شیخ‌الاسلام مولانا عبدالحمید یکشمبی‌ئے شامے وهدا (16 آذرماه 1399) ماں قرآن مجیدے تفسیرے سبکّا گوں استناد به قرآن عظیم‌الشأنے آیاتانِ کم‌کمێن اێراتنا ۆ همےرنگ شریعت پوره بیگا ما 23 سالا شه واجه رسول الله صلّی‌الله‌علیه‌وسلم پیغمریا، تأکید کرت که اے زمانگا هم اسلامے قانود کم‌کما اجرا بیَنت.
شیخ‌الاسلام مولانا عبدالحمید ماں سوره «اسراء» 106می‌ئێن آیتے تفسیرا «وَقُرْآنًا فَرَقْنَاهُ لِتَقْرَأَهُ عَلَى النَّاسِ عَلَى مُكْثٍ وَنَزَّلْنَاهُ تَنْزِيلًا» درشان کرت: قرآن مجیدے کم‌کمکێن اێر آیگ ماں «اولی‌ئێن جاهلیتا» (هما جاهلیتے که شه اسلاماءُ دێم بوته) مهمێن کلۆئے په انسانان ۆ هاس مسلمانان داریت ۆ آ اێشنت که اسلامے شریعت ماں 23 سالا کم‌کما پوره بوت ته ۆ مردمان سرا سکّ مَبِیت.
دارالعلوم زاهدان سرمسترا گوَشت: نونێن جاورا ۆ نونێن جاهلیتا که شه «اولی‌ئێن جاهلیتا» باز گنده تراِنت اگه کسّے لوٹیت که شریعتے حکمانَ ماں وتی ملکا اجرا بکنت، گڑاں گهترێن رهبند همێشنت که اے کارا کم‌کما کنت، پچے که ماں بازێن ملکے مردم اَنگت تیار نه‌وَنت که شریعتے حکمانَ صدماںصد منّنت.
زاهدان جمعه‌وی پێشنمازا گێش کرت: په درور ماں مصر ملکا که یک اسلامی‌ئێن پاٹی‌ئے به حکومتا رست، په منی گبانا اگه آوان اسلامے قانودانَ اۆدا کم‌کما اجرا کرتێن کمتر گوں سکّیان دێم‌په‌دێمَ بوتنت، هما ڈۆل که ماں لهتێن اسلامی‌ئێن ملکان که اسلامے حکمانَ کم کم اجرایش کرته اے پڑا سۆبمند بوتگ اَنت.
چمشانک