مروچی : ۲۳ مرداد , ۱۴۰۱
مولانا عبدالحمید ماں زاهدان ءِ جمعه نماز ءِ دیوان ءَ:

اسلام، مردم ءَ گهترێں عقیده، کردار، تب ءُ زندگی ءِ نێمگ ءَ تێلانکَ دنت

اسلام، مردم ءَ گهترێں عقیده، کردار، تب ءُ زندگی ءِ نێمگ ءَ تێلانکَ دنت

شیخ‌الاسلام مولانا عبدالحمید، ماں زاهدان ءِ جمعه نماز ءِ دیوان ءَ (۲۱ مرداد ۱۴۰۱/ 12 اگوست 2022) «باور به یکێں الله ءِ عبادت»، «نماز»، «خیرات ءُ پاک‌ونڈ»، «صله رحم»، «راست‌گوشی ءُ یکرنگی» ءُ «آسانی ءُ اعتدال» ءَ را شه اسلام ءِ ٹوهێں چێدگاں زانت ءُ سکّ سۆگه ئِے کرت که مردماں اے رهبندانَ کارمرز کن انت.

په سنی‌آنلاین ءِ سرهال ءَ شیخ‌الاسلام مولانا عبدالحمید پد شه اے پاگپ ءِ وانگ ءَ «وَالَّذِينَ لَا يَشْهَدُونَ الزُّورَ وَإِذَا مَرُّوا بِاللَّغْوِ مَرُّوا كِرَامًا» [فرقان: ۷۲] درشان ئِے کرت: اگاں ما اے ڈگارے سرے مردمانی دۆدءُربێدگانَ بچار اێں گڑا سرپدَ به اێں که په مردماں هچ زندگی ءِ گهتر شه اسلامی زندگی ءَ نه انت. اسلام دینے که آیی چێدگاں یکێں الله عبادت، نماز، پاک‌ونڈ، صله‌رحم، راست‌گوشی، وش‌تبی ءُ نێکێں کردار انت. اسلام په یکێں الله ءِ عبادت ءُ گهترێں عقیده ءِ نێمگ ءَ تێلانک دنت.

واجه ءَ گێش کرت: الله ءِ رهبندانی سر «نماز» ءُ «پاک‌ونڈ» انت. نماز رازءُدل گۆں الله ءَ ءُ وتی بےچارگی ءَ آیی دێم ءَ درشان کنگ ءُ رهوت گۆں الله ءُ آیی ادب ءُ حرمت کنگ انت. پاک‌ونڈ ٹوهترێں مالی ئێں عبادت ءُ برزترین وش‌تبی انت.

زاهدان ءِ جمعه ءِ خطیب ءَ گوشت: قرآن ءَ پد شه الله ءِ حقاں په پسءُماس ءِ حقاں، صله‌رحم، سیالداری ءُ رسیدگی به یتیم ءُ ناداراں سک سۆگه کرتگ. پاک‌ونڈ، بزاں رسیدگی به نادار، بندیگ ءُ آوانی لۆگماناں. الله پاک پاک‌ونڈے بدل ءَ که سۆداگری زر ءُ کالائانی یک‌چلّم انت، مزّ دنت، گناهانَ بکشاییت، هدایت ءَ گێشَ کنت ءُ ماں اے دنیا ءُ آ دنیا ءَ چنکه کساس گێشتر مزّ دنت.

واجه ءَ گێش کرت: اسلام راست‌گوشی، یکرنگی ءُ امانتداری ءِ دین انت. یکے شه اسلام ءِ مزنێں بُنداراں راست‌گوشی ءُ راستێں باور انت. اسلام ءَ ما را یات داتگ که راست‌گوش، امانتدار ءُ پلگارکار به اێں، هچ کسَے حق ءَ مه ور اێں ءُ ناحق ءَ هچ کسے دل ءَ مه پرۆش اێں، پچے که مردمانی دلانی پرۆشگ ءُ ظلم کنگ ءِ بدل شه آیی گرگَ بیت.

دارالعلوم زاهدان ءِ سرمستر ءَ گێش کرت: اسلام بنڈ ءُ دۆرنگی ءِ دشمن انت. یک رۆچے واجه رسول الله صلّی‌الله‌علیه‌وسلم ءَ ٹوهێں گناهانَ مرت ءُ درّائێنت ئِے: شرک ٹوهترێں گناه انت، پد ءَ پسءُماس ءِ نافرمانی ٹوهترێں گناه انت، پد ءَ درۆگێں هبر ءُ گواهی انت. قرآن بخیلی ءُ درۆگ ءَ سکّ اێر جنت، ما هم گۆں شرک ءُ پسءُماسے نافرمانی ءُ درۆگ ءَ دشمن به اێں. راست گوش اِت که رکێن ایت ءُ شه درۆگ ءَ پلگار کن اِت که تباه کنت.

واجه ءَ درشان کرت: اسلام ءَ شه درۆگ، بنڈ، بدی، قتل، مۆک، سود، ظلم، دزّی، فساد ءُ ترندآپے ورگ ءَ که عقل ءَ بارت، مکن کرتگ. آ چیزاں که اسلام ءَ شه آوان مکن کرتگ په مردمانی سۆب ءَ انت ءُ سالمێں عقل هم آیرا منّ ایت. اسلام ءِ حکمان سکّ نه انت، بلێں ارمان که بازێنے شه مسلمانان اێشرا زبر سرپد نه بوتگ انت ءُ وڑے کردار اِش کرتگ که رَدسرپدی ءِ سبب بوتگ انت ءُ مردماں شه دین ءَ بێزار بوتگ انت، وهدےکه دین راست انت ءُ سستی نه دار ایت. دین هما انت که ماں قرآن ءُ واجه رسول الله صلّی‌الله‌علیه‌وسلم ءِ سیرت ءَ آتگ.

زاهدان ءِ جمعه ءِ خطیب ءَ گوشت: صحابه ئاں که جاهلی ءِ دۆر ءَ را دیست ات، مدام په قرآن ءِ رهبند ءُ هدایت ءَ شکر اشَ کرت ءُ گوشت اش: «الْحَمْدُ لِله الَّذِي هَدَانَا لِهَٰذَا وَمَا كُنَّا لِنَهْتَدِيَ لَوْلَا أَنْ هَدَانَا الله» [اعراف: ۴۳]. اگه الله پاک ءَ چشێں رهبندے را ما را مه داتێں، ما هدایتَ نه بوت اێں. شه اے بابت ءَ بائد انت که ما پهکاں الله ءَ شکر کن اێں که گهترێں راه ءَ را ما را نشان داتگ ءُ اسلام ءَ سکّ لچ اێں.

🔹 مسلمانێں جنێنانی دێمروی ءُ عزت گۆں اسلامی پچءُپۆش ءُ علم ءِ کٹگ ءَ انت

مولانا عبدالحمید وتی هبرانی دێمتر ءَ «حجاب» ءَ را په جنێناں ارزشتے مرت ءُ گوشت ئِے: اسلام ءَ په اسلامی پچءُپۆش ءُ کاملێں پچ ءَ سکّ سۆگه کرتگ ءُ حجاب ءَ را په جنێناں ارزشت زانتگ.

واجه ءَ تچکاتچک گوشت: بازێنے جنێنانی لوچی ءَ دێمروی ءُ پۆشگ ءَ پدمانیَ زان انت، وهدےکه جنێنانی دێمروی گۆں علم ءُ زانتے کٹگ ءَ انت، نه گۆں لوچی ءَ.

دارالعلوم زاهدان ءِ سرمستر ءَ درشان کرت: دین شه دێمروی ءَ دێمداریَ نه کنت، بلکه پهکانَ گۆں جنێناں، په علم ءُ زانتے کٹگ ءَ دلبڈیَ دنت.


چمشانک

دیدگاهتان را بنویسید

نشانی ایمیل شما منتشر نخواهد شد.