شیخالاسلام مولانا عبدالحمید ماں زاهدان ءِ جمعه نماز ءِ دیوان ءَ (6 اسفند 1400/ 25 فبروری 2020) گۆں انتقاد شه کارگس ءُ ارگان ءُ لهتے شه شیعه یانی پاگواجهانی دخالتاں ماں اهلسنتانی مذهبی اموراں، شه ملک ءِ مزن رهشۆن ءَ لۆٹ ات ئِے که وت اهلسنتانی مشکل ءُ لۆٹانَ دلگۆش ءُ رندگیری کنت.
په سنیآنلاین ءِ سرهال ءَ شیخالاسلام مولانا عبدالحمید پد شه اے حدیث ءِ وانگ ءَ: «ألَا كُلُّكُم راعٍ و كُلُّكُم مَسؤولٌ عَن رَعِيَّتِه»، درشان ئِے کرت: ایران کهنێں ملکے که راجدپتر ءُ دۆدءُربێدگے واهند انت. آ استماناں که راجدپتر ءُ دۆدءُربیدگ ءُ هاس اسلامی دۆدءُربێدگے واهند انت، باید بستار اش باز برز بیت، پچےکه اسلام ءِ بستار ءُ سَگّگ برز انت.
واجه ءَ گێش کرت: مئے امێتداری اێش انت که مئے ملکے تها مذهبی آزاتیاں پێلو دیگ بےانت. مذهبی آزاتی یکے شه انسانانی بنیادی حقان انت. سجهێں ملکاں ءُ هم ایران ءَ میان استمانی منگنامه ءَ که مذهبی آزاتیانی بارو ءَ انت، امضا اش کرتگ ءُ مئی ملک ءِ بنیادی کانود ءَ هم اسلامی مذهبان ئِے مذهبی آزاتیان داتگ.
زاهدان ءِ جمعه ءِ خطیب ءَ گێش کرت: بنیادی کانودے رند ءَ هچ کس حق نه دار ایت که شیعه یا اهلسنتانی مذهبی امورانی تها دخالت کنت. بنیادی کانود ءِ رد ءَ ما وتی مذهبی امورانی تها آزات اێں که په وتی زهگانی هێلکاری ءُ آپسله ءُ وتی جمعه ءُ جماعتانی امامانی عزل ءُ نصب ءِ بارو ءَ تصمیم گر اێں.
دارالعلوم زاهدان ءِ سرمستر ءَ گوشت: بژن انت که بازێنے ملکی ءُ میان استمانی منگنامه ئانی خلاف ءَ مسیتانی امورانی تها دخالت کن انت ءُ گوش انت که ما باید شمے مسیتانی بندگ ءُ آوانی امامانی بارو ءَ تصمیم گر اێں، درحالی که مسیتان شه مذهبی اموران انت. اهلسنتانی مسیتان هچ وهدے په ملک ءَ ءُ حکومتاں ضرر نه داشتگ، مسیتان بس عبادتے جاگه انت که مردم اۆد ءَ نماز وان انت ءُ عبادتَ کن انت.
واجه ءَ گێش کرت: بنیادی کانودے رد ءَ ما په مسیتانی بندگ ءَ آزات اێں. البت شهرانی تها رهبندے هست که په مسیت ءِ بندگ ءَ باید شه شهرداری ءُ اوقاف ءِ نێمگ ءَ رندگیری بیت. بلێں ماں هلکاں که هچ وڑێں جۆڑ کنگ ءُ بندگے مۆکل ءُ جوازے نه لۆٹ ایت، مسیت ءِ جۆڑ کنگ هم جوازے نه لۆٹ ایت، بلێں ارمان که نون په مسیت ءِ بندگ ءَ ماں شهراں ءُ هلکاں باید شه هاسێں جای جوازے گرگ بیت.
مولانا عبدالحمید وتی هبرانی دێمتر ءَ گێش کرت: بنیادی کانود ءَ جمعه ءُ جماعتانی امامانی بارو ءَ هم مردمانَ آزاتی داتگ که هرکس ءَ لۆٹ انت وتی امام کن انت ءُ پهکێں اماماں باید کانود ءَ کمار کن انت، اگاں کسے کانود ءَ را کمار نه کرت، گڑا آ وتی کردے تاوان ءَ وت دنت.
واجه ءَ ٹکاٹک گوشت: اے پهکێں اهلسنتانی لۆٹ انت شه کردستان ءَ بهگر تاں آدگه ڈیهاں که بنیادی کانود اجرا بیت ءُ اهلسنتانی اموراں آوانی جندے دست ءَ بےانت، حکومت شور دنت ءُ چار ایت، بلێں اهلسنتانی مذهبی امورانی تها دخالت مه کنت.
زاهدان ءِ جمعه ءِ امام ءَ وتی هبرانی دێمتر ءَ په کار گرگ شه اهلسنتانی بودێنان سکّ سۆگه کرت ءُ گوشت ئِے: اهلسنتان ماں همے ملک ءَ زندگیَ کن انت ءُ اگاں ضرر ءُ بندشے بیت یا جنگے بیت پهکاں ماں یک سنگرے شه ملک ءَ دێمپانیَ کن انت، بلێں مئے لۆٹ اێش انت که بنیادی کانودے «شایسته سالاری» ءِ بندے رد ءَ شه اهلسنتان هم ماں ملکی ءُ استانی مدیریتاں کار گرگ بیت.
مولانا عبدالحمید سکّ سۆگه کرت: منی هبراں شه دلسۆچی ءَ انت که من ملک ءِ خێر ءَ لۆٹ آں که ادا امنیت ءُ یکّۆیی مدامی بیت. امێتوار آں که ملک ءِ مزن رهشۆں وت اهلسنتانی لۆٹان ءَ دلگۆش کنت ءُ اێشانی توار ءَ بُشکنت ءُ مشکلان اش رندگیری کنت پچےکه اهلسنتاں مدام آیی ءُ آدگه ذمهوارانی هبر ءَ گۆش کن انت.
🔹روسیه وتی بێڑ ءَ به اوکراین ءَ ءُ اۆد ءِ مردمانی کُشگ ءُ اموالانی ابێر ءَ بس کنت
زاهدان ءِ جمعه ءِ امام ءَ ماں دگه بهرے شه وتی هبراں به روسیه ءِ بێڑ ءَ اوکراین ءِ سر ءَ اشاره کرت ءُ گوشت ئِے: روسیه ءِ بێڑ شه اے هپتگ ءِ ٹوهێں پێشامدان ات. اوکراین وتمسترێں ملک ءِ که روسیه ءِ همسایگ انت.
واجه ءَ ٹکاٹک گوشت: جنگ ءُ کشتار ءُ بێڑ به دگه ملکانی سر ءَ ماں اے زمانگ ءَ هچ پلهمرزے نه دار ایت ءُ هر دولت ءُ ملک ءِ که چشێں کارے کنت ملامتَ بیت ءُ وت نقصانَ گند ایت.
واجه ءَ درّائێنت: ما شه روسیه ءَ لۆٹ اێں که اے جنگ ءَ بس کنت ءُ شه مردمانی کشتن ءُ اموالانی ابێر ءَ دست کش ایت ءُ اے بنگپ ءَ گۆں ترانکاری ءَ حل کنت.
🔹هند ءِ ملکاری رهشۆناں آ ملک ءِ سرکار ءَ ترپّێن انت تاں مسلمانانی دینی آزاتی ءَ کمار کنت
زاهدان ءِ جمعه ءِ امام ءَ ماں وتی هبرانی گڈی بهر ءَ گۆں اشاره به هند ءِ مسلمانانی جاور ءَ درشان ئِے کرت: هند شه آ ملکان بوتگ که پێسر ءَ اۆد ءَ آزاتی بوتگ ءُ مسلمان ءُ بےدیناں آ ملکے تها گۆں اشکام ءُ سلامتی ءَ زندگ گوازێنتگ.
واجه ءَ گێش کرت: هند ءِ مسلمانان آ ملک ءِ سر ءَ احسان دار انت، پچےکه گۆں نوآبادکارێں انگریز ءَ جنگ اش کرتگ ءُ گۆں گبرانی همراهداری ءَ هند ءَ شه انگرێزے دست ءَ رکّێنتگ اش. بلێں ارماں که اُشکنگَ بیت که هند ءِ نونێن سرکار که ترۆندێں ءُ افراطی ئێں سرکارے مسلمانانی سر ءَ ظلمَ کنت.
مولانا عبدالحمید درشان کرت: مئے سۆگه به هند ءِ ملکاری رهشۆنان اێش ات که آ ملک ءِ سرکار ءَ ترپێن انت تاں مۆکل مه دنت مسلمانان گۆں مشکلاں آماچ بےانت ءُ آوانی دینی و انسانی حقاں پادمالی بےانت.
چمشانک