ءَ ما بائد انت گۆں دێمروئی کرتگ ءُ هزگارێں ملکاں رهوت کن اێں
مولانا عبدالحمید گێش کرت: واجه پزشکیان ءِ سرکار که آیی ءِ کابینه جۆڑ بوتگ ءُ آیی ءَ وتی کار بندات کرتگ، آ ابید شه درملکی سیاستاں ملکی سیاستانی نێمگ ءَ هم دلگوش به دنت. په ملک ءِ مالزانشت ءِ گهتر کنگ ءَ گێش شه آ ملکاں که مالزانشت اش خراب انت، گۆں دێمروئی کرتگ ءُ هزگارێں ملکاں هم رهوت کن اێں. مئے رهوت گۆں سرجمێں دنیا ءَ شر به بنت ءُ یکے دومی ءِ حرمت ءَ سات اێں.
واجه ءَ گێش کرت: ملکی ءُ درملکی سیاستاں مالزانشت ءِ سرا مزنێں اثرے دار انت ءُ یکے دومی ءَ گوں بندوک انت ءُ داں اے سیاستاں بدل کنگ مه بنت، اگاں ما دنیا ءِ مزنیں کارمستر ءُ مالزانتاں یکجاہ مچ کن اێں، نه توان انت ملک ءِ مالزانشت ءَ جۆڑ کن انت.
🔹 واجه پزشکیان سرکار ءِ سرجمێں ادارهانی واگ ءَ دار ایت
زاهدان ءِ آدێنگ ءِ امام ءَ گوشت: ڈاکٹر ءِ دگه یک گرانێں ذمه واری اێش انت که آ وتی سرکار ءِ اداره ءُ سرجمیں باسکانی واگ ءَ به دار ایت. بازێں ادارہ انت که وت‌واجه انت ءُ نمازجاهانی سر ءَ بێڑ بر انت ءُ مردماں شه نماز وانگ ءَ مکن کن انت یا شه مردمانی کارءُباراں دێمداری کن انت. بازێنے انت که وت ءَ اختیاردار ءُ ملک ءِ مزن‌رهشۆن ءِ نمایندگ زان انت ءُ هرچی لوٹ انت کن انت ءُ هچ وڑیں کانود ءُ عزت ءِ سر ءَ نه اوشت انت ءُ زۆرێں گپ جن انت.
🔹 پچے آ واکانی دێم گرگ نه بیت که وت‌سر تیر جن انت؟!
شیخ‌الاسلام مولانا عبدالحمید گۆں شرگداری شه واکانی تیرگواری ءَ بےمیارێں مردمانی نێمگ ءَ گوشت: برےبرے ما اشکن اێں که یک جاگهے جنێنے تیر جنگ ءُ کُشگ بوتگ، یا که جنکے یا بازیں ورنا تیر جنگ ءُ ٹپّی کنگ بوتگ انت؛ پچے اے واکانی دێم گرگ نه بیت که اے وڑ ءَ تیر گواری کنگ ءَ اَنت؟!
🔹 په نیکشهر ءِ زمین‌چنڈ آماچێں مردماں دعا کن اێں
زاهدان ءِ آدێنگ ءِ امام ءَ وتی هبرانی گڈسر ءَ گۆں اشاره به نیکشهر ءِ مزن‌مێتگ ءِ زمین‌چنڈ ءَ گوشت: نزیک ء بیست رۆچ انت نیکشهر ءِ دمگاں «آبگاه» ءُ «بنت» ءَ زمین‌چنڈ بوتگ ءُ اے زمین‌چنڈ هر رۆچ بوهگ ءَ انت. اے زمین‌چنڈاں که تاں نون ھچ زانتکارے آوانی پێش آیگ ءِ سوب ءَ درنگێتگ. اے مچ ڈاه انت ءُ دعا ءُ استغفار ءِ زلورت انت که الله تعالی اے آفت ءَ شه اے دمگ ءِ درێں مردمانی سر ءَ دور به کنت.
چمشانک