شیخ الاسلام مولانا عبدالحمید ماں زاهدان ءِ جمعه نماز ءِ دیوان ءَ (5 فروردین 1401/ 25 مارچ 2021)، الله ءِ احکام ءُ فرایضانَ په چاگرد ءِ اصلاح ءُ انسان ءِ رکّێنگ شه الله ءِ عذاب ءَ زانت ءُ په عمل به شریعت ءِ حکماں ماں زندگی ءِ وڑ وڑێں پڑاں سکّ سۆگه ئِے کرت.
په سنی‌آنلاین ءِ سرهال ءَ شیخالاسلام مولانا عبدالحمید شه مبارکێں سوره «توبه» ءِ 34 ءُ 35می آیت ءِ وانگ ءَ پد درشان کرت: الله پاک انسان ءِ بنێنۆک انت ءُ شه آیی پهکێں راستی ءُ چۆٹی ءُ خُبی ءُ سستیاں سهی انت ءُ پرایی اصلاح ءَ شه مهتر آدم ءِ وهد ءَ تاں آخری پیغمبر ءِ وهد ءَ رهبند جۆڑ کرتگ.
واجه ءَ گێش کرت: الله پاک ءَ په انسان ءِ علاج ءَ شه جانی ءُ معنوی ناجۆڑیاں ءُ انسان ءِ پاکی شه کچٹی ءُ عیباں که هرکجامَ توانت انسان ءَ به جهندم ءَ بارت، شریعت ءُ احکامانَ اێر آورتگ. الله ءِ احکاماں پرێشی انت که انسان پاک بیت ءُ به بهشت ءَ بروت.
دارالعلوم زاهدان ءِ سرمستر ءَ گێش کرت: یکے شه الله ءِ احکام ءِ رهبنداں په انسان ءِ اصلاح ءَ نماز انت. نماز ءَ ماں سجهێں آسمانی دیناں بوتگ ءُ تیوگێں نبیاں په نماز ءِ وانگ ءَ سکّ سۆگه کرتگ. البت نماز ءِ وانگ ءِ رهبند ءُ آیی رکعتانی کساس ماں آدگه آسمانی ئێں دینان ءُ حتا ماں اسلام ءَ فرق کن انت.
واجه ءَ گۆں اشاره به نماز ءِ ارزشت ءَ درشان کرت: نماز راز ءُ نیاز گۆں الله ءَ ءُ یکے شه آ احکامان انت که انسان ءَ شه ته ءَ اصلاحَ کنت. دل ءِ تها الله ءِ ترس ءَ کار ایت ءُ انسان ءِ رهوت ءَ گۆں الله ءَ سکّ جۆڑ کنت ءُ الله ءِ مهر ءَ دلے تها کار ایت. دلگۆش کن اێں که نماز قضا مه بیت، پچےکه نماز ءِ قضا کنگ انچێں گناه ءِ که گۆں کفر ءَ نزێنک انت.
زاهدان ءِ جمعه ءِ خطیب ءَ گێش کرت: دۆمی حکمے که په انسان ءِ اصلاح ءَ باز هژدری انت، زکات انت. زکاتے دیگ یکے شه الله ءِ حکماں ءُ همدردی گۆں بےوس ءُ نادار ءُ یتیمان انت.
واجه ءَ گوشت: زکات ماں پهکێں آسمانی دینان بوتگ ءُ الله ءَ مهتر عیسی، مهتر اسماعیل ءُ پێسر ءِ پیغمبرانَ په نماز ءِ وانگ ءُ زکات ءِ دیگ ءَ پرمان داتگ. زکات انسان ءَ شه کنجوسکی، چم‌سکی به دگرانی مالان ءُ مال دۆستی ءُ حرص ءَ پاکَ کنت.
شیخالاسلام ءَ گوشت: ابید شه زکات ءَ، نفلی ئێں صدقه ءُ خیراتاں هم مال دۆستی ءَ شه انسانے دل ءَ دور کن انت ءُ انسان ءَ پاک کن انت. پرےواست ءَ ماں شعبان ءُ رمضان ءِ ماهاں که تزکیه ءُ اصلاح ءِ ماه انت، وتی سیاد ءُ دۆستانَ په زکات ءُ خیرات ءِ دیگ ءُ نماز ءُ اۆپار ماں دین ءَ سۆگه کن ات، اے حکماں په چاگرد ءِ اصلاح ءُ انسان ءِ رکّێنگ شه جهندم ءَ باز اثر دار انت.
🔹هچ کجام شه الله ءِ ولی ءُ فقه ءُ حدیث ءِ ائمه ئاں به گونڈترین صحابه ءِ مقام ءَ نه رس انت
شیخالاسلام مولانا عبدالحمید وتی هبرانی دێمتر ءَ گۆں اشاره به صحابه ئانی جاگه ءَ گوشت ئِے: واجه رسول الله صلّی‌الله‌علیه‌وسلم ءِ اصحاباں ٹوهێں مقامے دار انت. صحابه ئان گۆں اێشی که مدام واجه رسول الله ءِ کنکّ ءَ بوتگ انت په دێمپانی شه دین ءَ جنگ اش کرتگ.
واجه ءَ گوشت: هچ کجام شه الله ءِ ولی ءُ فقه ءُ حدیث ءِ ائمه ئاں به گونڈترین صحابه ءِ مقام ءَ نه رس انت، بلکه پهکێں اولیاءالله ئان شه صحابه ئانی علم ءُ معارفان بهر زۆرتگ. صحابه ئان گۆں وتی چماں واجه رسول الله صلّی‌الله‌علیه‌وسلم ءِ مبارکێں چهرگ ءَ دیستگ ءُ گۆں آ واجه ءَ نشتگ انت، اے بےجۆڑه ئێں عبادتے که ماں آوانی اصلاح ءَ باز اثر ئِے داشتگ.
دارالعلوم زاهدان ءِ سرمستر ءَ گوشت: واجه رسول الله صلّی‌الله‌علیه‌وسلم ءَ سۆگه کرتگ که منی صحابیانَ زاه ءُ زکت مه کن ات. بازێنے به حضرت معاویه رضی‌الله‌عنه بےشرپیَ کن انت، درحالےکه آ واجه پیغمبر صحابی ءُ وحی ءِ نبیسۆک بوتگ. تیوگێں فضایل ءُ ساڑایگاں که لس صحابه ئانی بارو ءَ گوشگ بوتگ انت، حضرت معاویه رضی‌الله‌عنه ءِ بارو ءَ هم هست انت.
واجه ءَ گێش کرت: صحابه ئاں معصوم نه انت، بلێں هرجا ماں قرآن ءَ که صحابه ئانی گناهاں ذکر بوتگ انت، دێمتر ءَ آوانی بکشایگ هم آتگ که اے الله ءِ مهر ءُ محبتے نشان انت گۆں صحابه ئان. پمێشا پهکاں باید صحابه ءُ اهل‌بیتانی حرمت ءَ سات انت ءُ آوانی بدگوشی ءَ مه کن انت.
🔹 نوروز ءُ بهارگاه ءِ مهمانانی حرمت کنگ اسلامی اگده ءِ ءُ شه مئے مردمانی رسم ءُ رواجان انت
مولانا عبدالحمید وتی هبرانی گڈی سرا سیستان ءُ بلوچستان ءِ مردمانَ نوروزی مهمانانی بارو ءَ سۆگه کرت ءُ گوشت ئِے: تیوگێں ایرانی مسافران مئے هم ملکی انت ءُ مسلمان انت، اگاں مسلمان هم مه بےانت، انسان انت، په همےواست ءَ حرمت کنگ بےانت. مهمان ءِ حرمت ءُ عزت اسلامی اگده ءِ ءُ شه مئے مردمانی رسم ءُ رواجان انت.
زاهدان ءِ جمعه ءِ امام ءَ دێمتر ءَ دزّی ءُ راه بندی ءِ رڈّی ءَ بیان کرت ءُ گوشت ئِے: راج ءُ استمان ءِ ٹوهترین دشمن هما انت که دزی کنت. اے پاٹی شه انسانیت ءَ دور انت. ڈیه ءِ مردمان نباید خلافکار ءُ سلاهبندێں دزان نادلگوش کن انت. بلکه په دزانی ودی کنگ ءُ دستگر کنگ ءَ گۆں قضایی واکاں همکاری کن انت.
مولانا عبدالحمید وتی هبرانی گڈسر ءَ گۆں اشاره به «حاجی مهیم شه‌بخش» ءِ وفات ءَ که یکے شه بلوچانی کماش ءُ اسپت ریشان بوتگ، په آ خدابیامرز ءَ شه الله ءِ بارگاه ءَ بکشش ؤ برزین درجه لۆٹۆک بوت.
چمشانک