🔷 ملک ءِ مزنێں ذمه‌واراں «بےدۆزواهی» ءُ گۆں« آمید» ءَ اے پێشامد ءَ رندگیری کن انت
شیخ‌الاسلام مولانا عبدالحمید، ماں زاهدان ءِ جمعه نماز ءِ دیوان ءَ (15 مهرماه 1401) زاهدان ءِ هۆنێن جمعه ءِ جنایت ءَ را سکّ اێرَ جت ءُ شه ملک ءِ مزنێں ذمه‌واراں لۆٹ ات که اے جنایتے پهکێں کنۆکاں بےدۆزواهی ءُ گۆں آمید ءَ شرع ءُ کانود ءِ رد ءَ مجازات بےانت.
په سنی‌آنلاین ءِ سرهال ءَ شیخ‌الاسلام مولانا عبدالحمید ماں اے دیوان ءَ که گۆں مردمانی بےمٹێں هوری ءُ بازی ءَ برجم دارگ بوت، اول ءَ به زاهدان ءِ هۆنێں جمعه ءِ جنایت ءَ اشاره کرت ءُ گوشت ئِے: پێسر ءِ هپتگ ءَ که مردماں په نماز ءَ آت انت، هچ کس ءَ گتَ نه کرت ءُ نه زانت که چے پێشَ کێت. نماز گۆں تاهیر ءَ برجم دارگ بوت، مردماں گۆں سنت ءُ نفل ءَ گلائێش ات انت که لهتێں ورنا ءَ کلانتری ءِ نێمگ ءَ سنگ جت، بلێن واکان هم ورنا ءُ هم آدگه مردمانَ که وتی گسانی نێمگ ءَ شێوگ ات انت، تیر جت.
مولانا عبدالحمید گوشت: پێسر ءِ هپتگے پێشامد باز دردآور ات. مردم ءُ نمازوانۆکاں دلگران انت که اے تیراں شه کجا ءُ گۆں چه مرادے جنگ بوتگ انت. ماں آ پێشامد ءَ بازێں مردمے شهید ءُ ٹپی بوت انت. چیزے که باز دلانَ په درد کرتگ اێش انت که مردمانی سر ءُ سێنگاں تیر لگّتگ، وهدےکه اے دنیا ءِ کانودانی هلاپ ءَ انت. گێشتر ماں ایران ءُ دنیا ءَ زهرشانیانی وهد ءَ شه ارسی گێس ءَ کارمرز بیت، اگاں لاچار بےانت گڑا پادانَ تیر جن انت. من تعجب آں آوان که تیرگواری کرتگ زاناں ایرانی ءُ هم‌وطن بوتگ انت؟ ما اسلامی ءُ ایرانی براسی ءُ سیادی دار اێں، زاناں آوان مئے براس بوتگ انت که چشێں کارش کرتگ؟!
زاهدان ءِ جمعه ءِ خطیب ءَ زاهدان ءِ هۆنێں جمعه ءِ پێشامد ءَ را «جنایت» زانت ءُ آیرا سکّ اێر جت ءُ گوشت ئِے: ما اے جنایت ءَ سک اێر جن اێں ءُ آیی رندگیری ءِ لۆٹۆک اێں. ما بس اێشرا نه منّ اێں که کشتگاں شهید گوشگ بےانت، پچےکه قرآن ءُ حدیث ءَ آوانَ شهید گوشتگ. پاگواجه، اسپےریش، کماش ءُ لس مردمانی لۆٹ اێش انت که ملکءِ مزنێں ذمه‌واراں اے جنایت ءَ اێر جن انت ءُ اے پێشامدے گواچن ءَ بےدۆزواهی ءَ رندگیری ءُ پدّر کن انت.
واجه ءَ سک سۆگه کرت: مردمانی آدگه لۆٹ شه ذمه‌واراں اێش انت که آ واکاں که مردمانَ تیر جتگ ءُ آوان که فرمان داتگ ٹک پجاه آرگ ءُ مجازات بےانت تاں ماں آیۆک ءَ اے شهر ءُ استان ءِ مردماں امنیت داشته بےانت. مردمانی جان ءُ مال ءِ امنیت حکومت ءُ سرکارے بڈا انت، حکومت بائد آوانَ که کانود ءَ را پرۆشتگ اش ءُ ظلم اش کرتگ، مجازات کنت.
دارالعلوم زاهدان ءِ سرمستر ءَ درّائێنت: زاهدان ءِ هۆنێن جمعه ءِ پێشامد ءِ گواچن ملک ءِ وزیر ءُ رمبے که شه پارلمان ءَ گۆں آیی همراه ات انت، گوشگ بوت. همےپێم اے ٹکے بارو ءَ سکّ سۆگه اێں کرت که لس مردمانی لۆٹ اێش انت که مئے مظلومی ءَ جار جن ات ءُ اے پێشامدے کنۆکاں مجازات بےانت ءُ سرکار مردمانی تاوان ءَ دنت ءُ آوان که دستگر بوتگ انت، آزات بےانت. ما را هچ لۆٹے برزتر شه حقے کارمرز ءَ نێست.
🔹منتوار اێں شه مردماں که همدردی اش کرت ءُ همےپێم آ رسانکدراں که اے پێشامدے گواچن ءَ جار اش جت
🔹شه استانی رسانک ءُ ملکی رسانکدر ءَ سک گلگ دار اێں
زاهدان ءِ جمعه ءِ امام ءَ درائێنت: شه ایران ءِ تیوگێں استمان ءُ شه وڑوڑێں راجاں ءُ دگه ملکانی مردماں که گۆں مئے مردماں همدردی اش کرتگ ءُ همےپێم شه آ رسانکدراں که زاهدان ءِ جنایت ءِ گواچن ءَ را بےدۆزواهی ءَ شنگ اش کرتگ، منتواریَ کن اێں. بلێں شه استانی رسانک ءُ ملکی رسانکدر ءَ سک گلگ دار اێں، پراستی که لایک نه انت که آیرا «ملکی» رسانک گوش اێں.
واجه ءَ گێش کرت: بازێنے جهد کرت که اے پێشامد ءَ به وت‌مستری‌لۆٹ ءُ دگه پاٹیاں لچێن انت، بلێں زان ات که هچ‌بر حق چێر نه بیت ءُ رۆچ مدام جمبر ءِ پشت ءَ نه مان ایت. من په ستک گوش آں که ماں اے پێشامد ءَ هم گواچن ءُ هم مئے مردمانی مظلومی په ذمه‌واراں ءُ دگه مردماں درا بوت. اے پێشامد ءَ مئے مردمانَ سرپد کرت که بےترس ءَ وتی حق ءَ لۆٹ انت.
🔹هچ حکومتے گۆں ظلم ءَ نه مان ایت
شیخ‌الاسلام مولانا عبدالحمید ماں وتی هبرانی گڈسر ءَ په عدالت ءَ سک سۆگه کرت ءُ گوشت ئِے: حکومت ءُ ملک تهنا گۆں عدالت ءَ دارگ بیت. ظلم مانۆک نه انت ءُ حکومت ءِ بندات ءَ ابێر کنت.
واجه ءَ گێش کرت: ماں انقلاب 57 ءَ اے گالرد ءَ جارش جت که «المُلک یبقی مع الکفر و لا یبقی مع الظلم»؛ ملک گۆں کفر ءَ مان ایت، بلێں گۆں ظلم ءَ نه مان ایت. پمێشا هرکس ماں هر پچے ءُ گۆں هر نامے ظلم کنت نه مان ایت ءُ تهنا حق ءُ آمید انت که مان ایت.
چمشانک