مروچی :پنجشنبه, ۳۱ خرداد , ۱۴۰۳
مولانا عبدالحمید:

دنیا ءِ حکومتاں ءُ یهودیاں اسرائیل ءِ ترۆندیانی دێم ءَ گر انت

دنیا ءِ حکومتاں ءُ یهودیاں اسرائیل ءِ ترۆندیانی دێم ءَ گر انت

شیخ‌الاسلام مولانا عبدالحمید ماں زاهدان ءِ نمازجمعه ءِ دیوان ءَ (21 اردیبهشت 1402/ 10 مای 2024) گۆں اێشی بیان ءَ که اسرائیل ءِ جنایتان ءَ ماں غزه ءَ آگاهێں زرداں سگ ات نه کن انت، شه دنیا ءِ حکومتاں ءُ یهودیاں لۆٹ ات که اسرائیل ءِ کارمسترانی ترۆندیانی دێم ءَ گر انت.

🔹 آگاهێں زرداں ماں دنیا ءَ اسرائیل ءِ جنایتان ءَ ماں غزه ءَ سگ ات نه کن انت

په سنی‌آنلاین ءِ سرهال ءَ مولانا عبدالحمید گوشت: غزه ءُ فلسطین ءِ اے رۆچانی پێشامداں دنیا ءَ را جسکێنتگ ءُ آگاهێں زردانی پدگرد ءُ اێراد ءِ سوب بوتگ. اسرائیل ءِ جنایتاں ماں غزه ءَ نه تهنا په مسلمانان بلکه په تیوگێں انساناں گران انت. مرۆچی ماں دنیا ءَ جنزے په نام آگاهێں زرداں جۆڑ بوتگ. زانت‌لۆٹ ءُ ورنائاں ماں امریکا ءِ مزن‌شهدربرجاهاں زهرشانی کرتگ.

واجه ءَ گێش کرت: اے زهرشانیاں په دنیا ءَ ءُ هاسکار اسرائیل ءُ آیی پله‌مرزاں کلۆ دار انت. البت اسرائیل ءِ گێشتری پله‌مرزانی دیدانک بدل بوتگ ءُ شه اسرائیل ءِ سرکار ءُ لشکر ءِ ترۆندیاں بد اش کێت.

زاهدان ءِ آدێنگ ءِ امام ءَ گوشت: اسرائیل ءِ کارمسترانی گمان ءَ، آ توان انت گۆں جنگ ءَ اے مشکل ءَ گێشءُگیوار کن انت، که اے آوانی سست مجگی ءِ نشان انت، پچےکه هپتاد سال انت فلسطین ءِ ڈگاران ءَ گپتگ اش ءُ آیی مردمان ءَ کشتگ ءُ درانڈیه اش کرتگ، بلێں انگت نه توانتگ اش که اے مشکل ءَ گێشءُگیوار کن انت، نون لۆٹ ات آیرا گۆں جنگ ءَ گێشءُگیوار کن ات! زانگ بیت که شمے مجگ کار نه کنت ءُ شمے رێسءُپرێس رد انت. ارمان که لهتے شه دنیا ءِ حاکماں هم مجگ اش جوان کار نه کنت ءُ دنیا ءَ مشکلانی آماچ اش کرتگ.

واجه ءَ گوشت: تهنا تۆجیل گپءُتران انت. جنگ بائد هلاس بیت. بائد تانسرپسندان ءَ منّێن انت که وتی واکان ءَ شه فلسطین ءِ ڈگاراں در کن انت ءُ گۆں گپءُتران ءَ اے بن‌گپ ءَ گێشءُگیوار کن انت.

🔹 آوان که مردمانی سر ءَ ظلم کن انت، اے خطر هست که ایمان اش بێران بیت

زاهدان ءِ آدێنگ ءِ امام ءَ ماں دگه بهرے شه وتی هبراں په مردمانی حقانی کمار کنگ ءَ سک سۆگه کرت ءُ آیرا تقوای ءِ دۆمی بهر زانت ءُ گوشت ئِے: الله پاک ءَ ما را سۆگه کرتگ که گۆں پهکێں مردماں جوانی کن اێں. بدتبی گۆں اسلام ءَ چپ انت. اگاں لۆٹ اێں چۆ مسلمان ءَ زند گوازێن اێں گڑا هم الله ءُ هم مردمانی حقان ءَ کمار کن اێں. اسلام ءَ په مردمانی حقانی کمار کنگ ءَ شه پس ءُ ماس ءُ سیادانی حق ءَ گپتگ تاں بےوس ءُ مسکین ءُ مسافر ءُ گردانی حقاں سک سۆگه کرتگ.

واجه ءَ مردمانی رۆزیگی مشکلانی رندگیری ءَ هم شه «انسانی حقانی کمار کنگ ءَ» زانت ءُ گوشت ئِے: مردم سکیانی آماچ انت، لهتے نادراهجاهانی هرچانی وس ءَ نه دار انت ءُ نه توان انت وتی ناجۆڑان ءَ یا میت ءَ شه نادراهجاه ءَ در کن انت. کارمستر ءُ چاگرد ءِ مردمانی اگده اے باروا باز گران انت، بائد آوان ءَ کمک کن انت. یتیمانی مال دیگ بیت. میراث که وارثانی حق انت بائد دیگ بیت ءُ نبائد ناحق ءَ لپاشگ بیت. اے پهکاں انسانی حق انت ءُ انسانی حق باز گران انت.

واجه ءَ دلگۆش گور دات که هچ کس ءِ سر ءَ ظلم مه کن اێں. کته‌کاری ءَ نشان داتگ که الله ظالم ءَ انگڑێن ایت ءُ آیی ایمان ءَ بێران کنت. بازێنے که مۆک گپتگ یا مردمانی سر ءَ ظلم اش کرتگ یا آوان که زۆرے واهند انت مردمانی سندان ءَ باطل اش کرتگ یا زۆرێں استه اش گپتگ ءُ آوان ءَ بندیگ اش کرتگ یا ناحقێں کۆش اش کرتگ اے خطر هست که بےایمان ءَ مر انت. روایت ءُ حکایتانی رد ءَ ظالمانی آسر بد انت.

🔹 هچ قاضی ءُ حاکمے ماں دنیا ءَ غٹێں اهتیار نه دار ایت

زاهدان ءِ جمعه ءِ خطیب ءَ گوشت: کسے که کۆشے نه کرتگ ءُ پاهو دیگ بوتگ، اے «ناحقێں کۆشے» زانگ بیت. دگری ئے نێست که اے کۆش ءَ واک ءُ کارمستر ءُ حاکم کنت یا استمان کنت. ٹکێں نص هست که هچ مردم ءِ کشگ روا نه انت مگه په حق کشگ بیت. کسے که کۆشکار ءِ بدل ءَ آیی پس یا زهگ ءَ کش ایت ناحقێں کۆشے کرتگ ئِے.

واجه ءَ گێش کرت: هچ قاضی ءُ حاکمے ماں دنیا ءَ غٹێں اهتیار نه دار ایت. مسلمانێں قاضی ءُ حاکمے اهتیار قرآن ءُ شریعت ءِ رد ءَ انت. هچ کسے اے حق ءَ نه دار ایت که حق ءَ ناحق یا ناحق ءَ حق کنت.

🔹 لهتے جهد کن انت که چاگرد ءِ جوانێں ءُ پائدگدارێں مردمان ءَ معتاد کن انت

مولانا عبدالحمید وتی هبرانی دێمتر ءَ دلگۆش گور دات که شه ترۆندآپ ءُ نشه ئی موادانی کارمرز کنگ ءَ پهرێز بیت ءُ گوشت ئِے: ارمان که سرهالانی رد ءَ ترۆندآپ ءُ نشه ئی موادانی کارمرز کنگ ماں چاگرد ءَ باز بوتگ، وهدےکه الله پاک ءَ ترۆندآپ ءِ ورگ ءَ را سک ءُ گۆں ٹکێں گالاں حرام کرتگ. ترۆندآپ ءُ نشه ئی موادانی کارمرز کنگ که په مردم ءِ عقل ءُ اراده ءُ جان ءَ چٹی دار انت، المی حرام انت.

واجه ءَ گێش کرت: مرۆچی معتادی ماں چاگرد ءَ گێش بوتگ. صنعتی ءُ سنتی نشه ئی موادانی کارمرز کنگ په وشی ءُ دگه سوباں خطرناک ءُ ناروا انت. لهتے بدواه ءُ دشمناں جهد کن انت که وانندگ ءُ اسپےریش ءُ پاگواجه ءُ چاگرد ءِ جوانێں ءُ پائدگدارێں مردمان ءَ معتاد کن انت. حتا سرهالانی رد ءَ لهتے جاهاں نشه ئی موادان ءَ انچا دےانت.

🔹 مشکوکێں کۆش شهر ءِ تها باز بوتگ انت

🔹 کارمستراں بلال نصرویی ءِ کۆش ءَ پٹءُپۆل کن انت ءُ گواچن ءَ درا کن انت

زاهدان ءِ آدێنگ ءِ امام ءَ وتی هبرانی گڈی بهر ءَ گۆں اشاره به «بلال نصرویی»، ورنائێں ازمگرێں بلوچ ءِ کۆش ءَ ماں زاهدان ءَ شه الله ءَ آیی بکشایگ ءُ درجه ئانی برزی ءَ لۆٹۆک بوت ءُ گوشت ئِے: بلال نصرویی ءِ شهید کنگ، تکانسری ءِ سوب بوتگ. منی سۆگه په کارمستراں همێش انت که اے بن‌گپ ءَ پٹءُپۆل ءُ گواچن ءَ درا کن انت.

واجه ءَ گێش کرت: ماں چۆشێں بن‌گپاں وهدےکه کۆشکار دزگر مه بیت گڑا ٹوهێں مشکل جۆڑ بیت. پشپدانی ٹوهترێں غم ءُ درد پد شه کۆش ءَ همێش انت که کۆشکار معلوم مه بیت. پمێشا ما امێتوار اێں که بلال نصرویی ءِ کۆشکار هرکس انت دزگر ءُ سزا دیگ بیت. اگاں مردماں هم اے باروا چیزے زان انت کارمستران ءَ سهی کن انت.

مولانا عبدالحمید گوشت: بژن انت که مشکوکێں کۆشاں شهر ءِ تها باز بوتگ انت. تیوگێں مردمان ءَ سۆگه کن اێں که گۆں چۆشێں کۆشاں مخالفت کن انت ءُ کۆشکاران ءَ آمیدگسی واکانی دست ءَ دےانت تاں سزا دیگ به انت ءُ کۆشانی دێم گرگ بیت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *