واجه مولانا عبدالحمید وتی ای جمعهی (4 بهمن 1398) هبرانِ توکا به مردمانِ دلپدردیا شه شبکه هامونا اشاره کرت که هما وهدا که به «شورای هماهنگی مدیریت بحرانے» دیوانا گپِ کرت و مستقیم شینگ بوتنت، آیی گپانَ قطعاش کرت، واجها ایشرا خلاف تپاکا زانت ؤ گوشته: گهتر ات که استانے صداوسیماوے سرمسترا شه مردمان عذر لوٹتین.
زاهدانِ جمعهی پیشنمازا گوشت: من به شورای هماهنگی مدیریت بحرانے دیوانا شه دوارگین سیلگپتنے دیمگیری ؤ دلگوش کنگ به استانے زیرساختان چو جادهیانِ جوڑ کنگ، پل ؤ سیلبندِ اڈ کنگ به روستا و کشارانِ کرّا، کشاورزیئین ٹگارانِ جوڑ کنگ ؤ چهبار، کنارک، دشتیاری، زرآباد، کهیر و آ روستایانے که آپبند و سدّانِ جَهلسرا انت، آیانِ ورگیئین آپے مشکلے حل کنگ ؤ همےپیم شه سیلے تاوانان هبر کرتن.
واجها همےپیم گوشت: من آ دیوانے گپانِ توکا گِردانِ هیالداریا کرت ؤ شه هر کسا که کوشست کرتت دان سیلگپتگانا مدد رسینیت، منتواری کرتن ؤ شه هچ کسا انتقادُن نکرت.
واجها گوشت: آ گپانِ شينگ نكنگ تپاكيَ وڈا نوَت ؤ بازين مردمانِ دلارا پروشته ؤ سيلگپتگين مردم كه بايدات دلوش ببوتينں هم شے كارا دلپدرد بوتنت، هرچون كه شه مے ديدانكا عذرے نلوٹت، بلين گهترت كه صداوسيما ءِ سرمسترا شه مردان عذر لوٹتين، پچے كه اي كار گوں زانت ؤ سرپديا بوتت.
مردم به ای وڑے اهلسنتے دیوانانِ شنگ کنگ ؤ نادلگوشی به بلوچی زبانا انتقاد دارنت
مولانا عبدالحمید وتی هبرانِ دیمترا به تپاکیِ ساتتنا تأکید کرت و گوشته: مهمترین چیزی که ما بایدانت آیرا سکّ ساتن تپاکیانت. ما شیعه ؤ سنّیا برات زانن ؤ گِردانه گوں یک چمّے سیله کنن، بلین اپسوزنت که لهتینے دگهراز سیله کننت. واجها گپ دیما برت: ای واقعیتے که سیستانؤبلوچستانے گیشتری مردم اهلسنتانت، پمشا شه ذمهداران انتظارنت که وتی اهلسنتین براتانَ گندنت ؤ آیانَ گیشتر دلگوش کننت. صداوسیما یک پاٹی ؤ مذهبےیه نهنت، پچےکه آیی حرجؤدرج شه منابع ملیا انت که گرد ملت گوں آیی شریک انت. دارالعلوم زاهدانِ سرمسترا گیش کرت: ای پیم که صداوسیمای استانی اهلسنتے نماز جمعهیانَ شینگَ کنت مَے مردمانِ پسند نهنت، پچےکه سرسری ؤ گوں لَسّئن هبرا شه سرا گوازینیت ؤ هما قدیمیئین عکسانه شینگَ کنت دان مردمانِ بازین جمعیتا چیر بکنت. همےپیم واجها شه نادلگوشیا صداوسیمایا به بلوچی زبانا انتقاد کرت و گوشته: ای کایدگ شه پروگرام و دلگوشے که صداوسیما به بلوچی زبانا کنت هچ مے مردمانِ مَنَّگ نبیت، شبکه استانی بایدات که گیشتر شےشی به زبان بلوچیا دلگوش کنت.
شیخالاسلاما گوشت: اپسوزنت که اهلسنتے آذان شه شبکه استانیا شینگ نبیَنت، وهدےکه کانون اساسییے تها آته که هر منطقهی توکا هر مذهبے گیشتر ببیت کانون ؤ پروگرامان هما ڈولا اجرا ببنت.
اگه اهلسنتانِ حق کشورے توکا پوره داتگ بوتین، مرچی اسلامی جمهوری محبوبیت دنیاوے تها شِدؤ گیشترت
زاهدانے جمعهی پیشنمازا گیش کرت: ای یک واقعیتے که اگه اهلسنت زبر دلگوش ؤ آیانِ حق داتگ بوتےن ؤ تمام استانیئین مسئولیتانِ تها کار گپته بوتےننت، مروچی مے مُلکے محبوبیت دنیاوی توکا بازبازَ بوت و ای به اسلامی جمهورییه سوبا ات. واجها گوشت شیعه و سنی گوں وت برات انت ؤ ما گوں ناتپاکی ؤ هکّل داتنا یکے په آدگرا مخالفن.
شیخالاسلاما وتی هبرانِ گڈسرا به مردمانِ بازین مدد ؤ کمکان به بلوچستانے جنوبے سیلگپتگان اشاره کرت ؤ گوشته: بایدات که من شه ایرانے ملتے مزنین مددان به سیلگپتگان منّتواری کنین، پچے که ما این پیشامدے تها وتی دُرّین هموطنانِ تپاکی، وطندوستی ؤ دیندوستیارَ دیست. واجها گیش کرت: انّون استانے جنوبے گیشترےن نیاز کشاورزیئین ٹگارانِ جوڑ کنگ، روستا ؤ کشارانِ کرّا سیلبند جنگ ؤ آپراه ؤ روستایی جادهیانی جوڑ کنگنت که مردمانِ مددا لوٹیت.
چمشانک