مروچی :پنجشنبه, ۲۴ خرداد , ۱۴۰۳
مولانا عبدالحمید:

ملک ءِ  مشکلاں گۆں سیاستانی ٹگلێنگ ءَ ءُ جُهلێن بدلیاں  جۆڑ بےانت

ملک ءِ  مشکلاں گۆں سیاستانی ٹگلێنگ ءَ ءُ جُهلێن بدلیاں  جۆڑ بےانت

شیخ‌الاسلام مولانا عبدالحمید، ماں زاهدان ءِ جمعه  ءِ نماز ءِ دیوان ءَ (27 مرداد 1402) گۆں اشاره به پارلمان  ءِ جهگیرانی کاگدنامێنگی ءَ، پارلمان ءُ راجکماشی گچێنکاریانی برجم دارگ  ءَ گۆں هما پێش ءِ رهبند ءُ سیاستاں، چشێن گچێنکاری ءِ را په ملک ءِ مشکلانی حل کنگ ءُ ملک ءِ رکێنگ ءَ شه گپچلاں بےپۆک زانت ءُ تۆجیل ءَ  را ماں کهنگێن سیاستانی ٹگلێنگ ءَ زانت ئِے.

🔹زاناں گۆں نۆکێن جهگیرانی آیگ ءَ ملک ءِ مشکلاں حل بےانت؟

🔹اگاں امێتے هست گڑا کارمستراں استمان ءَ پێش دار انت

په سنی‌آنلاین ءِ سرهال ءَ مولانا عبدالحمید درشان کرت: کاگدنامێنگی په پارلمان ءِ جهگیری ءَ چنکه ماه دێمتر ءَ بنگێج بوتگ. نون  هم ماں پارلمان ءَ جهگیر هست ءُ هم سرکارے که مردماں گچێن کرتگ. ماں خبرگان ءَ هم جهگیر هست که مردمان گچێن کرتگ.

مولانا عبدالحمید گوشت: همےرنگ که گچێنکاریاں برجم دارگ بوتگ انت ءُ پارلمان ءُ سرکار هم هست، ارمان که انگت ملک ءِ مشکلاں گێش بیان انت ءُ استمان گۆں مشکل ءُ سکیاں آماچ انت ءُ رۆچ‌په‌رۆچ اے مشکلاں باز بےانت. زاناں اگه نوکێن جهگیر ءُ راجکماشے بئێت گڑا اے مشکلاں حل بےانت؟ اگاں گۆں نۆکێن پارلمان ءُ سرکار ءَ مشکلاں حل بےانت باز زبر انت، بلێن اگه هما دێم ءِ رهبنداں پرّام بےانت ءُ مشکلاں گێش بےانت پایدگے نه دار ایت. پراستی ملک ءِ عقلی ءُ کارمستراں، آوان که الله پاک ءَ مردمانی کار ءَ ‌را آوانی دست ءَ داتگ نه بائد اے باروا پکرے کن انت؟!

واجه ءَ ٹکاٹک گوشت: زاناں امێت ءُ رۆشنائێن آیۆکے هست که گوش انت گۆں نۆکێن پارلمان یا سرکار ءَ مردمانی زندگی راحت بیت؟ اگاں کارمستراں چشێن چیزے گند انت ءُ استمان نه گند ایت، آیرا مردمانَ پێش دار انت. بلێن اگه چشێن چیزے نێست ءُ گۆں پارلمان ءِ گچێنکاری ءَ چیزے بدل نه بیت ءُ جاور هم پێش ءِ رنگ ءَ دێم ءَ رئوت، گڑا چشێن چیزے پائدگ نه دار ایت.

🔹پارلمان ءِ جهگیرانی اگده سیاستاں ءُ سرکار ءِ کردارانی چارگ انت

مولانا عبدالحمید گێش کرت: ماں دگه ملکاں پارلمان ءِ جهگیراں کانود نزّ کار انت ءُ سرکار ءِ سیاستانی سر ءَ شرگداری کن انت. پارلمان ءِ جهگیر ءِ بنی اگده کانودانی اێر دارگ ءِ چارگ انت. جهگیر بائد انت که وزارت‌گساں ءُ سرکار ءِ کردارانَ چار ایت ءُ اگاں ردی ءِ دار انت شرگداری کنت. جهگیرے که پد شه شرگداری ءَ گۆش کشۆک بیت که آیرا گوش انت ما ترا آۆرتگ ءُ باند ءَ هم تئی کار مئے دست ءَ انت، گڑا اے چه جهگیرے؟!

واجه ءَ گوشت: جهگیر بائد وت‌مستر بیت. پارلمان ءِ جهگیر سیاسی ءُ پارلمانی امنیت دار ایت ءُ حق دار ایت که هبر دنت ءُ سیاست ءُ کانود ءِ اێر دارگ ءَ چار ایت. من پێسر ءَ هم گوشتگ که پارلمان ءِ جهگیر سرکار ءِ جهگیر نه انت، بلکه مردمانی جهگیر انت ءُ بائد مردمانی نێمگ ءَ‌ بۆشت ایت ءُ شه مردمانی حقاں دێمپانی کنت.

واجه ءَ گێش کرت: اگه دێم ءِ رنگ  ءَ راجانَ په نام ءُ نان ءَ گچێنکاری ءِ نێمگ ءَ کش انت، گڑا اے پایدگے نه دار  ایت ءُ مشکلاں حل نه بےانت. اگاں سرکاراں  هم همےرنگ گچێن بےانت که  شه وت  اختیارے مه دار انت ءُ مه توان انت کارے کن انت، اێش هم پایدگے نه دار ایت، بائد جوانێن پکرے بیت.

🔹مزن‌رهشۆن ءَ «شۆر» پکار انت؛ خبرگان ءِ جهگیراں بائد مردمانی دردان ءَ  آیرا گوشتێن ءُ  شۆر اش داتێن

زاهدان  ءِ آدێنگ ءِ امام ءَ گوشت: ‌خبرگان ءِ جهگیرانَ که مردماں گچێن کرتگ اگه شش ماهے یک گشت دیوانے مه گر انت ءُ مزن‌رهشۆن ءِ مزن‌ادارهانی کردارانَ مه چار انت، گڑا هچ پایدگے نه دار انت. خبرگان ءِ جهگیراں بائد مزن‌رهشۆن ءَ شۆر دےانت ءُ آیرا شه مردمانی درد ءُ مشکلاں سهی کن انت. چنکه رۆچ دێم ءَ که مزن‌رهشۆن ءَ گۆں فوج ءِ فرماندهاں نیاد کرت، جوانێن هبرے دات ئِے، آیی گوشت که بیت‌کنت ما پهکان رد کن اێں.

مولانا عبدالحمید گوشت: ماں اے دنیا ءَ بس تهنا خدا انت که هچ رد نه کنت ءُ شه ردی ءَ پاک انت. «لَا يُسْأَلُ عَمَّا يَفْعَلُ وَهُمْ يُسْأَلُونَ» [أنبیاء: 23] هچ کس نه توانت شه الله پاک ءَ اێراد گیت، پچےکه الله حکیم ءُ عالم الغیب انت ءُ شه هر رنگێن ردی ءَ پاک انت ءُ هر چیز ءَ زانت ءُ ما نه زان اێں.  ماں جنگ تبوک ءَ یک پاٹی ءِ واجه رسول الله صلّی‌الله‌علیه‌وسلّم ءَ گوشت که ما مشکل دار اێں ءُ نه توان اێں په جنگ ءَ برو اێں. واجه رسول الله ءَ هم آوانَ مۆکل دات. بلێن الله پاک ءَ شه واجه رسول الله ءَ اێراد گپت که پچے آوانَ مۆکل ات دات. اگه مئے باور اێش بیت که زمین ءِ سر ءَ ابید شه الله ءُ ملائکاں انچێن مردم هست که رد نه کن انت، گڑا ما وت رد اێں.

واجه ءَ گوشت: مزن‌رهشۆن ءَ شۆر پکار انت ءُ خبرگان ءِ جهگیراں بائد آیرا شۆر دےانت ءُ شه مردمانی مشکل ءُ دردان سهی ئِے کن انت. اگاں چش مه کن انت گڑا اێشی پائدگ چےانت که مردم پارلمان ءُ خبرگان ءِ جهگیرانَ گچێن کن انت؟

🔹تاں وهدےکه سیاست ءُ دیدانکاں ٹگل مه ور انت، مشکلاں هم زیان نه بےانت

مولانا عبدالحمید ٹکاٹک گوشت: مهمێن چیزاں سیاست ءُ دیدانک انت، اگه اے دوئێناں بدل مه بےانت مشکل هم حل نه بےانت. ما په پارلمان ءُ خبرگان ءَ جهگیر گچێنَ کن اێں ءُ انگت مشکل دار اێں. راجکماش ءَ گچێنَ کن اێں ءُ انگت مشکل دار اێں. کارمستراں بائد اے باروا زبرێن پکرے کن انت. کامستراں بائد گۆں مردماں رهوت داشته بےانت، ٹوهترن خطر همێش انت که مردماں کارمسترانَ مه گند انت ءُ مردمانی هبر آوانَ مه رس ایت یا مه هل انت که مردماں گپ جن انت. ارمان که نه هشتگ اش لهتێن مردم هبر دےانت ءُ لهتے واجه‌کار ءِ نام ءَ گر انت پچے که آ «خط قرمز»/سُهرێن کِشک گوشگ بوتگ انت، درحالےکه خط قرمز بس الله انت ءُ هچ کسَ نه توانت شه الله ءِ کاراں اێراد گیت.

🔹ماں امریکا ءُ اروپا ءَ خۆبی هم هست، آوانَ کارمرز کن اێں

🔹ماں گوستگێن زهرشانیاں اسرائیلیاں هچ کسے را شه وتی مردماں نه کُشت

زاهدان ءِ آدێنگ ءِ امام ءَ گێش کرت: امریکایی ءُ اروپایی بازێن عیبے دار انت، په درور امریکایی وت‌‌منّ انت، بلێن انگت برےبرے کنگره شه راجکماش ءَ اێراد گیت ءُ شه کارمستراں انتقاد کن انت، اۆد ءَ گفتار ءُ نبشتار ءِ آزاتی هست. اے باز جوانێن چیزے. اے هما آزاتی ءِ که قرآن آیی باروا گپ کرتگ. اگه گفتار ءُ نبشتار ءُ سسا ءِ آزاتی مه بیت گڑا بازێن مشکلے جۆڑ بیت. ما بائد حرمتانَ سات اێں ءُ مه هل اێں کسے ءِ بےشرپی بیت، بلێن به هل اێں مردم وتی هبرانَ دےانت. یکے شه ملک ءِ مشکلانی سبب همێش انت که مۆکل اش نه داتگ مردم شرگداری کن انت.

واجه ءَ گوشت: ماں اروپا ءَ برےبرے راجکماش یا مزن‌وزیر ءُ پارلمان ءِ جهگیراں وتی اگده ءَ یله دےانت، بلێن مئے ملک ءِ رسمے تها هچ گستایی نێست. ما تاں نون نه دیستگ که ادا په مردمانی مشکلانی سبب ءَ وتی کار ءَ یله دےانت. پچےکه اگه وتی اگده ءَ یله دےانت آوانَ بدبخت کن انت.

مولانا عبدالحمید گوشت:  ماں اسرائیل ءِ نۆکێن زهرشانیاں عجیبێن چیز اێش ات که هچ کس شه آیی زهرشانی کنۆکێن مردماں کشگ نه بوت انت. اسرائیلی ئێں واکاں فلسطینیان کش انت، بلێن وتی مردمانَ نه کش انت.

🔹استمان ءِ جَنَگ جوانێن کارے نه انت

🔹اے جاور ءِ سگگ په مردماں باز سک انت

زاهدان ءِ آدێنگ ءِ امام ءَ گوشت: مرۆچی بازێن پاٹی ءِ شه مردماں چۆ جنێن ءُ هالتاک‌نبیس ءُ مزن‌شهدربرجاهی ءُ پاگواجه ئاں بندیگ انت. اے شمے استمان انت ءُ استمان ءَ په زهرشانی ءِ پارءَ نه بائد جن ات. یکے شه بسیج ءِ کارمستراں گوشت ات اگه دوارگ زهرشانی کن انت ما جن اێن اش. استمان ءِ جنَگ جوانێن کارے نه انت. بسیج بائد مردمانی درد ءُ مشکلان سرپد بیت ءُ زانت که مردمانی درد چے انت. زاناں اێشان په امریکا ءُ اروپا ءِ پارءَ کۆر ءُ بندیگ بوتگ انت یا شه گُشن ءُ جهل‌جنی ءَ؟ آوانی گپانَ گۆش دار ات.

واجه ءَ گوشت که سلاهبندێن واکانی فرمانده ءُ کارمستر ءُ قاضیاں که مردمانی مشکلانَ زان انت، پچے مزن‌رهشۆن ءَ سهیَ نه کن انت؟ ما که آیرا نه گند اێں، بلێن شما آیرا سهی کن ات که په ملک ءِ رکێنگ ءَ شه اے جاور ءَ سُر ایت، پچےکه اے جاور ءِ سگگ په مردماں باز سک انت، بائد کار ءَ کارزانتانی دست ءَ دنت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *