شیخ الاسلاما مه زاهدانے جمعه نماز(۲۸ دے ۱۳۹۷)ـا استانے مختلفێن ادارهاني نوکین استخدامان اشاره کت و گوشت: باید انت بومی توانمند و شایستگێن مردم کار گرگ ببنت. اێ استانے بازین مردمێ گله کنگا انت که همێ پنچین هزار نپرێ که دولت مه مختلفین ادارهان استخدام کنگا انت تهنا اێ استانے نینت؛ دراهین کشوریگ انت.
واجها گوشت که اێ چیز دلگوش گور کنگ لوٹیت که آموزش و پرورش و دانشگاهاني امکانات مه درو استانان یک نه انت. لهتێ استاناني امکانات گیشتر و لهتیے کمتر انت. سیستان و بلوچستان چه هما استانان انت که امکاناتش کمتر انت. پمێشا اێ استانے دانشگاهي و مدرک دار گون مرکزیگان برابر نینت.
واجها پدا گوشت: آ کسانێ که ادا وانتگش و بتواننت گون تهراني و مشهدي و اصفهاني و شیرازیان رقابت بکننت سک کم انت.
واجها گوشت که استخداماني سراسري کنگ مه استانے ادارهان ناعادلانه اێن کارێ که دیوان عدالت اداریا کتگ. عادلانه هما انت که رقابت بومي و استاني توانمندین نیرواني میانا ببیت.
مولانایا چه اهل سنتے کمیا مه استان و کشوري ادارهان انتقاد کت و گوشت: بژن انت که اهل سنتے شایستگین مردم مه کشوري ادارهان باز کم انت. مثال خبرا مے استانے مرکزا هنچین ادارهی هست انت که چه هفتاد نفر کارمندا بس ۴ یا ۵ نفر سني انت. هنچین اداره هست انت ۱۵۰ تا ۳۰۰ نفر کارمندا بس ۱۰ تا ۲۰ نفر سني انت. بلے استانے مردماني ۷۰ درصد سني انت.
دیمترا واجها گوشت: البت بغیر چه زاهدانا، مه ایدگه شهران که سنیاني جمعیت گیشتر انت؛ مے گله کمتر انت و مسایل رعایت بیتگ انت بلے مه استانے مرکزا که دوین فرقه یاني جمعیت برابر انت و شیعه و سني هوریگا په براتي و محبت زندگي کنگا انت؛ باید عدالت اجرا ببیت تا که ای محبت و براتي گیشتر ببیت. پرچی که ای براتي باز مهم و حیاتي انت.
آ واجها گوشت که شیعه و سني یکادگرا برات انت و مارا وتي شیعه این برات دوست بنت. بلے ای مے درستاني حق انت و باید وتي قانوني حقا پد بجنین. اهل سنت هما جاهان که کمتر انت هم حضورش سک ناچیز انت. ني دولت باید انت ای چیزا دلگوش گور بکنت.
شیخ الاسلاما گوشت: بژن انت که مه دولت و حاکمیتا عدالت، برابري و شایسته سالاري رعایت نبیتگ. مني خیالا “شایسته سالاري”ے شعارا مه کشورا مصداق نیست انت. شایسته سالاري هما انت که دراهین قوم و مذهباني شایستگین مردم گون یک چمی چارگ ببنت.
چمشانک