شیخالاسلام مولانا عبدالحمید، ماں زاهدان ءِ جمعه نماز ءِ دیوان ءَ (۲۵ آذر ۱۴۰۱/ 16 دسمبر 2022) گۆں اشاره به گرانێن حکماں که په زهرشانی کنۆکاں دیگ بوتگ، زهرشانی کنۆک ءُ بندیگێن اهلسنتێن پاگواجهانی آزاتی ءَ لۆٹۆک بوت.
په سنیآنلاین ءِ سرهال ءَ شیخالاسلام مولانا عبدالحمید گوشت: گۆں دلسۆچی ءَ سۆگه کن اێں که نونێن پێشامدانی بندیگانَ آزات کن ات ءُ گۆں آوان سکی مه کن ات. آوانی گێشتری ورنا ءُ کم سن انت. بچک ءُ جنکانَ آجو کن ات. آوانَ محارب مه زان ات، اگاں محارب هم بےانت تیرکێل ءُ کشگ مه بےانت.
مولانا عبدالحمید گێش کرت: گهترێن تفسیر شه قرآن ءَ همێش انت که کسے که مردمے را نه کشتگ ئِے، نه توان اێں کش اێں. بلکه آیرا بندیگ کن ات یا دراںڈیه بیت. ماں حدیث ءَ هست که دینے که آیی تها تسامح ءُ درگوز کنگ مه بیت، ماں آیی هچ خێرے نێست.
زاهدان ءِ جمعه ءِ امام ءَ گۆں اشاره به کرداے که گۆں اهلسنتێن پاگواجهاں بیگ انت، درشان ئِے کرت: دو ٹوهێن پاگواجه ماں کُردانی ڈیه ءَ دستگر بوتگ انت؛ واجه ماموستا سیفالله حسینی شه جوانرود ءِ زبردستێن پاگواجهاں انت که وهدے گسے تهے پترتگ انت، گۆں آیی ترندی اش کرتگ. ماموستا خضرنژاد هم شه اۆدے نامپرشتێن پاگواجهان انت. اے پاگواجهاں گپے کرتگ که ماں تیوگێن ملک ءَ چشێن گپ جنگَ بےانت. هچبر گپے دێم ءَ مه گر ات، به هل ات مردم گپ کن انت ءُ گهترێن گپانَ گچێن کن ات. دو سال انت که مولانا کوهی بندیگ بوتگ ءُ کانودے رد ءَ بائد نون آزات بیت. مئے پهکانی لۆٹ همێش انت که اے پاگواجهاں آزات بےانت. مولانا کوهی انتقادے کرت ات که نون ترندتر شه آیی گپان گوشگ بیت.
واجه ءَ گێش کرت: ما امێتوار اێں په مولانا نقشبندی هم که انتقاد ئِے کرتگ ءُ دگه کارے نه کرتگ ئِے، مشکلے جۆڑ مه بیت. ما هم سۆگهَ کن اێں که گپاں شه دلسۆچی ءَ گوشگ بےانت.
🔹مشکلاں سبب بوتگ انت مردم همدل ءُ همتپاک بےانت
مولانا عبدالحمید گۆں اشاره به ایران ءِ مردمانی همدلی ءَ گوشت: ماں ملک ءِ نونێن جاور ءَ مردمانی همدلی باز جوانێن چیزے. پێسر ءَ که لهتے شه ایران ءِ مردمانی همدلی کمرنگ بوت ات، نون مردماں همدل ءُ همتپاک بوتگ انت. آوان که ماں ٹوهێن شهراں چۆ تهران ءَ زندَ گوازێنت، گۆں سیمسری شهرانی مردماں مرۆچی ئێن داب ءَ محبت اشَ نه کرت، مرۆچی مردماں گۆں وت باز محبتَ کن انت ءُ به همدگرے پچاں پهرءُشان کن انت.
زاهدان ءِ جمعه ءِ امام ءَ درشان کرت: دێرێن وهدےکه گوشگ بوتگ که رسانکدراں ایران ءِ مردمانی پچ ءُ رسمءُرواجانَ همدگر ءَ پجارۆکی کن انت، هاس شه زرمبش ءِ اول ءَ مئے ڈیه ءِ پچانَ جاه نه یارت اش ءُ گوشت اش اے اۆگان یا پاکستانی انت. مرۆچی جاور وڑے بوتگ که مردم دگانی تها همدگر ءَ وش آتک گوش انت ءُ محبتَ کن انت. اے همدلی ءُ همتپاکی باز جوانێن چیزے.
مولانا عبدالحمید اے همدلی ءِ باروا سۆگه کرت: پهکێن ایرانیاں گۆں هم شۆر کن انت راهے را گچێن کن انت که توان انت گۆں دنیا ءِ مردماں جوانێن رهوت داشته بےانت ءُ همتپاک بےانت. وهدےکه نابرابری بیت گڑا یکویی هم جۆڑ نه بیت. بازێنے شه ایران ءِ مردماں نه توانتگ گۆں آزاتی ءَ عبادت کن انت ءُ وتی زهگانَ گۆں آزاتی ءَ هێل دےانت.
🔹مردمے که زر اش ماں دنیا ءَ بےارزش بوتگ، سرجَهلی ءِ مارشتَ کن انت
مولانا عبدالحمید گوشت: ایران ءِ مردماں نه دین ءِ مخالف انت ءُ نه دگه ملکانی مزور انت، بلکه ایرانی ءُ همے ملک ءِ مردم انت. اے زهرشانیانی سبب استمانے مشکل انت. وهدے مردمَ گند انت یک ڈالر 39 هزار تومن بوتگ ءُ زر اش ماں دنیا ءَ بےارزش بوتگ، سرجَهلی ءِ مارشت کن انت. مردم وهدے گند انت که ملکے گۆں اینکس داد ءُ مڈی ءَ انگت آیی مردم گشنگ انت ءُ گۆں رۆزیگی مشکلاں گلائێش انت ءُ بڈکی ءُ تێلبری ءِ پد ءَ انت، پرێشان بےانت.
زاهدان ءِ جمعه ءِ امام ءَ گۆں پێسرێں مزنرهشۆنے گپانی نقل ءَ بادشاه ءِ باروا گوشت: وهدے اے چیزانی باروا سۆبێن مه به اێں گڑا مردماں دلگران ءُ ناوشنود به انت. چار ات که مردماں پچے زهرشانی کرتگ. اے شه حکومت ءِ بنهشت اێرکنۆکَے گپان انت که بادشاه ءَ را گوشت ئِے که ایران ءِ مردم جوانێن مردم انت. پچے اے مردماں شه شما شکایت دار انت؟ ایران ءِ مردماں آزاتی نه دار انت، نه لۆٹ انت گۆں رۆدراتکی ءُ رۆاێرشتی ملکاں وابستگ بےانت ءُ ناوشنود انت که پچے مال ءُ مڈی اش دگه جاهاں هرچ بےانت؛ اے پێسرێن مزنرهشۆنے گپ انت. مرۆچی هم ذمهواراں زان انت که استمان دلگران انت. اے که ما گوش آں بائد استمان ءِ گپ اشکنگ بیت په همے پار ءَ انت.
🔹وهدےکه استمان ناوشنود بیت، حکومتَ نه بیت
مولانا عبدالحمید دێمتر ءَ گوشت: بائد په مشکل ءَ تۆجیلے درگێج ات. من مدام شه همے گونڈێن تریبون ءَ توار چست کرتگ که تهے ءُ ڈنے ملکاریاں بےپکار انت، بائد بدل بےانت. ذمهواراں بائد په ملکے جۆڑ کنگ ءُ استمان ءَ پگر کن انت. اگاں استمان شه دست ءَ برۆت تیوگێن دنیا هم وشنود بیت بےپۆک انت. وهدے استمان ناوشنود بیت، حکومتَ نه بیت. من ذمهوار ءُ استمانے دۆزواه آں، ماں اے گپاں خێر ءُ صلاح هست.
واجه ءَ گێش کرت: استمانے که سے ماه انت ملک ءِ تها ءُ ڈن ءَ زهرشانیَ کن انت پهکان مئے درّێن مردم انت. ما اێشی باروا پگر کن اێں که چُنێن وسی ئێں مردم شه ایران ءَ جستگ ءُ دراںڈیه بوتگ انت. په ایران ءِ مردماں هچ جا ایرانَ نه بیت، آ هر کجا بےانت، وتی وطنے پگر ءَ انت. مئے واهشت اێش انت که مئے درێن مردماں بر گرد انت ءُ ملک ءَ په وت ءُ په دگراں آباد کن انت. اے آوانی پس ءُ پیرۆکی ئێن وطن انت. اے بودێن مردماں که شه ملک ءَ شتگ انت، بائد برگرد انت ءُ ماں ملک ءَ کار کن انت.
🔹اگاں جمهوری اسلامی ءِ بنهشت اێرکنۆک ءِ گپانَ هم گوش اێں لهتے تپرکه بےانت
زاهدان ءِ جمعه ءِ امام ءَ گوشت: ماں گچێنکاریاں قول ءُ قرار اشَ کرت ءُ پد ءَ ما حتا نه توانت گۆں آوان نیاد کن اێں. همے پێسرے گچێنکاری ءَ بازێن قولے دات اش بلێن پد ءَ گوشت اش هچ کس مئے گپ ءَ نه منّ ایت. چُنتبر اۆد ءَ شُتگ آں ءُ رندگیری کرتگ آں بلێن هچ کارے نه بوتگ، پچے اێرنگ بیت؟
مولانا عبدالحمید درائێنت: مردماں مشکلاتے دار انت که بائد رندگیری بےانت، شه مردمانی جند ءَ مشکلاتان اش بُشکن ات. تهنا راه همێش انت که مردمانی لۆٹانَ منّ ات. پێسرے مزنرهشۆن ءِ گپ ءَ نقل کن آں که گوشتگ ئِے اے استمان هرچی لۆٹ ایت هما راست انت. اگاں من همایی گپانَ هم به گوش آں شاید لهتے تپرکه بےانت. شاید شما دگه هچ حکومتے ءِ دێم ءَ سرجَهل مه کن ات، بلێن استمان ءِ دێمءَ سر جهل کن ات. اے استمان شمے دادے واهند انت. پاگواجهاں مدام مردمی بوتگ انت ءُ په مردماں گرێتگ اش. ما که گۆں مردماں گرێتگ بائد نون گند اێں مردمانی گرێوگے سبب چے انت.
🔹پێسر ءَ ماں جێڑهاں کسے به پاگواجهاں بےحرمتیَ نه کرت
زاهدان ءِ جمعه ءِ امام ءَ گڈسر ءَ مولانا عبدالواحد ریکی ءِ شهادت ءِ باروا درشان کرت: واجه مولانا عبدالواحد ریکی شه خواش ءِ زبردست ءُ خێرلۆٹێں پاگواجهان ات که مدام په صلح ءُ اشکام ءَ جهدے کرت. آیرا شهید اش کرت ءُ ما شه اے بابت ءَ دلپه درد اێں.
مولانا عبدالحمید گێش کرت: ماں اے ڈیه ءَ چشێن مسائل کم بوتگ که پاگواجهانی سر ءَ بێڑ بیت. پێسر ءَ اگاں جێڑه ءِ هم بوتگ پاگواجه ءُ اسپےریش ءُ واننده ءُ جنێنانی بےحرمتی نه بوتگ. ما دعا ء کن اێں الله پاک آ خدابیامرزے شهادت ءَ قبول ءُ درجهانی برز کنت ءُ آیی زهگ ءُ پشپدانَ اۆپار دنت.
چمشانک