شیخالاسلام مولانا عبدالحمید، ماں چهبار ءِ جمعه نماز ءِ دیوان ءَ (۷ آبان ۱۴۰۰/ 29 اکتوبر 2021) گۆں اشاره به سیمسرنندۆکانی جهداں په ملک ءِ امنیت ءَ، سکّ سۆگهی کرت که آوان ماں کارمرز شه سیمسری سۆبمندیان اولویت داشته بےاَنت.
په زاهدانِ اهلسنتے جمعهوے پیشنمازے کارگسے هالرسانیئے بنجاهے سرهالا، شیخالاسلام مولانا عبدالحمید درشان کرت: چهبار ۆ استان ءِ زرباری مردماں بازێں سکّی ۆ ڈکالان ءَ سگّتگ ۆ ماں کپّراں زند اِش گوازێنتگ ۆ آوانی پسّ ۆ پیرکاں شه اے ملک ءِ سیمسراں دێمپانی کرتگ ۆ په ملک ءِ ڈگارانی ساتگ ءَ هونش داتگ. جنگ گۆں پرتقالی ملگراں ٹوهێں نمونگ ءِ شه اے مردمانی جنگ ۆ بهادری ءَ اِنت.
واجه ءَ گوشت: اے مردم ایران ءِ تیوگێں مردمانی سرا حق دار اَنت که شه سیمسراں دێمپانی ءَ کن اَنت. ملک ءِ تیابدپی سیمسران ءَ ماں زربار ءَ که ملک ءَ گۆں دریاب ءَ لچێن ایت، همێشان ساتتگ. گڑا اے سیمسرنندۆکانی حق همێش اِنت که حق اِش پوره دیگ بیت.
واجه ءَ گێش کرت: انصاف ۆ عدالت اێش اِنت که ماں مکران ءِ تیابدپ ءِ توسعه ءَ اے مردمانی حقاں دلگۆش کنگ بےاَنت، گڑا اے سیاست ۆ رهبند گهترێں سیاستَ بیت.
🔹 تیوگێں راج ۆ مذهبانی لۆٹ «عدالت ءِ اجرا» ۆ «وسیانی کارگرگ» اِنت
مولانا عبدالحمید وتی هبرانی دێمتر ءَ په عدالت ءِ اجرا ءَ سکّ سۆگه کرت ۆ گوشتِ: عدالت ءِ اجرا ایران ءِ استمان ۆ هاس اهل سنت ۆ مچ راج ۆ مذهبانی لۆٹ اِنت.
واجه ءَ ٹکاٹک گوشت: مئے مردمانی لۆٹ اێش اِنت که ماں استمان ءِ کارگرگ ءَ به «شایستهسالاری» ءِ اصل ءَ دلگۆش بیت ۆ راج ۆ مذهبانی وسیان برابر کارگرگ بےاَنت. مئے چاگرد پراستیئێں شایستهسالاری ءَ لۆٹۆک اِنت.
واجه ءَ گوشت: امنیت باز هژدری ۆ گردانی پایدگ ءَ اِنت. یکۆیی لۆٹی عقلمندی ءِ چێدگ اِنت. الحمدلله اهل سنت ءِ چاگرد گۆں وتی تیوگێں راج ۆ سیمسرنندۆکاں مدام امنیت ءِ لۆٹۆک اَنت براتی ۆ تپاک آوانی رهبندانی لڑ ءِ اول ءَ اِنت.
🔹 ملک ءِ ذمهواراں په «گرانی» ۆ «بےکاری» ءَ توجیلے درگێج اَنت
مولانا عبدالحمید درشان کرت: ما امێتوار اێں هماپێم که واجه رئیسی ءَ وتی دومی استانیئێں سفر ءَ را شه چهبارءَ بنگێج کرت اے استان ۆ هاس تیابدپی ڈیهان ءَ گێشتر دلگۆش کنت ۆ مردمانی بازێں مشکلان ءَ چۆ آپے کمی ۆ بےکاری ۆ دگه مشکلان ءَ حل کنت.
دارالعلوم زاهدان ءِ سرمستر ءَ گوشت: اپسۆز اِنت که مرۆچی ملک گۆں زبهری ۆ گرانی ۆ بےکاری ءَ آماچ اِنت. شه اے بابت ءَ لۆٹ ایت که ملک ءِ ذمهوارں په اے مشکلاں مهمێں توجیلے درگێج اَنت تاں مردمانی جاور وش بیت.
🔹 دنیا ۆ آخرت ءِ دێمروی ۆ آبادی ءِ رۆتگ علم اِنت
دارالعلوم زاهدان ءِ سرمستر ءَ درشان کرت: علم چه دین ءِ علم بیت یا دنیا ئے، مهم ۆ هژدری اِنت. علم دێمروی، آبادی رۆتگ اِنت، بےعلم ءَ نه دنیا جۆڑ بیت ۆ نه آخرت.
زاهدان ءِ جمعه ءِ امام ءَ گۆں ورنائانی دلبڈی دیگ ءَ په علم ءِ کٹتن ءَ گوشتِ: مرۆچی مئے ملک ءِ تها علم ۆ دین ءِ جاور تیار اِنت، وڑے که پیرێناں هم په علم ۆ قرآنءِ زانگ ءِ پد ءَ اَنت، بازێن ءِ شه پیرمرد ۆ پیرزالاں جهدَ کن انت تاں یک بهرے شه قرآن ءَ ازبر کن انت.
واجه ءَ گوشت: باید گردان په وتی زهگانی علم ءِ کٹگ ءِ فکر ءَ بَهاێں، اگاں زهگاں بےعلم بےاَنت پسّ ۆ ماس میاریگ اَنت.
چمشانک