شیخ‌الاسلام مولانا عبدالحمید ماں زاهدان ءِ جمعه نمازے دیوان ءَ (3 دی‌ماه 1400/ 24 سپتمبر 2021) گۆں انتقاد شه ذمه‌وارانی دخالتاں ماں اهل‌سنتانی اموراں ماں لهتێں ڈیهاں، اے دخالتان ءَ بنیادی کانودے هلاپ ءَ زانت ءُ بنیادی کانود ءُ هاس دوازدمی اصلے اجرا ءَ لۆٹۆک بوت.
په سنی‌آنلاین ءِ سرهال ءَ، شیخ‌الاسلام مولانا عبدالحمید گۆں تأکید پرێشی که بینادی کانودے دوازدمی اصل ٹک اهل‌سنتانی مذهبی آزاتیانی بارو ءَ انت، گوشت ئِے: بنیادی کانودے ردءَ اهل‌سنتاں ماں هێلکاری ءُ تیوگێں مذهبی مسائلاں آزات انت. هرچۆن که بنیادی کانود ءَ شیعه اثناعشری ءَ را ملک ءِ رسمی ئێں مذهب کرتگ ءُ هما درگت ءَ هم مولانا عبدالعزیز ماں خبرگان ءِ دیوان ءَ آیی بارو ءَ زهرشانی کرتگ، بلێں آسرات ءَ همے کانود تصویب بوت ءُ ما هم آیرا منّ ات ءُ کانودے ردءَ گپ کن اێں، مئے گپاں بازلۆٹی ءُ بےانصافی ئێں گپ نه انت.
مولانا عبدالحمید گۆں اشاره به اێشی که ماں بنیادی کانود ءَ هچ استثنا ئے نێست ءُ کسے نه توانت مکن کنت، گوشت ئِے: جمعه نمازے دیوان هم شه مذهبی دیوانان اِنت که باید بےمکن ءُ مشکل ءَ برجم دارگ بیت. اپسوز انت که بنیادی کانود پوره اجرا نه بوت ءُ آ آزاتی ئے که بنیادی کانود ءَ ما را داتگ، نه دار اێں. پدّرێں درور شورای مدیریت ءُ برنامه‌ریزی انت که ماں تهران ءَ انت ءُ لۆٹ ایت اهل‌سنتانی مذهبی اموران ءَ مدیریت کن ءُ رهبند درگێج ایت. شکر الله ما هِدا مشکلے نه دار اێں، بلێں دگه جاهاں که آ شورا ئے هستی ءَ را منّتگ اش مشکل جۆڑ بوتگ که استادان باید گچێن کنگ بےانت ءُ شه هما شورائے نێمگ ءَ تأیید بےانت. گێشترێں سکّی ماں کردستان ءَ انت. ماں کردستان ءَ کُردێں پاگواجهاں دلگران انت، ما لۆٹێں که بنیادی کانودے دوازدمی اصل په جوانی اجرا بیت.
زاهدان ءِ جمعه ءِ امام ءَ درشان کرت: اے مئے واهگ نه‌ات که سنندج ءِ مزنێں بنجاه که یک علمی ءُ دینی بنجاهے، آیی سرمستر یک شیعه ئے شه قم بیت، تاں وهدےکه اهل‌سنتێں پاگواجه که حکومت ءَ منّ انت ءُ گۆں حکومت ءَ همکاری ءَ کن انت اۆد ءَ هست انت، پچے شه اهل‌سنتێں پاگواجهاں ماں آ بنجاه ءَ کارگرگ ءَ نه بیت؟
واجه ءَ گۆں اشاره به دهاں وانگجاه ءُ مکتب ءِ بند کنگءَ گون آ بنجاه ءُ امنیتی ذمه‌وارانی زۆرءَ گوشت ئِے: امنیتی ذمه‌وارانی اگده اێش نه‌انت که دینی وانگجاه ءُ مسیتانی کارانی تها دخالت کن انت. حکومتَ توانت چار ایت، بلێں حق نه دار ایت دخالت کنت. چارگ نباید نظامی ءُ انتظامی واکانی دست ءَ بیت، بلکه باید پاگواجهانی دست ءَ بیت. ای چاروکان ءَ وڑوڑین سسا ءُ رهبند هست ءُ آ کساس دخالت اش کرتگ که مان کردستان ءَ اسلامگرایی ءُ دینداری ءَ نقصان دیستگ، بلکه ماں اسلامی حکومت ءَ باید اسلامگرایی ءُ دینداری پُرزۆر بیت. بلێں آ کساس ماں مذهبی مسائلاں ءُ نماز جمعه ءُ جماعتان دخالت اش کرتگ ءُ امامان ءَ ٹگلێنتگ اش که بازین مردمی مسیتان ءَ یله داتگ.
مولانا عبدالحمید ٹکاٹک گوشت: امام جماعت باید کسے بیت که آیرا مردم منّ انت ءُ په زۆر آوان ءَ منّێنگ مه بیت. ماں کردستان ءَ اے بارو ءَ بازێں گلگے هست. ماں اے استان ءَ گۆں امام جماعتاں کارے نه دار انت، بلێں امام جمعه ئے چست ءُ اێرا وتی حقَ زان انت. مئے باور اێش انت که باید مردم امام جمعه ءَ گچێں کن انت ءُ منّ انت. وهدےکه مسیت ءُ وانگجاهان ءَ مردماں جۆڑ کرتگ، به هلّ ات امام جمعه ءُ جماعت ءَ هم گچێں کن انت.
واجه ءَ گۆں اێشی بیان ءَ که امام باید کانودے رد ءَ کرد کنت گوشت ئِے: ما پهکاں ایران ءِ بنیادی کانود ءَ منّ اێں، مسیت ءُ وانگجاه باید آزات بےانت. عجیب انت که اگاں بنا بیت ماں هلکے مسیتے بندگ بیت، باید شورا ئے که آیی باسک سیاسی ءُ نظامی ءُ قضایی ءُ شیعه یانی پاگواجه ءُ لهتێں شه اهل‌سنتانی پاگواجهان انت، شۆر کن انت. نظامی ءُ انتظامی واکاں مئے عزیز انت، آوان باید په ملک ءِ امنیت ءَ جهد کن انت، بلێن شما آوان ءَ ماں مذهبی مسائلاں هور کرتگ. امنیتی واکانی اگده جنگ گۆں حکومتے دشمنان انت نه دخالت ماں مذهبی مسائلاں.
مولانا عبدالحمید گوشت ما تاں نون مدارا کرتگ ءُ انگت مدارا ءَ کن اێں، بلێں اے مئے حق نه انت. مئے حقاں ماں بنیادی کانود ءَ بیان بوتگ انت، ما لۆٹ اێں مئے مذهبی آزاتیاں دیَگ بَےانت.
🔹چلءُسے سال شه انقلاب ءِ عُمر ءَ گوستگ، بلێں انگت اهل‌سنتانی واهگ پوره نه بوتگ انت
مولانا عبدالحمید گۆں اشاره به تبعیض ءُ نابرابریاں که اهل‌سنتانی حقے تها بیگ انت، گوشت ئِے: 43 سال انت که مئے لۆٹ همے بوتگ که اهل‌سنتان ءَ ماں ملک ءَ اگده دیَگ بیت، بلێں مئے واهگاں پوره نه بوتگ انت. شما اهل‌سنتانی حقان ءَ کمار نه کرتگ.
زاهدان ءِ جمعه ءِ امام ءَ هال دات که په اۆگانستان ءِ اسلامی حکومت ءَ کلوه ئے دێم داتگ که شیعه یانی حقان دیگ بےانت. واجه ءَ گوشت من شه همے منبرے سر ءَ اۆگانستان ءِ نوکێں سرکار ءَ گوش آن که شیعه یان ءَ آوانی مذهبی امورانی تها آزات به هل ات.
مولانا عبدالحمید شه مزن رهشۆن ءَ لۆٹ ات که وت اهل‌سنتانی مشکلان ءَ حل کنت ءُ اے مشکلان ءَ په دولت ءُ دگراں مه هل ایت. واجه ءَ گێش کرت: ما مزن رهشۆن ءَ را په رهشۆنی ءَ منّتگ ءُ اے مئے کانودی حق انت که آ وت مئے مشکلان ءَ حل کنت. مئے پس ءُ پیرۆکاں په دێمپانی شه اے ملک ءَ کشگ بوتگ انت، ما گۆں انگریز ءُ پرچگیزاں جنگ کرتگ. پهکێں اهل‌سنتان که سیسمرانی کرّ ءَ نند انت گۆں درآمدان جنگ اش کرتگ. ما لۆٹ اێں که مئے مشکلان رسیدگی بےانت ءُ ما وتی آزاتی ءُ برابری ئے لۆٹۆک اێں. ما شه شیعه یانی سرکاری پاگواجه ءُ شه آیت‌الله رئیسی ءَ که گۆں بازێں سکّی ئے هستی ءَ په ملک ءُ چاگردے سۆبمندیانی هاتر ءَ آیرا گچێں اێں کرت، لۆٹ اێں مئے واهگان ءَ پوره کنت.
زاهدان ءِ جمعه ءِ امام ءَ شیعه ءُ سنیانی اختلافانی بارو ءَ گێشێنت: ما منّ اێں که اسلام ماں ملک ءَ حکومت ءَ کنت، بلێں شیعه ءِ فقه اجرا ءَ بیت نه اهل‌سنت ءِ فقه. ما بازێں هوارێں چیز دار اێں ءُ همےپێم بازێن اختلافے هم دار اێں. اهل‌سنت ءِ فقه اے بازێں پاهو ئان ءَ نه منّ ایت. زۆرێں اُسته گرگ ماں اهل‌سنت ءِ فقه ءَ رد انت.
🔹مولانا گرگیج ءِ در کنگ ءِ حکم اۆلکّی ءَ دیگ بوت
مولانا عبدالحمید گۆں اشاره به اێشی که مولانا گرگیج شه ملک ءِ نامءِتواری ئێں پاگواجهان انت ءُ پهکان آ واجه ءَ جا کار انت، آیی هبرانی بارو ءَ گوشت ئِے: مولانا گرگیج 40 سال اِنت که امام جمعه اِنت. آیی اے درگت ءَ شه مردمانی مشکلاں گپ کرتگ، لهتے وخت ءَ هم انتقاد ئِے کرتگ، همے پێم آیی په پله‌مرزی شه حکومت ءَ انچێں هبر داتگ که ما نه گوشتگ. آیی نۆکێں هبر که زهرشانی ءِ سبب بوت، وت گوشت ئِے که آیی مراد توهین نه بوتگ، ما هم آیی هبر ءَ منّ اێں، پچےکه ما زان اێں آ واجه اهل‌بیتانی بارو ءَ چه باور ءِ دار ایت.
مولانا عبدالحمید گێش کرت: ما هچ بر نه منّ اێں که مئے مسیتانی بارو ءَ دگه جاها شۆر بیت. اے اهل‌سنتانی حق نه انت. مئے لۆٹ اێش اِنت که اهل‌سنتانی اوقاف ءَ شه شیعه یانی اوقاف ءَ جتا کن ات، هما پێم که دگه ملکاں شیعه یانی اوقاف شه سنیانی اوقاف ءَ جتا انت. شیعه یانی پاگواجهان مئے براس انت ءُ ما آوانی حرمت ءَ سات اێں، بلێں مئے اموراں مئے جندے دست ءَ بےانت.
زاهدان ءِ جمعه ءِ امام ءَ درشان کرت: من نمدے په مزن رهشۆن ءَ نبشتگ، امێتوار آن گۆں آیی فرمان ءَ مشکلاں حل بےانت. مئے براتی هژدری اِنت. دشمنان لۆٹ انت اختلاف جۆڑ کن انت. باید سرجمێں کماش، مزنسسا ءُ زانتکاران شه کانودی راهاں اے بن‌گپ ءَ رندگیری کن انت.
چمشانک