شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (25 خرداد 1403/ 14 جون 2024) گوشت: «جنین» ءُ «اهلسنتانی» مکن کنگ شه نام نبیسگ په جمهوری کماشی ءَ که ماں بنیادی کانود ءِ 115می بند ءَ آتگ «اسلامی شریعت ءُ میاناستمانی کانودانی» رد ءَ نه انت.
🔹 «رجال سیاسی» ءِ معنا کنگ په «مردان سیاسی» ءَ رد انت
په سنیآنلاین ءِ سرهال ءَ شیخالاسلام مولانا عبدالحمید ءَ گوشت: بنیادی کانود ءِ 115می بند جمهوری کماش ءِ گچێن کنگ ءِ باروا انت. ماں اے بند ءَ آتگ که جمهوری کماش بائد شه «رجال مذهبی ءُ سیاسی» ءُ «ملک ءِ رسمی مذهب ءِ پدگیر ءَ» بیت ءُ ماں دگه بندے آتگ که ملک ءِ رسمی مذهب «شیعه اثناعشری» انت. بنیادی کانود ءِ 115می بند ءِ رد ءَ ماں اے 45 سال ءَ سه پاٹی مدام زبهر بوتگ انت؛ یکے «جنێناں»، آدگه «اهلسنتاں» ءُ سێمی پاٹی هما وسی ءُ بودێناں انت که شه هاسێں مذهبی ءُ سیاسی پاٹی ئے نه انت.
مولانا عبدالحمید گوشت: ماں اے 45 سال ءَ جنێناں که په جمهوری کماشی ءَ نام نبشتگ منّگ نه بوتگ انت، پچےکه ماں بنیادی کانود ءَ آتگ که «رجال سیاسی» ءُ آواں جنێن بوتگ انت نه مردێں ءُ تاں نون یک برے هم جنێناں وار دیگ نه بوتگ انت.
واجه ءَ گێش کرت: اگاں دنیا ءِ رسماں دلگۆش به انت «رجال سیاسی» ءِ بزانت سیاستزانتێں مرد نه انت، بلکه انچێں مردمان ءَ گوشگ بیت که ماں سیاست ءَ وس ءُ بودشت داشته به انت. «رجال سیاسی» ءِ معنا کنگ به «مردان سیاسی» ءَ رد انت. اگاں خبرگان ءِ مولءُمراد شه «رجال سیاسی» ءَ مردێں بوتگ گڑا پچے جنێنانی حق ءَ را دلگۆش ء نه کرتگ؟!
🔹 اهلسنتانی زبهر کنگ شه جمهوری کماشی ءَ ماں «جمهوری اسلامی ءِ حکومت» ءَ هچ نیمۆنے نه دار ایت
زاهدان ءِ آدێنگ ءِ امام ءَ شه اهلسنتانی مکن کنگ ءَ په جمهوری کماشی ءِ نام نبیسگ ءَ ماں بنیادی کانود ءِ 115می بند ءَ یات کرت ءُ گوشتء: اهلسنتانی میانجین ءَ لائک ءُ وسی ئێں مردم هست، بلێں پرێشی که ماں بنیادی کانود ءَ آتگ که بائد «ملک ءِ رسمی مذهب ءِ پدگیر بیت» اهلسنت نه توان انت وتی نام ءَ نبیس انت.
آوان که اے کانود ءَ نبشتگ منانک اش چے بوتگ؟ اے کانود گۆں الله ءِ کتاب ءُ سنت ءَ چپ انت ءُ اسلامی شریعت ءُ میان استمانی کانودانی رد ءَ نه انت. شما بیست ملیون اهلسنت ءَ که ماں تیوگێں سیاسی پڑاں ساڑی بوتگ انت پرێشی که سنی انت شه آوانی حق ءَ زبهر کرتگ! شما که اێشرا جمهوری اسلامیَ زان ات گڑا اے کانود ءَ چه همگرنچی ءِ گۆں اسلامی حکومت ءَ هست؟ بنیادی کانود آسمانی وحی ئے نه انت، بلکه آیی تها سستی ءُ ردی هست که گۆں اسلامی شریعت ءَ چپ انت.
🔹 سێزدمی سرکار ءَ «راسدێمێں کردار» هم داشتگ، بلێں «دلبرێجۆکێں پێشامد ءُ ظلم» هم هما درگت ءَ استمان ءِ سر ءَ بوت
زاهدان ءِ آدێنگ ءِ امام ءَ گێش کرت: ما په سێزدمی سرکار ءَ بازێں جهد ءُ کۆشستے کرت. گۆں اێشی که بازێنے شه اهلسنت ءُ ایران ءِ مردماں گۆں مئے رأی داتن ءَ چپ ات انت، بلێں رأی دات اێں که یک برے هم که بوتگ اصولگراهان ءَ آزمود کن اێں. هرچۆں که آوان ما را اے قول ءَ را نه دات که شه اهلسنتاں وزیرے گچێن کن اێں، بلێں گوشت اش که شه آوان هلاکه دار، وزیر ءِ معاون ءُ سفیر گچێن کن اێں. ارمان که اے کار ءَ را نه کرت اش بلکه اے درگت ءَ اهلسنتانی بازێں نمازخانه ئے را بست اش ءُ تهران ءِ بنجاهی نمازخانه ءَ را هم بست اش که اے گۆں بنیادی کانود ءَ چپ ات. ما چنکه بر تهران ءَ شت اێں ءُ گۆں جمهوری کماش ءِ دفتر ءَ گوانک جت اێں بلێں هچ آسرے نه داشتء. پد شه مهسا ءِ پێشامد ءَ زاهدان ءِ هۆنێں جمعه ءِ پێشامد بےهچ نیمۆنے کپت که باز دلبرێجۆک ات. همےرنگ اے درگت ءَ گۆں زهرشانی کنۆک ءُ بندیگاں انچێں کردار بوت که گۆں بنیادی کانود ءَ چپ ات انت. اے پهکێں ظلم ءُ سکیاں سێزدمی سرکار ءِ وهد ءُ زمان ءَ پێش آت انت.
🔹 ما شه اێشیَ ترس اێں که نۆکێں جمهوری کماش مه توانت کارے کنت، پچےکه آیرا بازێں اختیارے نێست
🔹 تاں وهدےکه سیاستاں ٹگل مه ور انت جمهوری کماش نه توانت کارے کنت
زاهدان ءِ آدێنگ ءِ امام ءَ گوشت: من اے گپان ءَ پرێشا جن آں که گوش آں مئے جاور چۆن انت. هرکجام شه جمهوری کماشی ءِ امێدواراں نۆن گپے جنت ءُ بازێں وعده ئے دنت، بلێں گواچن اێش انت که اے ملک ءِ تها جمهوری کماش ءَ بازێں اختیارے نێست ءُ آیی اختیار کم انت. بلێں اگه وسی ءُ بودێں کارمسترے بوتێں گۆں همے کمێں اختیاراں هم توانتء که کارے کنت ءُ مردمانی وشنودی ءَ کٹ ایت، بلێں پێسر ءَ اے رنگ نه بوتگ ءُ پمێشا ملک گۆں اے مشکلاں آماچ انت.
واجه ءَ سک سۆگه کرت: ما گوش اێں جمهوری کماش مردے بیت یا جنێنے یا شه هر راج ءُ مذهبی، بائد مزنسسا ءُ وسی ئے بیت گۆں پوره ئێں اختیار ءَ، پچےکه ایران ءِ جمهوری کماش چۆناهی ءَ 85 ملیون مردم ءِ جهگیر انت ءُ بائد کسے بیت که ماں دنیا ءَ بےجۆڑه بیت ءُ په دنیا ءَ کلۆ داشته بیت. ما دۆست دار اێں که وهدے مئے جمهوری کماش ماں میاناستمانی هۆربند ءَ گپ کنت پراواں کلۆ ئے داشته بیت، پچےکه اے ملک ءُ استمان ءِ پهر ءُ سربرزی انت.
مولانا عبدالحمید گوشت: ما شه اێشیَ ترس اێں که نۆکێں جمهوری کماش هم مه توانت کارے کنت ءُ ملک ءِ ءُ استمان ءِ نونێں مشکل ءُ سکی روان به انت. نۆکێں جمهوری کماش چه رۆشنێں آیۆکے توانت استمان ءَ نشان دنت؟ تاں وهدےکه جمهوری کماش پوره ئێں اختیار داشته مه بیت ءُ تاں وهدےکه ٹوهێں کارمستراں سیاستان ءَ مه ٹگلێن انت جمهوری کماش نه توانت کارے کنت. استمان لۆٹ ایت که ملک ءِ تها بدلی بێت، اگاں چۆش مه بیت گڑا جمهوری کماش ءِ گچێن کنگ بےپۆکێں کارے.
🔹 دارالعلوم زاهدان انگت درکانودی سکیانی آماچ انت
زاهدان ءِ آدێنگ ءِ امام ءَ گوشت: ارمان که انگت مئے باسک ءُ ٹولی گۆں سکیاں آماچ انت که اے سکی گۆں کانود، عرف ءُ شرع ءَ چپ انت. دارالعلوم ءِ کانودی سندان ءَ بےمنانک ءَ باطل اش کرتگ ءُ بازێں نندۆکی حقان ءَ پادمالی اش کرتگ. همےرنگ ماں پٹءُپاسی اۆشتجاهاں بازێں طلبه ئے را جلتگ ءُ عهد اش گپتگ که دوارگ ادا مه یا انت، وهدے که طلبه ئاں ادا بس سبک وان انت. اے ردێں کاراں گۆں کانود ءَ چپ انت.
واجه ءَ دلگۆش گور دات: ما شه تهران ءِ کارمستر ءُ تیوگێں دورچارێں کارمستراں لۆٹ اێں که چۆشێں مردمانی دێم ءَ گر انت، پچےکه اێشَ لۆٹ انت ایران ءِ مردمانی میانجین ءَ جتایی بیار انت، اے کارمستراں ملک ءِ تها امنیت جۆڑ نه کن انت، بلکه ناامنی جۆڑ کن انت. ناشی ءُ تانسرپسندێں زهگانی کردار په مچان چَٹی دار ایت. من ماں اۆلی نیاد گۆں رئیسی ءَ همے چیز ءَ را گوشت که په آزگسمائێں ڈیهاں ءُ راجی ءُ مذهبی ئێں ڈیهاں ءُ هاس په سلاهبندێں کاراں دورچارێں کارمستر گچێن کنت که بےزهرآمدی ءَ کار کن انت. پمێشا من شه تهران ءِ کارمستراں لۆٹ آں که اے بنگپان ءَ رندگیری کن انت ءُ اے ڈیه ءَ نادلگۆش مه کن انت که لهتے شه وتی جاگه ءُ اختیاراں بدێں کارمرز کن انت.
واجه ءَ گێش کرت: ما شمے حرمت ءَ داشتگ، شما هم حرمتان ءَ دار ات ءُ اگاں هبرے هست آیرا دێم په دێم گوش ات. شما گپءُتران ءَ لۆٹ ات ما همبلان ءَ دێم دات. ما ترانکاری ءِ لۆٹۆک اێں ءُ مدام گوشتگ اێں که گۆں زهرشانی کنۆکاں نند ات ءُ آوانی گپان ءَ گۆش دار ات.
واجه مولانا عبدالحمید ءَ گڈسر ءَ گوشت: ما مدام گوشتگ که زاهدان ءِ دارالعلوم مکی بس یک مذهبے ءِ نه انت، بلکه ادا په اسلام ءُ انسانیت ءَ سسا بیت. ما عهد کرتگ که هچ گپے مه جن اێں که گۆں حق ءُ راستی ءَ چپ بیت. تیوگێں ایرانیاں مئے هم ملکی انت ءُ ما بائد شه آوانی گواچنی ءُ شرعی حقاں دێمپانی کن اێں. ما پهکاں ماں یک ملکے زند گوازێن اێں، گپان ءَ جن اێں بلێں په امنیت ءُ دێمپانی شه ملک ءِ سیمسراں گۆں پهکێں ایرانیاں همتپاک اێں.
چمشانک