سنی‌آنلاین| “ساره امیری”، بلوچێں زالبۆلے په امارات ءِ تعلیم ءُ تربیت ءِ وزیری ءَ گچێن کنگ بوت.
شیخ محمد بن راشد آل مکتوم، امارات ءِ مزن وزیر ءَ ماں چاگردی رسانکدر ایکس ءَ اے هال ءَ را جار جتگ.
بانۆک امیری پیسر ءَ آ ملک ءِ فضایی ادارہ ءُ زانتکارانی شۆرجاه ءِ سرۆک بوتگ.
پد شه اێشی که امارات ءِ پٹءُپۆلکار 2020 ءَ گۆں سۆبمندی ءَ مریخ ءِ نێمگ ءَ دێم دیگ بوت، بازێں ایرانی ئے هاس ماں چاگردی رسانکدراں آ پروژه ءِ سرۆک «ساره امیری» ءِ باروا گپ جت.
بانۆک امیری ءِ کھول شه سیستان ءُ بلوچستان ءَ انت که پد شه ایران ءِ 1979 ءِ انقلاب ءَ امارات ءَ لڈ اتگ ءُ شتگ انت.
🔹 سارا امیری ءِ کرد ءُ سۆبمندیاں
ساره امیری امارات ءِ مریخ ءِ پروژه ءِ نائب (Hope Mars Mission) ءُ امارات ءِ دێمروی کرتگێں علوم ءِ شۆرجاه ءِ سرۆک انت. اے پروژه ءِ مولءُمراد پٹءُپۆلکار ءِ دێم دیگ ءُ مریخ ءِ هوا ءِ شۆهاز کنگ انت. اے پٹءُپۆلکار ماں 2020 ءَ دێم دیگ بوت ءُ 2021 ءَ گۆں سۆبمندی ءَ مریخ ءِ مدار ءَ سر بوت که اے په امارات ءِ آزمانی رهبنداں باز ٹوهێں سۆبمندی ئے انت.
ماں 2017 ءَ ساره امیری په امارات ءِ دێمروی کرتگێں علوم ءِ وزیری ءَ گچێن کنگ بوت تاں ملک ءِ زانت ءُ ٹیکنالوجی ءِ دێمروی ءِ اگده ءَ وتی بڈ ءَ کنت. اے وزارت ءِ مولءُمراد زانتی پٹءُپول ءُ نۆکێں ٹیکنالوجیانی دێمروی ماں امارات ءَ انت.
ساره امیری وتی جهد ءُ کۆشستانی پارءَ زانت ءُ ٹیکنالوجی ءِ پڑ ءَ بازێں داد ءُ شرپے کٹتگ. ماں 2015 ءَ بی‌بی‌سی ءَ آیرا یکے شه دنیا ءِ 100 بااثرێں زالبۆلاں گچێن کرت.
چمشانک