سنی‌آنلاین|شیخ‌الاسلام مولانا عبدالحمید ماں زاهدان ءِ جمعه نماز ءِ دیوان ءَ (19 فروردین 1401/ 8 آوریل 2022) گۆں اشاره به هریکے شه دین ءِ فرایض ءُ احکامانی تاثیراں ماں انسانے اصلاح ءَ، عمل به اے احکامانَ په انسان ءِ تزکیه ءُ الله ءِ وشنودی ءِ کٹتن ءَ هژدری زانت.
په سنی‌آنلاین ءِ سرهال ءَ شیخ‌الاسلام مولانا عبدالحمید پد شه مبارکێں سوره بقره ءِ 184-185 می آیتانی وانگ ءَ درشان ئِے کرت: الله پاک گۆں اسلام ءِ رهبندان لۆٹ ایت انسان ءَ اصلاح کنت ءُ آیرا به گلباگ ءَ بارت. الله ءِ رهبنداں په انسان ءِ تزکیه ءَ پێلو انت ءُ په انسان ءِ زندگی ءِ وڑ وڑێں بهراں گچێن بوتگ انت.
واجه ءَ گێش کرت: انسان ءِ زندگی ءِ وڑ وڑێں بهراں گۆں نماز، رۆچگ، حج، زکات، فرایض، واجبات، مردمانی حقانی کمار کنگ ءُ حرامانی یله دیگ ءَ جۆڑ بیت.
زاهدان ءِ جمعه ءِ امام ءَ درشان کرت: عبادتان باز اثر دار انت. گۆں رۆچگ ءَ هونی‌ئێں ناجوڑیاں چۆ قند ءُ چرپی کم بےانت. گۆں راه روگ ءَ ماں حج ءَ بازێنے شه پُپ ءُ لاپ ءِ ناجۆڑیاں علاجَ بےانت. زکات شمے گناهانَ پاک ءُ شما را تزکیهَ کنت، بےزکات ءَ شما اصلاحَ نه به‌اِت. زکات فرض انت ءُ بےعمل ءَ به فرضانی سر ءَ تزکیه جۆڑ نه بیت ءُ هچ رکّگ ءِ شه الله ءِ عذاباں ابید شه عمل به فرایض ءُ حرامانی یله دیگ ءَ نه انت.
واجه ءَ «نماز ءِ وانگ ءَ گۆں جماعت ءَ ماں مسیتاں» یکے شه شریعت ءِ اصلاحی‌ئێں رهبنداں زانت ءُ درشان ئِے کرت: فرضی‌ئێں نمازانَ گۆں مسلمانانی هوری ءَ ماں مسیتاں بوان ات. شمے نمازاں گسان تها آ اثر نه دار ایت که مسیتے تها دار ایت. شه مسیتے روگه ءَ شمے گسانی تها نور کێت. تاں وتی زندگی ءِ گڈی رۆچاں وتی رهوت ءَ گۆں مسیتان سات ات. مسیت الله ءِ گس ءُ نور ءُ هدایت ءُ عبادت ءِ جاگه انت، وهدےکه مسیتے تها پتر ات الله ءِ مهمانَ به اِت ءُ الله گۆں رحمتانی اێر آرگ ءَ شه شما پذیرایی کنت ءُ ملائکاں په شما درود دێم دےانت. رمضان آتگ تاں مئے رهوت گۆں مسیت ءُ قرآن ءُ ناداراں جۆڑ بیت.
دارالعلوم زاهدان ءِ سرمستر ءَ وتی هبرانی دێمتر ءَ رمضان ءَ را «همدردی ءِ ماه» زانت ءُ گوشت ئِے: رمضان دعا ءُ اصلاح ءُ همدردی گۆں نادارانی ماه انت. مۆمنَ نه توانت که چاگرد ءِ ناداری ءُ گشنگی ءُ مشکلانَ نادلگۆش کنت. مگه بیت که معلول ءُ ناجۆڑ ءُ بندیگانی کهول ءُ ظلم ءُ بےعدالتی ءُ آدگه مشکلان که ماں چاگرد ءَ هست انت مۆمن ءَ ناراحت مه کن انت؟! اے واجه رسول الله صلّی‌الله‌علیه‌وسلم ءِ سیرت ءِ هلاپ ءَ انت. واجه رسول الله صلّی‌الله‌علیه‌وسلم دنیا ءِ تیوگێں مردمانی دلسۆچ ات ءُ په تیوگانی سۆبمندی ءَ فکرے کرت. وهدےکه بستار برز بیت گڑا انسان په سرجمانی سۆبمندی ءَ فکر کنت، حتا گنگدامانی سر ءَ ظلم کنگ هم آیرا ناراحت کنت. ماں اسلام ءَ حیوانان هم حق دار انت، وهدےکه ضرر مه دار انت نباید لٹءُکٹ ءُ اذیت بےانت.
واجه ءَ وتی هبرانی دێمتر ءَ په «اصلاح ءُ تزکیه ءَ» سکّ سۆگه کرت ءُ گوشت ئِے: اگاں انسان شه رڈێں تباں پاک مه بیت، گڑا شه گلباگ ءَ زبهر بیت. پرے واست ءَ که گلباگ ما را رس ایت ءُ الله ءِ وشنودی ءَ کٹ اێں وت ءَ قرآن ءِ رهبندانی رد ءَ ماں ا ے ماه ءَ اصلاح کن اێں. وت‌لۆٹی ءَ یله دےاێں تاں ایمان ءِ نور ءُ هدایت مئے دلانی تها بێت، وتی دنیایی کارانَ کم کن ات ءُ گێشتر گۆں دعا ءُ عبادت ءَ گٹ بےات.
🔹انساناں گۆں دوری شه شریعت ءَ وت را گۆں بےسۆبی ءَ آماچ کرتگ
مولانا عبدالحمید وتی هبرانی دێمتر ءَ «دوری شه ابرم ءِ راه ءَ» را شه نونێں انسانانی مشکلاں زانت ءُ درشان ئِے کرت: اگاں انسانی چاگرد ءَ سێل کن اێں گند اێں که انساناں ماں دنیا ءَ گۆں سکّیاں آماچ انت، زندگی سکّ ءُ تهل بوتگ ءُ وت را بےسۆبَ زانت ءُ گۆں وت‌کشی ءُ جنگ ءُ مێڑ ءُ دگرانی کشتن ءَ لۆٹ ایت مشکلانَ دور کنت یا وت را راحت کنت.
واجه ءَ گێش کرت: انسانانی مشکلانی سوَب اێش انت که انسان شه ابرم ءِ راه ءَ دور بوتگ ءُ چۆٹێں راه ءَ شتگ. ابرم ءِ راه «دین» انت. اگاں انسان اے راه ءِ تها برۆت دین ءِ رهبندانی وڑ ءَ زندگی کنت، گڑا زندگی پرایی وشَ بیت ءُ به «حیات طیبه» ءُ پراه‌دلی ءَ رس ایت.
🔹گنبدکاووس ءُ مشهد ءِ پێشامداں سکّ رد انت
شیخ‌الاسلام مولانا عبدالحمید وتی هبرانی گڈسر ءَ گۆں اشاره به گنبدکاووس ءُ مشهد ءِ نۆکێں پێشامداں که لهتێں پاگواجه شه سنی ءُ شیعه یان کشگ ءُ ٹپی بوتگ انت، آ پێشامدانَ سکّ اێر جت ءُ گوشت ئِے باز رڈ انت که انسان وتسر گۆں دگراں جنگ کنت ءُ آوانَ کش ایت.
واجه ءَ گێش کرت: امنیت ٹوهترین داد انت. ایران ءِ استمان چۆ یک لۆگمانے انت ءُ ما گۆں دنیا ءِ آدگه استماناں هم سیادی ءِ مارشت کن اێں. اگاں گنۆک ءُ چۆٹێں مردمے بدێں کارے کرت نباید آیی کرد په پهکانی نام ءَ هِلّگ بیت. ذمه‌واراں باید په سار اے بن‌گپانَ رسیدگی کن انت.
چمشانک