اگه جنێں اصلاح بنت، چاگردا بدل کننت

واجه شیخ‌الاسلام مولانا عبدالحمیدا اِے هفتگا (18 اسفند 1396) زاهدانِ اهل‌سنتِ جمعه‌یِ نمازا په جنێن ؤ بانُکانی ذمه‌واری په چاگرد/جامعه اصلاح ؤ پاک بیگا اشاره کرت‌ ؤ گوشتی:‌ اگه جنێں اصلاح بنت، چاگردا بدل کننت.

په سنی‌آنلائنِ هالکاریا، واجه مولانا عبدالحمیدا همے پیم وتی اِے هفتگِ بیانانی تها په جنگل ؤ گیابانی سمبالگا هں تأکید کرت. واجها وتی گپانی دگه بهرے په دعاءِ فضیلت ؤ کاراں گۆں اللهِ نامِ بنگێج کنگا مردم سرپدی داتنت.

✅ واجه مولانا عبدالحمیدِ بیانِ درچتگێں بهر شما را پێش کنگ بیت:

🔹حضرت فاطمةالزهراءِ بیگِ رۆچ «بانکانی رۆچ» نام اِێرکنگ بوتگ، بی‌بی فاطمه مزنێں بانک ؤ زانتکارے اَت که باز گۆں واجه پیغمبرا هم‌رنگ اَت. وهدے که راه شت چو پیغمبرِ دابا راه شت. واجها چه وتی تمام زهگاں آئی گێشتر دۆست اَت، اِے بی‌بی په مئی چاگردِ بانُکاں بهترێں نمونه اِنت.
🔹جنێن ؤ بانکانی ذمه‌واری په چاگردِ اصلاح بیگا سک مهم اِنت. آیاں تاریخِ دراجیا مزنێں کردے په چاگردِ اصلاح ؤ پاک بیگا داشتگ، باید جنێنانی حق ؤ حقوقِ سرا دلگۆش کنگ بیت. اگه جنێں اصلاح بنت، چاگردا بدل کننت.
🔹گوستگێں هفتگا زاهدانِ شهردارا په دینی عالم ؤ پێشنمازاں دیوانے گپتگت ؤ اوداں چه مردماں په شهرِ آباتیا کمکّ لۆٹگ بوت، من چه شما لۆٹاں که په شهرِ آباتی ؤ تمیزّیا گۆں شهرداریا همکۆپگ بت. مئی دزبندی چه شهرداری ؤ شورا شهرا هں اِشنت که گۆں وتی تمام زۆرا په مردمانی خدمت ؤ شهرِ آباتیا جهد کننت.
🔹جنگل ؤ گیابانانی درچک ؤ دارانی حفاظت ؤ‌ سمبالگ سک مهم اِنت. همے پیم نباید برّێں حیوان چه مرغاں گپتگ تا دگه حیواناں شکار کنگ بنت، بلکێں اِے اِلّگ بنت تا زات ؤ زنک کننت ؤ گێشتر بنت، چو مبیت که اِے گرداں بیگواه کنگ بنت.

🔸دعا یک ٹوهێں عبادتے اِنت
🔹پێسر چه اسلامِ دینِ ظاهر بیگا، بندگاں جوانێں رابطه اِے گۆں وتی معبودا نهت، انساناں گۆں شرک ؤ خرافاتا گرفتار اِتنت. گۆں واجه رسول‌اللهِ گچێں بیگ په پیغمبریا انسانانی رابطه‌ برقرار بوت.
🔹په الله‌ پاکِ رابطه کنگا بازێں شکلے هست، دعا، نماز، سجده، حج، صدقات، خیرات ؤ شریعتِ تمام حکم همے واستا اَنت که انسان رابطه گۆں الله‌ها په جوانی برقرار بیت.
🔹دعا یک ٹوهێں عبادتے اِنت. وهدے که حضرت بی‌بی‌ حوا گیمّار بوت، آئیا گۆں حضرت آدما دست په دعایا چست کرتنت که اَے الله! ما را نێکێں زهگے بدے که هں جسمی سالم بیت ؤ هں الله پاکِ عبادت کنۆک ؤ حکمانی منّۆک بیت. گڑا الله‌ تعالی یا هں آیانی دعا قبول کرت.
🔹هرکس هرکارے که کنت، اگه یکے لۆگ ؤ‌ مسیتّے بندیت، باید په وتی کارِ برکتا دعا بکنت، هرکارا گۆں اللهِ ناما بنگێج بکنێں ؤ دعا بکنێں که الله آ کارِ تها خیر ؤ برکت مان کنات. سفراں گۆں اللهِ ناما بنگێج کنێں، اللهِ نام گرگ ؤ دعا سلامتی کارنت.