شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (۲۶ مرداد ۱۴۰۳) شه مسعود پزشکیان ءِ پێش کرتگێں کابینه ءَ اێراد گپت که آیی ته ءَ هچ اهل‌سنتے نێست ءُ بس یک جنێنے هوار انت.
په سنی‌آنلاین ءِ سرهال ءَ شیخ‌الاسلام مولانا عبدالحمید گوشت: اے رۆچاں ایران ءِ استمان ءِ یک بهرے که رأی اش داتگ آ دیم ءِ زند ءِ بابت ءَ تکانسر انت. ھما چیز که گچێنکاری ءِ ته ءَ په راستی کارآمد بوتگ ءُ مردماں پولنگ ءِ نێمگ ءَ کش اِتگ آ واجه پزشکیان ءِ گشتانک ءُ مناظرهانی ته ءَ جوانێں گپ بوتگ اَنت که آوانی ته ءَ آیی مردمانی درد ءُ نابرابریانی بابت ءَ بازێں راستی یے را گوشت.
واجه ءَ گێش کرت: نزیک به 45 سال انت که جنێناں، ٹک ءُ مذهب، لس مردم ءُ پاگواجهاں گلگ کنگ ءَ اَنت. وهدے واجه پزشکیان ءَ راجی یکویی ءِ سرکار ءِ جوڑ کنگے وعدہ کرت، گڑا درستاں امێتوار بوت انت ءُ واجه پزشکیان ءَ گوں وتی گپاں بازێں ناامێتی ءِ را به امێت ءَ بدل کرت.
🔹 «راجی یکویی» ءِ سرکار هما انت که جنێناں ءُ اهل‌سنتاں هم کابینه ءِ ته ءَ به انت
زاهدان ءِ آدێنگ ءِ امام ءَ ٹکاٹک گوشت: ایران ءِ آبادی ءِ نێم ءَ وتی زرد ءِ رد ءَ رأی نه دات ءُ گوشت اش که اگاں پزشکیان بلۆٹ ایت هم آیرا نه هل انت که وتی برنامه ئان ءَ اێر دار ایت. نوں که سرکار ءَ وتی وزیران ءَ گچێن کرتگ انت مردم پرێشان انت که هما وعدهاں که کنگ بوتگ انت آ گوں اے وزیراں سرجم نه بنت.
واجه ءَ درشان کرت: اے راجی یکویی ءِ سرکار نه انت. راجی یکویی ءِ بزانت اێش انت که کابینه ءِ ته ءَ هم جنێں ءُ هم اهل‌سنت هوار به انت ءُ بودێں ءُ وسی ئێں مردماں هم هوار به انت.
🔹 چاردمی سرکار ءِ اولی گام ءَ مردمانی امێتداری پورہ نه بوت انت
شیخ‌الاسلام مولانا عبدالحمید گێش کرت: اولی گام ءَ مردمانی امێتداری پورہ نه بوت انت ءُ گچێنکاری ءَ بهر زُرتگێں بازێں مردم پرێشان انت که اے 45 سالانی ته ءَ که ماں هر سرکارے 300 وزیر آتگ ءُ شتگ انت، اهل‌سنت ءُ زالبۆلاں جاگهے نه داشتگ ءُ نون هم یک جنێنے وزیر بوتگ که ایران ءِ آباتی ءِ نێم جنێن انت، گڑا چۆں آوانی امێتداری پوره به انت.
واجه ءَ درشان کرت: اهل‌سنت هم که پهکان شه ایران ءِ جهمنندێں راجاں انت ءُ ماں تیوگێں جنگاں ملک ءِ سیمسراں کُشگ بوتگ انت، آوان ھمراہ بوت انت ءُ راجی یکویی ءَ کمار اش کرت، بلے شه 300 ءَ گێش وزیراں یک اهل‌سنتێں وزیرے هم نێست ات. وهدےکه اهل‌سنتانی ته ءَ بودێں ءُ سالمێں مردم باز انت.
🔹 پرستار، پوریاگر ءُ دگه گلانی مشکلانی گێشءُ گیوار ءِ پارءَ «بنیادی ھیال ءُ لیکه» ءُ «ترۆندێں رهبند» په کار انت
مولانا عبدالحمید درائێنت: منی اولی ءُ مهمێں لۆٹاں ملکی انت. ما ھچبر آرام ءَ نه وسپ اێں وهدےکه پرستاراں ماں نادراهجاهاں سک باز کار کن انت، مشکلانی آماچ به انت. اے درێں مردماں گلگ دار انت ءُ پرێشان اَنت پچے که آوانی ماجب په زندگی ءَ کم انت یا آوانی پد منتگێں ماجباں انگت ادا نه بوتگ اَنت ءُ اێشی ءِ آسر ءَ آ سک زور ءِ آماچ انت. یا پوریاگر، کارنشت ءُ وانێنۆکاں گوں بازێں مشکلاں آماچ انت.
مولانا عبدالحمید گێش کرت: اے جاور ءَ یک بنیاتی ھیالے پکار انت که په چاگرد ءِ دراھیں پاٹیاں، نه په یک پاٹی ءِ گۆں سنجیدگی ءَ رهبندے درگێجگ بیت. اگاں کسے ءَ اێرادے ھست گڑا اێشی ءِ بزانت اێش نه انت که آ ایوک ءَ اے مشکلانی آماچ انت؛ بلے اے یک لسێں مشکلے که اێشی ءِ ته ءَ درستێں مردم ءُ پاٹیاں ھوار انت. ایران ءِ مردمانی مشکلاں مئے درستانی مشکل انت. ما را اُمێت انت که ایران ءِ استمان ءِ سرا هاسێں دلگۆشے دیگ بیت ءُ درائیں مشکلاں گێشءُگیوار به بنت.
🔹 پاکستان ءِ سرکار رۆدراتکی بلوچستان ءِ مردمانی پرایمنێں زھرشانی ءَ رسیدگی کنت
مولانا عبدالحمید ماں دگه بهرے شه وتی هبراں پاکستان ءِ سرکار ءَ دێم گور دات ءُ گوشتء: گوستگێں وھداں رۆدراتکی بلوچستان ءِ گوادر ءُ لھتے دگه شھراں مچی برجم دارگ بوتگ انت. منی شور ءُ سلاہ په پاکستان ءِ سرکار ءَ اێش انت که مردمانی پرایمنێں زھرشانیانی نێمگ ءَ دلگۆش به دنت. اے مچی ءُ لوٹاں پرایمن انت ءُ نه بیت که آوانی لوٹان ءَ نادلگۆش کن ات.
واجه ءَ ٹکاٹک گوشت: وھدےکه مردمانی مُچی ءُ زھرشانی امن ءُ بے زۆراکی ءَ برجم دارگ بوتگ انت، گُڑا پاکستان ءَ اے بےمٹێں موہ رستگ که آ اے پرایمنێں زھرشانیان ءَ پسو به دنت. پاکستانی کارمستراں بائد مردمانی لوٹانی سر ءَ هاسێں دلگۆشے به کن انت ءُ گۆں گپءُتران ءَ مردمانی هژدری ئێں لوٹان ءَ که یکے بازێں کهولانی مردمانی بێگواهی انت، آیرا پٹءُپول ءُ گێشءُگیوار به کن انت. اے مشکل ءُ دمگ ءِ دگه بنیاتی مشکلاں که مردم آوانی باروا گپ کن انت، بائد آوانی سر ءَ دلگۆش به بیت.
زاهدان ءِ آدێنگ ءِ امام ءَ درشان کرت: مرۆچی ماں دموکراتیک ءُ آزاتێں ملکاں هررۆچ پرایمنێں زهرشانیاں برجم دارگ بنت؛ بلێں اۆد ءَ نه کسے کشگ بیت ءُ نه کسے ٹپی بیت، نه دکانے سۆچگ بیت ءُ نه بانکے آچش جنگ بیت. کارمستراں گۆں زهرشانی کنۆکاں گپءُتران کن انت ءُ مشکلان ءَ جۆڑ کن انت؛ اے په امنیت ءِ گهتر کنگ ءَ هژدری انت.
🔹 «ناحقێں کۆشاں» باز بوتگ انت؛ دێمداری شه اے کۆشاں پهکانی اگده انت
مولانا عبدالحمید وتی هبرانی گڈسر ءَ گۆں شرگداری شه «ناحقێں کۆشانی بازی ءَ» ماں چاگرد ءَ وتی بژن ءَ درشان کرت ءُ گوشتء: کۆشانی گێش بوهگ ماں چاگرد ءَ بزاں بےهیالی شه الله تعالی ءَ. قرآن مجید ءَ ناحقێں کُشگ ءِ بابت ءَ ڈاه داتگ ءُ گوشتگء که ھرکس ناحقێں کۆشے به کنت آیی جهنم، الله ءِ هژم ءُ لعنت ءِ آماچ بیت؛ هچ دگری ئے نێست که اے ناحقێں کُشتءُکۆش شه سرکار ءِ نێمگ ءَ کنگ بیت یا شه لس مردمانی نێمگ ءَ.
واجه ءَ دێمتر ءَ ناحقێں کۆشانی دیم ءَ دارگ ءِ زلورت ءِ سر ءَ زۆر دات ءُ گْوشت: ناحقێں کۆشانی دیم ءَ دارگ ایوک ءَ پاگواجهانی ذمه‌واری نه انت، بلکیں اے ھرکسے شه مردێن ءُ جنێن، ماس ءُ پس، اسپےریش، کماش ءُ بااثریں مردمانی ذمه‌واری انت که آ درێں ورناھان ءَ که مئے باندات ءِ امێت انت، سۆگه ءُ پنت کن انت ءُ آوانَ شه اے کارانی آسر ءَ ڈاه دےانت ءُ شه ناحقێں کۆشاں مکن به کن انت.
🔹 سلاهبندێں واکاں په‌سار به انت که بےگناهێں مردمانی نێمگ ءَ تیر مه جن انت
زاهدان ءِ آدێنگ ءِ امام ءَ درائێنت: سلاهبندێں واکاں په سار به انت که لس مردمانی نێمگ ءَ تیر مه جن انت. پهکێں مردماں ماں دگ ءُ راهاں شتءُآت کن انت. بائد سلاهبندێں واکاں انچۆ جوان هێل دیگ به انت که آ بےگناھێں مردمانی سر ءَ یا ھما وھد ءَ که آ یک مردم یا ماشینے ءِ سر ءَ شک کن انت آوانی نێمگ ءَ تیرگواری مه کن انت. چۆ که باز رند ءَ بوتگ که یک ماشینے یے ءِ سر ءَ شک کرتگ ءُ تیر جتگ ءُ یک مردمے یا چنکه مردم کُشگ بوتگ انت ءُ پد ءَ زانگ بوتگ که اے مردم بے میار انت. اگاں آیاں ماشینے ءِ سر ءَ شک انت ءُ خطر پدر انت گڑا بس ماشین ءِ ٹائراں تیر به جن انت.
واجه ءَ گێش کرت: اے رنگێں جاوراں تیرجنۆکێں واک ایوک ءَ میاریگ ءُ گناهگار نه انت، بلکیں هما کس که آیی سرۆک انت هم بائد الله تعالی ءِ دێم ءَ پسۆ دنت ءُ چۆش نه انت که کارمسترے گوش ایت من په اے کار ءَ راضی نه بوتگ آں. ما درستاں بائد دێمداری شه ناحقێں کُۆشان ءَ وتی ذمه زان اێں ءُ وتی اگده ءَ آوانی باروا پێلو کن اێں.
چمشانک