مروچی : 23 مرداد , 1396

اهل‌سنتِ جمعه‌ءِ پېشنمازاں چه وتی بزرگانی‌ دعوت نکنگ مں راجکماشِ سوگندی دیوانا گلّه کت

اهل‌سنتِ جمعه‌ءِ پېشنمازاں چه وتی بزرگانی‌ دعوت نکنگ مں راجکماشِ سوگندی دیوانا گلّه کت

سنی‌آنلائن: گوستگېں شنبهِ بېگاها ایرانِ راجکماشِ/رئیس‌جمهورِ سوگندِ دیوان، ایرانِ مجلس ؤ پارلمانا برجم دارگ بوت. اِے دیوانا چه دنیاءِ سرتاسرا مهمان دعوت دیگ بوتگت، بلے چه ایرانِ اهل‌سنت کماشاں اِے دیوانا هچکس لۏٹگ نبوتگت، دولتِ‌ اِے بےترانگی بازېں واجه ؤ جهدکاریا اِیرجتگ ؤ اِے کار مزنېں بےوفائی یے زانت.
اهل‌سنت جمعه‌یِ پېشنمازاں هں وتی اِے هپتگِ (20 مرداد 1396) جمعه‌یِ گپاں گۏں دولتِ اِے کارِ اِېرجنگا وتی اعتراض ؤ گلّه پېش کت.

شیخ‌الاسلام مولانا عبدالحمید زاهدانِ‌ اهل‌سنتِ‌ جمعه‌یِ پېشنماز:
اهل‌سنتِ نلۏٹگ مں راجکماشِ تنفیذ ؤ تحلیفِ دیوانا، شیعه ؤ سنیانی گله ؤ ناراحتی درشان کنائېنت
واجه مولانا عبدالحمیدا زاهدانِ‌ اهل‌سنتِ‌ جمعه‌یِ نمازجاها گوشت: چه اهل‌سنت که اېرانِ‌ تها دومی جمعیت اِنت هچکسِ نبیگ مں راجکماشِ سوگندی دیوانا، مردم پرېشان کتنت. اِے گپِّ ظاهر کنگ په منا سکّ اِنت، بلے تهنا اِے منی گپ نهنت،‌ بازېنے چه مئی عزیزېں شیعه‌ئیں هم‌ملکیاں هں چه دولتِ اِے کارا ناراحت بوتگنت ؤ گله‌اِش کرتگ که پچے اِے دوئېں دیواناں چه اهل‌سنتِ‌ کماشاں هچکس نبوتگ.

آزادشهرِ‌جمعه‌یِ پیشنماز:
مولانا عبدالحمید ؤ اهل‌سنت اِے بےمهریانی لائق نهتنت
واجه مولانا محمدحسین گرگیجا هں وتی جمعه‌یِ گپاں اِے باروا وتی گله په ترندی درشاں کرت ؤ‌ گوشتی: اهل‌سنت بزرگ ؤ کماشانی دعوت نکنگ مں راجکماشِ سوگندی دیوانا، مردم ؤ تمام زانتکار پرېشان ؤ ناراحت کرتنت.
مولانا گرگیجا دیمترا گوشت: شیخ‌الاسلام مولانا عبدالحمید که آ حسّاسېں وهدا مردمی په رأی واستا صندوقانی سرا یارت ؤ راجکماشی سیٹِّ سرا نندېنت، نباید شمۏشگ بیت. اپسوز جاه اِنت که اهل‌سنتِ بزرگانی واستا مجلسِ تها یک سیٹے هں گیر میئیت.

واجه مولانا فضل‌الرحمن کوهی:
اپسوز اِنت که اِے دابېں دیوانے اهل‌سنت مذهبی رهشۏن دعوت کنگ مبیت
همے پیم واجه مولانا فضل‌الرحمن کوهی پشامگِ جمعه‌یِ‌ پیشنمازا هں وتی جمعه‌یِ گپاں په اِے موضوعا اشاره کرتگ ؤ گوشتگی: اپسۏزِ جاه اِنت که دیوانے که هر قِسمِ مردم اۏدا دعوت کنگ بنت،‌ اهل‌سنت مذهبی رهشۏن دعوت کنگ مبیت.
مولانا کوهیا درّائېنت: واجه مولانا عبدالحمید تهنا یک جمعه‌یِ پېشنمازے نهنت، بلکېں اهل‌سنتِ‌ مذهبی رهشون اِنت، شما گۏں وتی دعوت نکنگا چند میلیون اهل‌سنتِ دل ٹپِی کرت.

واجه مولانا محمدطیب ملازهی:
واجه روحانی! تو گۏں اهل‌سنت رأیاں راجکماش بوتے
واجه مولانا محمدطیب ملازهی ایرانشهرِ مسجدنورِ جمعه‌یِ پېشنمازا هں مں یک بهرے چه وتی گپاں اِے بن‌گپا اشاره کرت ؤ گوشتی:‌ واجه روحانی! تو گۏں 24 ملیون رأی که چه آیاں شش تا هفت میلیون رأی اهل‌سنتے بوتگنت، راجکماش بوتگئے، اگه واجه شیخ‌الاسلام مولانا عبدالحمیدِ‌ عالمی رهشۏنی مبوتېں، بلکېں اِے رأی تئی رقیباں بکٹّتین اَنت.
مولانا محمدطیبا گوشت: لائق اَت که شما واجه شیخ‌الاسلام مولانا عبدالحمید اِے دیوانا دعوت کتېں.

غیرچه اِے واجهاں دگه بازېں واجهے چه ایرانِ‌ سر تاسرا چوشکه: مولانا عبدالرشید شه‌بخش، زابلِ ‌جمعه‌یِ پېشنماز، مولانا فضل‌الله رئیسی ساربوگِ ‌جمعه‌یِ پېشنماز، مولوی عبدالغفار نقشبندی راسکِ ادارکی ‌جمعه‌یِ پېشنماز، حاج ماموستا ملا قادر قادری، پاوه‌یِ ‌جمعه‌یِ پېشنماز، قاضی شرف‌الدین جامی‌الاحمدی، تربت‌جامِ‌ جمعه‌یِ پېشنماز، مولانا پارسا سرخسِ ‌جمعه‌یِ پېشنماز ؤ‌ دگه بازېں واجهے وتی گلّه درشاں کرتگ.


چمشانک

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *