مولانا عبدالحمید اے هپتگے اهلسنتے جمعه نمازے دیوانا (11 بهمن 98) به طرحے که «قرنے سودا» گوشگ بیت اشاره کرت ؤ آیرا «بےانصافین، یکنیمگین ؤ زور ؤ زرابین صلحے» زانته ؤ گوشته که انشاءالله اے طرح جوڑَ نبیت.
شه زاهدانِ اهلسنتِ جمعه پیشنمازِ دفترِ حالرسانی حالا، مولانا عبدالحمید درشان کرت: یکے شے هپتگے تهلین پیشامدان، «قرنے سودا»وے طرحات که امریکاوے راجکماشا پیش کرت ؤ اسرائیلِ سرؤکان ؤ لهتین سستین مسلمانا که نتواننت شه وَت چیزے را دور کننت، هم اودا هورَتنت.
زاهدان جمعهی پیشنمازا گیش کرت: مچین دودءُربیدگانِ تها ؤ شه گردان گیشتر اسلامے دودءُ ربیدگے تها آته که بایدات صلح و سوداوے تها انصاف بیت، پمێشا راه اێشت که پێسر شه اے طرحے پیش کنگاه هردو نیمگے پاٹی گوں وت نشتێننت ؤ گپؤگالش کرتێن، گڑان آ دیوانے تها همےپیم که اسرائیلِ سرؤکان آتتنت، فلسطین رهشون ؤ سرؤکان هم هور بوتینت دان یک صلحی جوانێن جوڑ بوتێں که هردو پاٹی وژنود و راضی ببوتێننت ؤ جنگ ؤ جیڑه هلاس بوتیں.
دارالعلوم زاهدانِ سرمسترا گوشت: امریکای راجکماشا به وتی گمانا وهدے اے صلحا را کرته که پکّا گوشتهی یهودانِ کرّائنت ؤ شه اسرائیلا پلامرزیَ کنت. پمێشا اے صلح په پلامرزی شه اسرائیلا بوته که آیی مقصد اسرائیل امنیت و سۆب انت.
واجها گیش کرت: ترامپِ صلح پکّا یک نێمگیئنے، اے صلحے تها بیتالمقدسِ مێتگ که مسلمانانِ ائولی قبلهانت ؤ مسلمان اێشی سرا باز آزگسمائنت به یهودیان داتگ بوته ؤ یهودیانِ کُلاچان که فلسطین میانا اڈ بوتگنت به اسرائیلِ ملکا هورش کرته وهدی که گوں اے کارا فلسطین به اسرائیلِ گرؤپے تها کپیت. مولانا عبدالحمید درشان کرت: انشاءالله که امریکا ؤ اسرائیلِ قرنے سودا جوڑ نبیت پچے که فلسطین مردم ؤ پهکین دنیاوے آزاتکێن ملتان این صلحا نمنّنت ؤ اے صلحا پهکین مسلمانانِ دلا را هون کرته. امریکا ؤ اسرائیلَ لوٹنت گوں زورا اے موضوعا به فلسطینیان بمنّیننت، بلین تجربهیا نشان داته که زورا سۆبے نهنت.
واجها گوَشت: پهکێن مسلمانان، فلسطینِ جتائین ملک ؤ انصافین صلحا لوٹنت که گرد پاٹیانِ حقے واستهیا دلگوش کنگ بیت.
قرنے سودا، مسلمان ؤ اسلامی ملکانِ ناتپاکیِ سَٹّنت
مولانا عبدالحمید گوشت: امریکا ؤ اسرائیل پمێشا پد شه هپتاد سال ظلما اے طرحا را په مسلمان ؤ فلسطینیانِ پیش اِش کرته که زاننت مسلمان ؤ اسلامی ملکان گوں وت مٹ ؤ میلانت.
دارالعلوم سرمسترا درشان کرت: مرۆچی اسلامی ملک گوں یک دگرا نکّئی ؤ ناتپاکنت، پمێشا یک ؤ دو ملکے اعتراض سۆبے نداریت، مگه وهدے که پوره ملکان یکتوار ؤ یکّے ببنت، تهنا مردمان غلبدگ هم سۆبے نداریت، پچے که آ زوربندان شه مردمانِ توارا ترسے ندارند، بلێن ما گوں اعتراضا وتی دلا وشَ کنن.
زاهدانِ جمعهی پیشنمازا په «مسلمانانِ یکّویی» ؤ «دعا»یا تأکید کرت ؤ گوشته: مسلمان ؤ اسلامی ملکان بایدات که گوں وت یکّے ببنت ؤ مسلمانان دعا کننت ؤ اللهئا توار کننت دان آوانَ شے سکِّییان رکّێنیت.
واجها اے بهرے هبرانِ گڈسرا گوشت: سازمان ملل ؤ اروپایی ملکان هپتاد سالنت که په فلسطین ملتا کارے نکرته ؤ اسلامی ملکان هم گوں وت کٹ ؤ بحثانت. پمێشا منی کُلَه په فلسطین ملتا اێشنت که مردێن ؤ جنێن به اللهٔ نێمگا برگردنت ؤ نماز ؤ شریعتے احکامانه سکّ لچنت ؤ شه اللهئا که ٹوهین زوبندنت مدد لوٹنت.
ویروس کروناوے تالان بیگ به چین تها «اللهٔ عذاب» ؤ «ظلم کنگے سٹّنت به مسلمانان»
زاهدانِ اهلسنتے جمعهی پیشنمازا وتی هبرانِ دێمترا به ویروس کروناوا اشاره کرت که به چین ملکے تها تالان بوتگ ؤ گوشتِه: چین دولت و ملت که یکّے شه دنیاوے دێمرو ؤ پرنعمتێن ملکاننت، اپسوزنت که به ایالت سینکیانگِ مسلمانان سرا ظلم کرته، آیانَ شکنجهٔ کرته ؤ کشتهی ؤ آیانِ زهگانَ شه پت ؤ ماتان جتای کرته ؤ به اردوگاهان تها ساتتهٔ که آیوکا به چین ملکا مسلمانے ممانیت، بلێن نون یک بےمٹّیں ویروسے اودا تالان بوته که «کرونا» گوشگ بیت و پهکانِ زامپو ؤ هبکّهٔ کرته.
واجها گوشت که هیچ شکے نیست که اے اللهٔ عذابنت که به چینیانِ سرا آته، پچےکه آیان مردمانِ حقانَ چیر گردێنت، دنیاوا زهرشانی کرت که پچے مسلمانانِ حقانه ندَیت، بلێن چینِ دولتا نادلگوش کرت و نون گوں اللهٔ عذابا ڈُگش وارت. واجها دێمترا گوشت: ما چین ذمهوارانَ ڈاه دَیَن که شه مسلمانانِ ظلم کنگا دست زورنت ؤ آیانِ بندیگانَ آزات کننت ؤ به اللهٔ نێمگا بِر گردنت ؤ شه الله و مسلمانان حق بهلی لوٹنت دان الله عذابا شه آیان دور کنت.
دارالعلوم زاهدان سرمسترا گوشت: آیان که ظلمَ کننت گوں اے گبانا که مظلوم هچّ پناهدار ؤ پلّامرزی نداریت، بزاننت که الله سِیده مظلومے آه ؤ توارا اُشکنت ؤ ظالما سکّ عذابَ دنت. قرآنے تها شے وڈ کسهئان باز گوَشته بوته که ظالمان گوں عذابا ڈگ وارته ؤ مظلومان وشنام بوتگنت.
دینی واجهکارانِ توصیف ؤ ساڑایگے تها غلو ؤ افراط مکنن
شیخالاسلام مولانا عبدالحمید وتی هبرانِ گڈسرا به بیبی فاطمهٔ وفاتا اشاره كرت ؤ گوشته: بیبی فاطمه رضیاللهعنها پیامبر صلّیاللهعلیهوسلّم جنکّ ؤ حضرت علی رضیاللهعنه گسبانَکّانت، آیی رواج ؤ کردارا باز گوں رسول الله شباهت داشت و پیگمبرا آیرا باز دوسته داشت.
دارالعلوم زاهدان سرمسترا گیش کرت: بیبی فاطمه رضیاللهعنها به ایمان، تقوا، حیا و پاکدامنی ؤ عمل به شریعتے تها گامگیجے. اگه دنیاوے جنێنان گامگیجے پداونت بایدات که به بیبی فاطمه، ازواج مطهرات، بیبی مریم، بیبی آسیه و دگه تاریخے ٹوهین جنێنانِ پدا برونت. واجها دیمترا گوشت که مسلمانان شه غلو به دینے تنها دوری کننت ؤ شیعه و سنییانِ گوشت که به دینے تها ؤ به وتی دینی واجهکارانِ توصیف ؤ ساڑایگے تنها غلو و افراط مکننت. واجها گوشت حرمتانه ساتت ؤ به مذاهبانِ مقدساتان توهین ؤ بدگوشگ مبيت.
چمشانک