چه بزرگوارێں صحابه کراما -رضوان‌الله علیهم أجمعین- رند اِے امتِ تها دگه یک طبقه‌اِے پاداهت که آیاں صحابه کرامِ زرتگ ؤ آورتگێں دین زرت ؤ وتی زندگیِ بنمال قرار دات ؤ اشی دنیایا تالان کنگِ خاطرا هما کار کرت که آیاں چه صحابه کراما دیستت ؤ کرتت ؤ زرتت، رسول‌الله صلی‌الله‌علیه‌وسلمِ همراه دارانی نام صحابی انت ؤ صحابیانی تربیت زرتگ ؤ چه آیاں علم ؤ ادبِ حاصل کنوکانی نام تابعی انت، هنچو که حضرات صحابه کراما وتی باریا وتی فرض په شهم ؤ ذمداری ادا کرت، همے پیما چه صحابه کراما ادب زرتگێں تابعیاں هم وتی راه گۆں وتی پێشوکانی راها هۆر کرت، بزاں چه آیانی راها دگرے نبوتنت.
چه صحابیانی تربیتا علم ؤ عمل ؤ جهاد ؤ دعوت و تبلیغ ؤ اێدگه میدانانی شهسوار پاداهت اَنت، اِشاں هم هما کار کرت که صحابه کرام کرتت، چه همے واجهانی کۆششاں لهتے دراهت که آیاں قرآن ؤ حدیث یاد کرت اَنت ؤ مردمانا وانێنت اَنت ؤ دگه لهتیا چه قرآن ؤ حدیثا په تحقیق ؤ تلاش زندگیِ راه ؤ راهبندانی حکم ؤ حکمت درگهت اَنت، اوّلیانی نام ائمه حدیث ؤ دومیانی نام ائمه فقه اِنت، حدیثانی تها کار کنۆکێں بزرگوار فقهِ تها هم منّتگێں استاد بوتگنت ؤ فقهِ ائمه حدیثِ هم مکملێں زانۆک بوتگنت، بلے کارِ پڑ ؤ میدان یکے چه دومیا جتا بوتگ.
اِے بابِ تها ما همے بزرگوارانی زندگی ؤ کارپدانی بابتا چیزے پیش کنگِ کۆشش کنێں ؤ امیت کنێں که چه اِشی مئی مسلمانێں راج ؤ براتانا اِے بزرگوارانی خدمات ؤ کارپدانی بابتا معلومداری بیت.
◀️ دێما روت…
📚سرچمگ: راستیں راه
چمشانک