مروچی :سه شنبه, ۵ تیر , ۱۴۰۳

بلوچستان ءِ نونێن دۆر ءُ باریگ ءِ جاور

بلوچستان ءِ نونێن دۆر ءُ باریگ ءِ جاور

پد شه زاهدان ءِ هۆنێن جمعه ءِ دل‌برێجۆکێں پێشامد ءَ رۆکپتی بلوچستان ءَ سکێن رۆچ دێم ءَ داشتگ. اێشی بزانت اێش نه انت که پێسر ءَ ادا گلباگ بوتگ، بلێن خب اے دۆر ءِ رنگ ءَ جهندم هم نه بوتگ. ماں اے ملک ءَ بلوچ راج ءُ سنی مذهباں مدام گۆں سکیاں زند گوازێنتگ. کارءُ دندا ءِ نه بوَگ سبب بوتگ تاں بلوچاں وتی هۆنانی سر ءَ گام جن انت ءُ تێل‌بری ءُ دگه گندگێن کارانی پد ءَ برو انت که ماں همے راهاں بازێن ورنا ءِ ساه گرگ بوتگ. بلوچستان ءِ پاگواجه ئاں ءُ هاس شیخ‌الاسلام مولانا عبدالحمید ءَ مدام اے ظلم ءُ ناانصافیانی باروا که اے مردمانی سر ءَ بوتگ، توار چست کرتگ ءُ شه مظلومێن مردمانی حقاں دێمپانی اش کرتگ که ایران آبادێن ملکے پچے مردم ئِے گۆں رۆزیگی مشکلاں آماچ بےانت. بلێن زۆرغنڈیگێں حکومتانی داب انت که هچبرَ نه لۆٹ انت کسے آوانی سر ءَ اێراد گیت، پمێشا سرکار اێشی بدل ءَ که پاگواجه‌ئانی گپانَ گۆش دار ایت ءُ په مشکلاں تۆجیلے درگێج ایت جهد کرتگ تاں آوانی توار ءَ بند کنت.

اگاں ما زاهدان ءُ خواش ءِ هۆنێن جمعه ئانی پد ءِ پێشامدانَ چار اێں گڑا زبر سرپد به اێں که پاگواجه‌ئاں چنکه شه حکومت ءِ نێمگ ءَ گۆں زۆر ءُ سکیاں آماچ بوتگ انت ءُ اے باروا چنکه شه پاگواجه‌ئانَ بندیگ اش کرتگ. شه مولانا عبدالمجید مرادزهی ءَ بگر تاں مولانا فتحی‌محمد نقشبندی ءَ که همے زوتاں بندیگ کنگ بوت. اے پاگواجه‌ئاں هچبر په وتی جند ءِ سۆباں گپ نه جتگ، بلکه شه بلوچ ءُ ملک ءِ مظلومێن استمان ءَ دێمپانی اش کرتگ ءُ په آوانی حقاں توار چست اش کرتگ، اے پاگواجه‌ئان بس مردمانی کانودی حقانی لۆٹۆک بوتگ انت.

سرکار ءِ دشمنی گۆں هبر ءِ آزاتی ءَ همد ءَ هلاسَ نه بیت، بلکه ابید شه حق‌گوشێں پاگواجه‌ئانی بندیگ کنگ ءَ سرکاری رسانکدراں وتی مدامی ئێں داب ءِ رد ءَ گۆں درۆگ ءُ بنڈ ءُ آچاوگے شنگ کنگ ءَ لۆٹ انت آمید ءِ توار ءَ بند کن انت، په درور همے رۆچاں سرکاری رۆتاک «جوان» په بےشرمی گۆں درۆگ ءُ آچاوگے شنگ کنگ ءَ همے رڈێن راه ءِ تها گام جن بوت. شه آ سر ءَ هم بد دپێن مردکے که آیی بدواهی په بلوچستان ءِ مردماں پدّر انت ءُ برےبرے بلوچانی چپ ءَ توار چست کنت، بلوچستان ءِ ونڈی ونڈی کنگے لۆٹۆک بوتگ. البت که پدرّ انت که ماں بلوچستان ءَ اے بدێن رهبندانی پشت ءَ کے نشتگ ءُ شه کی نێمگ ءَ اے کار بیگ انت بلێن اے کاراں گۆں سهرێن ند ءَ نبشته بیگ ءَ انت ءُ ماں راجدپتر ءَ زیانَ نه بےانت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *