واجه مولانا عبدالحمیدا مَں یک بهرے چه اِے هپتگِ (24 گوهر (دی) 1395) جمعهیِ گپاں، حضرت آیتالله هاشمی رفسنجانی په ایرانِ مردماں ٹوهیں هستیئے زانت ؤ گوشتی: آیتالله رفسنجانیِ نظر ؤ دیدانکانی بدل ؤ ٹَگل ورگ سوب/سبب بیت که اِے گُڈّی سالاں، مرحومِ دوستی مردمانی دلِ تها گیشتر ببیت.
په سنیآنلاینِ هالکاریا، واجه مولانا عبدالحمیدا گوں اشاره په آیتالله هاشمی رفسنجانیِ وفاتا، گوشتی: آیتالله هاشمی رفسنجانیِ وفاتا ایرانِ تمامیں مردم گمیگ ؤ سوگی کرتنت. اِے واجه بلاهیں مردے اَت ؤ په ایرانیاں ٹوهیں شخصے اَت.
زاهدانِ جمعهیِ پیشنمازا گوشت: آیتالله رفسنجانیا باز ٹوهیں مسئولیت/ذمهواری چوشکه: راجکماشی (رئیس جمهوری)، پارلمانِ کارمستری، کماشانی دیوانِ (خبرگان) کارمستری ؤ مجمع تشخیص مصلحتِ نظامِ کارمستری چه مرحومِ سیاسی جهداں بوتگنت. واکی مرحوما په ایرانِ مردماں باز جهد کرت.
زاهدانِ جمعهیِ پیشنمازا دیمترا وتی گپانی تها گوشت: آیتالله رفنسجانیا گڈسرا وتی سیاسی فکر ؤ هیال ٹگل دات، همے سبب بیت که ایرانِ مردمانی میانا دوستناکتر بیت. ایرانِ اقوام ؤ مذهب همے واستا گیشتر په آئی نیمگا دلمانگ بوتنت.
مولانا عبدالحمیدا گیش کرت: آیتالله رفسنجانی گڈسرا همے باور هستت که ایران، پهکیں ایرانیانیگ اِنت ؤ نباید ایرانِ مردمانی درمیانا فرق ؤ دگری ببیت. باید تمامانی حق برابری سرا دیگ بیت ؤ قانونی آزاتی ملکا تامین کنگ ببنت. همے باور ؤ عقیده سوب بوتنت که آئیِ دوستی مردمانی میانا گیشتر ببیت.
واجه مولانا عبدالحمیدا گڈسرا گوشت: گرداں باید یک روچے چه دنیا برونت، آیتالله رفسنجانیا هں دنیا اِشت ؤ دیم په آخرتا رهادگ بوت. اِے واجهِ روگ په ایرانِ مردماں ٹوهیں تاوانے. ما اِے پیشامدا په ایرانِ تمامیں مردماں خاصکار ملکِ ٹوهیں رهشون ؤ مرحومِ سیاد ؤ لوگی مردماں که گیشتر گمیگ اَنت، تسلیت گوشین ؤ په پشپداں صبر ؤ اوپار ؤ په مرحوما درجهیانی برزیا چه اللهِ بارگاها لوٹوکیں.
چمشانک