مروچی : 15 شهریور , 1400
مولانا عبدالحمید:

اۆگانستانءِ استمان پد شه بیست سال جنگ ۆ جهادءَ نون به «آزاتی» ۆ «عزت»ءَ رس ایت ۆ وتی ملکءِ سرنبشتءَ وتی دستءَ گیت

اۆگانستانءِ استمان پد شه بیست سال جنگ ۆ جهادءَ نون به «آزاتی» ۆ «عزت»ءَ رس ایت ۆ وتی ملکءِ سرنبشتءَ وتی دستءَ گیت

شیخ‌الاسلام مولانا عبدالحمید، ماں زاهدان جمعه نمازءِ دیوانءَ (12 شهریور 1400/ 3 سپتمبر 2021) امریکایی واکانی در بیگءَ را شه اۆگانستانءَ «ٹوهێں تاریخی‌ئێں پێشامدءِ» زانت ۆ شه اێشی که اۆگانستانءِ استمان پد شه بیست سال «جنگ ۆ جهادءَ» به «آزاتی» ۆ «عزت»ءَ رستگ ۆ «وتی ملکءِ سرنبشتءَ وتی دستءَ گیت» وتی وشّالیءَ را درشانی کرت.

په زاهدانِ اهل‌سنتے جمعه‌وے پیشنمازے کارگسے هال‌رسانی‌ئے بنجاهے سرهالا، شیخ‌الاسلام مولانا عبدالحمید درشان کرت: امریکایی  واکانی در بیگ شه اۆگانستانءَ ۆ آ ملکءِ مردمانی سۆبمندی یکے شه تاریخءِ ٹوهێں پێشامدان اِنت. بلکێں بازێنءِ بَےانت که شه امریکایی ۆ ناتو ءِ واکانی در بیگءَ شه اۆگانستانءَ دل‌چَلّ بَےانت. په منی گمانءَ اے وڑێں مردم هماوان اَنت که سر ۆ سسا ءِ تهےاش گلامی ۆ نوکری هست.

مولانا عبدالحمد ٹکاٹک گوشت: اگاں اۆگانستانءِ مردمان ۆ دگه استمانان وتی گسانی تها گشنگ بےانت ۆ پینگی‌ئێں پچ گوَرا کن اَنت، بلێں ملکءِ سرنبشت آوان جندءِ دستا بیت ۆ وت په وتی ملکءَ اراده کن اَنت، اے په اے استمانان شه اروپا ۆ رودراتکی ۆ رونشتنی ملکانی خزانگ ۆ زر ۆ مالان باز باز گهتر اَنت، پچےکه انسان برخلاف حیوانءَ عزت ۆ آبرو ۆ کرامتءِ واهند اِنت ۆ اے عزت ۆ کرامت وختے ساتگءَ بیت که انسان وتی سرنبشتءِ سرۆچێرءِ تها هۆر بیت.

زاهدان جمعه نمازءِ خطیبءَ گوشت: اے بیست سالءِ دراجیءَ اۆگانستانءِ مردمانءَ وت‌واجهی ۆ عزتءِ نه بوتگ، دگران آوانی واجه بوتگ اَنت، بلێن نون اے استمان به وت‌واجهی ۆ عزتءَ رستگ. اۆگانستانءِ استمانءِ تاریخی رۆچ هما رۆچ اِنت که وت تهنکا په وتی ملکءِ سرنبشتءَ تصمیم گر اَنت. بلێن عجیب اِنت که بعضءِ شه اۆگانستانءِ مردمان شه اے جاورءَ ناراض اَنت ۆ لۆٹ اَنت شه وتی ملکءَ لڈ اَنت!

🔹اۆگانستانءِ درّێں مردمان شه «پرۆش وارتگێں سیاسیان» متأثر مه بےاَنت ۆ گۆں وت جنگ مه کن اَنت

زاهدانی جمعه ئے اماما وتی هبرانی دێمترا گۆں نگد شه «پرۆش وارتگێں سیاسیانی» جهدان په اۆگانستانءِ ناامن کنگءَ گوشتِ: پراستی افسوس اِنت که لهتے شه سیاسی‌ئێں پرۆش ورۆکان که بیست سال ماں اۆگانستانءَ حکومت اِش کرتگ، نون مردمانءَ به نام «مقاومت» یا دگه نامان شۆرءَ دےاَنت و نه‌هل اَنت که اۆگانستانءِ مردم به اشکام ۆ تاهیر ۆ امنیتءَ رس اَنت ۆ په وتی ملکءِ آباد کنگءَ گۆں وت جهد کن اَنت.

واجهءَ گوشت: منی خێرلۆٹێں سۆگه په اۆگانستانءِ استمانءَ اێش اِنت که شه پرۆش وارتگێں سیاسیان متأثر مه‌بےاَنت ۆ گۆں وت جنگ مه‌کن اَنت ۆ وتءَ په کۆش مه‌دےاَنت. بلکه په جوانی فکر کن اَت ۆ گۆں وت تپاک کن اَت. به نۆکێں سرۆکءَ که به نام قرآن ۆ سنت ۆ شریعتءَ ماں اۆگانستانءَ جۆڑءَ بیت وار دےات ۆ به آوانی هبران که قرآن ۆ اسلامءَ نه منّ اَنت، دلگۆش مه‌کن اَنت. گهترێں حکم اللهءِ حکم اِنت، مطمئن بےاِت که اگاں اللهءِ حکم ماں شمے ملکءَ اجرا بیت ٹگاری ۆ آسمانی‌ئێں برکت شما سرا اێرءَ رچ اَنت.

🔹اۆگانستانءِ آیۆکێں دولت نونێں جاورءِ ردءَ شه قرآنءِ بستار ۆ خلفای راشدینان سیرتءَ که په تمام پاٹیانی حقانی دلگوش کنگ سکّ سۆگه اش کرتگ، کارمرز کن اَنت

مولانا عبدالحمید وتی هبرانی دێمترءَ طالبان ۆ اۆگانستانءِ نۆکێں دولتءَ را هم سۆگه کرت و گوشتِ: مئے سۆگه به طالبان ۆ اۆگانستانءِ آیۆکێں دولتءَ اێش اِنت که اسلامی دینءَ نونێں جاور ۆ زمانگءِ ردءَ اجرا کن اَنت ۆ شه قرآن ۆ خلفای راشدینانی زندگیءِ بستارءَ که پوره‌ترێں رهبند ماں دنیاءَ اِنت که آیی تها جنێن ۆ راج ۆ مذهب ۆ دینانی حقان کمار بوتگ اَنت، کارمرز بیت. اۆگانستانءِ نۆکێں دولت همےپێم وتی دیدانکءَ پراه کنت ۆ شه تیوگێں راجانی وسی‌ئێں مردمان کار گیت ۆ جنێنانی حقانءَ هم دلگۆش کنت.

واجهءَ دێمترا گوشت: منی دگه سۆگه به اۆگانستانءِ نۆکێں دولتءَ اێش اِنت که جهانی چاگردءِ آزگ‌سماییانءَ دلگۆش کنت ۆ آ ملکءِ تها «بیمکاری‌ئێں» کارانءَ هچ اجازه مه‌دنت. بلکه اۆگانستان په آ ملکءِ استمان ۆ همسایگێں ملک ۆ دگه ملکان، امنێں جایے بیت. اۆگانستانءِ نۆکێں دولت په آ ملکءِ آبادی ۆ کٹءُکارءِ جۆڑ کنگءَ جهد کنت ۆ اۆگانستانءَ هم شه سرءُراز ۆ هم شه علم ۆ معنویتءِ لحاظءَ آباد کنت.

🔹اےکه جنێنانی آزاتی «لوچی» بیت، اے ٹوهترێن ظلم جنێنانی حقءِ تها اِنت

دارالعلوم زاهدانی سرمسترءَ وتی هبرانی دێمترا به تبلیغاتان اۆگانستانءِ جنێنانی حقانی باروءَ اشاره کرت و گوشتِ: اے رۆچان بازێنی جنێنانی حقانءَ نیمون کرتگ ۆ گڑتی دار اَنت، درحالی‌که ماں اسلامءَ جنێنان گۆں اسلامی رهبندانی کمار کنگءَ توان اَنت ماں مزن شهدربرجاهان درس بوان اَنت ۆ ماں چاگردءَ کار کن اَنت. هچ حکومتءِ حق نه دار ایت که جنێنانی علم کٹگءِ دێما گیت ۆ آوانءَ په ملکاری ۆ چاگردی جهدان مه‌هلّ اِیت.

واجهءَ گوشت: البت لهتێنءِ جنێنانی حق ۆ آزاتیءَ لوچیءَ زان اَنت، درحالی‌که اے ٹوهترێں ظلمءِ که رۆاێرشتءِ چاگردءَ جنێنانی حقے تها کرتگ. براهداری ۆ ڈولداری ماں پچ ۆ گدءِ تها اِنت؛ اے که لهتێنءِ لوچیءَ جنێنانی براهداریءَ زان اَنت، اے مشکل شه آوانی ردێں دیدانکءَ اِنت.

زاهدانی جمعه ءِ خطیبءَ گوشت: جانءِ پۆشگ شه انسانی ابرمءَ اِنت ۆ تیوگێں دینان ۆ شریعتان په جانءِ پۆشگءَ سکّ سۆگه کرتگ، البت په اے پۆشگءَ هاسێں پچءِ مراد نێست، بلکه هر کسَ توانت وتی دۆدءِ ردءَ پچ گورا کنت ۆ وتی جانءَ پۆش ایت.

🔹امێتوار اێں راجکماشءِ سفر به سیستان ۆ بلوچستانءَ سبب بیت دیدانکان اے استانءِ باروءَ بدل بےانت

مولانا عبدالحمید وتی هبرانی گڈسرا به راجکماشءِ سفرءَ به سیستان ۆ بلوچستانءَ اشاره کرت ۆ گوشتِ: آیت‌الله رئیسی اے رۆچان سیستان ۆ بلوچستانءِ مردمانی مهمان اِنت. ما شه آیی تشکرَ کن اێں که به اے استانءَ دلگۆش کرت ۆ پد شه استانی خوزستانءَ که آیی ائولی‌ئێن سفر ات، به سیستان ۆ بلوچستانءَ سفرِ کرت.

مولانا عبدالحمید گوشت: امێتوار اێں آیت‌الله رئیسیءِ سفر به سیستان ۆ بلوچستانءَ سبب بیت که دیدانکان اے استانءِ باروءَ بدل بےانت، امنیتی‌ئێں دیدانکان اے استانءِ باروءَ بدل بےانت ۆ رۆزیگی ۆ باپاری دیدانکان آوان جاها گر انت. دیدانکانی بدل بیگ اے استانءِ باروءَ اے استانءِ امنیت ۆ توسعهءِ سببءَ بیت.

زاهدانی جمعهءِ اماما گوشت: امێتوار اێں نۆکێں دولت شه راج ۆ مذاهبانی وسیان که ملکءِ هنتکان اَنت ۆ همےپێم شه سیستان ۆ بلوچستانءِ دگه پتانسیل ۆ استعدادان کار گیت تاں مردمان شه گڑتی ۆ مشکلان رکّ انت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *