سنیآنلاین| مولانا مفتی محمدقاسم قاسمی ماں زاهدان ءِ جمعه نماز ءِ دیوان ءَ (۷ آبان ۱۴۰۰/ 28 اکتوبر 2021) دنیا ءِ جاور ءَ را رسول الله صلّیاللهعلیهوسلم ءِ ودی بیگ ءِ درگت ءَ «تاکرێچ ءِ وڑ ءَ» زانت ۆ رسول الله ءِ بعثت ءَ را «شه الله ءِ مزنێں احسانان په انساناں» مارت ۆ په رندگیری شه آ واجه ءِ سیرت ۆ سنتاں سکّ سۆگهی کرت.
په سنیآنلاین ءِ هالرسانیئے سرهال ءَ، مفتی محمدقاسم قاسمی ماں اے معنویئێں دیوان ءَ درشان کرت: په اے ابدمانێں بهارگاه ءِ زانگ ءَ که الله پاک ءَ گۆں وتی نبی ءَ دێم دات، مهم اِنت که آ واجه ءِ ودی بیگ ءِ درگت ءِ تاکرێچ ءَ زان اێں. آ زمان ءَ باوراں، کرداراں، اخلاق، سیاست، سۆدا، گندءُنند ۆ پهکێں چیزاں خرابت اَنت. الله تعالی ءَ آ زبهر ۆ تباهێں چاگرد ءَ را ضلال مبین گوشتگ، بزاں آوان ماں پدّرێں حیرانی ۆ گمراهی ءِ بوتگ اَنت. آ زمان ءِ چاگرد گۆں انچێں گماناں آماچ بوتگ که مردم ءَ وتی بےگناه ۆ درّێں جِنک ءَ را گۆں وتی دستاں زندکا کنڈ کرتگ.
واجه ءَ به آ زمان ءِ ملکاری چاگرد ءَ اشاره کرت که پادشاهاں وترا خدا زانتگ ۆ گوشت اش که کسراهانی رگان تها خدایئێں هونَ چَرّ ایت.
مولانا قاسمی گۆں اشاره به اعتقادیئێں گمراهی ءَ درشان کرت: شرک بےکساس باز بوت اَت، مشرکاں شه حلوا ءَ بتَ جۆڑێنت ۆ آیی دێما زانانی سرا نشت انت ۆ وتی حاجتان ءَ لۆٹ اِت اِش ۆ وهدے که شدیگَ بوت اَنت، هما بت ءَ را وارت اِش. الله تعالی ءَ په تیوگێں انساناں احسان کرت ۆ رسولالله صلّیاللهعلیهوسلّم ءَ را دێم دات.
دارالعلوم زاهدان ءِ استاد فقه ۆ حدیث ءَ «قرآن ءِ وانگ»، «تزکیه»، «قرآن ءِ یات دَیگ» ۆ «حدیث ءِ یات دیگ» ءَ را شه رسول الله صلّیاللهعلیهوسلّم ءِ اگدهاں زانت ۆ درشانی کرت: رسول الله صلّیاللهعلیهوسلّم شه معنوی ءِ لحاظ ءَ پهک نور، روشنی ۆ رحمت اَت. آ واجه حضرت ابراهیم ءِ دعا، حضرت موسی ءِ واهگ ۆ الله ءِ رحمت اَت په انساناں.
مولانا قاسمی وتی هبرانی دێمتر ءَ به ارزشت ءِ که واجه رسول الله صلّیاللهعلیهوسلّم ءَ به جنێناں داتگ اشاره کرت ۆ گوشتِ: رسول الله صلّیاللهعلیهوسلّم ماں حدیث ءِ گوش ایت: هرکس یک یا دو دُتّگ رۆدێن ایت ۆ په لۆگواجه ءِ گس ءَ دێم دنت، قیامت ءِ رۆچ ءَ گۆں من نزیکَ بیت. گلباگ ماسانی پادے چێر ءَ اِنت.
مولانا مفتی محمدقاسم قاسمی وتی هبرانی گڈسر ءَ به پیغمبر ءِ محبت ءِ گێش بیگ ءِ اسباباں ماں دلاں اشاره کرت ۆ گوشتِ: یکے شه پیامبر ءِ تعظیم ءِ اسباباں درود اِنت، هر درود ده رحمتَ کار ایت ۆ ده نێکی نبشتگ بیت. شه رسول الله صلّیاللهعلیهوسلّم ءِ نێمگ ءَ درود نازل بیت ۆ انسان ءِ ارزشت برزَ رئوت.
چمشانک