مولوی عبدالملک آرامش سرباز ءِ منبع العلوم کوه‌ون ءِ دینی وانگجاه ءِ استاد ءَ مزن‌رهشۆن ءِ جهگیر گپانی باور ءَ وتی پدگرد ءَ درشان کرتگ. حجةالاسلام محامی مزن‌رهشۆن ءِ جهگیر ماں سیستان ءُ بلوچستان ءَ، گوشت ات: «زاهدان واتیکان نه انت، پهازۆکی واکاں آزات انت که هر دینی وانگجاه ءِ سر ءَ بێڑ بر انت ءُ نۆدربران ءَ دزگر کن انت.»
مولوی آرامش ءَ آیی هبرانی بارو ءَ نبشت:
بسم الله الرحمن الرحیم
«زاهدان واتیکان نه انت…..»
یک رمبے شه بلوچستان ءِ اهل‌سنتانی مزنێں پاگواجهاں پهازۆکی واکانی درکانودی بێڑاں ماں لهتے دینی وانگجاه ءِ سر ءَ ءُ نۆدربرانی بازی ئێں دزگر کنگ ءِ بابت ءَ په گپءُتران ءَ مزن‌رهشۆن ءِ جهگیر، محامی ءِ کر ءَ شت ات انت ءُ محامی ءَ هم که بازێں وهدے په چشێں وارے چمءُچاری بوتگ، گۆں گونڈێں، بلێن پرمعنائێں گالردے گوشت ات: «زاهدان واتیکان نه انت.»
هان؛ زاهدان واتیکان نه انت! بلێن پچے ماں اسلامی جمهوری ءِ بنیادی کانود ءَ که مذهبی ءُ راجی آزاتیاں دیگ بوتگ انت، ماں زاهدان ءَ نادلگۆش بوتگ ءُ اێر دارگ نه بےانت؟!
هان؛ زاهدان واتیکان نه انت! بلێن پچے همسایگێن ملکانی دینی نۆدربراں ماں ایران ءِ شیعه ئانی دینی وانگجاهاں وان انت، بلێں آوانی وانگ ماں اهل‌سنتانی دینی وانگجاهاں مکن بوتگ؟!
راستی، پچے هما جاورے که ماں شیعه ئانی دینی وانگجاهاں په درے ملکانی وانۆکاں تیار انت، ماں اهل‌سنتانی وانگجاهاں هم تیار مه بیت؟!
هان؛ زاهدان واتیکان نه انت! بلێن پچے ادا کمتر شه یک ادار ءَ پهازۆکی واکاں گێش شه 300 نمازوانۆکێں مردم ءَ کشتگ ءُ ٹپی کرتگ ءُ زاهدان ءِ مردم ءُ واجه شیخ الاسلام ءِ دێم ءَ یله داتگ؛ گڑا پسۆ که نه داتگ اش هچ، بلکه بێهار همَ دےانت؟!
هان؛ زاهدان واتیکان نه انت! بلێن زاهدان انت!
«تن همه داغ داغ شد، پنبه کجا کجا نهم!» تیوگێں بدن ٹپی بوت، ملم ءَ کجا بل آں!
(مفتی) عبدالملک آرامش منبع العلوم کوه‌ون سرباز
دوشمبی ۴ دی ۱۴۰۲ ه.ش همدپ گۆں ۱۱ جمادی الثانی ۱۴۴۵ ه.ق
چمشانک