واجه شیخ‌الاسلام ءِ نمد په مزن رهشون ءَ اهل‌سنتانِ 42 سال ءِ گڑتیانِ باروا

واجه شیخ‌الاسلام ءِ نمد په مزن رهشون ءَ اهل‌سنتانِ 42 سال ءِ گڑتیانِ باروا

شیخ‌الاسلام مولانا عبدالحمید ماں نمد ءِ په مزن رهشون ءَ آیرا شه اێران‌ ءِ اهل‌سنتانِ مزنێن مشکل ۆ گڑتیان سهیِ کرت.

په زاهدانِ اهل‌سنتے جمعه‌وے پیشنمازے کارگسے هال‌رسانی‌ئے بنجاهے سرهالا، شیخ‌الاسلام مولانا عبدالحمید ماں نمد ءِ که همے زوتا په آیت‌الله سید‌علی خامنه‌ای کارگس ءَ دێمِ داته، ائولی سرا به «اێرانے  اهل‌سنتانِ پاکێن پلامرزی ءَ شه جمهوری اسلامیِ حکومت ءَ ماں سکّ‌ترێن جاوران» ۆ «اهل‌سنتان اثرگذار ۆ بےجوڑ ءَ ئێن کِرد ماں ملکے یکّویی ۆ سیمسران حفاظت ءَ» اشارهِ کرت.

 واجه‌ئا ماں دگه بهرے شه اے نمد ءَ گوں تأکید پرێشی که «42 سال پد شه اسلامی سر ۆ چێرے/ انقلابے پیروزی ءَ انگت اێرانے اهل‌سنتان ماں جاهمنندی حقان گوں مشکلات ۆ گڑتیان دێم‌په‌دێم اَنت، اێرنگ که آوان ءَ مارشت ءَ بیت که ماں اسلامی اێران ءَ درجهِ چنکس ءُ می‌ئێن جاهمنند اَنت.» اهل‌سنتانِ وسی‌ئانِ کار نه گرگ ماں وزارت ۆ استانداری ۆ راجکماشے شور دیوک یا معاون ۆ ولی فقیه‌ئے جهگیر و مزن رهشونے شور دیوک ۆ همےپێم آوانِ «باز کمێن کار گرگ» ماں وزارتجاه ۆ سلاه بندێن واکان ۆ کارگس ۆ سنی نندۆکێن استانانِ بنجاه ءَ، اێشان ءَ شه اهل‌سنتانِ گڑتیانِ زانت.

زاهدان اهل‌سنتان جمعه‌وے اماما به مزن رهشۆنے پسه ءَ به وتی نمد ءَ ماں 96 ءِ مرداد ءَ اشاره کرت ۆ نبشته: «من 1396 ءِ مرداد ماه ءَ نمدے نبشت که واجه‌کارا جوانێن حکیمانه‌ئێن پسه ءِ دات، بلێن اپسوز اِنت که آ پدّرێن حکم انگت شه ملکے اجرایی‌ئێن ذمه‌وانِ نێمگا دلگوش نبوته؛ شاید پرێشی که رسماً گوشگ نبوته یا آوان آیرا انچائێن دل وشی‌ئێن حکمے زانته.»

مولانا عبدالحمید ماں دگه بهرے شه وتی نمد ءَ به یکّے شه اێرانے اهل‌سنتان اے رۆچان مهمّێن گڑتیان اشاره کرت ۆ نبشتِه: «همے زوتا نۆکێن برجمی‌ئے جوڑ بوته که «اهل‌سنتانِ دینی وانگجاهان برنامه‌ریزی‌ئے شورا» گوشگ ءَ بیت ۆ جهد ءَ کنت که گوں قضایی ۆ امنیتی واکان زۆرا اهل‌سنتانِ تیوگێن مذهبی کاران ماں ملکے وڑ وڑێن هند ۆ دمگان وتی دست ءَ گیت، اێشی اهل‌سنتانِ گڑتیانَ گێش کرته. اے برجمی ءَ ماں‌وهدے اهل‌سنتانِ مذهبی کاران وتی دست ءَ گپته ۆ په آوان محدودیت جوڑِ کرته که بنیادی قانودے دوازدهمی اصل ءِ رد ءَ اسلامی مذاهبان رندگیرۆکان ماں وتی مذهبی کاران تها پوره آزات اَنت. همےپێم ماں دگه ملکان اوقاف ءِ هوربند په مذهبی کاران رندگیری ءَ جوڑ بوته ۆ مئے شیعه‎ئێن براتان هم په وتی مذهبی کارانِ رندگیری ءَ به اوقاف ءِ هوربند ءَ روَنت.»

واجه گوں اێشی بیانا که «گوستگێن 40 سالا پدّر بوته که په اهل‌سنتان ماں هاسێن جاهان تصمیم گرگ بیت ۆ گێشترێن تصمیمان قانودے رد ءَ نه وَنت ۆ دل‌لۆٹی اَنت» اے بن‌گپ ءَ را «اصلی‌ئێن مشکلِ» زانت ۆ دێمترا تأکید کرت: «اے گردِ مشکل و گڑتیان سبب بوتگ اَنت که یک بهرے شه جاهمنندترێن اێرانیان که ماں گوستگێن ۆ هم زمانگێن راج‌دپتر ءَ په ملکے سیمسرانِ ساتگ ۆ امنیت ۆ یکّویی ءَ وتی جانا را هم‌اِش داته ۆ وتی ملکا را باز دوست اِش داشته، وتی روحیه ءَ شه دست دَیَنت ۆ شه جاور ءِ جوڑ بیگا پوره ناامێت بینت.»

شیخ‌الاسلام مولانا عبدالحمید وتی نمدے دێمترا «بدلی ءِ که گوں حکمت ۆ پگرا بیت» تیوگێن اهل‌سنتانِ لوٹ شه مزن رهشون ءَ زانتِ ۆ گڈسرا نبشتِه: «اے بن‌گپانِ بیان کنگ که په آوان زوتێن چارگے گندگ بیت هاس شه دلسوچی ۆ خیرلوٹی ءَ اَت اَنت ۆ هچ دگه مقصدے نه وَت که سوره نساء 83 می‌ئێن آیت ءِ ردءَ گوشگ بوت اَنت؛ «وَإِذَا جَاءَهُمْ أَمْرٌ مِنَ الْأَمْنِ أَوِ الْخَوْفِ أَذَاعُوا بِهِ وَلَوْ رَدُّوهُ إِلَى الرَّسُولِ وَإِلَى أُولِي الْأَمْرِ مِنْهُمْ لَعَلِمَهُ الَّذِينَ يَسْتَنْبِطُونَهُ مِنْهُمْ وَلَوْلَا فَضْلُ اللَّهِ عَلَيْكُمْ وَرَحْمَتُهُ لَاتَّبَعْتُمُ الشَّيْطَانَ إِلَّا قَلِيلًا» ـ  والأمر الیکم»


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

نوکتریں