مروچی : 18 مهر , 1400
مولانا عبدالحمید ماں زاهدانءِ جمعه نمازے دیوانءَ:

انسانءِ عزت ۆ مڑا ماں پدگیری شه اللهءَ ۆ عمل به شریعتءِ حکمانی سرءَ انت

انسانءِ عزت ۆ مڑا ماں پدگیری شه اللهءَ ۆ عمل به شریعتءِ حکمانی سرءَ انت

شیخ‌الاسلام مولانا عبدالحمید ماں زاهدانءِ جمعه نمازے دیوانءَ (16 مهرماه 1400/ 8 اکتوبر 2021) گردانءَ په شریعتءِ حکمانی سرے عمل کنگءَ ۆ خاص نمازے وانگ ۆ زکاتے دَیَگءَ سکّ سۆگه کرت ۆ انسانے شرف ۆ مڑاءَ را ماں عمل به شریعتءِ حکمانی سرءَ زانتِ.

په زاهدانءِ اهل‌سنتے جمعه‌وے پیشنمازے کارگسے هال‌رسانی‌ئے بنجاهے سرهالا، شیخ‌الاسلام مولانا عبدالحمید پد شه اے آیتے وانگءَ «وَمَا خَلَقْتُ الْجِنَّ وَالْإِنْسَ إِلَّا لِيَعْبُدُونِ*ما أُرِيدُ مِنْهُمْ مِنْ رِزْقٍ وَ ما أُرِيدُ أَنْ يُطْعِمُونِ»[الذاریات: 56-57] درشانِ کرت: الله تعالی حکیم اِنت ۆ اللهءِ تیوگێں کاراں شه حکمتے روگهءَ اَنت ۆ  هر ساهدار ۆ بےساهے را په خاصێں مول ۆ مراد ۆ همایی وڑءَ جۆڑِ کرتگ.

واجهءَ گێش کرت: انسانے اگده اێش اِنت که اللهءَ عبادت کنت ۆ شه اللهءَ پدگیری کنت، بلێں اگاں نفس ۆ شیطانے پدا برَۆت ۆ گناه کنت ۆ انچێں کار کنت که پراوانی واستا جۆڑ نه بوتگ، کڑا پرایی باز بد اِنت. انسان گۆں پدگیری شه نفسے لۆٹاں ظالم ۆ معاندَ بیت ۆ آیی حق اِنت که الله آیرا زیان ۆ بێران کنت، بلێں الله گۆں وتی مهربانی ۆ اۆپارءَ آیرا هلّ ایت ۆ عذابے نه‌دنت.

دارالعلوم زاهدانءِ سرمسترءَ گوشت: انسانے براهداری ۆ شۆکی ماں اللهءِ عبادت ۆ نمازے وانگے تها اِنت؛ الله تعالی نماز ۆ جهادءَ که دێمپانی شه حقءَ اَنت، دۆست دار ایت. نماز ۆ جهادے سرَپ اللهءِ دێمءَ شه گهترێں سرپاں اِنت. نمازے سرپ که جنگ گۆں نفس ۆ شیطانءَ اِنت، اللهءِ دێما شه گهترێں سرپاں اِنت، هچ گام آ گامے کساسءَ که ماں جهادءَ زورگَ بیت ۆ هچ هونے آ هونے کساسءَ که ماں اللهءِ راهءَ رێچگَ بیت ۆ هچ ارسے آ ارسے کساسءَ که شه اللهءِ ترسءَ رچیت، اللهءِ دێما محبوب نه‌اَنت.

زاهدانءِ جمعهءِ اماما وتی هبرانی دێمترءَ به صدقهانی فضیلتاں اشاره کرت ۆ گوشتِ: اگاں انسان ماں اللهءِ راها یک درهم دنت، الله تعالی آیرا هفتصد برابرَ دنت. ٹوهێں بےسۆبی ئے که انسانءَ مسیتےروگ ۆ نماز جماعت ۆ زکاتے توفیق مه‌رس ایت. اگاں په شما یک تومن هم مه‌مانیت، انگت وتی مالانی زکاتانءَ دےاِت ۆ اگاں ناجۆڑ اَت‌اِت یا ماں هر جاورے بوت اِت، نمازءَ بوان‌اِت.

واجهءَ گێش کرت: وهدےکه زکات که اللهءِ حکم‌اِنت ۆ دینے رکن‌اِنت، دیَگ مه‌بیت، اے مال قیامتے رۆچءَ په وتی واهندءَ عذابے بیت. آ کَسّ که وتی زرانی زکاتءَ نه دنت کجا توانت شه اللهءِ عذابے دێما جی ایت؟ ما په همێشی جۆڑ بوتگ اێں که گۆں جان ۆ مالءَ اللهءِ عبادتءَ کن اێں ۆ شه اللهءَ هبرزوری کن اێں. انسانءِ عزت ۆ مڑا همێشی تها انت که اللهءِ دێما سرِ جهل بیت ۆ اللهءِ رضاءَ کٹ ایت ۆ گۆں شیطانءَ مخالفت کنت.

🔹نباید په دۆست ۆ مهمانانی خاطرءَ اللهءِ حکمءَ پرۆش اێں ۆ گناه کن اێں

مولانا عبدالحمید درشان کرت: نباید دۆست ۆ مهمان آ کساسءَ مئے کرّءَ درّ ۆ عزیز بیت که پرایی خاطرءَ اللهءِ حکمءَ پرۆش اێں ۆ گناه کن اێں. بازێں گِس‌واهندے که جوانێں مردم اَنت، په مهمانانی خاطرءَ دیوانانی تها تریاک ۆ ترندآپَ کار اَنت. مهمان اللهءِ دۆست ۆ رحمت اِنت، بلێں مهمانے که تریاک ۆ ترندآپَ لۆٹ ایت، اللهءِ عذاب اِنت. تریاک ۆ دگه نشهی چیزانی ورگ ۆ کَشّگ اگه په خوشیءَ هم بیت حرام ۆ ناروا اِنت.

🔸 زاهدانءِ جمعه نمازے اماما وتی هبرانِ گڈسرا مردمانءَ سۆگه کرت که کمک کن انت تاں مسیتے کار هلاس بیت ۆ پوره بندگ بیت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *