شیخالاسلام مولانا عبدالحمید ماں زاهدان ءِ جمعه نماز ءِ دیوان ءَ (۱۱ شهریور ۱۴۰۱) شه اێشی که اهلسنتانی آزاتیاں سگّتَ نه بےات، انتقاد کرت ءُ اے کردارانی آسراتے بارو ءَ ڈاه دات.
په سنیآنلاین ءِ سرهال ءَ مولانا عبدالحمید درشان کرت: بائد ماں تیوگێن پڑان عدالت ءَ کمار کن اێں ءُ دگرانَ سگّ اێں. نبائد اے بارو ءَ ترۆندی بیت.
اێران انچێن ملکے که وڑوڑێن راج ءُ مذهب دار ایت ءُ ماں دنیا ءَ چشێن ملک کم انت. شیعه یان ءُ هاس آوان که حکومتے واهند انت، بائد وڑے کرد کن انت که سجهێں پاٹیاں چۆ یهودی، مسیحی ءُ درویش، پهکانی حقان کمار بےانت، کانود هم همێشرا گوش ایت.
واجه ءَ سک سۆگه کرت که اهلسنتاں ماں اێران ءَ ٹوهێن آباتی ءِ انت ءُ ما هجبر نه گوش اێن که اهلسنتاں کم انت، اهلسنتاں ماں اێران ءَ کمتهکم ۲۰ میلیون انت ءُ اے آباتی ءَ حق ءُ آزاتی هست ءُ په ملکے راهبرگ ءَ بودێن مردم دار انت که بائد آوانی کانودی حقاں کمار بےانت.
🔹کسے که آیی وجودے تها ذره ئے مسلمانی بیت نماز ءَ سگّتَ کنت
مولانا عبدالحمید ذمهارانَ ڈاه دات که شه ترۆندی ءَ ماں حکومت ءَ پلگار کن انت ءُ گوشت ئِے: ما شه اێشیَ ترس اێں که ذمهوارانی ترۆندی سبب بیت تپاک ءُ یکۆیی نقصان گند ایت. اگه اے ترۆندیاں مئے آزاتیانَ زن انت، گڑا اے باز خطرناکێن چیزے. من پرێشا اے گپ ءَ جن آں که لهتێن وهد انت جنزے ماں ملک ءَ بنگێج بوتگ که ما را پرێشانِ کرتگ. نمازخانهئانی سر ءَ ماں وڑوڑێن جاهاں بێڑ بوتک؛ وهدےکه نماز په هچ کس ءَ پرێشانی ءِ سببَ نه بیت.
کسے که آیی وجودے تها ذره ئے مسلمانی بیت نماز ءَ سگت کنت. مگه نماز په کسے ضرر دار ایت؟
زاهدان ءِ جمعه ءِ امام ءَ گێش کرت: نمازخانه ئان ماں مشهد، شیراز، تهران ءُ دگه مێتگاں زۆر ءُ زرابے چێر ءَ انت. من شه همے تریبونے سر ءَ دلسۆچێن ذمهواران گوش آں که شه اے ترۆندیاں دێمداری کن انت. هم راجکماش که دلسۆچے، هم مزنرهشۆن که حکومتے سرۆک انت ءُ آدگه ذمهواران مه هل انت که اهلسنتاں ناراض بےانت.
واجه ءَ گێش کرت: ما بازێن سکیانَ پج کرتگ بلێن وتی توار ءَ چست نه کرتگ اێں تان مه گوش انت اهلسنتاں اێرنگ ءُ آ رنگ انت. ما گۆں حکومت ءَ همراهداری کرتگ، نون مئے امێتداری اێش نه انت که مئے نماز سگت مه بیت. حکومت بائد مئےکانودی آزاتیانَ حفاظت کنت. اگه اهلسنتانی سر ءَ زۆر ءُ زراب بیت گڑا ما شه وتی کانودی آزاتیان دێمپانیَ کن اێن.
🔹 آوانی دێم ءَ اۆشت اێں که مئے نماز ءَ سگتَ نه کن انت
مولانا عبدالحمید گۆں تاکید پرێشی که اێران پهکێن اێرانیانی ملک انت ءُ اهلسنتاں تهنا په براسی ءِ ساتگ ءَ اے ۴۴ سالاں نابرابرانَ سگتگ، درشان ئِے کرت: شه مئے بودێناں ماں ملک ءِ ٹوهێں جاگه ئاں ءُ استانانی بنجاهاں کار گرگ نه بوتگ، گۆں سلاه بندێن واکاں هم اهلسنتاں هور نه انت، بلێن ما تهنا اے چیزانَ گوشتگ ءُ رندگیری کرتگ ءُ ودار اێں تان حل بےانت، بلێن اگه مئے مذهبی مسائلانی تها دخالت بیت، گڑا ما اێشرا سگت نه کن اێں ءُ ٹکاٹک زهرشانیَ کن اێں.
زاهدانءِ جمعه ءِ امام ءَ تچکاتچک گوشت: من یکے شه ملکے خیرلۆٹاں آں. اے سجهێں اهلسنتانی توار انت که بائد ماں اے ملک ءَ آزات بےانت ءُ آ که زۆرے واهند انت نبائد مئے آزاتیانَ زنت. تاں آ دم ءَ که ساه مئے ڈڈرے تها بیت ما آوانی دێم ءَ اۆشت اێں که مئے نماز ءَ سگت مه کن انت ءُ لۆٹ انت مئے هێلکاری ءَ دێمداری کن انت.
واجه ءَ گۆں اشاره به اهلسنتانی بازێن هواری ءَ ماں ملکے سیاسی پڑان، درائێنت ئِے: وهدے مزنرهشۆن ادا آت، من آیرا گوشت ما مرۆچی اێرانیانی دێم ءَ ءُ هاس شمے دێم ءَ سر برز اێں، پچےکه هجبر جێڑه جۆڑ نه کرتگ اێں. ما مدارا ءِ واهند اێں ءُ باور دار اێں که مسلماناں ماں دنیا ءَ بائد تپاک بےانت. په ما شیعه ءُ سنی ءُ مسلمان ءُ کافر فرق نه کنت، ما به انسانیت ءَ باور دار اێں. اهلسنتاں په ملک ءِ امن کنگ ءَ شه پهکان دێمتر ءَ بوتگ انت، ما په ملکی یکویی ءَ همکاری کرتگ ءُ ماں پهکێن ملکاری پڑان هوار بوتگ اێں. حتا پێسرے گچێنکاری ءَ که ووٹ ءَ را مکن اش کرت، انگت اهلسنتاں بهر زۆرت ءُ گچێنکاری ءَ بندش نه کرت.
مولانا عبدالحمید همےپێم گوشت که ذمهواران مئے نمدانَ پسو نه دےانت، وهدے که ما آوانَ مان رسانکدران شنگ کن اێں گڑا گلگ کن انت که شما پچے شنگ کرت، وهدے ما نمدے نبیس اێں اے مئے حق انت که آیرا پسو دےات.
واجه ءَ درائێنت حتا مئے تندجاهانَ فیلتر اش کرتگ، وهدےکه اهلسنتان شه حکومتی رسانکدرانی نێمگ ءَ ڈالچار بیگ انت، ما دو تندجاه جۆڑ کرتگ بلێن آوانَ هم شه هما اول ءَ فیلتر اش کرت. درے رسانکدران هم که پێسر ءَ برےبرے مئے مطالبانَ شنگَ کرت، پد شه گچێنکاری ءَ آوان هم ما را بندش کرتگ.
چمشانک