مروچی : 11 مهر , 1400
مولانا عبدالحمید ماں زاهدانءِ جمعه نمازے دیوانءَ:

دنیائے بلا ۆ آفتانی گێش بَیَگے مزنێں سبب «آسمانی‌ئێں وحی» ۆ «آخری پێغمبر»ءِ سۆگهانی نادلگۆشی اِنت

دنیائے بلا ۆ آفتانی گێش بَیَگے مزنێں سبب «آسمانی‌ئێں وحی» ۆ «آخری پێغمبر»ءِ سۆگهانی نادلگۆشی اِنت

شیخ‌الاسلام مولانا عبدالحمید ماں زاهدانءِ جمعه نمازے دیوانءَ (9 مهرماه 1400/1 اکتبر 2021) «شریعتءِ حکمانی هبرنزوریءَ» ۆ «ٹوهێں گناهانی باز بیگءَ» را شه دنیائے پێشامد ۆ آفتانی مزنێں سبباں زانت ۆ سکّ سۆگه‌ی کرت که اللهءِ کتاب ۆ سنتءِ ردءَ کِرد بیت ۆ رندگیانی رهبندے سرا نۆکێں چارگے بیت.

په زاهدانِ اهل‌سنتے جمعه‌وے پیشنمازے کارگسے هال‌رسانی‌ئے بنجاهے سرهالا، شیخ‌الاسلام مولانا عبدالحمید درشان کرت: اللهءِ رسولءَ ماں حدیثے هپت گناهءَ را شه بێراں کنۆکان ماراِت ۆ مسلمانانءَ گوشتِ که شه اے ٹوهێں گناهاں پلگار کن اَنت.

زاهدانءِ جمعهءِ اماما گێش کرت: مرۆچی ۆ ماں نونێں جاورءَ مسلمانان سرچرّ ۆ تکانسر اَنت ۆ پێشامدانی که مرۆچی ماں دنیاءَ پێشَ کاینت په انسانانی سۆبءَ نه‌اَنت. انساناں شه اے پێشامدانی اصلی‌ئێں سبباں بےترانگ اَنت ۆ اللهءِ کتاب ۆ سنتءَ دلگۆشءَ نه کن اَنت تاں اے پێشامدانی اصلی‌ئێں سببانءَ سرپد بَےاَنت.

واجهءَ گوشت: اے تیوگێں تکانسری ۆ پێشامدانی اصلی‌ئێں سبب بازێں گناه ۆ اللهءِ ٹکاٹکێں حکم ۆ همےپێم آیی پێغمبرے سۆگهانی نادلگوشی اَنت. وهدےکه آسمانی‌ئێں وحی ۆ حکیم ۆ مزن‌زانتکارێں انسانءِ هبراں نادلگۆش بےاَنت، گڑا انساناں گۆں سکّی ۆ مشکلاں آماچءَ بےاَنت ۆ دنیا ۆ آیی داد که په انسانے سۆبءَ بوتگ اَنت، انسانءِ ضدءَ بےاَنت.

دارالعلوم زاهدانءِ سرمستر ءَ اللهءِ رسولءِ حدیثے ردءَ بێران‌کنۆکێں گناهانءَ بیان کرت ۆ گوشتِ: اللهءِ رسولءَ شرکءَ را یکے شه ٹوهێں بێران‌کنۆکێں گناهاں زانتگ. اے که لهتێنے گوش اَنت انسان آزات اِنت هرچیزے را عبادت کنت، اے هبر پکّءَ رد اِنت. الله تعالیءَ انسانءَ را چشێں اهتیارے نه داتگ.

واجهءَ گوشت: اللهءِ ائولی ۆ ٹوهترێں حق انسانے سرا ۆ مزنێں رکّێنۆک «توحید» اِنت ۆ ٹوهترێں دشمنی گۆں اللهءَ «شرک» اِنت. اپسوز اِنت که مرۆچی ماں دنیاءَ «شرک» ۆ «غیر الله ءِ عبادت» باز اِنت ۆ «توحید» کم بوتگ. لهتێنے شه مسلماناں هم گۆں خرافات ۆ شرکی‌ئێں کرداراں آماچ اَنت.

زاهدانءِ جمعهءِ خطیبءَ گوشت: واجه رسول الله صلّی‌الله‌علیه‌وسلم ءَ ماں بێران‌کنۆکێں گناهانی لڑءَ «سحر ۆ جادو»ءَ بیان کرتگ ۆ گوشتگِ: سحر ۆ جادو شه ٹوهێں گناهاں ۆ شه شیطان ۆ باطلێں انسانانی کرداران اَنت. بازێں جادوئے کفر اَنت، ۆ بازێں جادوئانی تها کفری ۆ شرکی‌ئێں چیز کارمرزَ بےاَنت که آوانی کفر بَیَگے تها هچ شکے نێست، اگه آ چیزاں کفر مه‌بےاَنت کم‌تاں‌کم حرام ۆ شریعتے خلافءَ اَنت. سحر ۆ جادوءَ باید گۆں قرآنءِ آیات ۆ الله ئے نامءَ باطل کن اِت، هماپێم که «معوذتین»ان په سحرے باطل کنگءَ اێر آتگ اَنت.

مولانا عبدالحمید دێمترا درشان کرت: پیامبر صلّی‌الله‌علیه‌وسلمءَ همےپێم ناحقێں قتل ۆ یتیمانی مالانی ورگءَ را شه بێران‌کنۆکێں گناهاں زانتگ. ناحقێں هونے رێچگ انسانءَ تباه کنت. اپسوز اِنت که مرۆچی یتیمانی مالانی ورگ ماں چاگردءَ باز بوتگ.

دارالعلوم زاهدانءِ سرمسترءَ همے حدیثے ردءَ «ربا»ءِ باروءَ که شه ٹوهێں گناهان اِنت، گوشتِ: ربائے گرگ ۆ ربائے ورگ چوناهیءَ جنگ اِنت گۆں الله ۆ آیی رسولءَ. ربا گێش شه اێشی که انسانے معنویتءَ خرابَ کنت چاگردے اقتصادءَ نابودَ کنت. واجهءَ گوشت اے گناهاں که مه حدیثءَ بیان بوتگ انت ۆ دگه گناهاں سبب بوتگ اَنت دنیا گۆں اے بلا ۆ آفتاں آماچ بیت.

🔹دولت گۆں فکرءَ ۆ جوانێں رهبندءَ گرانیانی دێما گیت

شیخ‌الاسلام مولانا عبدالحمید ماں دگه بهرے شه وتی هبراں شه قیمتانی دمءُکتره ئے برز روگءَ انتقاد کرت ۆ گوشتِ: اپسوز اِنت که قیمتاں دمءُکتره ۆ هر روچ برزءَ رو اَنت ۆ کم درآمد ۆ بےکار ۆ پوریارگرانی سرا باز سکَّ بیت.

واجهءَ گوشت: مئے لۆٹ شه دولتءَ اێش اِنت که گۆں فکر ۆ جوانێں رهبندءَ تورم ۆ گرانیانی دێما گیت ۆ هماپێم که درّێں راجکماشءَ وعده داتگ، مردمانی رۆزیگی مشکلانءَ وتی لڑے اولءَ به‌هلّ ایت. واجهءَ وتی هبرانی آسرءَ به زاهدانءِ نۆکێں شهردارءَ اشاره کرت ۆ گوشتِ پرایی سۆبێں بیگءَ دعا ۆ همکاری بیت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *