سر بیتگیں ھالانی رد ءَ کینڈا ءَ بلوچستان ءَ بندوکیں سیاسی جھدکار ءُ بی ایس او آزاد ءِ گوستگیں سرکماش کریمہ بلوچ ءِ جون مروچی کینیڈا ءِ شھر ٹورنٹو ءَ دزکپتگ.
گیشیں ھالانی رد ءَ کریمہ بلوچ بیست دسمبر دوھزار ءُ بیست یکشمبے ءِ بیگاہ ءِ ساھت سَے ءَ بیگواہ بیتگ.
پولیس ءَ مردمانی کمک ءَ کریمہ ءِ جون آئی ءِ کھول ءِ گور ءَ پجار کنائینتگ.
کریمہ بلوچ دوھزار ءُ شانزدہ ءَ بی بی سی ءِ سد نامی‌ئیں گچین کرتگیں زالبولانی لڑ ءَ ھوار بیتگ ءُ آ گوست ءَ کینیڈا ءَ پہ میاربندی ءَ شتگ ءُ آئی ءَ جھانی تکاں بلوچستان ءِ توار چِست کرتگ.
زانگ بہ بیت ھمے سال ءِ مارچ ءَ میاربندی ءَ شتگیں بلوچ اھوالکار ساجد حسین ھم سویڈن ءَ بیگواہ کنگ بیتگ ءُ پد ءَ آئی ءِ جون کورے ءَ دزکپتگ اَت ءُ ساجد حسین ءِ سنگت ءُ مردمانی گوشگ‌اَت کہ آئی ءِ کوش ءِ سوب بلوچ اھوالکاری ءُ بلوچستان ءَ چیرتر اِتگیں ھالانی پدر کنگ ءَ پاکستانی چیریں اداراں آوار جتگ ءُ کُشتگ.
کریمہ ءِ کوش ءِ سوب چی‌اَنت چون کُشگ بیتگ اے درگت ءَ تنی وھدی سرجمیں ھال نیاتکگ‌اَنت.
سرچمگ: دی بلوچستان پوسٹ
چمشانک